Mga Miting Para sa Pag-alagad sa Latagon nga Nagapalig-on, Nagahatag sing Instruksion, kag Nagaorganisar sa Aton
1. Ano ang katuyuan sang mga miting para sa pag-alagad sa latagon?
1 Isa ka bes, gintipon ni Jesus ang iya 70 ka disipulo antes sila magbantala. (Luc. 10:1-11) Ginpalig-on niya sila paagi sa pagpahanumdom sa ila nga wala sila nagaisahanon kay ginagiyahan sila sang “Agalon sang alanyon,” si Jehova. Ginhatagan man niya sila sing instruksion para mahimo nila ang hilikuton, kag gin-organisar niya sila “sing tagduhaduha.” Subong, amo man sini ang katuyuan sang aton mga miting antes maggua sa latagon—para magpalig-on, maghatag sing instruksion, kag mag-organisar sa aton.
2. Daw ano na lang kadugay ang miting para sa pag-alagad sa latagon?
2 Ang miting para sa pag-alagad sa latagon nagadugay sing 10 tubtob 15 minutos, nga nagalakip sang pag-organisar sang grupo, pag-asayn sang teritoryo, kag pangamuyo. Ginbag-o na ini. Sugod sa Abril, ang miting para sa pag-alagad sa latagon magadugay sing lima tubtob pito ka minutos na lang. Apang, mas malip-ot pa gid ini kon hiwaton ini pagkatapos sang miting sang kongregasyon kay ang mga tumalambong bag-o lang napalig-on sa pagbinagbinag sa Kasulatan. Kon malip-ot na lang ang mga miting para sa pag-alagad sa latagon, mas malawig nga tion ang mahinguyang sa ministeryo. Dugang pa, indi sini gawa masablagan ang pagbantala sang mga payunir ukon mga manugbantala kon nakasugod na sila.
3. Paano organisahon ang mga miting para sa pag-alagad sa latagon para mangin mapuslanon gid ini sa mga manugbantala?
3 Ang mga miting para sa pag-alagad sa latagon dapat organisahon sing maayo para mangin mapuslanon gid ini sa mga manugbantala. Sa madamo nga kongregasyon, mas maayo nga ang mga grupo sa pag-alagad indi magtingob sa pagmiting sa isa lang ka lokasyon. Mangin mahapos sa mga manugbantala ang pagkadto sa tilipunan kag sa teritoryo. Madali man maorganisar ang mga manugbantala, kag makabulig sa manugtatap sang grupo nga maatipan sing maayo ang iya mga miembro. Mahimo binagbinagon sang hubon sang mga gulang ang lokal nga mga kahimtangan kag hibaluon kon ano ang pinakamaayo. Antes takpan ang miting paagi sa malip-ot nga pangamuyo, dapat nahibaluan sang tanan kon diin ang teritoryo kag kon sin-o ang ila paris.
4. Ngaa importante ang mga miting para sa pag-alagad sa latagon?
4 Importante Ini Pareho sa Iban nga Miting sa Kongregasyon: Bangod ang mga miting para sa pag-alagad ginahiwat para sa mga magua sa latagon, mahimo indi ini matambungan sang bilog nga kongregasyon. Apang, importante ini pareho sa iban nga miting sa kongregasyon kay mga aman ini halin kay Jehova para pahulagon kita sa gugma kag sa maayong mga buhat. (Heb. 10:24, 25) Gani, ang magadumala dapat nakahanda sing maayo para makapadungog ini kay Jehova kag makabenepisyo ang tanan nga tumalambong. Kon mahimo, tinguhaan gid sang mga manugbantala nga tambungan ini antes maggua sa latagon.
Ang miting para sa pag-alagad sa latagon importante pareho sa iban nga miting sa kongregasyon
5. (a) Ano ang papel sang manugtatap sang pag-alagad sa pag-organisar sang miting para sa pag-alagad sa latagon? (b) Paano dumalahan sang isa ka sister ang miting para sa pag-alagad sa latagon?
5 Paghanda sang Magadumala: Para mahandaan sing maayo sang isa ang iya bahin sa miting, dapat ihatag ini sa iya sing abanse. Amo man sini sa mga miting para sa pag-alagad sa latagon. Kon ang kada grupo sang pag-alagad nagahiwat sang ila miting, ang ila manugtatap sang grupo ukon ang iya asistant amo ang magadumala sang miting. Pero kon magtingob ang bilog nga kongregasyon, ang manugtatap sang pag-alagad magaasayn sang magadumala. Ang pila ka manugtatap sang pag-alagad nagahatag sang iskedyul sa tanan nga magadumala kag nagabutang man sini sa information board. Dapat mangin mahinantupon ang manugtatap sang pag-alagad sa pag-asayn sang magadumala, nga ginahunahuna nga ang kalidad sini nga miting nagadepende sa ikasarang sa pagtudlo kag pag-organisar sang magadumala. Kon wala sang gulang, ministeryal nga alagad, ukon iban pa nga kalipikado nga brother para magdumala, dapat mag-asayn ang manugtatap sang pag-alagad sang kalipikado nga sister.—Tan-awa ang artikulo nga “Kon San-o Puede Makadumala ang Isa ka Sister.”
6. Ngaa importante gid nga maghanda sing maayo ang magadumala?
6 Kon makabaton kita sang asaynment sa Teokratikong Eskwelahan Para sa Ministeryo ukon Miting sa Serbisyo, ginahandaan naton ini sing maayo. Wala na naton ginahulat nga nagapakadto na kita sa miting kag amo pa lang maghunahuna kon ano ang aton isiling. Amo man sini kon naasayn ang isa nga magdumala sang miting para sa pag-alagad sa latagon. Bangod ginpalip-ot na ini nga miting, importante gid nga handaan ini sing maayo para mangin mapuslanon kag matapos sa husto nga tion. Nalakip man sa maayo nga paghanda ang paghibalo sing abanse sang teritoryo.
7. Ano ang pila ka butang nga mahimo binagbinagon sang nagadumala sa miting?
7 Kon Ano ang Mahimo Binagbinagon: Bangod lainlain ang mga kahimtangan sa teritoryo, ang matutom nga ulipon wala nagahatag sing balayan sang kada miting para sa pag-alagad sa latagon. Ang kahon nga “Mahimo Binagbinagon sa Miting Para sa Pag-alagad sa Latagon,” nagahatag sang pila ka panugda. Sa masami, isa ini ka paghinun-anon. Mahimo man ilakip ang nahandaan sing maayo nga pasundayag ukon ang nagakaigo nga video sa jw.org. Dapat hunahunaon sang magadumala kon ano ang makapalig-on kag makahatag sing instruksion sa mga maggua sa latagon sa sina nga adlaw.
Dapat hunahunaon sang magadumala kon ano ang makapalig-on kag makahatag sing instruksion sa mga maggua sa latagon sa sina nga adlaw
8. Ano ang maayo nga binagbinagon sa miting para sa pag-alagad sa latagon kon Sabado kag Domingo?
8 Halimbawa, kon Sabado, ang kalabanan nga manugbantala nagatanyag sing Lalantawan kag Magmata! Madamo sang nagagua kon Sabado ang indi makagua sa iban nga adlaw, gani mahimo malipatan nila ang presentasyon nga ginpraktis nila sa ila Pangpamilya nga Pagsimba. Gani, mas maayo nga repasuhon sang nagadumala ang isa ka sampol nga presentasyon sa likod sang Ang Aton Ministeryo sang Ginharian. Mahimo man binagbinagon kon paano ang mga lokal nga balita, hitabo, ukon piesta opisyal maangot sa pagpresentar sang magasin ukon kon ano ang ihambal sa tagbalay kon batunon niya ang mga magasin para makaduaw liwat. Kon nakapahamtang na ang pila ka utod sang tanyag nga magasin, mahimo sila pangabayon sang nagadumala nga maghatag sang pila ka panugda ukon magsaysay sing maayo nga mga eksperiensia. Kon Domingo, mahimo amo man sini ang himuon sang nagadumala sa tanyag nga mga literatura sa sina nga bulan. Ang mga publikasyon nga ginatun-an pareho sang Maayong Balita kag Pamatii ang Dios nga mga brosyur kag ang Ginatudlo sang Biblia nga libro mahimo itanyag sa bisan ano nga adlaw, gani mahimo man binagbinagon sang nagadumala kon paano ini itanyag.
9. Ano ang mahimo binagbinagon kon nagapakigbahin sa pinasahi nga kampanya sa Sabado kag Domingo?
9 Kon ang kongregasyon nagapakigbahin sa pinasahi nga kampanya sa Sabado kag Domingo, mahimo binagbinagon sang nagadumala kon paano itanyag ang mga magasin upod sa imbitasyon ukon tract, ukon ano ang himuon kon interesado ang tagbalay. Mahimo man magsaysay sang makapalig-on nga mga eksperiensia parte sa sina nga kampanya.
10, 11. Ngaa importante ang paghanda sang mga manugbantala para mangin madinalag-on ang miting para sa pag-alagad sa latagon?
10 Paghanda sang mga Manugbantala: Ang mga manugbantala may bahin man para mangin madinalag-on ang miting para sa pag-alagad sa latagon. Paagi sa ila paghanda sing abanse, mahimo sa tion sang ila pangpamilya nga pagsimba, may ara sila mapaambit nga mga punto sa iban nga manugbantala. Nalakip man sa maayo nga paghanda ang pagkuha sing mga magasin kag literatura antes magkadto sa tilipunan agod indi maatrasar ang pagkadto sa teritoryo.
11 Importante man nga mag-abot sing temprano sa tilipunan sang miting. Siempre pa, luyag naton nga indi maulihi sa tanan nga miting sa kongregasyon. Makatublag gid kita kon maulihi kita sa miting para sa pag-alagad sa latagon. Paano? Ang utod nga nagadumala nagabinagbinag anay sang pila ka butang antes organisahon ang grupo. Kon pila lang ka utod ang presente, mahimo kobrehan nila ang teritoryo nga nasugdan sang nagligad. Kon malayo ang teritoryo, mahimo niya iparis ang mga utod nga wala sang salakyan sa mga utod nga may salakyan. Kon delikado ang isa ka teritoryo, mahimo niya iasayn ang mga brother nga manghikot upod sa grupo sang mga sister. Mahimo niya iasayn ang may edad na nga mga utod nga magbantala sa higad sang dalan ukon sa mga balay nga manubo lang ang hagdanan. Ang mga bag-uhan mahimo iparis sa mas eksperiensiado nga mga manugbantala. Pero kon maulihi ang mga manugbantala, ang nahimo na nga mga kahimusan kinahanglan bag-uhon ukon liwaton para sa mga naulihi. Matuod, maulihi kita kon kaisa bangod sa pila ka rason. Pero, kon pirme kita ulihi, mahimo naton pamangkuton ang aton kaugalingon, ‘Nagakaulihi bala ako bangod wala ko ginaapresyar ang mga miting para sa pag-alagad sa latagon ukon bangod wala ko ginaorganisar sing abanse ang akon mga hilikuton?’
12. Kon pirme ka nagahimo sing kaugalingon nga kahimusan, ano ang mahimo mo binagbinagon?
12 Ang iban nga manugbantala nagahimo sang ila kahimusan antes magsugod ang miting, ukon nagapili na nga daan sang ila paris. Kon amo sini, ‘makapasangkad’ ka bala paagi sa pag-upod sa lainlain nga manugbantala sa baylo nga sa amo lang gihapon nga kaupod? (2 Cor. 6:11-13, footnote) Maupdan mo bala ang mga bag-uhan para mabuligan sila nga mag-uswag sa ila ikasarang sa pagtudlo? (1 Cor. 10:24; 1 Tim. 4:13, 15) Pamatii sing maayo ang mga instruksion nga ginahatag, lakip ang direksion kon diin masugod sa pagbantala. Kon matapos ang miting, likawi nga bag-uhon ang mga kahimusan kag maghalin gilayon pakadto sa teritoryo.
13. Kon mangin maukod kita kag tungdan ang aton papel, ano ang mabenepisyo naton sa mga miting para sa pag-alagad sa latagon?
13 Pagkatapos sang ila pagbantala, ang 70 nga gin-organisar ni Jesus “nagbalik nga malipayon.” (Luc. 10:17) Pat-od nga ang pagtipon sa ila ni Jesus antes sila nagbantala nakabulig gid nga nagmadinalag-on sila. Amo man sini ang mahatag nga benepisyo sang miting para sa pag-alagad sa latagon. Kon mangin maukod kita kag tungdan ang aton papel, ang miting para sa pag-alagad sa latagon makapalig-on, makahatag sing instruksion, kag maorganisar kita sa pagtuman sang aton hilikuton sa ‘pagpanaksi sa tanan nga pungsod.’—Mat. 24:14.