Mangin “Mapinalanggaon nga may Kaawa”
1. Ano gid ang ginakinahanglan sang mga tawo karon?
1 Labi na gid karon nga nagakinahanglan ang mga tawo sing kaawa. Bangod sa nagalala nga mga kahimtangan sa kalibutan, madamo ang nagabatyag sing kasubo, depresyon, kag pagkawalay paglaum. Minilyon ang nagakinahanglan sing bulig, kag subong mga Cristiano, mapakita naton ang matuod nga kabalaka sa ila. (Mat. 22:39; Gal. 6:10) Paano?
2. Ano ang pinakamaayo nga paagi nga mapakita naton ang kaawa?
2 Hilikuton nga May Kaawa: Ang Dios gid lang ang ginahalinan sang matuod nga lugpay. (2 Cor. 1:3, 4) Ginapalig-on kita ni Jehova nga ilugon sia paagi sa pagpakita sing ‘mapinalanggaon nga kaawa’ kag ginsugo niya kita nga kadtuan ang mga tawo kag ipaambit sa ila ang maayong balita sang Ginharian. (1 Ped. 3:8) Ang aton aktibo nga pagpakigbahin sa sini nga hilikuton amo ang pinakamaayo nga paagi para lugpayan ang mga “boong sing tagiposoon,” bangod ang Ginharian sang Dios amo lamang ang matuod nga paglaum sang nagaantos nga katawhan. (Isa. 61:1) Bangod sa kaawa ni Jehova, dulaon niya sa ulihi ang kalautan kag paluntaron ang matarong nga bag-ong kalibutan.—2 Ped. 3:13.
3. Paano naton mailog ang pagtamod ni Jesus sa mga tawo?
3 Iluga ang Pagtamod ni Jesus sa mga Tawo: Bisan pa nagabantala sia sa dalagku nga kadam-an, wala ni Jesus gintamod ang mga tawo subong isa ka grupo, kundi subong mga indibiduwal nga nagakinahanglan sing bulig sa espirituwal. Daw kaangay sila sang mga karnero nga wala sing manugbantay. Natandog gid si Jesus sang nakita niya sila, gani gintudluan niya sila sing mapailubon. (Mar. 6:34) Kon tamdon naton ang mga tawo subong sang pagtamod ni Jesus, mapahulag kita nga ipakita ang matuod nga kaawa sa ila subong mga indibiduwal. Makita ini sa tono sang aton tingog kag sa aton pangguyahon. Unahon man naton sa aton kabuhi ang pagbantala kag ipahisuno naton ang aton mensahe sa ginakabalak-an sang kada isa.—1 Cor. 9:19-23.
4. Ngaa dapat naton panaptan ang aton kaugalingon sing kaawa?
4 Madamo nga tawo gikan sa tanan nga pungsod ang nagabuylog sa aton bangod sa mensahe sang Ginharian kag sa mahigugmaon nga interes nga ginpakita sa ila. Kon padayon naton nga panaptan ang aton kaugalingon sing kaawa, mapadunggan naton kag mapahamut-an ang aton maawaon nga Dios nga si Jehova.—Col. 3:12.