Ano ang Imo ‘Rason sa Paghugyaw’?
1. Ano ang rason sang aton paghugyaw kada matapos ang bulan?
1 Kon mag-abot ang katapusan sang bulan kag pangabayon ang tanan nga ihatag ang ila report sa pag-alagad, ano ang imo ‘rason sa paghugyaw’? (Gal. 6:4) Espesyal payunir man kita nga nagareport sing 130 ka oras sa ministeryo ukon manugbantala nga nagareport sing 15 minutos lamang bangod sa mga kasablagan, tanan kita dapat malipay sa aton bug-os kalag nga pag-alagad kay Jehova.—Sal. 100:2.
2. Ngaa dapat gid kita magtinguha sa aton pag-alagad kay Jehova?
2 Subong Soberanong Ginuo sang uniberso, nagakaigo lang nga ihatag naton kay Jehova ang aton pinakamaayo. (Mal. 1:6) Tungod sang aton gugma sa iya, gindedikar naton ang aton kabuhi sa paghimo sang iya kabubut-on. Gani, kada matapos ang adlaw ukon ang bulan, nakahibalo kita nga nahatag naton ang “nahauna nga mga bunga” sang aton tion, ikasarang, kag kusog sa pag-alagad kay Jehova, amo nga may rason kita sa paghugyaw. (Hulu. 3:9) Pero, kon ginasuknaan kita sang aton konsiensia kay may mas labaw pa kita kuntani nga mahimo, dapat naton binagbinagon kon ano pa ang aton mapauswag.—Roma 2:15.
3. Ngaa indi maalamon nga ikumparar naton ang aton kaugalingon sa iban?
3 “Indi sa Pagpaanggid sa Iban nga Tawo”: Indi maalamon nga ikumparar naton ang aton kaugalingon sa iban ukon ipaanggid naton ang aton kaugalingon sa kon ano ang aton masarangan sang una. Nagabag-o ang kahimtangan. Nagkalainlain ang aton ikasarang. Ang pagpaanggid masami nga nagadul-ong sa pagpaindisanay ukon pagbatyag sing pagkawalay-pulos. (Gal. 5:26; 6:4) Si Jesus wala magpaanggid. Sa baylo, naghatag sia sing komendasyon sa kon ano ang masarangan sang isa.—Mar. 14:6-9.
4. Anong importante nga leksion ang matun-an naton sa parabola ni Jesus tuhoy sa mga talanton?
4 Sa parabola ni Jesus tuhoy sa mga talanton, ang tagsa ka ulipon ginhatagan sing talanton “suno sa iya ikasarang.” (Mat. 25:15) Sang nagbalik ang agalon kag nangayo sang report parte sa ila binuhatan, yadtong mga mapisan nga nagtrabaho suno sa ila ikasarang kag kahimtangan nakabaton sing komendasyon kag nagkalipay upod sa ila agalon. (Mat. 25:21, 23) Sing kaanggid, kon padayon kita nga masako sa pagwali sang Ginharian, makasalig kita sang kahamuot sang Dios kag may rason kita sa paghugyaw!