“Magpalapit kamo sa Dios, kag magapalapit sia sa inyo.”—Santiago 4:8

Ginapamatian Bala sang Dios ang Aton mga Pangamuyo?

Nagapalibog ka bala kon nagapamati gid man ang Dios kon nagapangamuyo ka? Ginapaligban man ina sang madamo nga tawo. Madamo ang nagapangamuyo sa Dios nga hatagan sing solusyon ang ila mga problema, pero wala man ini gihapon nasolusyonan. Buot bala silingon nga wala ginasapak sang Dios ang aton mga pangamuyo? Indi! Nagapasalig ang Biblia nga ginapamatian kita sang Dios kon nagapangamuyo kita sa iya sa insakto nga paagi. Binagbinagon naton kon ano ang ginasiling sang Biblia.

NAGAPAMATI ANG DIOS.

“O Manugpamati sang pangamuyo, ang tanan nga sahi sang tawo magapalapit sa imo.”—Salmo 65:2.

Siling sang iban, nagatawhay ang ila pensar kon nagapangamuyo sila. Gani bisan wala sila nagapati nga may nagapamati sa ila, nagapangamuyo sila gihapon. Pero nagapangamuyo kita indi lang para mangin maayo ang aton pamatyag kag maatubang ang aton mga problema. Ginapasalig kita sang Biblia nga “si Jehovaa malapit sa tanan nga nagapanawag sa iya, sa tanan nga nagapanawag sa iya sa kamatuoran. . . . Ginapamatian niya ang ila pagpangayo sing bulig.”—Salmo 145:18, 19.

Gani sigurado kita nga ginapamatian ni Jehova nga Dios ang mga pangamuyo sang mga nagasimba sa iya. Mahigugmaon sia nga nagasiling: “Magapanawag kamo sa akon kag magadangop kamo kag magapangamuyo sa akon, kag magapamati ako sa inyo.”—Jeremias 29:12.

GUSTO SANG DIOS NGA MANGAMUYO KA SA IYA.

Isa ka amay nga nagapungko sa tupad sang iya bata nga babayi samtang nagahampang ini sang mga hampanganan.

“Magpadayon kamo sa pagpangamuyo.”—Roma 12:12.

Sa Biblia, ginapalig-on kita nga ‘magpadayon sa pagpangamuyo’ kag ‘padayon nga magpangamuyo sa tagsa ka higayon.’ Maathag nga gusto ni Jehova nga Dios nga mangamuyo kita sa iya.—Mateo 26:41; Efeso 6:18.

Ngaa gusto sang Dios nga mangamuyo kita sa iya? Binagbinaga: May ginikanan bala nga indi gusto nga ang iya bata magsiling sa iya “Buligi ’ko ’Tay”? Mahimo bal-an na sang amay kon ano ang kinahanglan kag ginabatyag sang iya bata. Pero kon mabatian niya nga nagapangayo sang bulig ang iya bata, mabatyagan niya nga ginasaligan sia sang iya bata kag malapit gid ini sa iya. Pareho man sa sini kon nagapangamuyo kita kay Jehova nga Dios. Ginapakita naton nga ginasaligan naton sia kag gusto naton nga mangin malapit sa iya.—Hulubaton 15:8; Santiago 4:8.

NAGAULIKID GID ANG DIOS SA IMO.

Isa ka negosyante nga masubo nga nagapungko sa halintang sang isa ka bilding. Tupad niya ang isa ka kahon nga puno sang iya mga gamit sa opisina.

‘Itugyan ninyo sa iya ang tanan ninyo nga kabalaka, kay nagaulikid sia sa inyo.’—1 Pedro 5:7.

Gusto sang Dios nga mangamuyo kita sa iya bangod palangga niya kita kag nagaulikid sia sa aton. Kabalo gid sia sang aton mga problema kag mga ginakabalak-an, kag gusto niya nga buligan kita.

Sa bilog niya nga kabuhi, nangamuyo si Hari David kay Jehova nga Dios para buligan sia kag para isugid sa Iya ang iya mga ginahunahuna kag ginabatyag. (Salmo 23:1-6) Ano ang pagtan-aw sang Dios kay David? Palangga sang Dios si David kag ginpamatian niya ang iya madamo nga pangamuyo. (Binuhatan 13:22) Pareho kay David, ginapamatian sang Dios ang aton mga pangamuyo bangod nagaulikid sia sa aton.

“GINAHIGUGMA KO SI JEHOVA BANGOD GINAPAMATIAN NIYA ANG AKON TINGOG”

Amo ini ang ginsiling sang isa sang mga nagsulat sang mga salmo sa Biblia. Sigurado sia nga ginapamatian sang Dios ang iya mga pangamuyo, kag daku gid ang epekto sini sa iya. Nabatyagan niya nga nangin mas malapit sia sa Dios kag may kusog nga maatubang ang kalisdanan kag kasubo sang kabuhi.—Salmo 116:1-9.

Kon kumbinsido kita nga ginapamatian sang Dios ang aton mga pangamuyo, magapadayon kita sa pagpakig-istorya sa iya. Binagbinaga ang eksperiensia ni Pedro, nga nagaistar sa naaminhan nga bahin sang Spain. Napatay sa aksidente sa salakyan ang iya 19 anyos nga bata nga lalaki. Grabe gid ang kasubo ni Pedro, gani pirme sia nagapangamuyo para ipautwas sa Dios ang iya ginabatyag kag para mangayo sing paumpaw kag bulig. Ano ang natabo? “Ginsabat ni Jehova ang akon mga pangamuyo paagi sa paumpaw kag bulig nga nabaton ko kag sang akon asawa halin sa pareho namon nga mga Cristiano,” siling ni Pedro.

Masubo nga lalaki nga nagauyat sang piktyur samtang ginapaumpawan sia sang iya mga abyan. — Sa masami, ang paumpaw kag bulig sang mga abyan nga nagaulikid sa aton amo ang sabat sa aton mga pangamuyo

Wala man nabuhi liwat ang iya bata, pero daku gid ang nabulig sang pangamuyo kay Pedro kag sa iya pamilya. Ang iya asawa, nga si María Carmen, nagsiling: “Nabuligan ako sang pangamuyo nga mabatas ang kasubo. Kabalo ako nga naintiendihan ako ni Jehova nga Dios. Kay kon mangamuyo ako sa iya, mabatyagan ko ang kalinong kag nagakalma ako dayon.”

Maathag gid nga ginapakita sang Biblia kag sang personal nga mga eksperiensia nga ginapamatian sang Dios ang mga pangamuyo. Pero maathag man nga may mga pangamuyo nga wala ginasabat sang Dios. Ngaa ginasabat sang Dios ang iban nga pangamuyo, kag ang iban wala?

a Si Jehova ang ngalan sang Dios.—Salmo 83:18.