Epektibo nga Pagpanaksi sa Dalan
1. Ano ang isa ka paagi nga mailog naton si Jesus?
1 Sa tion sang ministeryo ni Jesus sa duta, wala sia nagpangalag-ag nga istoryahon ang mga tawo nga masumalang niya sa dalan ukon sa iban pa nga publiko nga lugar. (Luc. 9:57-61; Juan 4:7) Luyag niya ipaambit ang iya importante nga mensahe sa pinakamadamo nga tawo tubtob posible. Sa karon, ang pagpanaksi sa dalan isa man ka epektibo nga paagi nga mabuligan ang mga tawo nga matigayon ang diosnon nga kaalam. (Hulu. 1:20) Mangin mas madinalag-on kita kon magpakita kita sing inisyatibo kag paghantop.
2. Paano kita magpakita sing inisyatibo kon nagapanaksi sa dalan?
2 Magpakita sing Inisyatibo: Mas maayo kon kita ang mag-una palapit sa mga tawo sa baylo nga magtindog lang ukon magpungko sa isa ka lugar kag hulaton sila nga magpalapit sa aton. Yuhumi sila, tuluka sa mata, mangin kalmado, kag mainabyanon. Kon may upod ka nga iban nga manugbantala, mas maayo nga isa-isahan ninyo palapitan ang mga tawo. Mangita man sing paagi nga maistorya liwat ang mga nagpakita sing interes. Kon nagakaigo, pamangkuta sila kon paano mo sila maistorya liwat. Ang iban nga manugbantala regular nga nagapanghikot sa isa ka lugar agod maistorya nila liwat kag matatap ang mga tawo nga nagpakita sing interes.
3. Paano naton mapakita ang paghantop kon nagapanaksi kita sa dalan?
3 Magpakita sing Paghantop: Dapat mangin mahinantupon kita kon diin kita matindog kag kon sin-o ang aton palapitan. Indi kinahanglan nga panaksihan gid naton ang tanan nga nagalinabay. Manilag anay. Mas maayo nga indi naton pag-istoryahon ang tawo nga nakita naton nga nagadali. Kon nagapanaksi sa atubangan sang balaligyaan, dapat kita mangin mataktikanhon. Sa baylo nga istoryahon ang mga kustomer samtang nagapasulod, mas maayo nga istoryahon sila kon maggua na agod indi kita pagsawayon sang manedyer. Likawi nga makibot ukon mahadlok ang tawo nga imo palapitan. Mangin mahinantupon man kon nagatanyag sang aton mga literatura. Kon indi gid interesado ang aton ginaistorya, mas maayo nga hatagan na lang naton sia sang tract sa baylo nga magasin.
4. Ngaa makalilipay kag mapuslanon ang pagpanaksi sa dalan?
4 Mas madamo kita sing masab-ug nga binhi sang kamatuoran sa malip-ot lang nga tion paagi sa pagpanaksi sa dalan. (Man. 11:6) Mahimo ang iban naton nga masumalang amo ang mga tawo nga indi naton maabtan sa ila balay. Ngaa indi ka maghimo sing kahimusan nga makapakigbahin sa pagpanaksi sa dalan—isa ka makalilipay kag epektibo nga paagi sang pagbantala?