Jehovah’s Witnesses—Organized to Share the Good News
Kapin na sa 100 ka tuig nga naorganisar ang mga Saksi ni Jehova sa pagbantala sang maayong balita. Paagi sa sining pinakalapnag nga kampanya sang pagbantala sa bug-os nga kalibutan, ginapaalinton naton ining mensahe sa ginatos ka lenguahe kag sa kapin sa 230 ka kadutaan. (Mat. 24:14) Ngaa importante ini nga hilikuton? Paano ini ginahimo sa bug-os nga kalibutan? Ang video nga Jehovah’s Witnesses—Organized to Share the Good News magasabat sa sini nga mga pamangkot paagi sa detalyado nga presentasyon tuhoy sa nanuhaytuhay nga bahin sang aton internasyonal nga mga hilikuton. Sa tapos mo matan-aw ang video, binagbinaga ang masunod nga mga pamangkot.
Paano ini nga video nagpatudok sang imo apresasyon (1) sa panikasog sang organisasyon ni Jehova nga ibantala ang maayong balita? (2 Tim. 4:2) (2) sa pamilya Bethel sa bug-os nga kalibutan? (3) sa paghanas sa mga misyonero kag mga manugtatap? (2 Tim. 2:2) (4) sa kapuslanan sang pagsugod sang tagsa ka adlaw paagi sa pag-usisa sang isa ka teksto sa Biblia kag sa paghanda sa mga miting kada semana? (Binu. 17:11) (5) sa benepisyo sa pagtambong sa aton Cristianong mga miting? (Heb. 10:24, 25) (6) sa mga pagpakamaayo nga matigayon naton kon ipasag-uli na ang Paraiso nga duta? (Isa. 11:9) (7) sa pribilehiyo nga makapakigbahin sa hilikuton nga pag-ani?—Juan 4:35.
Ini nga video isa gid ka maayo nga galamiton para mahibaluan sang mga interesado ang bug-os kalibutan nga hilikuton sang mga Saksi ni Jehova. (8) San-o ang pinakamaayo nga tion nga ipatan-aw ang video sa aton mga estudyante sa Biblia, paryente, kag sa iban pa? (9) Anong positibo nga reaksion ang nakita mo sa ila sang ginpatan-aw mo ini nga video?
Samtang ginapamalandungan naton ang mga ginahimo ni Jehova, magaugyon kita sa ginsiling sang salmista: “O GINOO, nga akon Dios, madamu ang makatilingala nga buhat nga imo nahimo, kag ang imo mga hunahuna ayon sa amon; dili sila mapaanggid sa imo!” (Sal. 40:5) Kabay nga gamiton naton sing maayo ini nga video agod buligan ang iban nga mapalambo ang apresasyon kay Jehova kag sa iya organisasyon!