Isa ka Siglo nga Pagbantala sang Ginharian!
1. Sa ano nga hilikuton napalig-on ang katawhan ni Jehova halos isa ka siglo na ang nagligad?
1 “Tan-awa, ang Hari nagagahom! Kamo ang iya mga tiglawas. Gani ibantala, ibantala, ibantala, ang Hari kag ang iya ginharian.” Ining makapahulag nga mga pulong nga ginpahayag ni Brother Rutherford halos isa ka siglo na ang nagligad, nagpalig-on sa katawhan ni Jehova nga ipalapnag ang mensahe sang Ginharian. Amo gid sina ang ginahimo naton! Kaangay sang mga Cristiano sadto, ginabantala naton ang maayong balita sang Ginharian “sa tanan nga tinuga sa idalom sang langit.” (Col. 1:23) Ano ang nahimo naton sang nagligad nga siglo para ibantala ang Ginharian sang Dios? Paano naton ini padayon nga ibantala samtang nagahilapit ang ika-100 nga anibersaryo sang Ginharian?
2. Paano ginapasanyog sang aton mga literatura ang Ginharian sang Dios?
2 Ang Nahimo Naton Sadto: Dinekada na nga ginapasanyog sang aton mga literatura ang Ginharian sang Dios. Sugod sang 1939, ang aton panguna nga magasin may tig-ulo nga: Ang Lalantawan Nagabantala sang Ginharian ni Jehova. Ini nga magasin masami nga nagabinagbinag tuhoy sa Ginharian kag sa pagahimuon sini. Ang Magmata! nagapadaku man sang Ginharian sang Dios subong amo lamang ang paglaum sang katawhan. Nagakaigo lamang nga ining duha ka magasin amo karon ang pinakalapnag nga ginatranslate kag ginapanagtag sa bilog nga kalibutan!—Bug. 14:6.
3. Ano ang pila sa mga paagi nga aton gingamit sa pagbantala sang Ginharian?
3 Ang katawhan ni Jehova naggamit sing lainlain nga paagi sa pagbantala sang Ginharian. Sang una, naggamit kita sing mga sound car, pagwaragwag sa radyo, kag radyo pono. Ini nga mga paagi nakabulig sa pagpalapnag sing maayong balita sa madamo nga tawo sang tion nga diutay pa lang ang manugbantala sang Ginharian. (Sal. 19:4) Sining karon lang, nagbalhag kita sing mga impormasyon sa jw.org. Paagi sini, minilyon ang mabantalaan sang Ginharian lakip na ang mga lugar nga ginadumilian ang aton hilikuton.
4. Anong pinasahi nga mga paagi ang aton ginhimo?
4 Ang katawhan ni Jehova naggamit man sing pinasahi nga mga paagi sa pagpalapnag sing mensahe sang Ginharian. Halimbawa, sugod sang tungatunga sang dekada 1990, magluwas sa pagbantala sa mga balay, nagpanaksi man kita sa mga parke, palarkingan sang salakyan, kag sa duog sang negosyo. Sining karon lang, nag-organisar kita sing special metropolitan public witnessing sa dalagku nga mga siudad sa bilog nga kalibutan. Dugang pa, madamo nga kongregasyon ang nagapakigbahin sa pagpanaksi sa publiko nga mga duog sa ila teritoryo. Nagplastar sila sing mga cart kag lamesa sa mga lugar nga madamo sing nagaagi. Siempre pa, ang pagpamalaybalay amo gihapon ang aton panguna nga paagi sa pagbantala sang Ginharian.—Binu. 20:20.
5. Ano nga mga kahigayunan ang bukas sa aton sa bag-o nga tuig sang pag-alagad?
5 Ang Mahimo Pa Naton: Sa pagsugod sang bag-o nga tuig sang pag-alagad sa Septiembre, madamo ang magaregular payunir. Isa ka bala sa ila? Kon indi, makaauxiliary payunir ka bala sa pulupanag-on? Makapayunir ka man ukon indi, pat-od nga pakamaayuhon ka ni Jehova sa imo mga sakripisyo sa pagpakigbahin sing bug-os sa pagbantala sang Ginharian.—Mal. 3:10.
6. Ngaa pinasahi ang bulan sang Oktubre 2014?
6 Ang bulan sang Oktubre 2014 amo ang ika-100 nga anibersaryo sang Ginharian. Gani ang publiko nga edisyon sang Ang Lalantawan sa sina nga bulan magabinagbinag sa Ginharian sang Dios. Ngaa indi mo paghimuon nga tulumuron nga madamo ka sing mapanagtagan sini nga magasin? Samtang nagatulok kita sa palaabuton, kabay nga ang tagsa sa aton padayon nga magbantala sing “maayong balita tuhoy sa ginharian sang Dios” sa tanan nga magapamati.—Binu. 8:12.