Nagahanda Ka Bala Para sa Memoryal?

Pinasahi gid ang katapusan nga Paskua ni Jesus. Bangod nagahilapit na ang iya kamatayon, gin-upod niya ang iya mga apostoles para saluhan ang pagkaon sa Paskua kag itudlo ang bag-o nga selebrasyon nga dapat nila saulugon kada tuig, ang Panihapon sang Ginuo. Gani ginpadala niya sanday Pedro kag Juan para maghanda sang kuarto. (Lu 22:7-13; tan-awa ang piktyur sa kober.) Nagapahanumdom ini sa aton nga dapat naton handaan ang Memoryal sa Marso 27. Mahimo may mga kahimusan ang kada kongregasyon para sa speaker, mga emblema, kag iban pa. Pero, ano ang mahimo sang kada isa sa aton para makahanda sa Memoryal?

Ihanda ang imo tagipusuon. Basaha kag pamalandungi ang Pagbasa sing Biblia sa Memoryal. Makita ang iskedyul sa Pag-usisa sa Kasulatan Adlaw-adlaw kag ang mas detalyado nga iskedyul ara sa Apendise B12 sang Bag-ong Kalibutan nga Badbad sang Balaan nga Kasulatan. (Tan-awa man ang Abril 2020 nga isyu sang Pagkabuhi kag Pagministeryo nga Workbook Para sa Miting.) Mahimo magamit sang kada pamilya ang Watch Tower Publications Index ukon ang Giya sa Pagtuon Para sa mga Saksi ni Jehova para makakuha sing impormasyon parte sa importansia sang halad-gawad nga ila binagbinagon sa ila pangpamilya nga pagsimba.

Imbitaha ang iban nga magtambong. Magpakigbahin sing bug-os sa pagpanagtag sing imbitasyon. Pamensara kon sin-o ang puede mo imbitahon pareho sang imo mga return visit, ginatun-an sa Biblia sang una, mga kakilala, kag mga paryente. Dapat siguraduhon sang mga gulang nga imbitahon ang mga indi aktibo. Dumduma nga kon nagaistar sa iban nga lugar ang imo kilala, puede mo mabal-an ang oras kag lokasyon sang Memoryal sa ila lugar paagi sa pag-click sang tab nga PARTE SA AMON sa ibabaw nga bahin sang jw.org nga home page, dayon i-click ang “Memoryal.”

Ano pa ang puede naton mahimo para makahanda?