“Dili Ka Mahadluk”
1. Ano nga kahadlok ang naatubang ni Jeremias nga ginaatubang naton?
1 Sang si Jeremias ginsugo nga magtagna, nagbatyag sia nga di-sangkol. Pero ginpasalig sia ni Jehova nga ‘dili mahadluk,’ kag mainayuhon nga ginpabakod sa pagtuman sang iya asaynment. (Jer. 1:6-10) Sa karon, ang pagkamahuluy-on ukon kakulang sing kompiansa mahimo magpugong sa aton pagpakigbahin sa ministeryo. Kon kaisa, bangod ini sa kahadlok kon ano ang reaksion ukon pagtamod sang mga tawo sa aton. Paano ini malandas, kag ano ang mga pagpakamaayo sini sa aton?
2. Paano ang paghanda makabulig sa aton para mabuhinan ang kahadlok sa pagministeryo?
2 Maghanda sing Abanse: Daku ang mabulig sang paghanda sing maayo para mabuhinan ang kahadlok. Halimbawa, kon repasuhon nga daan ang posible nga mga pagpamatok, mahandaan naton kon paano ini sabton. (Hulu. 15:28) Ngaa indi pag-ensayuhon sa tion sang Pangpamilya nga Pagsimba ang isabat sa lainlain nga kabudlayan sa eskwelahan kag sa ministeryo?—1 Ped. 3:15.
3. Paano ang pagsalig kay Jehova makabulig sa aton nga malandas ang kahadlok?
3 Magsalig kay Jehova: Malandas ang kahadlok paagi sa pagsalig sa aton Dios. Nagapasalig si Jehova nga buligan niya kita. (Isa. 41:10-13) Makapalig-on gid ini sa aton! Isa pa, ginpasalig kita ni Jesus nga bisan pa mag-utwas ang wala ginapaabot nga mga kahimtangan, buligan kita sang balaan nga espiritu para makapanaksi sing maayo. (Mar. 13:11) Gani, pirme pangabaya kay Jehova ang balaan nga espiritu.—Luc. 11:13.
4. Ano ang mga pagpakamaayo sa pagpadayon sa ministeryo bisan pa may mga kabudlayan?
4 Pagpakamaayo: Ang pagpadayon sa ministeryo bisan pa may mga kabudlayan magapabakod sa aton nga mabatas ang mga pagtilaw sa palaabuton. Mapalambo naton ang kaisog kag kasidla—mga kinaiya sang mga napuno sang balaan nga espiritu. (Binu. 4:31) Dugang pa, kon malandas naton ang kahadlok sa bulig ni Jehova, mapabakod naton ang aton pagtuo kag pagsalig sa iya pagluwas. (Isa. 33:2) Mabatyagan man naton ang kalipay bangod nahibaluan naton nga napahamut-an naton ang aton langitnon nga Amay. (1 Ped. 4:13, 14) Gani, indi kita mahadlok sa pagbantala sang mensahe sang Ginharian, nga pirme nagasalig sang bulig ni Jehova!