Ang Pagbantala Nagapalig-on Sang Aton Espirituwalidad
1. Ano nga mga benepisyo ang mahatag sa aton sang pagbantala nga hilikuton?
1 Ang aktibo nga pagpakigbahin sa pagbantala nga hilikuton makapabakod sang aton espirituwalidad kag makadugang sang aton kalipay. Huo, ang panguna nga rason kon ngaa nagapakigbahin kita sa ministeryo amo ang pagpahamuot kay Jehova. Apang, paagi sa pagtuman sa sugo nga “ibantala ang pulong,” matigayon naton ang mga pagpakamaayo ni Jehova kag makabenepisyo man kita sa iban pa nga mga paagi. (2 Tim. 4:2; Isa. 48:17, 18) Paano ang pagbantala makapabakod kag makahatag sa aton sing kalipay?
2. Sa ano nga mga paagi ginapabakod kita sang pagministeryo?
2 Ginpabakod Kita kag Ginpakamaayo: Ang pagbantala nagapalig-on sa aton nga magkonsentrar sa mga pagpakamaayo sang Ginharian sa baylo nga magkonsentrar sa mga problema subong. (2 Cor. 4:18) Samtang ginapaathag naton ang mga panudlo sang Biblia, nagabakod ang aton pagtuo sa mga saad ni Jehova kag nagalambo ang aton apresasyon sa kamatuoran. (Isa. 65:13, 14) Samtang ginabuligan naton ang iban nga mag-uswag sa espirituwal kag mangin “indi bahin sang kalibutan,” ginapabakod man naton ang aton panindugan nga indi magbuylog sa kalibutan.—Juan 17:14, 16; Roma 12:2.
3. Paano ang aton ministeryo makabulig sa aton nga mapalambo ang Cristiano nga mga kinaiya?
3 Ang pagpakigbahin sa ministeryo nagabulig sa aton nga mapalambo ang Cristianong mga kinaiya. Halimbawa, ang pagtinguha naton nga ‘mangin tanan nga butang sa tanan nga sahi sang mga tawo’ nagabulig sa aton nga mangin mas mapainubuson. (1 Cor. 9:19-23) Samtang ginaistorya naton yadtong mga ‘ginpanitan kag nag-alaplaag kaangay sa mga karnero nga wala sing manugbantay,’ matun-an naton nga magpakita sing simpatiya kag empatiya. (Mat. 9:36) Makatuon kita sang pagbatas kon nagapadayon gihapon kita bisan pa wala kita ginasapak ukon ginapamatukan pa gani. Samtang nagabulig kita sa iban, labi nga nagadugang ang aton kalipay.—Binu. 20:35.
4. Ano ang imo nabatyagan sa imo pagministeryo?
4 Si Jehova takus gid sang aton pagsimba. Gani, isa gid ka pagpakamaayo nga makapakigbahin kita sa ministeryo nga nagahatag sing pagdayaw sa Iya! Ang ministeryo nagapabakod sa aton. Nagahatag ini sing bugana nga mga pagpakamaayo sa mga ‘nagapanaksi sing maid-id sa maayong balita.’—Binu. 20:24.