Iluga ang mga Manalagna—Amos
1. Ngaa ang halimbawa ni Amos makapalig-on sa aton?
1 Nakabatyag ka bala nga indi ka kalipikado magbantala bangod diutay lang ang imo tinun-an? Kon huo, makatigayon ka sing kaisog sa halimbawa ni Amos. Manugbantay sia sing karnero kag kon kaisa mamumugon, pero ginhatagan sia ni Jehova sing kaisog nga ipahayag ang isa ka importante nga mensahe. (Amos 1:1; 7:14, 15) Sing kaanggid, ginagamit ni Jehova ang mga mapainubuson kag kubos sa aton tion. (1 Cor. 1:27-29) Anong iban pa nga leksion nga mapuslanon sa aton ministeryo ang matun-an naton kay manalagna Amos?
2. Ngaa makapabilin kita nga malig-on sa pag-atubang sa mga pagpamatok sa ministeryo?
2 Magpabilin nga Malig-on sa Pag-atubang sa mga Pagpamatok: Si Amasias isa ka saserdote sang naaminhan nga napulo ka tribo nga ginharian sang Israel, pero nagasimba sia sa tinday nga baka. Sang nabatian niya ang tagna ni Amos, daw subong bala nga nagsiling sia: ‘Maghalin ka! May relihion na kami!’ (Amos 7:12, 13) Sang nangabay sia kay Hari Jeroboam nga dumilian ang hilikuton sang manalagna, ginpatiko ni Amasias ang pinamulong ni Amos. (Amos 7:7-11) Pero wala mahadlok si Amos. Sa karon, ginatinguhaan man sang pila ka lider sang relihion nga makuha ang suporta sang panguluhan para hingabuton ang katawhan ni Jehova. Pero ginapasalig kita ni Jehova nga wala sing bisan ano nga hinganib batok sa aton ang padayon nga magamadinalag-on.—Isa. 54:17.
3. Ano ang duha ka bahin sang mensahe nga ginapahayag naton karon?
3 Ipahayag ang Paghukom sang Dios kag ang Iya mga Pagpakamaayo sa Palaabuton: Bisan pa gintagna ni Amos ang paghukom batok sa napulo ka tribo nga ginharian sang Israel, ginsulat niya sa tulun-an sa Biblia nga ginngalanan sa iya ang bugana nga pagpakamaayo kag saad ni Jehova nga ipasag-uli ang pungsod. (Amos 9:13-15) Ginapahayag man naton ang nagahilapit nga “adlaw sang paghukom” sang Dios, pero bahin lang ini sang “maayong balita sang ginharian” nga dapat naton ipahayag. (2 Ped. 3:7; Mat. 24:14) Ang paglaglag ni Jehova sa mga malauton sa Armagedon magabukas sang dalan padulong sa paraiso nga duta.—Sal. 37:34.
4. Ngaa makasalig kita nga matuman naton ang kabubut-on ni Jehova?
4 Ang pagbantala sang mensahe sang Ginharian sa kalibutan nga madamo sing nagapamatok magatilaw sang aton determinasyon nga magkabuhi suno sa aton dedikasyon kag himuon ang kabubut-on ni Jehova. (Juan 15:19) Pero makasalig kita nga si Jehova padayon nga magabulig sa aton agod matuman ang iya kabubut-on, pareho sang ginhimo niya kay Amos.—2 Cor. 3:5.