Pagpugong sa Kaugalingon​—Importante Ini Para Malipay sa Aton si Jehova

“Sang ginbais ako sang akon pakaduha, ginkuga ko sia. Daw gusto ko gid sia patyon.”—Paul.

“Sa balay, kadasig sa akon maakig nga daw wala man sang rason. Ginapanglampos ko ang mga gamit, mga hampanganan, ukon ang bisan ano nga mapudyutan ko.”—Marco.

Ang kalabanan sa aton indi man gid pareho sa ila nga duha. Pero, tanan kita nabudlayan nga magpugong sa aton kaugalingon kon kaisa. Ngaa? Bangod indi kita perpekto nga napanubli naton sa una nga tawo nga si Adan. (Roma 5:12) May pila nga nabudlayan nga kontrolon ang ila kaakig, pareho kay Paul kag kay Marco. Ang iban nabudlayan nga kontrolon ang ila mga ginahunahuna. Pirme nila ginapamensar ang mga butang nga ginakabalak-an nila kag nagapaluya sang ila buot. Ang iban naman nabudlayan nga pakigbatuan ang pagsulay nga maghimo sing seksuwal nga imoralidad, magpahubog, ukon magdroga.

Kon indi pagkontrolon sang isa ang iya ginahunahuna, ginahandum, kag ginahimo, posible nga maguba gid ang iya kabuhi. Pero malikawan naton ina. Paano? Paagi sa pagpugong sa aton kaugalingon. Para mahimo ini, binagbinagon naton ang tatlo ka pamangkot: (1) Ano ang pagpugong sa kaugalingon? (2) Ngaa importante ini? (3) Paano naton mapakita ini nga “kinaiya nga ginapatubas sang espiritu”? (Gal. 5:22, 23) Dayon binagbinagon naton kon ano ang himuon naton kon wala naton napunggan ang aton kaugalingon.

ANO ANG PAGPUGONG SA KAUGALINGON?

Ang tawo nga may pagpugong sa kaugalingon wala nagapadasudaso sa paghimo sang iya napensaran. Sa baylo, ginapunggan niya nga makahambal kag makahimo sang mga butang nga indi malipay ang Dios.

Ginpakita ni Jesus kon ano ang pagpugong sa kaugalingon. Ang Biblia nagasiling: “Sang ginainsulto sia, wala sia magbalos. Sang nagaantos sia, wala sia magpamahog, kundi ginsalig niya ang iya kaugalingon sa Isa nga nagahukom sing matarong.” (1 Ped. 2:23) Sang ginlansang si Jesus sa usok sang pag-antos, ginyaguta sia sang iya mga kaaway pero ginpunggan niya ang iya kaugalingon. (Mat. 27:39-44) Antes sini, ginpamangkot sia sang mga lider sang relihion kay gusto nila nga makahambal sia sing indi husto. Pero nagpakita si Jesus sang tumalagsahon nga pagpugong sa kaugalingon. (Mat. 22:15-22) Kag maayo gid ang iya ginhimo sang nagpulot sang mga bato ang akig nga mga Judiyo para habuyon sia! Sa baylo nga magbalos, “nagpanago si Jesus kag naggua sa templo.”—Juan 8:57-59.

Mailog bala naton si Jesus? Huo. Si apostol Pedro nagsulat: “Ang Cristo mismo nag-antos tungod sa inyo, nga nagabilin sang huwaran agod sundon ninyo sing maayo ang iya mga tikang.” (1 Ped. 2:21) Bisan indi kita perpekto, mailog naton sing maayo ang halimbawa ni Jesus sang pagpugong sa kaugalingon. Ngaa importante nga himuon naton ini?

NGAA IMPORTANTE ANG PAGPUGONG SA KAUGALINGON?

Kinahanglan naton ang pagpugong sa kaugalingon para malipay sa aton si Jehova. Bisan pa tinuig na kita nga nagaalagad sing matutom kay Jehova, mahimo maguba ang aton kaangtanan sa iya kon indi naton pagkontrolon ang aton mga ginahimo kag ginahambal.

Binagbinaga ang natabo kay Moises. Sia “ang pinakamahagop sa tanan nga tawo sa duta” sadto. (Num. 12:3) Madamo nga tinuig nga nagpasensia si Moises sa mga Israelinhon nga pirme lang nagareklamo. Pero isa ka adlaw, naubos ang iya pasensia. Naakig sia sang nagreklamo sila liwat nga wala na sila sing mainom nga tubig. Akig sia nga naghambal sa katawhan: “Pamati kamo nga mga rebelde! Dapat bala kami magpagua sing tubig para sa inyo halin sa sining daku nga bato?”—Num. 20:2-11.

Wala napunggan ni Moises ang iya kaugalingon. Wala niya ginpadunggan si Jehova nga amo ang naghatag sang tubig paagi sa milagro. (Sal. 106:32, 33) Gani nagsiling si Jehova nga indi sia makasulod sa Ginsaad nga Duta. (Num. 20:12) Mahimo nga asta nga napatay si Moises, ginhinulsulan gid niya nga wala niya mapunggan ang iya kaugalingon.—Deut. 3:23-27.

Ano ang matun-an naton sa sini? Bisan pa madugay na kita nga Saksi, indi kita dapat maghambal sing malain sa mga nagapaakig sa aton ukon sa mga nagakinahanglan sang laygay. (Efe. 4:32; Col. 3:12) Ang matuod, samtang nagatigulang kita, nagalip-ot ang aton pasensia. Pero dumduma si Moises. Indi gid naton gusto nga maguba ang aton maayo nga kaangtanan kay Jehova bangod lang wala naton napunggan ang aton kaugalingon. Paano naton mapakita ining importante nga kinaiya?

KON PAANO MAPAKITA ANG PAGPUGONG SA KAUGALINGON

Mangamuyo sang balaan nga espiritu. Ngaa? Bangod ang pagpugong sa kaugalingon isa ka kinaiya nga ginapatubas sang espiritu sang Dios, kag ginahatagan ni Jehova sang iya espiritu ang mga nagapangayo sa iya. (Luc. 11:13) Paagi sa iya espiritu, ginabuligan kita ni Jehova para mapakita naton ang pagpugong sa kaugalingon. (Fil. 4:13) Mabuligan man niya kita nga mapakita ang iban pa nga kinaiya nga ginapatubas sang espiritu, pareho sang gugma, nga makabulig sa aton nga mapakita ang pagpugong sa kaugalingon.—1 Cor. 13:5.

Likawi ang bisan ano nga mahimo magpabudlay sa imo nga mapakita ang pagpugong sa kaugalingon. Halimbawa, likawi ang mga website kag mga kalingawan nga nagapakita sang sala nga mga buhat. (Efe. 5:3, 4) Ang matuod, dapat naton likawan ang tanan nga puede magsulay sa aton nga maghimo sing malain. (Hulu. 22:3; 1 Cor. 6:12) Halimbawa, kon ang isa ka tawo madali masulay sa paghimo sang seksuwal nga imoralidad, indi gid sia dapat magbasa sang mga libro kag maglantaw sang mga pelikula nga parte sa pagpakigrelasyon.

Mahimo mabudlayan kita sa pagsunod sa sini nga laygay. Pero kon magpanikasog kita, buligan kita ni Jehova nga mapunggan ang aton kaugalingon. (2 Ped. 1:5-8) Buligan niya kita nga makontrol ang aton mga ginahunahuna, ginahambal, kag ginahimo. Matuod ini kay Paul kag kay Marco, nga ginsambit kaina, kay natun-an nila nga kontrolon ang ila kaakig. Binagbinaga man ang isa ka brother nga pirme lang nagainit ang ulo kon nagadrayb sia, kag nagapakigbais pa gani sia sa iban nga mga drayber. Ano ang iya ginhimo? “Hanuot ako nga nagapangamuyo kada adlaw. Ginatun-an ko ang mga artikulo parte sa pagpugong sa kaugalingon kag ginasaulo ko ang mga teksto sa Biblia nga makabulig sa akon. Bisan pa tinuig ko na ini nga ginahimo, ginapahanumdom ko gihapon ang akon kaugalingon kada aga nga mangin kalmado lang. Kag kon may kadtuan ako, temprano pa ako nagahalin sa balay para wala ako nagadali.”

KON WALA NATON NAPUNGGAN ANG ATON KAUGALINGON

Kon kaisa, indi gid naton mapunggan ang aton kaugalingon. Kon matabo ina, basi mahuya na kita nga mangamuyo kay Jehova. Pero amo gid ini ang tion nga dapat kita mangamuyo. Gani mangamuyo gilayon kay Jehova. Mangayo sa iya sing patawad, magpabulig sa iya, kag panikasugi nga indi mo na masulit ang nahimo mo nga sala. (Sal. 51:9-11) Indi pagpamensara nga indi pagpamatian ni Jehova ang imo sinsero nga pangamuyo para patawaron ka. (Sal. 102:17) Nagsiling si apostol Juan nga ang dugo sang Anak sang Dios “nagatinlo sa aton sa tanan naton nga sala.” (1 Juan 1:7; 2:1; Sal. 86:5) Dumduma nga ginsilingan ni Jehova ang iya mga alagad nga pirme nila patawaron ang mga nakasala sa ila. Gani makasalig kita nga himuon man niya ini sa aton.—Mat. 18:21, 22; Col. 3:13.

Wala nalipay si Jehova sang wala napunggan ni Moises ang iya kaugalingon sa kamingawan, pero ginpatawad sia ni Jehova. Kag ang Pulong sang Dios nagsiling nga si Moises may mabakod gid nga pagtuo nga dapat naton ilugon. (Deut. 34:10; Heb. 11:24-28) Wala nakasulod si Moises sa Ginsaad nga Duta, pero paistaron sia ni Jehova sa Paraiso kag may paglaum sia nga mabuhi sing wala sing katapusan. May amo man kita sini nga paglaum kon panikasugan naton nga mapakita ang importante nga kinaiya nga pagpugong sa kaugalingon.—1 Cor. 9:25.