May Masaligan Bala nga Giya Para sa Maayo nga Palaabuton?

Suno sa nabinagbinag na sa nagligad nga mga artikulo, gusto gid sang mga tawo nga mangin maayo ang ila palaabuton. Gani, nagsalig sila sa kapalaran, sa edukasyon, sa manggad, kag gintinguhaan nila nga mangin maayo nga tawo. Pero ang paghimo sini para mangin maayo ang palaabuton daw pareho lang sa paggamit sang sala nga mapa pakadto sa isa ka lugar. Buot silingon bala nga wala sing masaligan nga giya para sa maayo nga palaabuton? Indi!

ANG MAKAHATAG SANG PINAKAMAAYO NGA GIYA

Kon nagahimo sang mga desisyon, masami nga nagapamangkot kita sa isa nga mas magulang kag mas maalam sangsa aton. Pareho sa sini, makakita man kita sing masaligan nga giya para sa aton palaabuton halin sa Isa nga mas madugay na nga nagkabuhi kag mas maalam sangsa aton. Mabasa naton ang iya laygay sa isa ka libro nga ginsugdan nga isulat mga 3,500 ka tuig na ang nagligad. Ini nga libro, koleksion sang balaan nga mga sinulatan kag ginatawag ini nga Biblia.

Ngaa masaligan naton ang Biblia? Bangod ang Awtor sini amo ang pinakamaalam kag pinakadugay na nga Persona nga nagakabuhi sa uniberso. Gintawag sia nga “ang Dumaan sang mga Adlaw” nga “halin sa wala sing katubtuban tubtob sa wala sing katubtuban.” (Daniel 7:9; Salmo 90:2) Sia “ang Manunuga sang langit, ang matuod nga Dios, ang Manughimo sang duta.” (Isaias 45:18) Ginapakilala niya ang iya kaugalingon paagi sa iya personal nga ngalan nga amo si Jehova.—Salmo 83:18.

Ang Biblia halin sa Manunuga sang tanan nga tawo. Gani wala ini sing ginapasulabi nga kultura ukon pungsod. Ang mga laygay sini praktikal gihapon asta subong kag nakabulig gid sa mga tawo. Mabasa ini sa madamo nga lenguahe kag amo ini ang pinakadamo nga napanagtag nga libro.a Buot silingon, mabasa ini sang mga tawo bisan diin kag puede gid sila magpagiya sa sini. Gani maathag nga matuod gid ining ginasiling sang Biblia:

“Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.”—BINUHATAN 10:34, 35.

Pareho sa isa ka mapinalanggaon nga ginikanan nga nagagiya sa iya mga kabataan, si Jehova nga Dios isa man ka mahigugmaon nga Amay nga nagabulig sa aton paagi sa iya Pulong, ang Biblia. (2 Timoteo 3:16) Masaligan mo gid ang iya Pulong, kay man sia ang nagtuga sa aton kag kabalo sia kon ano ang makapalipay sa aton.

MASALIGAN NATON ANG BIBLIA

Ang Biblia masaligan gid nga giya para sa palaabuton kay mga 2,000 ka tuig na ang nagligad, gintagna sini ang mga hitabo sa kalibutan kag ang mangin batasan sang mga tawo. Natuman gid ini kay makita naton nga nagakatabo ini subong.

MGA HITABO

“Magailinaway ang mga pungsod kag subong man ang mga ginharian. May mabaskog nga mga linog, kag sa nagkalainlain nga lugar may kakulang sa pagkaon kag mga balatian.”—LUCAS 21:10, 11.

MGA BATASAN SANG MGA TAWO

“Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, manugpasipala, indi matinumanon sa mga ginikanan, indi mapinasalamaton, indi mainunungon, indi mapinalanggaon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios.”—2 TIMOTEO 3:1-4.

Ano ang masiling mo kay nakita mo nga sibu gid ang mga tagna sang Biblia sa mga nagakatabo subong? Sigurado nga nagaugyon ka gid sa ginsiling ni Leung nga taga-Hong Kong: “Ang mga tagna sa Biblia, madugay na kaayo nga ginsulat. Kon sa tawo lang ini naghalin, imposible gid nga matuman ini sang amo sina ka detalyado. Gani, sigurado nga ang Biblia naghalin sa Isa nga mas maalam sangsa aton.”

Mabasa sa Biblia ang ginatos ka tagna nga natuman na.b Pamatuod ini nga ang Biblia, Pulong gid sang Dios. “Ako ang Dios kag wala sing bisan sin-o nga kaangay sa akon,” siling ni Jehova. “Halin sa ginsuguran gintagna ko ang mahanabo.” (Isaias 46:9, 10) Bangod sini, masaligan mo gid ang ginasiling sang Biblia parte sa palaabuton.

GIYA NGA MAKABULIG SA IMO SUBONG KAG SA WALA SING KATAPUSAN

Kon sundon mo ang giya nga mabasa sa Balaan nga Kasulatan, makabenepisyo ka gid. Binagbinaga ang masunod nga mga halimbawa.

MAAYO NGA LAYGAY PARTE SA KUARTA KAG TRABAHO

“Mas maayo pa ang diutay nga pahuway sangsa tuman nga pagpangabudlay kag paglagas sa hangin.”—MANUGWALI 4:6.

KON PAANO MANGIN MALIPAYON ANG PAMILYA

“Ang kada isa sa inyo dapat maghigugma sang iya asawa kaangay sang paghigugma niya sang iya kaugalingon. Subong man, ang asawa dapat may tudok nga pagtahod sa iya bana.”—EFESO 5:33.

KON PAANO MAKIGBAGAY SA IBAN

“Isikway ang kaakig kag bayai ang kasingkal; indi ka magkaakig kag maghimo sing malaut.”—SALMO 37:8.

Kon sundon mo ang ginasiling sang Biblia, mangin maayo ang imo kabuhi subong kag may maayo ka man nga palaabuton. Sa Biblia, mabasa man naton ang promisa sang Dios parte sa matahom nga palaabuton nga

MAY PAGHIDAIT NA KAG SEGURIDAD

“Mangin malipayon gid sila sa bugana nga paghidait.”—SALMO 37:11.

MAY BALAY NA KAG PAGKAON PARA SA TANAN

“Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini.”—ISAIAS 65:21.

WALA NA SING BALATIAN UKON KAMATAYON

“Wala na sing kamatayon, ukon paglalaw ukon paghibi ukon kasakit pa.”—BUGNA 21:4.

Ano ang dapat mo himuon para mabaton mo ini nga palaabuton? Binagbinaga ang masunod nga artikulo.

a Para sa dugang nga impormasyon parte sa pag-translate kag pagpanagtag sang Biblia, kadtui ang www.jw.org/hil kag buksi ang PANUDLO SANG BIBLIA > KASAYSAYAN KAG ANG BIBLIA.

b Para sa dugang nga impormasyon, basaha ang kapitulo 9 sang libro nga The Bible—God’s Word or Man’s? nga ginhimo sang mga Saksi ni Jehova. Mabasa man ini online sa www.jw.org. Buksi ang LIBRARY > BOOKS & BROCHURES.