Mga Pamatan-on nga Lalaki, Ano ang Dapat Ninyo Himuon Para Saligan Kamo?

1. Ano ang masiling naton parte sa aton mga pamatan-on nga brother?

MGA pamatan-on nga brother, madamo kamo sing mahimo para sa kongregasyon. May kusog kamo kag mabaskog. (Hulu. 20:29) Madamo kamo sing mabulig sa inyo mga kauturan. Posible nga gusto ninyo nga mangin ministeryal nga alagad. Pero, mahimo nagabatyag kamo nga basi pensaron sang iban nga bata pa kamo katama kag indi pa kamo handa nga hatagan sang importante nga mga responsibilidad. Bisan pa matuod pamatan-on pa lang kamo, madamo na kamo sing mahimo subong para saligan kamo kag respetuhon sang mga kauturan sa inyo kongregasyon.

2. Ano ang binagbinagon naton sa sini nga artikulo?

² Sa sini nga artikulo, binagbinagon naton ang kasaysayan ni Hari David. Binagbinagon man naton ang kasaysayan sang duha ka hari sang Juda nga sanday Asa kag Jehosapat. Hibaluon naton kon ano nga mga kabudlayan ang naeksperiensiahan sining tatlo ka lalaki, kon ano ang ila ginhimo para masarangan ini, kag kon ano ang matun-an sang mga pamatan-on nga brother sa ila mga halimbawa.

ANG MATUN-AN NINYO KAY HARI DAVID

3. Ano ang isa ka paagi nga makabulig ang mga pamatan-on sa mga tigulang sa kongregasyon?

³ Sang pamatan-on si David, nakatuon sia sang mga ikasarang nga ginpabaloran gid sang iban. Suod sia kay Jehova. Nagpanikasog man sia para mangin sagad sia nga musikero. Gingamit niya ini nga ikasarang para buligan si Saul nga amo ang gintangdo sang Dios nga hari. (1 Sam. 16:16, 23) Mga pamatan-on nga brother, may mga ikasarang bala kamo para buligan ang iban sa kongregasyon? Madamo sa inyo ang may ara gid ikasarang. Halimbawa, nalipay gid ang pila ka tigulang kon ginatudluan sila kon paano gamiton ang ila mga gadyet para sa ila personal nga pagtuon kag para sa mga miting. Daku gid ang mabulig ninyo sa ila kay sagad kamo sa sini nga mga gadyet.

4. Pareho kay David, ano nga mga kinaiya ang dapat panikasugan nga ipakita sang mga pamatan-on nga brother? (Tan-awa ang piktyur sa kober.)

⁴ Paagi sa mga ginhimo ni David, ginpakita niya nga responsable sia kag masaligan. Halimbawa, sang pamatan-on sia, gin-atipan gid niya sing maayo ang mga karnero sang iya amay. Indi ini mahapos kag may peligro man. May ginsiling si David kay Hari Saul parte sa sini. Nagsiling sia: “Ginuo ko, nangin manugbantay ako sing panong sang akon amay. May nag-abot sadto nga isa ka leon, kag isa ka oso, kag ang kada isa may gintaban nga karnero halin sa panong. Ginlagas ko ini kag ginlampusan, kag ginluwas ko ang gintaban sini nga karnero.” (1 Sam. 17:34, 35) Kabalo si David nga dapat niya bantayan sing maayo ang mga karnero, kag maisog niya sila nga ginbantayan. Mailog sang mga pamatan-on nga brother si David kon himuon nila sing maayo ang bisan ano nga asaynment nga ginahatag sa ila.

5. Suno sa Salmo 25:14, ano ang pinakaimportante nga dapat himuon sang mga pamatan-on nga brother?

⁵ Sang pamatan-on si David, ginpanikasugan gid niya nga mangin suod kay Jehova. Mas importante ang kaangtanan ni David kay Jehova sangsa iya kaisog ukon sangsa iya ikasarang nga magtokar sang arpa. Si Jehova ang Dios kag suod nga Abyan ni David. (Basaha ang Salmo 25:14.) Mga pamatan-on nga brother, ang pinakaimportante nga dapat ninyo himuon amo ang pabakuron ang inyo kaangtanan sa inyo Amay sa langit. Kon himuon ninyo ini, posible nga hatagan kamo sang dugang nga mga pribilehiyo sa kongregasyon.

6. Ano ang pagtan-aw sang iban kay David?

⁶ Para sa iban, bata pa katama si David ukon indi sia masaligan. Halimbawa, sang nagsiling si David nga sia ang magapakig-away kay Goliat, ginsilingan sia ni Hari Saul: “Bata ka pa.” (1 Sam. 17:31-33) Antes sini, ginsilingan si David sang iya utod nga indi sia masaligan kay wala niya kuno ginhimo ang iya responsibilidad. (1 Sam. 17:26-30) Pero, wala ginhunahuna ni Jehova nga bata pa katama ukon indi masaligan si David. Kilala gid niya sing maayo si David. Kag bangod nagsalig si David sa iya Abyan nga si Jehova, nasarangan ni David nga patyon si Goliat.—1 Sam. 17:45, 48-51.

7. Ano ang matun-an mo kay David?

⁷ Ano ang matun-an mo kay David? Dapat ka mangin mapinasensiahon. Kilala ka na sang iban halin sang bata ka pa, gani daw bata lang gihapon ang pagtan-aw nila sa imo bisan pa pamatan-on ka na. Pero makasigurado ka nga wala nagapokus si Jehova sa imo hitsura. Kilala ka gid niya kag kabalo sia kon ano ang masarangan mo nga himuon. (1 Sam. 16:7) Gani pabakura ang imo kaangtanan sa Dios. Ginhimo ini ni David paagi sa pag-obserbar sing maayo sa mga tinuga ni Jehova. Ginpamalandungan niya kon ano ang matun-an niya sa sini parte sa iya Manunuga. (Sal. 8:3, 4; 139:14; Roma 1:20) Ang isa pa nga puede mo himuon amo ang pagpangabay kay Jehova nga buligan ka nga mangin malig-on. Halimbawa, ginayaguta ka bala sa eskwelahan bangod isa ikaw ka Saksi ni Jehova? Mangamuyo kay Jehova nga buligan ka nga mabatas ini. Kag iaplikar ang mga laygay sang Biblia kag sang aton mga publikasyon kag mga video nga nabase sa Biblia. Sa kada tion nga maeksperiensiahan mo nga ginabuligan ka ni Jehova sa imo mga kabudlayan, mas magasalig ka pa gid sa iya. Kag kon nagapabulig ka kay Jehova kon may problema ka, makita sang iban nga masaligan ka.

8-9. Ano ang nakabulig kay David nga mangin mapinasensiahon samtang nagahulat sia nga maggahom bilang hari, kag ano ang matun-an sang mga pamatan-on nga brother sa iya halimbawa?

⁸ Nakaeksperiensia si David sang isa pa ka mabudlay nga sitwasyon. Bisan pa ginhaplasan na si David nga mangin hari, naghulat pa sia sing madamo nga tinuig antes sia nagsugod sa paggahom bilang hari sang Juda. (1 Sam. 16:13; 2 Sam. 2:3, 4) Ano ang nakabulig sa iya nga maghulat kag mangin mapinasensiahon? Sa baylo nga magpokus sa mga butang nga nagpaluya sang iya buot, nagpokus si David sa mga puede niya himuon. Halimbawa, sang nalagyo si David kag nag-istar sia sa teritoryo sang mga Filistinhon, gingamit niya ang iya tion para magpakig-away sa mga kaaway sang Israel. Bangod sang iya mga ginhimo, naamligan niya ang mga dulunan sang teritoryo sang Juda.—1 Sam. 27:1-12.

⁹ Ano ang matun-an sang mga pamatan-on nga brother kay David? Himua ninyo ang inyo bug-os nga masarangan sa pagbulig sa mga kauturan. Binagbinaga ang eksperiensia sang isa ka brother nga si Ricardo.b Sang mga dies anyos pa lang sia, gusto na niya nga mangin regular payunir. Pero ginsilingan sia sang mga gulang nga indi pa sia handa. Sa baylo nga maluyahan sing buot ukon maakig, gindugangan pa gid ni Ricardo ang iya ginahimo sa iya ministeryo. Nagsiling sia: “Kon pamensaron ko ang nagligad, narealisar ko nga mas maayo kon pauswagon ko anay ang akon mga ikasarang. Gintinguhaan ko nga balikan ang tanan nga naistorya ko nga interesado kag ginhandaan ko sing maayo ang pagbalik ko sa ila. Gani nakakita ako sang akon pinakauna nga Bible study. Natalupangdan ko nga kon pirme ako nagabantala, amat-amat nga nagakadula ang akon kulba sa pag-istorya sa mga tawo.” Isa na subong ka maayo gid nga regular payunir kag ministeryal nga alagad si Ricardo.

10. Isa ka bes, ano ang ginhimo ni David antes sia maghimo sang importante nga desisyon?

¹⁰ Binagbinaga ang isa pa ka eksperiensia ni David sang nalagyo sia kay Saul. Isa ka bes, naglakat si David kag ang iya mga tinawo para magpakig-away, kag nabilin ang ila mga pamilya. Samtang ato sila sa malayo nga lugar, ginsalakay sang mga kaaway ang ila mga pamilya kag ginbihag sila. Puede kuntani hunahunaon ni David nga bangod madamo na sia sing eksperiensia sa pagpakig-away, makahimo sia sang maayo nga plano kon paano luwason ang ila mga pamilya nga nabihag. Pero, nangabay si David kay Jehova nga buligan sia. Paagi sa isa ka saserdote nga si Abiatar, ginpamangkot ni David si Jehova: “Lagson ko bala ang mga tulisan?” Ginsilingan ni Jehova si David nga lagson sila kag maluwas niya ang mga ginbihag. (1 Sam. 30:7-10) Ano ang matun-an ninyo sa sini?

11. Ano ang puede mo himuon antes ka magdesisyon?

¹¹ Pamangkuta ang iban kon ano ang ila mapanugda antes ka magdesisyon. Pamangkuta ang imo mga ginikanan. Kon magpakig-istorya ka sa madugay na nga mga gulang, makahatag man sila sa imo sang maayo nga mga laygay. May salig si Jehova sa sining gintangdo nga mga lalaki, gani makasalig ka sa ila. “Mga dulot” sila halin kay Jehova para sa kongregasyon. (Efe. 4:8) Kon ilugon mo ang ila pagtuo kag pamatian mo ang ila maayo nga mga panugda, makabulig gid ini sa imo pagdesisyon. Binagbinagon naman naton ang matun-an naton kay Hari Asa.

ANG MATUN-AN NINYO KAY HARI ASA

12. Ano ang mga kinaiya ni Hari Asa sang nagsugod sia sa paggahom?

¹² Sang pamatan-on si Hari Asa, mapainubuson sia kag maisog. Halimbawa, sang ginbuslan niya ang iya amay nga si Abias, ginpanikasugan niya nga dulaon ang pagsimba sa mga diosdios. “Ginsilingan man niya ang Juda nga pangitaon nila si Jehova nga Dios sang ila mga katigulangan kag tumanon nila ang Kasuguan kag ang sugo.” (2 Cron. 14:1-7) Kag sang ginsalakay ni Zera nga Etiopianhon upod ang 1,000,000 ka soldado ang Juda, maayo gid ang ginhimo ni Asa kay nangamuyo sia kay Jehova nga buligan sia. Nagsiling sia: “O Jehova, indi problema sa imo kon bala ang ginabuligan mo madamo ukon indi gamhanan. Buligi kami, O Jehova nga amon Dios, kay nagasalig kami sa imo.” Mabatyagan naton sa ginsiling ni Asa nga nagatuo gid sia nga luwason sia ni Jehova kag ang iya katawhan. Bangod nagsalig si Asa sa iya Amay sa langit, ‘ginbuligan ni Jehova si Asa nga mapierde ang mga Etiopianhon.’—2 Cron. 14:8-12.

13. Ano ang natabo kay Asa sang ulihi, kag ngaa?

¹³ Sigurado gid nga ginkulbaan si Asa sang ginsalakay sila sang 1,000,000 ka soldado. Pero bangod nagsalig si Asa kay Jehova, napierde niya sila. Pero sang nakaeksperiensia si Asa sang indi pareho sini kadaku nga problema, wala sia nagpabulig kay Jehova. Sang ginsalakay sia sang malain nga hari sang Israel nga si Baasa, nagpabulig si Asa sa hari sang Siria. Indi gid maayo ang resulta sang iya desisyon. Paagi sa manalagna nga si Hanani, ginsilingan ni Jehova si Asa: “Bangod nagsalig ka sa hari sang Siria kag wala ka magsalig kay Jehova nga imo Dios, nakapalagyo sa imo ang mga soldado sang hari sang Siria.” Sugod sadto, pirme lang may nagapakig-away kay Asa. (2 Cron. 16:7, 9; 1 Hari 15:32) Ano ang matun-an ninyo sa sini?

14. Paano mo mapakita nga nagasalig ka kay Jehova, kag ano ang resulta kon himuon mo ini suno sa 1 Timoteo 4:12?

¹⁴ Mangin mapainubuson pirme kag padayon nga magsalig kay Jehova. Sang ginbawtismuhan ka, ginpakita mo nga nagatuo ka gid kag nagasalig kay Jehova. Kag nalipay gid si Jehova nga batunon ka sa iya pamilya. Ang dapat mo himuon subong amo ang padayon nga magsalig kay Jehova. Mahimo nga nagapabulig ka dayon kay Jehova kon kinahanglan mo maghimo sang importante gid nga mga desisyon, pero ano ang ginahimo mo sa iban nga mga sitwasyon? Importante gid nga magsalig ka kay Jehova kon nagahimo sang desisyon. Nalakip sa sini ang pagpili sang kalingawan, sang trabaho, kag sang gusto mo nga himuon sa imo kabuhi. Indi magsalig sa imo kaalam. Sa baylo, mangita sang mga prinsipio sa Biblia nga makabulig sa imo sitwasyon kag iaplikar ini. (Hulu. 3:5, 6) Kon himuon mo ini, malipay gid si Jehova sa imo kag respetuhon ka sang mga kauturan sa kongregasyon.—Basaha ang 1 Timoteo 4:12.

ANG MATUN-AN NINYO KAY HARI JEHOSAPAT

15. Suno sa 2 Cronica 18:1-3; 19:2, ano nga mga sala ang nahimo ni Hari Jehosapat?

¹⁵ Tanan kita indi perpekto, gani makahimo gid kita sang sala kon kaisa. Pero indi buot silingon nga indi mo na mahimo ang imo bug-os nga masarangan sa pag-alagad kay Jehova. Binagbinaga ang halimbawa ni Hari Jehosapat. Madamo sia sing maayo nga kinaiya. Sang pamatan-on sia, “ginpangita niya ang Dios sang iya amay kag ginsunod ang iya sugo.” Ginpakadto niya ang mga pangulo sa tanan nga siudad sang Juda para tudluan ang katawhan parte kay Jehova. (2 Cron. 17:4, 7) Pero nakahimo man sia sang indi maayo nga mga desisyon. Bangod sang isa ka indi maayo nga desisyon ni Jehosapat, ginlaygayan sia sang manalagna ni Jehova. (Basaha ang 2 Cronica 18:1-3; 19:2.) Ano ang matun-an ninyo sa sini?

16. Ano ang natun-an mo sa eksperiensia ni Rajeev?

¹⁶ Pamatii kag iaplikar ang mga ginalaygay sa imo. Pareho sa madamo nga pamatan-on, posible nga nabudlayan ka man nga himuon nga pinakaimportante sa imo kabuhi ang pag-alagad kay Jehova. Indi ka dapat maluyahan sing buot. Binagbinaga ang eksperiensia sang isa ka pamatan-on nga brother nga si Rajeev. Ginsugid niya ang iya kabuhi sang pamatan-on pa sia. Nagsiling sia: “May mga tion nga daw indi ako sigurado kon ano gid ang gusto ko nga himuon sa akon kabuhi. Pareho sa madamo nga pamatan-on, nawili ako sa sports kag mas gusto ko nga maglingawlingaw sangsa magtambong sa mga miting ukon magbantala.” Ano ang nakabulig kay Rajeev? Ginlaygayan sia sang isa ka gulang nga nagaulikid gid sa iya. Si Rajeev nagsiling: “Ginbuligan niya ako nga mahangpan ang prinsipio sa 1 Timoteo 4:8.” Nagpaubos si Rajeev kag gin-aplikar niya ang laygay. Dayon ginhunahuna niya sing maayo kon ano gid ang pinakaimportante sa iya kabuhi. Nagsiling sia: “Ginhimo ko nga pinakaimportante sa akon kabuhi ang pag-alagad kay Jehova.” Ano ang resulta? Si Rajeev nagsiling: “Pagligad sang pila ka tuig pagkatapos ko gin-aplikar ang laygay, gintangdo ako nga ministeryal nga alagad.”

HIMUA NINYO ANG INYO PINAKAMAAYO PARA MALIPAY SA INYO SI JEHOVA

17. Ano ang ginabatyag sang mga kauturan parte sa mga pamatan-on nga lalaki nga nagaalagad kay Jehova?

¹⁷ Mga pamatan-on nga lalaki, ginapabaloran gid kamo sang inyo mga kauturan sa kongregasyon. Nalipay gid sila nga “nahiusa” kamo sa ila sa pagsimba kay Jehova. (Sof. 3:9) Nalipay man sila kay makita nila nga nanamian kamo kon ginahatagan kamo sang asaynment kag mapisan ninyo ini nga ginahimo. Ginapabugal gid nila kamo.—1 Juan 2:14.

18. Suno sa Hulubaton 27:11, ano ang ginabatyag ni Jehova parte sa mga pamatan-on nga lalaki nga nagaalagad sa iya?

¹⁸ Mga pamatan-on nga brother, indi gid ninyo pagkalimtan nga palangga kamo ni Jehova kag may salig sia sa inyo. Nagtagna sia nga sa sining katapusan nga mga adlaw, madamo nga mga pamatan-on nga lalaki ang magaalagad sa iya sing kinabubut-on. (Sal. 110:1-3) Kabalo sia nga palangga ninyo sia kag gusto ninyo nga alagaron sia sa bug-os ninyo nga masarangan. Gani mangin mapinasensiahon sa iban, kag indi matak-an sa paghulat. Kon makahimo kamo sang sala, pamatii ang laygay kag batuna ang disiplina. Dapat ninyo hunahunaon nga halin ini kay Jehova. (Heb. 12:6) Himua ninyo sing maayo ang bisan ano nga asaynment nga ginahatag sa inyo. Kag ang pinakaimportante, himua ninyo ang inyo bug-os nga masarangan nga malipay ang inyo Amay sa langit.—Basaha ang Hulubaton 27:11.