Kon Paano Gamiton ang “Gugma sang Dios” nga Libro sa Pagdumala sing mga Pagtuon sa Biblia
1. Ano ang katuyuan sang libro nga “Gugma sang Dios”?
1 Nalipay gid kita sang nabaton naton sa “Pagtuytoy sang Espiritu sang Dios” Distrito nga Kombension ang bag-o nga libro nga “Magpabilin Kamo sa Gugma sang Dios”! Subong sang napahibalo na, ini nga publikasyon gindesinyo para magbulig sa aton nga mahibaluan kag higugmaon ang mga talaksan ni Jehova sa paggawi kag indi para magtudlo sang panguna nga mga doktrina sang Biblia. Indi naton pag-itanyag ini nga libro sa aton pagbantala sa mga balay.
2. Sa diin gamiton ini nga libro, kag kay sin-o?
2 Ining libro gamiton subong ikaduha nga publikasyon nga pagatun-an para sa mga nakatapos na sang Ginatudlo Sang Biblia nga libro. Dumduma nga lainlain ang pag-uswag sang kada tawo sa pagtuon kag pag-aplikar sang kamatuoran. Ang pagtuon dapat ipasibu sa ikasarang sang kada estudyante. Pat-ura nga mahangpan niya sing maayo ang materyal nga inyo ginatun-an. Kon mahimo, ini nga libro indi dapat gamiton sa pagsugod sa pagtuon sa mga tawo nga nakatuon na anay sa pila ka libro apang wala gihapon nagatambong sa mga miting kag maathag nga wala sing interes nga iaplikar ang mga kamatuoran sa Biblia nga ginatudlo sa iya.
3. Ano ang himuon naton kon may ginahiwatan kita karon sing pagtuon sa libro nga Simbaha ang Dios?
3 Kon nagahiwat ka karon sing pagtuon sa libro nga Simbaha ang Dios kag diutay na lang nga kapitulo ang nabilin, mahimo mo ini tapuson kag palig-unon ang imo estudyante nga basahon sing personal ang libro nga “Gugma sang Dios.” Apang kon bag-o pa lang kamo nakasugod sa sini ukon yara pa lang sa tungatunga, maayo nga isaylo mo ang pagtuon sa umpisa sining bag-o nga libro. Pareho sa libro nga Ginatudlo Sang Biblia, ang mga topiko sa apendise mahimo ninyo binagbinagon depende sa kahimtangan.
4. Ano ang aton himuon kon ang aton ginahiwatan sing pagtuon mabawtismuhan antes pa matapos ang libro nga Ginatudlo Sang Biblia kag ang libro nga “Gugma sang Dios”?
4 Kon ang imo ginahiwatan sing pagtuon mabawtismuhan antes pa ninyo matapos ang duha ka libro, dapat padayunon mo gihapon ang pagtuon sa iya tubtob matapos ninyo ang libro nga “Gugma sang Dios.” Bisan nabawtismuhan na sia, mahimo mo gihapon ireport ang oras, pagduaw liwat, kag ang pagtuon. Ang manugbantala nga magaupod sa imo kag magapakigbahin sa pagtuon mahimo man magreport sang oras.
5. Paano mo gamiton ang libro nga “Gugma sang Dios” sa pagbulig sa isa nga nangin indi aktibo sa pagbantala?
5 Kon gin-asayn ka sang katapo sang Komite sang Pag-alagad sang Kongregasyon nga dumalahan sing pagtuon ang isa nga indi aktibo sa pagbantala, mahimo nga pangabayon ka nga binagbinagon sa iya ang espesipiko nga mga kapitulo sa libro nga “Gugma sang Dios.” Indi kinahanglan ang malawig nga pagtuon upod sa iya. Isa gid ka maayo nga aman ining bag-o nga libro, nga gindesinyo agod buligan kita nga magpabilin “sa gugma sang Dios”!—Jud. 21.