Pagkamapailubon sa Aton Ministeryo
1. Paano nagpakita sing pagkamapailubon si Jehova sa katawhan?
1 Ang Dios mapailubon gid sa mga tawo. (Ex. 34:6; Sal. 106:41-45; 2 Ped. 3:9) Nagpakita sia sing pagkamapailubon ilabi na may kaangtanan sa bug-os kalibutan nga pagbantala. Halos 2,000 ka tuig na ini nga hilikuton, apang padayon gihapon nga ginabuyok ni Jehova ang bunayag sing tagipusuon nga mga tawo pakadto sa iya. (Juan 6:44) Paano naton mailog ang pagkamapailubon ni Jehova sa aton ministeryo?
2. Paano naton mapakita ang pagpailob sa aton teritoryo?
2 Pagpamalaybalay: Ginailog naton ang pagkamapailubon ni Jehova kon “wala [kita] nagauntat” sa pagbantala sa mga teritoryo nga indi interesado ang mga tawo. (Binu. 5:42) Mapailubon naton nga ginabatas ang indi pagsapak, pagyaguta, kag pagpamatok sa aton ministeryo. (Mar. 13:12, 13) Nagapakita man kita sing pagpailob paagi sa padayon nga pagbalik sa mga interesado bisan pa mabudlay sila maabtan sa ila puluy-an.
3. Ngaa kinahanglan ang pagpailob kon nagaduaw liwat ukon nagadumala sing mga pagtuon sa Biblia?
3 Pagtuon sa Biblia: Ang pagpatubo sang tanom nagakinahanglan sing pagpailob. Puede naton ini tatapon, pero indi naton mapuersa ang pagtubo sini. (Sant. 5:7) Sing kaanggid, ang espirituwal nga pagtubo nagakatabo man sing amat-amat. (Mar. 4:28) Mahimo indi mahapos para sa aton mga ginatun-an ang pagbiya sa ila sayop nga mga pagpati ukon kinabatasan. Indi naton dapat pagpuersahon ang pag-uswag sang aton mga estudyante paagi sa pagpilit sa ila nga magbag-o. Kinahanglan hatagan naton sing bastante nga tion ang espiritu sang Dios sa pagpanghikot sa ila tagipusuon.—1 Cor. 3:6, 7.
4. Paano ang pagkamapailubon makabulig sa aton nga magpanaksi sing epektibo sa aton di-tumuluo nga mga paryente?
4 Di-tumuluo nga mga Paryente: Bisan pa luyag gid naton nga makatuon sang kamatuoran ang aton di-tumuluo nga mga paryente, nagahulat kita sa husto nga tion nga ipaambit sa ila ang aton pagpati, kag nagahalong gid kita nga indi sila pagpatam-an sing tuman kadamo nga impormasyon. (Man. 3:1, 7) Samtang wala pa inang husto nga tion, ginatinguhaan naton nga ang aton maayo nga paggawi amo ang magpanaksi kag handa kita nga ipaambit ang aton pagpati sing malulo kag may tudok nga pagtahod. (1 Ped. 3:1, 15) Sa pagkamatuod, mangin epektibo kita sa aton ministeryo kon magpakita kita sang pagkamapailubon kag mapahamut-an naton ang aton langitnon nga Amay.