Palambua ang Batasan nga Mag-abot sa Eksakto nga Oras
1. Anong halimbawa ang ginpakita ni Jehova?
1 Ginahimo ni Jehova ang mga butang sa husto nga tion. Halimbawa, ginabuligan niya ang iya mga alagad sa ‘tion nga kinahanglan nila ini.’ (Heb. 4:16) Nagaaman man sia sing espirituwal nga “pagkaon sa nagakaigo nga tion.” (Mat. 24:45) Gani makasalig kita nga ang iya nagahilapit nga adlaw sang kaakig ‘indi magpalantang.’ (Hab. 2:3) Daku gid ang aton benepisyo sa pagpanghikot ni Jehova sa husto nga tion! (Sal. 70:5) Pero bangod sa kasakuon kag pagkadihimpit, indi mahapos para sa aton nga mag-abot sa eksakto nga oras. Ngaa dapat naton palambuon ang batasan nga mag-abot sa eksakto nga oras?
2. Ngaa ang pag-abot sa eksakto nga oras makahatag sing kadungganan kay Jehova?
2 Ang mga tawo sa sining katapusan nga mga adlaw wala sing pagpugong kag mahigugmaon sa kaugalingon, gani ginapasapayanan na lang ang pag-abot sa eksakto nga oras. (2 Tim. 3:1-3) Kon ang mga Cristiano nagaabot sa eksakto nga oras sa ila trabaho, appointment, kag mga miting, matalupangdan ini sang iban kag makahatag sing kadungganan kay Jehova. (1 Ped. 2:12) Pirme bala kita nagaabot sa husto nga oras sa aton ulubrahan pero masami nagakaleyt sa teokratikong mga pagtilipon? Ang pag-abot sa eksakto nga oras sa Cristianong mga miting, lakip ang nagabukas nga ambahanon kag pangamuyo, nagapakita nga luyag naton ilugon si Jehova, ang Dios sang kahimusan.—1 Cor. 14:33, 40.
3. Ngaa ang pag-abot sa eksakto nga oras nagapakita sang aton konsiderasyon sa iban?
3 Ang pag-abot sa eksakto nga oras nagapakita man sang aton konsiderasyon sa iban. (Fil. 2:3, 4) Halimbawa, kon nagaabot kita sa eksakto nga oras sa Cristiano nga mga miting, lakip sa mga miting para sa pag-alagad sa latagon, indi naton matublag ang aton mga kauturan. Pero kon batasan na naton nga nagakaulihi, mahimo hunahunaon sang iban nga wala naton ginapabaloran ang ila tion. Kon nagaabot kita sa eksakto nga oras, ginapakita naton nga masaligan kita kag maukod. Ini nga mga kinaiya ginaapresyar gid sang mga tawo sa aton palibot.
4. Kon masami kita nagakaleyt, ano ang dapat naton himuon?
4 Kon masami kita nagakaleyt, pamensara sing maayo kon ano ang mga rason. Mangin organisado paagi sa paghimo sing realistiko nga iskedyul agod matapos mo ang mga hilikuton sa gintalana nga tion. (Man. 3:1; Fil. 1:10) Mangayo sing bulig kay Jehova. (1 Juan 5:14) Ang pag-abot sa eksakto nga oras isa ka paagi nga mapakita naton ang aton apresasyon sa duha ka labing daku nga sugo sa Kasuguan—ang paghigugma sa Dios kag paghigugma sa aton isigkatawo.—Mat. 22:37-39.