Ginapabaloran Mo Bala ang mga Regalo sang Dios?

1-2. Suno sa Salmo 40:5, ano nga mga regalo ang ginhatag ni Jehova sa aton, kag ngaa binagbinagon naton ini?

SI Jehova maalwan nga Dios. Pamensara ang pila ka regalo nga ginhatag niya sa aton: ang duta nga aton ginaistaran nga isa ka matahom kag pinasahi nga planeta; ang aton utok nga gindesinyo sing dalayawon; kag ang iya hamili nga Pulong, ang Biblia. Bangod ginhatagan kita ni Jehova sining tatlo ka regalo, may maistaran kita, makapamensar kita kag makakomunikar sa iban, kag kabalo kita sang sabat sa pinakaimportante nga mga pamangkot.—Basaha ang Salmo 40:5.

² Binagbinagon naton sa sini nga artikulo ining tatlo ka regalo. Kon pamalandungan naton ini, mapalig-on kita sini nga pirme magpasalamat kag pahamut-an ang aton mahigugmaon nga Manunuga, si Jehova. (Bug. 4:11) Kag mas mabuligan naton ang mga nagapati sa ebolusyon pero wala sila kabalo nga indi gali ini husto.

ANG ATON PINASAHI NGA PLANETA

3. Ngaa pinasahi gid ang duta?

³ Kon usisaon naton kon paano ginhimo sang Dios ang duta, masiling naton nga maalam gid sia. (Roma 1:20; Heb. 3:4) May iban pa nga planeta nga nagalibot sa adlaw, pero pinasahi gid ang aton duta kay ari diri ang tanan nga kinahanglan sang tawo para mabuhi.

4. Ngaa masiling naton nga maalam gid ang Dios sa kon paano niya ginhimo ang duta? Maghatag sing halimbawa.

⁴ Ang planeta nga duta sa kahawaan mahimo ipaanggid sa isa ka barko sa dagat. Pero may daku nga kinatuhayan ang barko nga madamo sing tawo kag ang aton duta. Halimbawa, kon ang mga tawo nga nagasakay sa barko amo dapat ang maghimo sang kinahanglan nila nga oxygen, pagkaon, kag tubig, kag kon indi sila puede maghaboy sang basura sa dagat, daw ano ayhan sila kadugay mabuhi? Sigurado nga malip-ot lang ang ila kabuhi. Pero binilyon ka tawo kag kasapatan ang nagakabuhi sa duta. Ang duta amo ang nagahimo sang tanan nga oxygen, pagkaon, kag tubig nga kinahanglan naton, kag wala ini nagakaubos. Ang higko sang duta wala ginahaboy sa kahawaan, pero ngaa matahom ini gihapon kag puede maistaran? Gintuga ni Jehova ang duta nga may ikasarang nga himuon nga mapuslanon liwat ang mga higko sini. Masiling naton nga maalam gid si Jehova kon binagbinagon naton ang ginahimo sang duta para indi maubos ang oxygen kag tubig sini.

5. Ngaa wala nagakaubos ang oxygen, kag ano ang ginapamatud-an sini?

⁵ Kinahanglan sang mga tawo kag mga sapat ang oxygen para mabuhi. Ginabulubanta nga kada tuig, binilyon ka tangke sang oxygen ang ginahaklo sang mga tawo kag mga sapat sa ila pagginhawa. Dayon nagapagua naman sila sang carbon dioxide. Pero, wala nagakaubos ang oxygen kag wala man nagakapuno sang carbon dioxide ang palibot. Ngaa? Bangod nagtuga man si Jehova sang mga tanom nga sarisari ang kadakuon nga amo ang nagasuyop sang carbon dioxide kag nagapagua sang oxygen. Bangod sang sini nga proseso nga ginatawag oxygen cycle, ginapamatud-an sini nga husto gid ang ginasiling sang Binuhatan 17:24, 25: “Ang Dios . . . nagahatag sa tanan nga tawo sang kabuhi kag sang ginhawa.”

6. Ngaa wala nagakaubos ang tubig, kag ano ang ginapamatud-an sini? (Tan-awa man ang kahon nga “Ang Tubig Regalo sa Aton ni Jehova.”)

⁶ May tubig ang aton planeta bangod hustuhan lang ang kalayuon sini sa adlaw. Kon naglapit ini diutay sa adlaw, mangin mainit gid ang duta kag mahubsan ini sang tubig, kag wala gid sang mabuhi. Kon naglayo naman diutay ang duta sa adlaw, mangin matugnaw gid ini, kag mapuno ini sang snow kag ice. Bangod ginbutang ni Jehova ang duta sa insakto gid nga puesto sini, wala nagakaubos ang tubig nga importante gid para mabuhi. Bangod sang init sang adlaw, nagausbong ang tubig sa dagat kag duta kag nagahimo ini nga mga panganod. Kada tuig, minilyon ka litro sang tubig ang nagausbong. Pagligad sang mga napulo ka adlaw, magatupa ini bilang ulan ukon snow. Ini nga tubig magabalik sa dagat, mga suba, kag mga sapa. Dayon masulit naman ini nga proseso nga ginatawag water cycle. Gindesinyo ni Jehova ini nga proseso para indi mawad-an sang tubig ang duta. Ginapamatud-an sini nga si Jehova maalam kag gamhanan.—Job 36:27, 28; Man. 1:7.

7. Paano naton mapakita nga ginapabaloran naton ang regalo nga ginsambit sa Salmo 115:16?

⁷ Paano naton mapakita nga ginapabaloran naton ang aton planeta kag ang tanan nga ari diri? (Basaha ang Salmo 115:16.) Ang isa ka paagi amo ang pagpamalandong sa mga butang nga ginhimo ni Jehova. Magapalig-on ini sa aton nga pasalamatan si Jehova kada adlaw sa tanan nga ginahatag niya sa aton. Kag mapakita naton nga ginapabaloran naton ang duta paagi sa pagtinlo sang aton ginaistaran kag sang aton palibot.

ANG ATON DALAYAWON NGA UTOK

8. Ngaa makasiling kita nga dalayawon gid ang pagkadesinyo sang aton utok?

⁸ Dalayawon gid ang pagkadesinyo sa utok sang tawo. Sang ginabusong kita, ang aton utok nagaporma suno gid sa desinyo sini, kag linibo ka bag-o nga mga cell sa utok ang nagakahuman kada minuto! Suno sa mga researcher, ang utok sang tawo may halos 100 ka bilyon ka cell nga ginatawag neuron. Ini nga mga cell nagahuman sang aton utok, nga mga isa ka kilo kag tunga ang kabug-aton. Binagbinagon naton ang pila sa dalayawon nga mahimo sang aton utok.

9. Ngaa makasiling ka nga ang aton ikasarang sa paghambal isa ka regalo halin sa Dios?

⁹ Ang aton ikasarang sa paghambal isa ka milagro. Hunahunaa ang nagakatabo kon nagahambal kita. Sa kada tinaga nga ginahambal naton, ginakontrol sang aton utok ang mga 100 ka maskulo sa aton dila, tutunlan, bibig, apipingig, kag dughan. Para maintiendihan ang aton ginahambal, dapat tayming ang paghulag sini tanan nga maskulo. Suno sa isa ka pagtuon nga ginpagua sang 2019 parte sa aton ikasarang nga makatuon kag makahambal sang mga lenguahe, may ikasarang ang bag-o natawo nga bata nga maintiendihan ang kada tinaga. Ini nga pagtuon dugang nga pamatuod sa ginapatihan sang madamo nga mga researcher, nga natawo kita nga may ikasarang nga makahangop kag makatuon sang mga lenguahe. Gani ang aton ikasarang sa paghambal isa gid ka regalo halin sa Dios.—Ex. 4:11.

10. Paano naton mapakita nga ginapabaloran naton ang regalo sang Dios nga ikasarang sa paghambal?

¹⁰ Mapakita naton nga ginapabaloran naton ang regalo sa aton nga ikasarang sa paghambal paagi sa pagpaathag sa mga nagapati sa ebolusyon kon ngaa nagapati kita nga gintuga sang Dios ang tanan nga butang. (Sal. 9:1; 1 Ped. 3:15) Ang mga nagapati sa ebolusyon nagasiling nga wala sing may nagtuga sa duta kag sa tanan nga nagakabuhi diri. Paagi sa Biblia kag sa pila ka leksion nga ginbinagbinag naton sa sini nga artikulo, madayaw naton ang aton Amay sa langit. Mapaathag man naton sa mga gusto mamati sa aton kon ngaa kumbinsido kita nga si Jehova amo ang Manunuga sang langit kag duta.—Sal. 102:25; Isa. 40:25, 26.

11. Ngaa dalayawon gid ang aton utok?

¹¹ Dalayawon gid ang aton ikasarang nga makadumdom. Sang una, ginbulubanta sang isa ka awtor nga ang utok sang tawo makasarang sa pagdumdom sang mga impormasyon nga makaigo sa 20 ka milyon ka libro. Pero subong, ginabulubanta nga mas madamo pa sangsa sini ang aton madumduman. Bangod sa aton memorya, ano nga ikasarang ang pinasahi sa aton nga mga tawo?

12. Ano ang kinatuhayan naton sa mga sapat parte sa ikasarang nga makatuon sang leksion?

¹² Sa tanan nga tinuga sa duta, ang mga tawo lang ang may ikasarang nga makatuon sang leksion paagi sa pagdumdom sa mga naeksperiensiahan naton sa aton kabuhi. Gani makatuon kita kon ano ang mas maayo para sa aton kag mabag-o naton ang aton hunahuna kag pagkabuhi. (1 Cor. 6:9-11; Col. 3:9, 10) Ang matuod, mahanas naton ang aton konsiensia nga makilala ang maayo kag malain. (Heb. 5:14) Matun-an naton kon paano magpakita sang gugma, kaluoy, kag hustisya nga pareho sa ginapakita ni Jehova.

13. Suno sa Salmo 77:11, 12, paano naton dapat gamiton ang regalo sa aton nga ikasarang nga makadumdom?

¹³ Kon pirme naton ginahunahuna ang tanan nga tion nga ginbuligan kag ginpaumpawan kita ni Jehova, mapakita naton nga ginapabaloran naton ang aton ikasarang nga makadumdom. Magapalig-on ini sa aton nga magsalig pa gid sa iya nga buligan niya kita sa palaabuton. (Basaha ang Salmo 77:11, 12; 78:4, 7) Dapat man naton dumdumon ang maayo nga ginhimo sa aton sang iban, kag pasalamatan sila. Suno sa mga researcher, mas malipayon ang mga tawo nga pirme nagapasalamat. Isa pa, maayo gid kon ilugon naton si Jehova. Perpekto ang iya memorya, pero may ginakalimtan man sia. Halimbawa, ginapatawad niya kita kag ginakalimtan ang aton mga sala kon nagahinulsol kita. (Sal. 25:7; 130:3, 4) Kag gusto niya nga amo man sini ang aton himuon sa mga nakasakit sa aton nga nagapangayo sing pasaylo.—Mat. 6:14; Luc. 17:3, 4.

14. Paano naton mapakita nga ginapabaloran naton ang aton utok nga isa ka dalayawon nga regalo?

¹⁴ Dalayawon gid ang aton utok. Mapakita naton nga ginapabaloran naton ini kon gamiton naton ini para padunggan ang nagregalo sini sa aton. Gingamit sang iban ang ila utok para lang sa ila kaayuhan, kay sila ang nagadesisyon kon ano ang husto kag sala. Pero bangod si Jehova ang nagtuga sa aton, mas maayo ang iya mga prinsipio parte sa husto kag sala sangsa aton ginahunahuna. (Roma 12:1, 2) Kon tumanon naton si Jehova, mangin malinong ang aton kabuhi. (Isa. 48:17, 18) Kag mabal-an naton kon ano ang dapat naton himuon sa aton kabuhi. Gusto ni Jehova nga padunggan naton sia bilang aton Manunuga kag Amay kag himuon ang makapahalipay sa iya.—Hulu. 27:11.

ANG BIBLIA ISA KA HAMILI NGA REGALO

15. Ngaa masiling naton nga ang regalo ni Jehova nga Biblia nagapakita nga palangga niya kita?

¹⁵ Ang Biblia isa ka regalo halin sa aton mahigugmaon nga Dios. Bangod palangga gid kita sang aton Amay sa langit, gintuytuyan niya ang pila ka tawo nga isulat ang Biblia. Paagi sa Biblia, ginasabat ni Jehova ang mga pamangkot nga gusto gid naton mabal-an ang sabat, pareho sang: Gintuga bala kita sang Dios? Ngaa gintuga kita sang Dios? Kag ano ang matabo sa palaabuton? Gusto ni Jehova nga mabal-an sang tanan niya nga anak ang sabat sa sini nga mga pamangkot, gani ginpaposible niya nga ma-translate ang Biblia sa madamo nga lenguahe. Subong, mabasa ang kompleto nga Biblia ukon ang bahin lang sini sa sobra 3,000 ka lenguahe. Ang Biblia amo ang pinakamadamo nga na-translate kag napanagtag nga libro. Bisan diin man nagaistar ang mga tawo ukon bisan ano man ang ila lenguahe, ang kalabanan may mabasa gid nga Biblia sa ila lenguahe.—Tan-awa ang kahon nga “Gin-translate ang Biblia sa mga Lenguahe sa Africa.”

16. Suno sa Mateo 28:19, 20, paano naton mapakita nga ginapabaloran naton ang Biblia?

¹⁶ Mapakita naton nga ginapabaloran naton ang Biblia paagi sa pagbasa sini kada adlaw, pagpamalandong sa mga ginatudlo sini, kag pag-aplikar sang aton mga natun-an. Mapasalamatan man naton ang Dios paagi sa pagbantala sang mensahe sini sa madamo nga tawo sa bug-os naton nga masarangan.—Sal. 1:1-3; Mat. 24:14; basaha ang Mateo 28:19, 20.

17. Ano nga mga regalo ang ginbinagbinag naton sa sini nga artikulo, kag ano ang binagbinagon naton sa masunod nga artikulo?

¹⁷ Sa sini nga artikulo, ginbinagbinag naton ang mga regalo nga ginhatag sang Dios sa aton: ang duta nga aton ginaistaran; ang aton utok nga gindesinyo sing dalayawon; kag ang Pulong sang Dios, ang Biblia. Pero may iban pa nga regalo si Jehova sa aton nga indi naton makita. Binagbinagon naton ini sa masunod nga artikulo.