TULUN-AN NGA ARTIKULO 11
Makabulig ang Pagbasa sang Biblia Para Masarangan Mo ang mga Problema
“Ang Dios . . . nagabulig sa aton sa pagbatas.”—ROMA 15:5.
AMBAHANON 94 Salamat sa Pulong sang Dios
ANG BINAGBINAGON SA SINI NGA ARTIKULOa
1. Ano nga mga problema ang ginabatas sang katawhan ni Jehova?
MAY ginabatas ka bala nga mabudlay nga problema? Basi may ginhimo ukon ginsiling ang isa ka utod sa kongregasyon nga nagpalain sang imo buot. (Sant. 3:2) Ukon basi ginayaguta ka sang imo mga kaupod sa trabaho ukon sa eskwelahan bangod nagaalagad ka kay Jehova. (1 Ped. 4:3, 4) Ukon basi ginapunggan ka sang imo pamilya nga magtambong sa mga miting kag indi nila gusto nga isugid mo sa iban ang imo mga ginapatihan. (Mat. 10:35, 36) Kon nagabatas ka sang mabudlay gid nga problema, mahimo nga magbatyag ka nga mas maayo siguro nga mag-untat na lang sa pag-alagad kay Jehova. Pero makasalig ka nga bisan ano man ang imo problema, hatagan ka ni Jehova sang kaalam para makahimo ka sang maayo nga mga desisyon kag sang kusog para mabatas mo ini.
2. Suno sa Roma 15:4, paano makabulig sa aton ang pagbasa sang Biblia?
2 Ginsigurado ni Jehova nga masulat sa Biblia ang mga halimbawa sang indi perpekto nga mga tawo nga nagbatas sang mga problema. Ngaa? Kay suno sa ginpasulat ni Jehova kay apostol Pablo sa Roma 15:4, may matun-an kita sa sini. (Basaha.) Kon basahon naton ini nga mga halimbawa, magapabakod ini sa aton kag magahatag sa aton sing paglaum. Pero, indi bastante nga basahon lang naton ang Biblia. Dapat siguraduhon naton nga may epekto ini sa aton hunahuna kag balatyagon. Ano ang puede naton himuon kon may problema kita kag gusto naton mabal-an ang pinakamaayo nga solusyon? Ari ang apat nga puede naton himuon: (1) Magpangamuyo, (2) Imadyina ang imo ginabasa, (3) Magpamalandong, kag (4) Iaplikar ang imo mga natun-an. Binagbinagon naton kon paano naton ini himuon.b Dayon gamiton naton ining paagi sang pagtuon sa pagbinagbinag sang kabuhi ni Hari David kag ni apostol Pablo.
1. MAGPANGAMUYO
Antes mo basahon ang Biblia, pangabaya si Jehova nga buligan ka nga makita ang mga leksion nga makabulig sa imo (Tan-awa ang parapo 3)
3. Antes mo basahon ang Biblia, ano ang dapat mo himuon, kag ngaa?
3 (1) Magpangamuyo. Antes mo basahon ang Biblia, pangabaya si Jehova nga buligan ka nga makita ang mga leksion nga makabulig sa imo. Halimbawa, pangabaya si Jehova nga buligan ka nga makita ang mga prinsipio sa Biblia nga makabulig sa imo nga masarangan ang imo problema, kag mabal-an kon ano ang dapat mo himuon.—Fil. 4:6, 7; Sant. 1:5.
2. IMADYINA ANG IMO GINABASA
Imadyina nga ikaw ang panguna nga karakter sa kasaysayan sa Biblia nga imo ginabasa (Tan-awa ang parapo 4)
4. Ano ang puede mo himuon para mangin tuodtuod ang kasaysayan sa Biblia nga imo ginabasa?
4 (2) Imadyina ang imo ginabasa. Ginhatagan kita ni Jehova sang dalayawon nga ikasarang nga maimadyin ang mga butang. Kon nagabasa ka sang isa ka kasaysayan sa Biblia, imadyina nga ikaw ang panguna nga karakter. Imadyina ang iya mga nakita kag nabatyagan, kag imadyina ang mga nagakatabo. Paagi sa sini, mangin tuodtuod ang kasaysayan nga imo ginabasa.
3. MAGPAMALANDONG
Hunahunaa sing maayo ang imo ginabasa kag kon paano mo ini iaplikar (Tan-awa ang parapo 5)
5. Ano ang pagpamalandong, kag paano mo ini himuon?
5 (3) Magpamalandong. Ang pagpamalandong amo ang paghunahuna sing maayo sa imo ginabasa kag kon paano mo ini iaplikar. Makabulig ini sa imo nga mahangpan sing maayo ang imo ginabasa kag mabal-an kon ano ang kaangtanan sini sa iban pa nga impormasyon. Kon nagabasa ka sang Biblia pero wala ka nagapamalandong, daw pareho lang ina nga may puzzle ka nga nagalinapta sa lamesa pero wala mo ini ginasugponsugpon. Kon nagapamalandong ka, daw pareho lang nga ginasugponsugpon mo ang puzzle para makita mo kon ano gid ang hitsura sini. Para makapamalandong ka sing maayo kon nagabasa ka sang isa ka kasaysayan sa Biblia, puede mo sabton ini nga mga pamangkot: ‘Ano ang ginhimo sang panguna nga karakter para masolbar ang iya problema? Paano sia ginbuligan ni Jehova? Paano ko maaplikar ang mga natun-an ko sa sini nga kasaysayan para mabatas ko ang akon mga problema?’
4. IAPLIKAR ANG IMO MGA NATUN-AN
Iaplikar ang imo mga natun-an para makahimo ka sang maayo nga mga desisyon, mangin malinong ang imo hunahuna, kag magbakod ang imo pagtuo (Tan-awa ang parapo 6)
6. Ngaa dapat naton iaplikar ang aton mga natun-an?
6 (4) Iaplikar ang imo mga natun-an. Nagsiling si Jesus nga kon indi naton pag-iaplikar ang aton mga natun-an, daw pareho kita sa isa ka tawo nga nagpatindog sang iya balay sa balas. Kanugon lang sang iya pagpangabudlay. Ngaa? Kay kon magbagyo kag magbaha, marumpag gid ang iya balay. (Mat. 7:24-27) Posible nga nagapangamuyo man kita, ginaimadyin naton ang aton ginabasa, kag nagapamalandong. Pero kon wala naton ginaaplikar ang aton mga natun-an, kanugon lang sang aton mga pagpanikasog. Kon makaeksperiensia kita sang mga problema ukon mga paghingabot, indi ini masarangan sang aton pagtuo. Pero kon nagatuon kita kag ginaaplikar naton ang aton mga natun-an, makahimo kita sang maayo nga mga desisyon, mangin malinong ang aton hunahuna, kag magabakod ang aton pagtuo. (Isa. 48:17, 18) Hibaluon naton kon ano ang matun-an naton sa isa ka hitabo sa kabuhi ni Hari David paagi sa pag-aplikar sa apat ka panugda nga ginbinagbinag naton.
ANO ANG MATUN-AN MO KAY HARI DAVID?
7. Kay sin-o kasaysayan sa Biblia ang aton binagbinagon?
7 May ginhimo bala ang imo abyan ukon miembro sang imo pamilya nga nagpalain sang imo buot? Naeksperiensiahan man ini ni Hari David. Nasakitan gid sia sang gusto agawon ni Absalom nga iya anak ang ginharian. Gani makabulig gid sa imo kon binagbinagon mo ini nga kasaysayan.—2 Sam. 15:5-14, 31; 18:6-14.
8. Ano ang puede mo himuon para buligan ka ni Jehova?
8 (1) Magpangamuyo. Antes mo basahon ang kasaysayan ni David, ipabutyag kay Jehova ang imo ginabatyag bangod sang indi maayo nga ginhimo sa imo. (Sal. 6:6-9) Isugid kay Jehova kon ano gid ang imo ginabatyag. Dayon pangabaya si Jehova nga buligan ka nga makita ang mga prinsipio nga makabulig sa imo nga mabal-an kon ano ang dapat mo himuon.
9. Ano ang natabo kanday David kag Absalom?
9 (2) Imadyina ang imo ginabasa. Imadyina ang nagakatabo sa kasaysayan ni Hari David nga imo ginabasa, kag kon ano ang epekto sini sa iya. Sa sulod sang madamo nga tinuig, may mga ginhimo si Absalom nga anak ni David para makuha niya ang simpatiya sang mga tawo. (2 Sam. 15:7) Dayon sang nahunahuna ni Absalom nga nag-abot na ang pinakamaayo nga tion para agawon ang ginharian, nagpadala sia sing mga espiya sa bilog nga Israel para batunon sia dayon sang mga tawo bilang ila hari. Nakumbinsi pa gani niya nga mag-upod sa iya pagrebelde si Ahitofel nga suod nga abyan kag manuglaygay ni David. Ginpabalo ni Absalom nga sia na ang hari, kag naghimo sia sang plano nga patyon si David nga posible may malala nga balatian sadto. (Sal. 41:1-9) Ara sa Jerusalem si David sang nabal-an niya ang ginahimo nga plano ni Absalom, gani nagpalagyo sia. Sang ulihi, nag-inaway ang mga soldado ni Absalom kag ang mga soldado ni David nga nag-unong sa iya. Napierde ang mga rebelde kag napatay si Absalom.
10. Ano kuntani ang puede nga nangin reaksion ni Hari David?
10 Dayon, imadyina kon ano ayhan ang ginbatyag ni David samtang nagakatabo ini tanan nga problema. Palangga niya si Absalom kag ginsaligan niya si Ahitofel. Pero, ginluiban nila si David kag gusto pa gani nila sia patyon. Nasakitan gid si David sa ila ginhimo. Puede kuntani nga indi na pagsaligan ni David ang iban pa niya nga mga abyan kay basi nagasuportar man sila kay Absalom. Puede man nga sia lang ang magpalagyo para luwason ang iya kaugalingon. Ukon puede man nga magluya gid ang iya buot kag pamensaron niya nga wala na sing solusyon ang iya problema. Pero wala ini ginhimo ni David. Sa baylo, nasarangan niya ining mabudlay nga problema. Paano?
11. Ano ang ginhimo ni David para masarangan niya ang mabudlay nga problema?
11 (3) Magpamalandong. Ano nga mga prinsipio ang matun-an mo sa kasaysayan ni David? Sabta ang pamangkot nga, “Ano ang ginhimo ni David para masarangan niya ang iya problema?” Nagpabilin nga kalmado si David kag wala sia nagpadasudaso sa paghimo sang indi maayo nga mga desisyon. Gintinguhaan niya nga indi mabalaka sing sobra kay posible mabudlayan sia sa paghimo sang desisyon kon mahadlukan sia. Nangamuyo sia kay Jehova nga buligan sia. Nangayo man sia sing bulig sa iya mga abyan. Kag ginhimo niya dayon ang iya mga nadesisyunan. Bisan pa nasakitan gid si David, wala sia nagdumot kag wala nadula ang pagsalig niya sa iban. Padayon sia nga nagsalig kay Jehova kag sa iya mga abyan.
12. Ano ang ginhimo ni Jehova para buligan si David?
12 Paano ginbuligan ni Jehova si David? Kon mag-research kita, mabal-an naton nga ginpabakod ni Jehova si David para mabatas niya ang iya problema. (Sal. 3:1-8; superskripsion) Ginpakamaayo ni Jehova ang mga desisyon ni David. Kag ginbuligan niya ang mga abyan ni David nga nag-unong sa iya sang nagpakig-away sila para amligan ang ila hari.
13. Kon may ginhimo ang iban nga nagpalain gid sang imo buot, paano mo mailog si David? (Mateo 18:15-17)
13 (4) Iaplikar ang imo mga natun-an. Pamangkuta ang imo kaugalingon, ‘Paano ko mailog si David?’ Himua dayon ang mga puede mo himuon para masolbar ang imo problema. Depende sa kahimtangan, puede mo sundon ang ginlaygay ni Jesus nga dapat mo himuon nga mabasa sa Mateo kapitulo 18 ukon puede mo man iaplikar ang prinsipio sang sini nga laygay. (Basaha ang Mateo 18:15-17.) Pero indi ka dapat magpadasudaso sa paghimo sang mga desisyon kon akig ka. Dapat ka mangamuyo kay Jehova nga buligan ka nga mangin kalmado kag mabal-an kon ano ang dapat mo himuon. Saligi gihapon ang imo mga abyan kag batuna ang ila bulig. (Hulu. 17:17) Kag ang pinakaimportante, tumana ang laygay ni Jehova nga mabasa sa iya Pulong.—Hulu. 3:5, 6.
ANO ANG MATUN-AN MO KAY PABLO?
14. Sa ano nga mga kahimtangan makabulig ang 2 Timoteo 1:12-16; 4:6-11, 17-22?
14 Ginapamatukan ka bala sang imo pamilya? Ukon nagaistar ka bala sa pungsod nga ginadumilian ang mga hilikuton sang katawhan ni Jehova? Kon amo sini ang imo kahimtangan, mapalig-on ka gid sa mabasa mo sa 2 Timoteo 1:12-16 kag 4:6-11, 17-22.c Ginsulat ini ni Pablo sang ara sia sa prisuhan.
15. Ano ang puede mo ipangabay kay Jehova?
15 (1) Magpangamuyo. Antes mo basahon ang ginsambit nga mga teksto, isugid kay Jehova ang imo problema kag kon ano gid ang imo ginabatyag. Dayon pangabaya si Jehova nga buligan ka nga makita ang mga prinsipio nga matun-an mo sa natabo kay Pablo, kag kon paano ini makabulig sa imo nga masarangan ang imo problema.
16. Ano ang natabo kay Pablo?
16 (2) Imadyina ang imo ginabasa. Imadyina nga ikaw si Pablo nga napriso sa Roma. Nakaagi na sia priso, pero sa sini nga tion, sigurado sia nga pagapatyon sia. Ginbayaan sia sang pila niya ka kaupod sang una, kag grabe gid ang iya kakapoy.—2 Tim. 1:15.
17. Ano kuntani ang puede nga nangin reaksion ni Pablo?
17 Puede kuntani pamensaron ni Pablo nga kon wala sia nangin Cristiano, wala kuntani sia mapriso. Puede man kuntani nga maakig sia sa mga tawo sa distrito sang Asia nga nagbiya sa iya, kag puede kuntani nga indi na niya pagsaligan ang iya mga abyan. Pero wala ini ginhimo ni Pablo. Ngaa ginsaligan niya gihapon ang iya mga abyan, kag ngaa wala sia nadulaan sing paglaum?
18. Ano ang ginhimo ni Pablo para masarangan niya ang mabudlay nga problema?
18 (3) Magpamalandong. Sabta ang pamangkot nga, “Ano ang ginhimo ni Pablo para masarangan niya ang iya problema?” Bisan pa kabalo si Pablo nga malapit na sia patyon, wala niya ginkalimtan nga importante gid nga mahimaya si Jehova. Kag pirme niya ginahunahuna kon paano niya mapalig-on ang iban. Nagsalig sia kay Jehova kag pirme sia nagapangamuyo sa iya. (2 Tim. 1:3) Sa baylo nga magpokus sa mga kauturan nga nagbiya sa iya, ginpasalamatan niya ang iya mahigugmaon nga mga abyan nga nagbulig sa iya. Padayon man nga gintun-an ni Pablo ang Pulong sang Dios. (2 Tim. 3:16, 17; 4:13) Kag ang pinakaimportante, sigurado sia nga palangga sia ni Jehova kag ni Jesus. Wala nila sia ginbayaan, kag padyaan nila ang iya matutom nga pag-alagad.
19. Paano ginbuligan ni Jehova si Pablo?
19 Ginsilingan ni Jehova si Pablo nga pagahingabuton sia bangod isa sia ka Cristiano. (Binu. 21:11-13) Paano ginbuligan ni Jehova si Pablo? Ginsabat niya ang mga pangamuyo ni Pablo kag ginpabakod sia. (2 Tim. 4:17) Ginsilingan ni Jehova si Pablo nga padyaan gid sia sa iya mga pagpanikasog. Gingamit man ni Jehova ang mga abyan ni Pablo nga wala nagbiya sa iya para buligan sia.
20. Paano naton mailog ang pagtuo ni Pablo nga mabasa sa Roma 8:38, 39?
20 (4) Iaplikar ang imo mga natun-an. Pamangkuta ang imo kaugalingon, ‘Paano ko mailog si Pablo?’ Pareho kay Pablo, kabalo kita nga pagahingabuton kita bangod sang aton pagtuo. (Mar. 10:29, 30) Para makapabilin kita nga matutom kay Jehova bisan pa may mga problema, dapat kita padayon nga magpangamuyo sa iya kag dapat naton tun-an sing regular ang iya Pulong. Kag dapat naton siguraduhon nga madayaw si Jehova sa tanan naton nga ginahimo kay isa ini sa pinakaimportante nga mahimo naton. Makasalig kita nga indi gid kita pagpabay-an ni Jehova, kag wala sing makapugong sa iya gugma sa aton.—Basaha ang Roma 8:38, 39; Heb. 13:5, 6.
TUN-I ANG IBAN PA NGA MATUTOM NGA MGA ALAGAD NI JEHOVA SA BIBLIA
21. Ano ang nakabulig kay Aya kag kay Hector nga masarangan ang ila mga problema?
21 Ang halimbawa sang matutom nga mga alagad ni Jehova sa Biblia makabulig sa aton nga masarangan ang bisan ano nga problema. Halimbawa, si Aya nga isa ka payunir sa Japan nagsiling nga ang kasaysayan ni Jonas amo ang nagbulig sa iya nga madula ang iya kahadlok sa pagpanaksi sa publiko nga mga lugar. Si Hector, nga isa ka pamatan-on sa Indonesia kag indi Saksi ang mga ginikanan, nagsiling nga napalig-on sia sang halimbawa ni Rut para magtuon parte kay Jehova kag mag-alagad sa iya.
22. Ano ang mga puede mo himuon para makabenepisyo ka pa gid sa mga drama sa Biblia ukon sa mga artikulo sa “Iluga ang Ila Pagtuo”?
22 Diin mo makita ang dugang nga impormasyon parte sa mga halimbawa sa Biblia nga makapabakod sa imo? Ang aton mga video, mga drama sa Biblia, kag mga artikulo sa “Iluga ang Ila Pagtuo” makabulig sa aton para mangin tuodtuod ang mga kasaysayan sa Biblia.d Antes mo tan-awon, pamatian, ukon basahon ini nga mga kasaysayan, pangabaya si Jehova nga buligan ka nga makita ang importante nga mga leksion nga makabulig gid sa imo. Imadyina nga ikaw ang panguna nga karakter. Pamalandungi kon ano ang ginhimo sining matutom nga mga alagad ni Jehova kag kon paano niya sila ginbuligan nga masarangan ang ila mga problema. Dayon iaplikar ang imo mga natun-an sa imo sitwasyon subong. Pasalamati si Jehova kay padayon ka niya nga ginabuligan. Kag ipakita ang imo apresasyon sa mga bulig nga nabaton mo paagi sa pagpangita sang mga kahigayunan nga mapalig-on kag mabuligan ang iban.
23. Suno sa Isaias 41:10, 13, ano ang ginpromisa ni Jehova nga himuon niya para sa aton?
23 Mabudlay gid ang kabuhi sa kalibutan nga kontrolado ni Satanas, kag kon kaisa, indi kita kabalo kon ano ang dapat naton himuon. (2 Tim. 3:1) Pero indi kita dapat mabalaka ukon mahadlok. Kabalo si Jehova kon ano ang aton mga problema. Kon kinahanglan naton sing bulig, nagpromisa sia nga uyatan niya kita sang iya makusog nga tuo nga kamot. (Basaha ang Isaias 41:10, 13.) Makasalig kita nga buligan gid kita ni Jehova. Kay man, makabulig ang pagbasa sang Biblia para masarangan naton ang bisan ano nga problema.
AMBAHANON 96 Libro sang Dios—Isa ka Bahandi
a Madamo kita sang mabasa sa Biblia nga nagapamatuod nga palangga ni Jehova ang iya mga alagad kag buligan niya sila nga masarangan ang bisan ano nga problema. Binagbinagon sa sini nga artikulo kon ano ang mga puede mo himuon sa imo personal nga pagtuon sang Biblia para makabenepisyo ka pa gid sa imo ginabasa.
b Isa lang ini sa madamo nga paagi sang pagtuon nga puede himuon. Makita sa Giya sa Pagtuon Para sa mga Saksi ni Jehova ang iban pa nga panugda sa pagtuon sang Biblia. Pangitaa ang “Pagbasa kag Paghangop sang Biblia” sa topiko nga “Biblia.”
c Indi pagbasahon ini nga mga teksto sa tion sang Pagtinuon sa Ang Lalantawan sa kongregasyon.
d Tan-awa ang “Iluga ang Ila Pagtuo—Mga Lalaki kag mga Babayi sa Biblia” sa jw.org/hil. (Kadtui ang PANUDLO SANG BIBLIA > PAGTUO SA DIOS.)