Pagpauswag sang Aton Ikasarang sa Ministeryo—Pagbulig sa mga Estudyante sa Biblia nga Mag-uswag Padulong sa Dedikasyon kag Bawtismo

KON NGAA IMPORTANTE: Para mapahalipay si Jehova, dapat idedikar sang mga estudyante sa Biblia ang ila kabuhi sa iya kag magpabawtismo. (1Pe 3:21) Kon magkabuhi sila suno sa ila dedikasyon, maamligan sila sa espirituwal. (Sa 91:1, 2) Ang isa ka Cristiano nagdedikar kay Jehova—indi sa tawo, sa trabaho, ukon sa organisasyon. Gani, dapat ipalambo sang mga estudyante ang gugma kag apresasyon sa Dios.—Ro 14:7, 8.

KON PAANO INI HIMUON:

• Sa inyo pagtuon, binagbinaga kon ano ang ginatudlo parte kay Jehova sang inyo ginatun-an. Palig-una sia nga basahon ang Biblia kada adlaw kag “padayon” nga mangamuyo kay Jehova.—1Te 5:17; San 4:8

• Palig-una ang imo estudyante nga himuon nga tulumuron ang pagdedikar kag pagpabawtismo. Buligi man sia nga mahimo ang madali malab-ot nga mga tulumuron, pareho sang pagkomento sa mga miting ukon pagpanaksi sa iya mga kaingod kag kaupod sa trabaho. Dumduma nga wala ginapilit ni Jehova ang bisan sin-o nga mag-alagad sa iya. Ang dedikasyon isa ka personal nga desisyon.—Deu 30:19, 20

• Palig-una ang imo estudyante nga maghimo sing mga pagbag-o para mapahalipay si Jehova kag makalipikar sa bawtismo. (Hul 27:11) May mga batasan kag bisyo nga mabudlay dulaon, gani mahimo nga kinahanglan sang estudyante sa Biblia ang padayon nga pagbulig agod mauba niya ang daan nga personalidad kag masuksok ang bag-o. (Efe 4:22-24) Ipabasa sa iya ang mga artikulo sa Ang Lalantawan nga “Ang Biblia Nagapabag-o sang Kabuhi”

• Isugid sa iya ang imo makalilipay nga eksperiensia sa pag-alagad kay Jehova.—Isa 48:17, 18