Duha ka Sensilyo nga Diutay sing Balor

Ang isa ka importante nga paagi sa pagsakdag sa intereses sang Ginharian amo ang paghatag sing pinansial nga amot para sa bug-os kalibutan nga hilikuton. Pero ano abi kon pigado kita?

Isa ka bes, nakita ni Jesus ang isa ka balo nga babayi nga naghatag sing duha ka sensilyo nga diutay sing balor sa bahandian sang templo. Bangod sa gugma sang babayi kay Jehova naghatag sia “gikan sa iya kinawad-on, . . . sang tanan nga yara sa iya, ang iya bug-os nga palangabuhian.” (Mar. 12:41-44) Ang pagsambit ni Jesus parte sa iya nagapakita nga ginapabaloran gid sang Dios ang iya amot. Ang mga Cristiano sang unang siglo wala man naghunahuna nga ang mga manggaranon lang ang dapat maghatag sing pinansial nga amot para sa ministeryo. Ginsambit ni apostol Pablo ang mga taga-Macedonia nga bisan pa ‘tuman sila kaimol nagpadayon sila sa pagpangabay nga may daku nga pagpakiluoy nga makatigayon sang pribilehiyo sa mainayuhon nga paghatag.’—2 Cor. 8:1-4.

Gani bisan pa ang aton amot ‘duha lang ka sensilyo, nga may diutay nga balor,’ dumdumon naton nga daku man ang balor sini kon tingubon. Kon maghatag kita sing tinagipusuon malipay gid ang aton maalwan nga Amay sa langit, kay “ginahigugma sang Dios ang nagahatag sing malipayon.”—2 Cor. 9:7.