PAGKABUHI BILANG CRISTIANO

Ang Bag-o sa Midweek Meeting

Sugod sa Enero 2018, ilakip na sa midweek meeting ang mga study note kag media halin sa online study edition sang New World Translation of the Holy Scriptures (nwtsty), bisan wala pa ma-translate ang online study edition sa imo lenguahe. Ini nga impormasyon makabulig gid sa imo kon nagahanda ka para sa miting. Labaw sa tanan, magapasuod ini sa imo sa aton mapinalanggaon nga Amay, si Jehova!

STUDY NOTE

Ang study note nagahatag sing impormasyon parte sa madamo nga bersikulo sang Biblia pareho sang kultura, lugar, kag lenguahe.

Mateo 12:20

Pabilo nga nagapiraw: Ang kinaandan nga suga sa balay sadto amo ang gamay nga suga nga human sa daga nga ginagatungan sang lana sang olibo. Ginasuyop sang pabilo nga lino ang lana para magsiga ini. Ang Griego nga ekspresyon nga “pabilo nga nagapiraw” mahimo magpatuhoy sa pabilo nga nagaaso kay nagabaga pa ini pero nagapiraw na ukon patay na ang kalayo. Ang tagna sang Isaias 42:3 parte sa kaluoy ni Jesus nagapasalig nga indi gid niya pagpalungon ukon pagpatyon ang katapusan nga kirab sang paglaum sang mga kubos kag ginapigos.

Mateo 26:13

Sa pagkamatuod: Sa Griego, ang a·menʹ, transliterasyon sang Hebreo nga ʼa·menʹ, buot silingon “kabay pa,” ukon “pat-od gid.” Pirme ginagamit ni Jesus ini nga ekspresyon antes sia maghambal, magpromisa, ukon magtagna, nga nagapakita nga matuod kag masaligan gid ang iya ginsiling. Ining pinasahi nga paggamit ni Jesus sang “sa pagkamatuod,” ukon amen, makita lang sa Ebanghelyo. Sa bilog nga Ebanghelyo ni Juan, ginadoble ni Jesus ang a·menʹ para ipadaku nga matuod kag masaligan gid ang iya ginsiling.

MEDIA

Mga piktyur, drowing, video, kag mga animation nga nagahatag sing impormasyon sa mga detalye nga narekord sa Biblia.

Ang Betfage, Bukid sang mga Olibo, kag Jerusalem

Makita sa sining malip-ot nga video ang alagyan pa-Jerusalem halin sa sidlangan, halin sa lugar sang moderno nga et-Tur, nga ginapatihan nga amo ang Betfage sang panahon sang Biblia, pakadto sa isa sa mas mataas nga mga bahin sang Bukid sang mga Olibo. Ang Betania ara sa sidlangan sang Betfage sa nasidlangan nga bahin sang Bukid sang mga Olibo. Kon si Jesus kag ang iya mga disipulo ara sa Jerusalem pirme sila nagadayon sa Betania, nga amo subong ang banwa sang el-ʽAzariyeh (El ʽEizariya). Arabic ini nga ngalan nga buot silingon, “Ang Lugar ni Lazaro.” Pat-od nga nagdayon si Jesus sa balay nanday Marta, Maria, kag Lazaro. (Mat 21:17; Mar 11:11; Lu 21:37; Ju 11:1) Kon magkadto si Jesus sa Jerusalem halin sa ila balay, mahimo nga nagaagi sia sa ruta nga makita sa video. Sang Nisan 9, 33 C.E., sang nagsakay si Jesus sa tinday sang asno kag nag-agi sa Bukid sang mga Olibo pa-Jerusalem, mahimo nga halin sia sa Betfage, kag ginsubay niya ang dalan pa-Jerusalem.

Dalan halin sa Betania pa-Betfage
Betfage
Bukid sang mga Olibo
Nalupyakan sang Kidron
Templo

Ang Lansang sa Tul-an sa Tikod

Piktyur ini sang replika sang tul-an sa tikod sang tawo nga natuhog sang salsalon nga lansang nga nagalaba sing 11.5 sentimetros (4.5 pulgadas). Ang orihinal nga tul-an nga napetsahan sang panahon sang mga Romano, nakutkutan sang 1968 sa naaminhan sang Jerusalem. Pamatuod ini nga ang lansang posible gid nga ginagamit sadto para malansang ang isa ka tawo sa kahoy nga usok. Ini nga lansang mahimo pareho sa mga lansang nga gingamit sang Romano nga mga soldado para ilansang si Jesucristo sa usok. Nakit-an ini sa daw baul nga bato, nga ginatawag ossuary. Diri ginatago ang nagmala nga mga tul-an sang napatay nga tawo kon madunot na ang lawas. Ginapakita sini nga ang isa nga ginpatay sa usok puede ilubong.—Mat 27:35.