Daw Ano Kabakod ang Imo Pagtuo sa mga Promisa ni Jehova?

Ginpamatud-an nanday Josue kag Solomon nga wala sing bisan isa sa mga promisa ni Jehova ang napaslawan. (Jos 23:14; 1Ha 8:56) Ang ginhambal sining duha ka masaligan nga saksi nagapabakod pa gid sang pundasyon diin mahimo naton ipasad ang aton pagtuo.​—2Co 13:1; Tit 1:2.

Paano gintuman ni Jehova ang iya mga promisa sang panahon ni Josue? Upod sa imo pamilya, tan-awa ninyo ang video nga Wala sing Isa ka Pulong ang Napaslawan. Dayon binagbinaga ninyo ang masunod nga mga pamangkot: (1) Paano mo mailog ang pagtuo ni Rahab? (Heb 11:31; San 2:24-26) (2) Paano ang halimbawa ni Acan nagapakita nga ang hungod nga indi pagtuman nagaresulta sa kapahamakan? (3) Bisan pa ang mga taga-Gibeon maayo sa inaway, ngaa ginlimbungan nila si Josue kag nakighidait sa Israel? (4) Paano natuman ang pulong ni Jehova sang ginpahog sang lima ka hari sang Amornon ang Israel? (Jos 10:5-14) (5) Paano ka ginbuligan ni Jehova samtang ginauna mo sa imo kabuhi ang Ginharian sang Dios kag ang iya pagkamatarong?​—Mat 6:33.

Kon pamalandungan naton ang tanan nga ginhimo, ginahimo, kag himuon pa ni Jehova, magabakod pa gid ang aton pagtuo sa iya mga promisa.​—Ro 8:31, 32.