‘Matuman ang Kabubut-on sang Dios’
1. Ano ang tema sang programa para sa adlaw sang pinasahi nga asembleya sa 2012, kag ngaa dapat naton ini binagbinagon?
1 Natuga kita bangod sa kabubut-on ni Jehova. (Bug. 4:11) Gani, kon indi naton pagtun-an kag himuon ang kabubut-on sang Dios, indi gid naton matuman ang katuyuan kon ngaa gintuga kita. Indi ini mahapos bangod kinahanglan naton batuan ang huyog nga himuon “ang mga butang nga ginahandum sang unod kag sang hunahuna” ukon “ang kabubut-on sang mga pungsod.” (Efe. 2:3; 1 Ped. 4:3; 2 Ped. 2:10) Kon wala ang bulig sang Dios, mahimo kita ‘madakpan nga buhi sang Yawa para sa iya kabubut-on.’ (2 Tim. 2:26) Ang programa para sa aton adlaw sang pinasahi nga asembleya sa 2012 magabulig sa aton tanan nga manghikot suno sa isa sa tatlo ka panguna nga pangabay sa modelo nga pangamuyo, nga nagasiling, “matuman ang imo kabubut-on.”—Mat. 6:9, 10.
2. Ano nga mga pamangkot ang pagasabton sa tion sang programa?
2 Mga Pamangkot nga Pagasabton: Samtang nagapamati ka sa programa, pangitaa ang sabat sa sini nga mga pamangkot: Anong importante nga butang ang aton himuon magluwas sa pagpamati sa Pulong sang Dios? Paano naton padayon nga mahibaluan kon ano ang kabubut-on sang Dios para sa aton? Ngaa dapat kita mangin handa sa pagbulig sa tanan nga sahi sang tawo? Paano naton masapwan ang malipayon kag makaalayaw nga kabuhi? Mga pamatan-on, ano ang dapat ninyo pamatud-an kay Jehova? Ano ang mga padya sang paghimo sa kabubut-on sang Dios? Ngaa dapat na naton pabakuron kag palig-unon ang iban subong?
3. Paano kita makapanginpulos sing bug-os sa sining espirituwal nga aman?
3 Pat-ura nga makatambong ka kag mamati sing maayo sa programa. Isa ka representante halin sa Bethel ukon isa ka nagalakbay nga manugtatap ang mahimo ipadala subong nagaduaw nga humalambal. Antes kag pagkatapos sang programa, indi mahuya sa pagpakig-istorya sa iya kag sa iya asawa kon minyo sia. Sa imo pagpauli, indi mangin “malipaton nga manugpamati,” kundi repasuha ang programa upod sa imo pamilya kag binagbinaga kon paano kamo makapanghikot sing bug-os nahisuno sa kabubut-on sang Dios.—Sant. 1:25.
4. Ngaa importante nga unahon naton ang kabubut-on sang Dios?
4 Sa indi madugay, ang mga nagahimo sang ila kaugalingon nga mga kailigbon kag wala nagapasakop sa kabubut-on ni Jehova pagalaglagon. (1 Juan 2:17) Gani nagapasalamat gid kita kay Jehova bangod ginhanda niya ining suno sa tion nga impormasyon nga makabulig sa aton nga unahon ang iya kabubut-on!