Pamangkot
◼ Ano nga mga prinsipio sa Biblia ang nadalahig parte sa paggamit sang cell phone kon nagatambong sa Cristianong mga miting kag nagapakigbahin sa ministeryo?
“Sa Tagsa ka Butang may Panag-on.” (Man. 3:1): Bangod sa cell phone, mahimo kita maka-text ukon makapakighambal sa iban sa bisan ano nga tion. Pero, may mga tion nga indi luyag sang isa ka Cristiano nga madisturbo sang iya cell phone. Halimbawa, ang aton mga miting tion sa pagsimba kay Jehova, pagbaton sang espirituwal nga instruksion, kag pagpalig-unay sa isa kag isa. (Deut. 31:12; Sal. 22:22; Roma 1:11, 12) Mahimo bala naton patyon ang aton cell phone kag basahon na lang ang mga mensahe pagpauli naton halin sa miting? Kon kinahanglan nga naka-on gid ang aton cell phone, dapat ibutang ini sa setting nga indi makadisturbo sa iban.
Himua ang Tanan nga Butang Tungod sa Maayong Balita. (1 Cor. 9:23): Kon kaisa, mapuslanon man ang cell phone sa aton ministeryo. Halimbawa, ang utod nga nagapanguna mahimo maggamit sini para hibaluon kon diin na ang mga nagabantala sa iban nga bahin sang teritoryo. Ginagamit man ini sang iban nga manugbantala para tawgan ang isa ka interesado ukon Bible study antes magduaw, ilabi na kon malayo ang iya ginaistaran. Pero, dapat kita maghalong nga indi ini makatublag sa aton kon nagapakighambal sa tagbalay. (2 Cor. 6:3) Kon nagahulat sa iban nga manugbantala, sa baylo nga magtawag ukon mag-text sa imo abyan, indi bala mas maayo kon magkonsentrar kita sa ministeryo kag sa aton mga kaupdanan?
Magpakita sing Konsiderasyon. (1 Cor. 10:24; Fil. 2:4): Indi kita dapat magpabuyanbuyan sa pagtambong sa miting para sa pag-alagad sa latagon kay nagahunahuna kita nga puede man kita makatawag ukon maka-text para hibaluon kon diin nagapanaksi ang grupo. Kon maulihi kita abot, masami nga ginaorganisar liwat ang grupo. Matuod, mahimo kita maulihi kon kaisa bangod sa mga kahimtangan nga indi naton kontrolado. Pero kon nagaabot kita sing temprano, nagapakita kita sing konsiderasyon sa kahimusan ni Jehova, sa utod nga nagapanguna, kag sa iban nga manugbantala.