Gamita sing Epektibo ang mga Bahin sang Ginatudlo sang Biblia nga Libro

Samtang nagatuon ang estudyante sa Biblia kag ginaaplikar ang iya natun-an, magatubo kag magapamunga sia sa espirituwal. (Sal. 1:1-3) Mabuligan naton ang aton estudyante nga mag-uswag paagi sa paggamit sing maayo sang pila ka bahin sang Ginatudlo sang Biblia nga libro.

Mga Pamangkot sa Umpisa: Ang kada kapitulo may mga pamangkot sa umpisa nga sabton samtang nagatuon sa sina nga kapitulo. Mahimo mo ini ipamangkot sa estudyante para mahunahuna niya ang inyo tun-an. Ukon mahimo mo sia pasabton sing malip-ot sa kada pamangkot. Kon indi husto ang iya paghangop, indi kinahanglan nga tadlungon mo sia dayon. Ang iya sabat magabulig sa imo nga mahibaluan kon ano nga mga punto ang dapat mo ipaathag sing maayo.—Hulu. 16:23; 18:13.

Apendise: Kon nahangpan na kag ginabaton sang estudyante ang inyo natun-an, mahimo mo sia palig-unon nga basahon na lang ang apendise nga naangot sa inyo natun-an. Sa inyo masunod nga pagtuon, mahimo mo repasuhon ang apendise para mapat-od nga nahangpan niya ini. Pero kon sa banta mo mas mabuligan sia kon binagbinagon ninyo ini, ilakip sa inyo pagtuon ang apendise ukon ang bahin lang sini. Mahimo ninyo basahon ang mga parapo kag dapat may nahanda ka na nga mga pamangkot.

Kahon sa Repaso: Makita sa kahon sa repaso sa kada katapusan sang kapitulo ang sabat sa mga pamangkot sa umpisa. Mahimo mo ini gamiton para mapat-od nga nahangpan kag mapaathag sang estudyante ang panguna nga mga punto. Basaha ninyo ini lakip ang mga teksto nga ginsambit. Dayon pangabaya ang imo estudyante nga ipaathag kon paano gamiton ang teksto para pamatud-an nga husto ang ginasiling sa repaso.—Binu. 17:2, 3.