Iluga ang mga Manalagna—Sofonias
1. Ano ang kahimtangan sang nangin manalagna si Sofonias, kag ngaa maayo sia nga halimbawa para sa aton?
1 Sang tungatunga sang ikapito nga siglo B.C.E., ang pagsimba kay Baal lapnag sa Juda. Bag-o lang ginpatay ang malain nga hari nga si Amon, kag naggahom ang bata nga hari nga si Josias. (2 Cron. 33:21–34:1) Sa sina nga tion, ginsugo ni Jehova si Sofonias nga ipahayag ang iya mensahe sang paghukom. Bisan pa mahimo nga kaliwat si Sofonias sang harianon nga pamilya sang Juda, wala niya ginpamag-an ang mensahe sang paghukom ni Jehova sa mga lider sang Juda. (Sof. 1:1; 3:1-4) Sing kaanggid, luyag gid naton ilugon ang kaisog ni Sofonias kag indi pagtugutan nga upangan sang aton mga paryente ang aton pag-alagad kay Jehova. (Mat. 10:34-37) Ano nga mensahe ang ginpahayag ni Sofonias, kag ano ang mga resulta sini?
2. Ano ang aton dapat himuon para maluwas sa adlaw sang kaakig ni Jehova?
2 Pangitaa si Jehova: Si Jehova lamang ang makaluwas sa mga indibiduwal sa adlaw sang iya kaakig. Gani, ginpalig-on ni Sofonias ang katawhan sang Juda nga pangitaon si Jehova, pangitaon ang pagkamatarong, kag pangitaon ang pagkamapainubuson samtang may tion pa. (Sof. 2:2, 3) Amo man sini ang ginahimo naton karon. Kaangay ni Sofonias, ginapalig-on naton ang iban nga pangitaon si Jehova, apang dapat man kita maghulag, determinado nga ‘indi gid magtalikod kay Jehova.’ (Sof. 1:6) Sa baylo, ginapangita naton si Jehova paagi sa pagtuon sing maayo sa iya Pulong kag pagpangabay sang iya panuytoy. Ginapangita naton ang pagkamatarong paagi sa pagkabuhi nga matinlo sa moral. Ginapangita naton ang pagkamapainubuson paagi sa pagpalambo sang pagkamapinasakupon kag pagsunod gilayon sa panuytoy sang organisasyon ni Jehova.
3. Ngaa dapat kita mangin positibo pirme sa aton ministeryo?
3 Positibo nga mga Resulta: Ang mensahe sang paghukom nga ginpahayag ni Sofonias nagpahulag sa iban nga taga-Juda kag ilabi na gid kay Josias, nga nagsugod sa pagpangita kay Jehova samtang bata pa. Sang ulihi, maisugon nga gindula ni Josias ang butig nga pagsimba. (2 Cron. 34:2-5) Sa karon, bisan pa ang iban nga binhi nagtupa sa higad sang dalan, sa batuhon, ukon sa tunukon, ang iban nagtupa man sa maayo nga duta kag nagpamunga. (Mat. 13:18-23) Makasalig kita nga padayon nga pakamaayuhon ni Jehova ang aton mga panikasog samtang masako kita sa pagpalapnag sang binhi sang Ginharian.—Sal. 126:6.
4. Ngaa dapat padayon naton nga ‘hulaton si Jehova’?
4 Ang iban nga taga-Juda nagapati nga indi pagdayunon ni Jehova ang iya paghukom. Apang, ginpasalig ni Jehova ang tanan nga malapit na ang iya dakung adlaw. (Sof. 1:12, 14) Maluwas lamang ang mga nagadangop sa iya. (Sof. 3:12, 17) Samtang ‘ginahulat naton si Jehova,’ kabay nga malipay kita sa pag-alagad sing nahiusa upod sa aton mga masigkasumilimba sang aton halangdon nga Dios!—Sof. 3:8, 9.