Ang Pagkabanhaw Nagapakita nga Mahigugmaon, Maalam, kag Mapinasensiahon ang Dios

1. Ngaa nagpanuga si Jehova?

MAY tion sadto nga nagaisahanon si Jehova. Pero wala sia nasubuan. Indi niya kinahanglan ang kaupod para mangin malipayon sia. Pero, gusto sang Dios nga may kabuhi man ang iban kag mangin malipayon man sila. Gani nagpanuga si Jehova bangod sa iya gugma.—Sal. 36:9; 1 Juan 4:19.

2. Ano ang nabatyagan ni Jesus kag sang mga anghel sang nagpanuga si Jehova?

² Ang una nga gintuga ni Jehova amo ang iya Anak nga si Jesus. Dayon, paagi sa iya una nga Anak, “gintuga [niya] ang tanan iban pa nga butang,” lakip ang minilyon ka anghel. (Col. 1:16) Nalipay gid si Jesus nga magbulig sa iya Amay. (Hulu. 8:30) Kag nalipay man ang mga anghel. Nakita nila sang gintuga ni Jehova kag sang iya Batid nga Manugpangabudlay, nga si Jesus, ang langit kag ang duta. Ano ang reaksion sang mga anghel? Gindayaw nila si Jehova sang gintuga niya ang duta, kag padayon nila sia nga gindayaw sang ginhimo niya ang iban pa nga tinuga, ilabi na sang gintuga niya ang mga tawo. (Job 38:7; Hulu. 8:31) Makita sa tanan nga tinuga ni Jehova ang iya gugma kag kaalam.—Sal. 104:24; Roma 1:20.

3. Suno sa 1 Corinto 15:21, 22, ano ang benepisyo sang halad-gawad ni Jesus?

³ Gusto ni Jehova nga ang mga tawo magkabuhi sing wala sing katapusan sa matahom nga duta nga iya gintuga. Pero sang nagrebelde sanday Adan kag Eva sa ila mahigugmaon nga Amay, indi na sila puede mabuhi sing wala sing katapusan. Napatay sila kag amo man ini ang matabo sa tanan nila nga kaanakan. (Roma 5:12) Ano ang ginhimo ni Jehova? Ginhambal niya dayon kon paano niya luwason ang katawhan. (Gen. 3:15) Magahatag si Jehova sang gawad nga magahilway sa kaanakan nanday Adan kag Eva sa sala kag kamatayon. Dayon hatagan niya sang kabuhi nga wala sing katapusan ang tanan nga magaalagad sa iya.—Juan 3:16; Roma 6:23; basaha ang 1 Corinto 15:21, 22.

4. Ano nga mga pamangkot ang binagbinagon naton sa sini nga artikulo?

⁴ Madamo kita sang posible ipamangkot parte sa promisa sang Dios nga pagbanhaw sa mga patay. Halimbawa, paano mahanabo ang pagkabanhaw? Makilala bala naton ang aton mga pinalangga kon banhawon na sila? Ngaa makahatag sa aton sing kalipay ang pagkabanhaw? Kag ano ang ginatudlo sa aton sang pagkabanhaw parte sa gugma, kaalam, kag pagkamapinasensiahon ni Jehova? Binagbinagon naton ini nga mga pamangkot.

PAANO MAHANABO ANG PAGKABANHAW?

5. Ngaa makasiling kita nga indi dungan ang pagbanhaw sa mga napatay kag mangin organisado ini?

⁵ Kon banhawon na ni Jehova paagi sa iya Anak ang minilyon nga napatay, posible gid nga indi dungan ang pagbanhaw sa ila. Ngaa? Bangod magaresulta sa kagamo kon hinali lang nga magdamo ang populasyon sa duta. Kag pirme organisado si Jehova sa iya mga ginahimo. Kabalo sia nga dapat mangin organisado ang tanan para may paghidait ang pagkabuhi sang mga tawo. (1 Cor. 14:33) Ginpakita ni Jehova nga Dios nga maalam sia kag mapinasensiahon sang ginahanda niya ang duta kaupod si Jesus antes ini istaran sang mga tawo. Ipakita man ni Jesus ini nga mga kinaiya sa tion sang iya Isa ka Libo ka Tuig nga Paggahom. Buligan niya ang mga makalampuwas sa Armageddon para ihanda ang duta kag ang mga kinahanglanon sang mga banhawon.

6. Suno sa Binuhatan 24:15, sin-o ang nalakip sa mga banhawon ni Jehova?

⁶ Ang pinakaimportante, dapat tudluan sang mga makalampuwas sa Armageddon ang mga banhawon parte sa Ginharian sang Dios kag parte sa mga ginapatuman ni Jehova. Ngaa? Bangod ang kalabanan sa mga banhawon amo ang ginatawag sa Biblia nga “mga indi matarong.” (Basaha ang Binuhatan 24:15.) Dapat sila maghimo sang madamo nga mga pagbag-o para makabenepisyo sila sa halad-gawad sang Cristo. Hunahunaa kon ano ang mga dapat himuon para matudluan sang kamatuoran parte sa Dios ang minilyon ka katawhan nga wala sing nabal-an parte kay Jehova. Isaisa bala sila nga tudluan pareho sa ginahimo naton subong nga paagi sang pagtudlo sang Biblia sa iban? Iasayn bala ining mga bag-uhan sa mga kongregasyon para hanason sila nga tudluan ang mga masunod nga banhawon? Wala kita kabalo sang sabat sa sini subong. Pero, kabalo kita nga sa katapusan sang Isa ka Libo ka Tuig nga Paggahom sang Cristo, “ang duta mapuno sang ihibalo tuhoy kay Jehova.” (Isa. 11:9) Masako gid kita pero malipayon sa tion sang Isa ka Libo ka Tuig nga Paggahom.

7. Ngaa ang katawhan sang Dios magapakita sang simpatiya sa mga banhawon samtang ginatudluan nila sila?

⁷ Sa tion sang Isa ka Libo ka Tuig nga Paggahom sang Cristo, tanan kita nga katawhan ni Jehova dapat maghimo sang mga pagbag-o para malipay sia sa aton. Gani magapakita gid kita sang simpatiya sa mga banhawon samtang ginabuligan naton sila nga madula ang ila malain nga mga handum kag tumanon ang mga ginapatuman ni Jehova. (1 Ped. 3:8) Bangod sini, mapalig-on ang mga banhawon nga mag-upod sa katawhan ni Jehova para simbahon sia bangod matalupangdan nila nga mapainubuson man kita nga ‘nagapanikasog para sa aton kaugalingon nga kaluwasan.’—Fil. 2:12.

MAKILALA BALA NATON ANG MGA BANHAWON?

8. Ngaa makasiling kita nga makilala naton ang aton mga pinalangga nga napatay kon banhawon na sila?

⁸ May pila ka rason ngaa makasiling kita nga makilala naton ang aton mga pinalangga nga napatay kon banhawon na sila. Halimbawa, base sa mga ginhimo ni Jehova nga pagbanhaw sang una, mapaabot naton nga ang mga banhawon niya may amo gihapon nga hitsura. Kon paano sila nagahambal kag nagahunahuna antes sila napatay, posible nga amo man ini gihapon kon banhawon na sila. Dumduma nga ginpaanggid ni Jesus ang kamatayon sa pagtulog kag ang pagkabanhaw sa pagpukaw sa nagakatulog. (Mat. 9:18, 24; Juan 11:11-13) Kon magbugtaw ang isa ka tawo, amo gihapon ang iya hitsura, tingog, kag mga nabal-an antes sia magtulog. Binagbinaga ang natabo kay Lazaro. Apat ka adlaw na sia nga napatay, gani nagaumpisa na nga madunot ang iya lawas. Pero sang ginbanhaw sia ni Jesus, nakilala sia dayon sang iya mga utod kag nakilala man sila ni Lazaro.—Juan 11:38-44; 12:1, 2.

9. Ngaa makasiling kita nga ang mga banhawon indi pa perpekto?

⁹ Nagpromisa si Jehova nga sa Paraiso, wala sing magasiling: “Nagamasakit ako.” (Isa. 33:24; Roma 6:7) Gani ang tanan nga banhawon may maayo nga panglawas. Pero, indi pa sila perpekto. Kay kon perpekto na sila, posible nga indi sila makilala sang ila mga pamilya kag mga abyan. Mahimo gid nga amat-amat nga mangin perpekto ang mga tawo sa tion sang Isa ka Libo ka Tuig nga Paggahom sang Cristo. Ibalik ni Jesus sa iya Amay ang Ginharian sa katapusan sang isa ka libo ka tuig. Sa sini nga tion, nahimo na sang Ginharian ang mga dapat sini himuon, lakip ang pagbulig sa mga tawo nga mangin perpekto.—1 Cor. 15:24-28; Bug. 20:1-3.

NGAA ANG PAGKABANHAW MAKAHATAG SA ATON SING KALIPAY?

10. Ano ang mabatyagan mo kon banhawon na ang imo mga pinalangga nga napatay?

¹⁰ Imadyina ang imo mabatyagan kon makita mo liwat ang imo mga pinalangga nga napatay. Basi makahibi ka bangod sa kalipay. Ukon basi magakanta ka pa gani para dayawon si Jehova. Sigurado nga mas palanggaon mo pa gid ang aton mahigugmaon nga Amay kag ang iya Anak bangod sang ila dalayawon nga regalo nga pagkabanhaw.

11. Suno sa ginsiling ni Jesus sa Juan 5:28, 29, ano ang maeksperiensiahan sang mga magatuman sa Dios?

¹¹ Imadyina ang kalipay sang mga nabanhaw samtang ginabag-o nila ang ila personalidad para matuman nila ang Dios. Ang mga nagahimo sini nga mga pagbag-o magakabuhi sing wala sing katapusan sa Paraiso. Pero para indi madula ang paghidait, indi pagtugutan sang Dios nga padayon nga magkabuhi sa Paraiso ang mga indi luyag magbag-o.—Isa. 65:20; basaha ang Juan 5:28, 29.

12. Paano pakamaayuhon ni Jehova ang tanan nga tawo sa duta?

¹² Kon ang Ginharian sang Dios na ang magagahom sa bilog nga duta, maeksperiensiahan sang tanan nga katawhan sang Dios nga matuod gid ang ginasiling sang Hulubaton 10:22. Nagasiling ini: “Ang pagpakamaayo ni Jehova amo ang nagapamanggad sa tawo, kag wala Sia nagadugang sing kasakit sa sini.” Sa bulig sang espiritu ni Jehova, mas labi nga mailog sang katawhan sang Dios ang Cristo kag amat-amat sila nga mangin perpekto. (Juan 13:15-17; Efe. 4:23, 24) Kada adlaw, mas nagapagros sila kag nagaayo ang ila kahimtangan. Mangin malipayon gid ang aton kabuhi sa sini nga tion. (Job 33:25) Pero, paano ang pagpamalandong sa pagkabanhaw makabulig sa imo subong?

ANG MATUN-AN NATON PARTE SA GUGMA NI JEHOVA

13. Suno sa Salmo 139:1-4, daw ano kita ka kilala ni Jehova, kag paano ini ginapamatud-an sang pagkabanhaw?

¹³ Nabinagbinag naton nga kon banhawon na ni Jehova ang mga napatay, ibalik niya ang ila mga memorya kag mga kinaiya. Hunahunaa kon ano ang ginatudlo sini sa aton parte kay Jehova. Palangga ka gid ni Jehova kay ginatalupangod niya ang tanan mo nga ginahunahuna, ginabatyag, ginasiling, kag ginahimo. Gani, kon banhawon ka niya, mahapos lang para sa iya nga ibalik ang imo memorya kag mga kinaiya. Kabalo si Hari David nga kilala gid kita ni Jehova sing maayo. (Basaha ang Salmo 139:1-4.) Bangod kilala gid kita ni Jehova, paano ini makabulig sa aton?

14. Ano ang dapat naton mabatyagan kon ginapamalandungan naton kon daw ano kita ka kilala ni Jehova?

¹⁴ Kon ginapamalandungan naton kon daw ano kita ka kilala ni Jehova, indi kita dapat mabalaka. Ngaa? Dumduma nga palangga gid kita ni Jehova. Para sa iya, hamili ang kada isa sa aton. Ginadumdom niya ang tanan naton nga naeksperiensiahan sa aton kabuhi nga nakaimpluwensia sa aton. Makapaumpaw gid ini. Indi gid kita dapat magbatyag nga nagaisahanon lang kita. Kaupod naton pirme si Jehova kag gusto niya kita buligan.—2 Cron. 16:9.

ANG MATUN-AN NATON PARTE SA KAALAM NI JEHOVA

15. Paano ginapamatud-an sang pagkabanhaw nga maalam si Jehova?

¹⁵ Ang kahadlok sa kamatayon isa ka epektibo nga armas sang mga kaaway. Ginagamit ini sang mga naimpluwensiahan ni Satanas para piliton ang mga tawo nga luiban ang ila mga abyan ukon maghimo sang malain. Pero indi nila ini magamit sa aton. Kabalo kita nga bisan pa patyon kita sang aton mga kaaway, banhawon kita ni Jehova. (Bug. 2:10) Kumbinsido kita nga wala sila sing mahimo para punggan kita nga mag-alagad kay Jehova. (Roma 8:35-39) Maalam gid si Jehova kay ginhatagan niya kita sang paglaum nga mabanhaw. Bangod sini, wala kita nahadlok kon pahugon kita sang mga tawo nga naimpluwensiahan ni Satanas kag nagahatag ini sa aton sang kaisog nga mangin matutom kay Jehova.

16. Ano ang mga dapat mo ipamangkot sa imo kaugalingon, kag paano ini makabulig sa imo nga mabal-an kon bala nagasalig ka kay Jehova?

¹⁶ Kon pahugon ka sang mga kaaway ni Jehova nga patyon ka nila, magasalig ka ayhan nga banhawon ka ni Jehova? Paano mo mabal-an nga magasalig ka kay Jehova? Ang isa ka paagi amo ang pagpamangkot sa imo kaugalingon, ‘Makita bala bisan sa gagmay nga desisyon nga ginahimo ko kada adlaw nga nagasalig ako kay Jehova?’ (Luc. 16:10) Ang isa pa ka pamangkot amo ini, ‘Makita bala sa akon pagkabuhi nga nagasalig ako sa promisa ni Jehova nga amanan niya ako sang akon materyal nga mga kinahanglanon kon unahon ko ang iya Ginharian?’ (Mat. 6:31-33) Kon huo ang imo sabat sa sini nga mga pamangkot, ginapakita mo nga nagasalig ka kay Jehova kag handa ka sa bisan ano nga pagtilaw.—Hulu. 3:5, 6.

ANG MATUN-AN NATON PARTE SA PAGKAMAPINASENSIAHON NI JEHOVA

17. (a) Paano ginapakita sang pagkabanhaw nga mapinasensiahon si Jehova? (b) Paano naton mapakita nga nagapasalamat kita kay mapinasensiahon si Jehova?

¹⁷ Nakadesisyon na si Jehova kon ano nga adlaw kag oras niya laglagon ining malaut nga kalibutan. (Mat. 24:36) Himuon gid niya ini sa iya gintalana nga tion, gani mapinasensiahon sia nga nagahulat. Gusto na gid niya nga banhawon ang mga patay. (Job 14:14, 15) Pero ginahulat niya ang husto nga tion nga himuon ini. (Juan 5:28) Dapat gid naton pasalamatan si Jehova kay mapinasensiahon sia. Hunahunaa ini: Bangod mapinasensiahon nga nagahulat si Jehova, madamo nga tawo lakip na kita ang ‘ginahatagan sang kahigayunan nga maghinulsol.’ (2 Ped. 3:9) Gusto ni Jehova nga madamo gid nga tawo ang mahatagan sang paglaum nga mabuhi sing wala sing katapusan. Gani ipakita naton nga nagapasalamat kita kay mapinasensiahon sia. Paano? Paagi sa paghimo sang aton bug-os nga masarangan nga makita ang mga tawo nga “may husto nga panimuot sa pagtigayon sing kabuhi nga wala sing katapusan” kag buligan sila nga higugmaon kag alagaron si Jehova. (Binu. 13:48) Kon himuon naton ini, makabenepisyo man sila sa pagkamapinasensiahon ni Jehova, pareho sa aton.

18. Ngaa dapat kita mangin mapinasensiahon sa iban?

¹⁸ Samtang wala pa matapos ang isa ka libo ka tuig, indi paghunahunaon ni Jehova nga perpekto na kita. Mapinasensiahon sia nga magahulat nga matapos ini nga tion. Samtang wala pa ini matapos, handa si Jehova nga patawaron ang aton mga sala. Gani, ilugon naton sia paagi sa pagpokus sa maayo nga mga kinaiya sang iban kag mangin mapinasensiahon kita sa ila. Binagbinaga ang eksperiensia sang isa ka sister. Gin-atake sang grabe nga nerbios ang iya bana kag wala na nagtambong sa mga miting. Ang sister nagsiling: “Nabudlayan gid ako. Gulpi lang nagbag-o ang amon kahimtangan kag indi na namon mahimo ang mga plano namon sa amon pamilya.” Pero palangga gid sini nga sister ang iya bana, gani mapinasensiahon sia sa iya. Nagsalig sia kay Jehova, gani nasarangan niya ang mga problema. Pareho kay Jehova, nagpokus sia sa maayo nga mga kinaiya sang iya bana. Nagsiling sia, “Maayo nga tawo ang akon bana kag ginatinguhaan niya nga amat-amat nga madula ang iya nerbios.” Importante gid nga mangin mapinasensiahon kita sa miembro sang aton pamilya ukon sa mga kauturan sa kongregasyon nga nagaatubang sang mabudlay nga mga problema.

19. Ano ang dapat naton himuon?

¹⁹ Nalipay gid si Jesus kag ang mga anghel sang gintuga ang duta. Pero imadyina ang ila kalipay kon ang tanan nga tawo sa duta mangin perpekto na kag tanan sila nagahigugma kag nagaalagad kay Jehova. Imadyina ang kalipay sang mga mangin kaupod sang Cristo nga magagahom sa langit kon makita na nila nga nagabenepisyo ang katawhan sa ila ginahimo. (Bug. 4:4, 9-11; 5:9, 10) Kag imadyina ang imo kabuhi kon indi ka na maghibi bangod sa kasakit kundi bangod sa kalipay, kag wala na sing balatian, kasubo, kag kamatayon. (Bug. 21:4) Samtang wala pa ini, himua ang imo bug-os nga masarangan nga ilugon ang imo mahigugmaon, maalam, kag mapinasensiahon nga Amay. Kon himuon mo ini, mangin malipayon ka gihapon bisan pa may mga pagtilaw. (Sant. 1:2-4) Nagapasalamat gid kita nga nagpromisa si Jehova nga “may pagkabanhaw”!—Binu. 24:15.