Gamita ang jw.org sa Imo Ministeryo—“Mangin Abyan ni Jehova”

Ang “Panudlo sang Biblia” nga seksion sang jw.org/hil may bahin para sa kabataan nga “Mangin Abyan ni Jehova” kag makita diri ang mga kanta, video, kag hilimuon. (Ang iban sini sa English pa nga lenguahe.) Nagamit mo na bala ini sa imo ministeryo? Kon nagatuon ka sa Biblia sa isa ka ginikanan nga may gagmay nga kabataan, ngaa indi mo ini ipakita sa iya? Mahimo magpainteres ini sa iya nga buksan ang iban pa nga bahin sang aton Web site.

Sang nagpanagtag sang Kingdom News Num. 38, ginhatagan sang brother ang isa ka babayi sini nga tract kag ginbasa niya ini gilayon. May gagmay sia nga kabataan nga interesado gid sa tract. Ginbinagbinag sing makadali sang brother ang kaundan sini kag ginpakita ang aton Web site sa likod sang tract. Bangod interesado ang babayi, gingamit sang brother ang iya smartphone kag ginpatan-aw sa babayi kag sa iya kabataan ang isa sa mga video parte kay Caleb.

Ginsugiran sang sister ang iya katrabaho nga may gagmay nga kabataan parte sa aton Web site kag sa makita diri nga makabulig sa pamilya. Ginbuksan sang babayi kag sang iya kabataan ang jw.org. Sang ulihi, ginsugiran niya ang sister nga ginakanta na sang iya kabataan ang “Iwali ang Pulong,” nga isa sa mga kanta sa “Mangin Abyan ni Jehova.”

Mangin pamilyar sa sini nga bahin sang jw.org, kag mag-download sang mga video, kanta, ukon hilimuon sa imo mobile device. Paagi sini, handa ka na nga gamiton ang jw.org sa ministeryo. Ini nga galamiton makabulig gid sa aton sa pagpaulipon sa Ginuo!—Binu. 20:19.