“Mahimo Ka Mangin Maayo nga Payunir!”
1. Ano ang ginbatyag sang isa ka utod tuhoy sa iya pagpayunir?
1 “Wala na ako sing may nakita nga iban pa nga buluhaton nga nakahatag sa akon sing kalipay ukon makapaladya sa espirituwal.” Amo ini ang ginsiling ni Kathe B. Palm. Naghinguyang sia sing dinekada subong masinakripisyuhon nga payunir nga nagapanaksi sa bug-os nga Chile, South America. Sa paghunahuna sang makalilipay nga kabuhi sang mga nagaalagad sing bug-os tion, ayhan may nagsiling sa imo: “Mahimo ka mangin maayo nga payunir!”
2. Ipaathag kon ngaa ang matuod nga kalipay matigayon paagi sa espirituwal nga mga buluhaton.
2 Isa ka Makalilipay nga Kabuhi: Ang aton Huwaran, si Jesus, nakabatyag sing kaumpawan sa paghimo sang kabubut-on sang iya Amay. (Juan 4:34) Gani, sinsero nga gintudluan ni Jesus ang iya mga sumulunod nga ang matuod nga kalipay matigayon paagi sa pagpakigbahin sa mga buluhaton may kaangtanan sa pagsimba kay Jehova. Malipayon kita kon masako kita sa mga buluhaton nga ginakahamut-an ni Jehova. Isa pa, kon nagahinguyang kita sing madamo nga tion, kusog, kag materyal nga butang sa pagbulig sa iban, nagadugang ang aton kalipay.—Binu. 20:31, 35.
3. Ano nga kalipay ang aton mabatyagan kon maghinguyang kita sing mas madamo nga tion sa ministeryo?
3 Kon madamo nga tion ang aton ginahinguyang sa ministeryo, mas daku ang aton kahigayunan nga mabatyagan ang kalipay sa pagsugod kag pagdumala sing mga pagtuon sa Biblia. Bisan pa madamo nga tagbalay ang daw wala nagasapak, sa tion nga makatigayon kita sing eksperiensia kag kalantip sa pagministeryo masapwan naton nga madamo sing interesado sa aton teritoryo sangsa ginahunahuna anay naton. Pagligad sang isa ka tuig nga pagpayunir, mahimo sila makaeskwela sa PSS kag ang ila matun-an diri makabulig gid sa ila pagpayunir. (2 Tim. 2:15) Samtang nagapadayon kita, madamo kita sing matanom nga binhi sang kamatuoran nga mahimo mamunga sa ulihi.—Man. 11:6.
4. Ano ang dapat binagbinagon sang mga manugtapos sa pag-eskwela?
4 Mga Pamatan-on: Samtang manugtapos ka sa imo pag-eskwela, ginahunahuna mo bala sing maayo ang imo palaabuton? Sa sini nga tion, masako ka gid sa imo iskedyul sa eskwelahan. Ano ang himuon mo sa sina nga iskedyul pagkatapos sang pag-eskwela? Imbes nga magtinguha sing sekular nga karera, ngaa indi mapinangamuyuon nga binagbinagon ang tulumuron nga mangin regular payunir? Ang inyo matun-an sa pagpayunir—pagpanaksi sa mga tawo nga may nanuhaytuhay nga ginhalinan, paglandas sa lainlain nga kabudlayan, pagpalambo sang pagdisiplina sa kaugalingon kag pagpauswag sang ikasarang sa pagtudlo—makabulig sa inyo pagkabuhi.
5. Paano makahatag sing pagpalig-on ang mga ginikanan kag ang kongregasyon parte sa pagpayunir?
5 Mga ginikanan, ginapalig-on bala ninyo ang inyo kabataan nga mag-alagad sing bug-os tion? Ang inyo ginahambal kag positibo nga halimbawa makabulig gid sa ila nga unahon ang intereses sang Ginharian. (Mat. 6:33) Si Ray, nga nagsugod sa pagpayunir pagkatapos sang hayskul nagsaysay: “Nagapati gid pirme si Nanay nga ang pagpayunir nagaresulta sa labing makalilipay nga pagkabuhi.” Mahimo mapalig-on sang tanan sa kongregasyon ang iban nga magpayunir paagi sa ila ginahambal kag pagsuporta. Si Jose nga taga-Espanya nagsiling: “Ginakabig sang amon kongregasyon ang pagpayunir nga amo ang labing maayo nga karera para sa mga pamatan-on. Bangod sang ila mga komento kag apresasyon sa pagpayunir kag praktikal nga bulig, nangin mahapos sa akon ang pagpayunir.”
6. Ano ang himuon naton kon wala pa kita sing handum sa pagpayunir?
6 Paglandas sang mga Kabudlayan: Pero kon magsiling ka, ‘Wala ako sing handum sa pagpayunir.’ Kon amo sina ang imo inisyal nga reaksion, ipangamuyo kay Jehova ang imo nabatyagan kag ipabutyag sa iya, ‘Indi ko mahibaluan kon para sa akon ang pagpayunir, pero gusto ko himuon ang makapahamuot sa imo.’ (Sal. 62:8; Hulu. 23:26) Nian magpagiya paagi sa iya Pulong kag sa organisasyon. Madamo nga regular payunir ang ‘nagtilaw’ anay sa pag-auxiliary payunir, kag ang ila kalipay nagpahulag sa ila nga magpadayon sa pag-alagad subong bug-os tion.—Sal. 34:8.
7. Paano naton malandas ang pagpangduhaduha nga indi malab-ot ang kinahanglanon nga 70 ka oras?
7 Kamusta naman kon indi mo masiguro nga malab-ot mo ang kinahanglanon nga 70 ka oras? Mahimo mo istoryahon ang mga payunir nga pareho sa imo sang kahimtangan. (Hulu. 15:22) Nian isulat ang imo pila ka posible nga mga iskedyul. Masapwan mo nga mahapos lang ini lab-uton sangsa ginahunahuna mo paagi sa pagbakal sing panahon gikan sa indi importante nga mga buluhaton para sa ministeryo.—Efe. 5:15, 16.
8. Ngaa dapat naton usisaon ang aton mga kahimtangan sa tion kag tion?
8 Usisaa ang Imo Kaugalingon: Pirme nagabag-o ang aton mga kahimtangan. Maayo gid kon usisaon naton ang aton sitwasyon sa tion kag tion. Halimbawa, malapit ka na lang bala magretiro sa imo sekular nga trabaho? Si Randy, nga nagretiro sing maaga, nagsiling: “Bangod sini nga desisyon nakapayunir kami sang akon asawa, kag nakahigayon sa pagsaylo para mag-alagad sa duog nga may mas daku nga panginahanglan. Madamo ako sing pagpakamaayo nga nabaton, pero ang labing daku amo ang pagtigayon sing maayo nga konsiensia.”
9. Ano ang dapat binagbinagon sang mga mag-asawa?
9 Nasapwan sang pila ka mag-asawa nga sa tapos sang ila pag-usisa sang ila sitwasyon, indi kinahanglan nga duha sila ang magtrabaho. Matuod, kinahanglan pasimplehon sang pamilya ang ila pagkabuhi, pero takus gid ini nga pagsakripisyo. Si John, nga ang iya asawa nag-untat sa iya trabaho sining karon lang para pasangkaron ang iya ministeryo, nagsaysay: “Wala na sing mas malipayon pa sangsa mahibaluan ko nga ang akon asawa masako sa pag-alagad kay Jehova sa bug-os nga adlaw.”
10. Ano ang magapahulag sa mga Cristiano nga binagbinagon ang pagpayunir?
10 Pagpakita sing Gugma kag Pagtuo: Para kay Jehova, ang pagbantala amo ang labing importante nga buluhaton nga mahimo naton. Malapit na lang laglagon ining malaut nga kalibutan, kag ang nagatawag lamang sa ngalan ni Jehova ang maluwas. (Roma 10:13) Ang tinagipusuon nga gugma kag pagpasalamat sa iya ginhimo sa aton magapahulag sa aton nga tumanon ang sugo sang iya Anak nga magbantala sing mapisan. (Mat. 28:19, 20; 1 Juan 5:3) Isa pa, ang pagtuo nga nagakabuhi kita sa katapusan nga mga adlaw magapahulag sa aton nga himuon ang aton bug-os nga masarangan sa ministeryo samtang may tion pa, imbes nga gamiton sing bug-os ang kalibutan.—1 Cor. 7:29-31.
11. Paano naton tamdon kon may magsiling sa aton nga mahimo kita mangin maayo nga payunir?
11 Ang pagregular payunir indi lamang pagtuman sa kahimusan sang aton organisasyon; pagpabutyag ini sang aton debosyon sa Dios. Gani, kon may magsiling sa imo nga mahimo ka mangin maayo nga payunir, pasalamati sia. Kag binagbinaga sing mapinangamuyuon ang pagbuylog sa mga nagsulod na sa sining malipayon nga pag-alagad sa Dios.
[Blurb sa pahina 4]
Mga ginikanan, ginapalig-on bala ninyo ang inyo kabataan nga mag-alagad sing bug-os tion?
[Blurb sa pahina 5]
Para kay Jehova, ang pagbantala amo ang labing importante nga buluhaton nga mahimo naton.