PAGKABUHI BILANG CRISTIANO
Sunda ang Talaksan sa Moral ni Jehova
Si Jehova ang nagpahamtang sing talaksan sa moral para sa mga tawo. Halimbawa, nagsugo sia nga ang pag-asawahay isa ka permanente nga paghiusa sang lalaki kag babayi. (Mat 19:4-6, 9) Ginapakamalaut niya ang tanan nga sahi sang seksuwal nga imoralidad. (1Co 6:9, 10) Naghatag man sia sing mga prinsipio parte sa pamayo kag pamustura nga nagahimo sa iya katawhan nga lain sa iban.—Deu 22:5; 1Ti 2:9, 10.
Madamo nga tawo subong ang nagasikway sa mga talaksan ni Jehova. (Ro 1:18-32) Ginasunod nila ang opinyon sang kalabanan parte sa pamayo, pamustura, kag batasan. Ginapabugal pa gani nila ang ila nahimo nga sala kag ginapakalain ang wala nagasunod sa ila.—1Pe 4:3, 4.
Bilang mga Saksi ni Jehova, dapat sundon gid naton ang talaksan sang Dios sa moral. (Ro 12:9) Paano? Mainayuhon naton nga isugid sa iban kon ano ang ginakahamut-an niya. Pero dapat man naton huptan ang mataas nga talaksan sa aton pagkabuhi. Halimbawa, kon parte sa imo pamustura kag ginapili nga bayo, pamangkuta ang imo kaugalingon: ‘Ginasunod ko bala ang talaksan ni Jehova ukon ang iya sang kalibutan? Makita bala sa akon pamayo kag pamustura nga isa ako ka Cristiano nga nagakahadlok sa Dios?’ Kon nagapili ka sang programa ukon pelikula, pamangkuta ang imo kaugalingon: ‘Manamian bala sini si Jehova? Kay sin-o mga talaksan ang ginapakita sini? Ang akon bala ginapili nga kalingawan makapaluya sa akon panindugan sa moral? (Sa 101:3) Makapasandad bala ini sa akon pamilya ukon sa iban?’—1Co 10:31-33.
Ngaa importante nga sundon naton ang talaksan sa moral ni Jehova? Sa indi madugay, laglagon ni Jesucristo ang mga pungsod kag ang tanan nga malauton. (Eze 9:4-7) Ang mga nagahimo sang kabubut-on sang Dios amo lamang ang maluwas. (1Ju 2:15-17) Gani, padayon naton nga sundon ang talaksan sa moral ni Jehova para ang mga makakita sang aton maayong mga buhat magahimaya sa Iya.—1Pe 2:11, 12.
Ano ang ginapakita sang akon pamayo kag pamustura parte sa akon talaksan sa moral?
TAN-AWA ANG VIDEO NGA MANGIN ABYAN NI JEHOVA—ISA KA LALAKI, ISA KA BABAYI, DAYON BINAGBINAGA ANG MASUNOD NGA MGA PAMANGKOT:
Ngaa maayo gid nga sundon naton ang talaksan ni Jehova?
Bisan gamay pa ang kabataan, ngaa dapat sila tudluan sang ila mga ginikanan sang talaksan sa moral ni Jehova?
Paano ang mga pamatan-on kag tigulang makabulig sa mga tawo nga makabenepisyo sa kaayo sang Dios?