Madula Na sing Bug-os ang Pagdumtanay!
Bisan pa nga dulaon naton ang dumot sa aton tagipusuon, indi gihapon naton makontrol ang ginahimo kag batasan sang iban. Madamo gihapon nga inosente nga tawo ang nagaantos bangod sa dumot. Kon amo, sin-o ang may ikasarang sa pagdula sing bug-os sang dumot?
Si Jehova nga Dios lamang ang may ikasarang sa pagtapos sing bug-os sa wala untat nga pagdumtanay subong. Amo gid ina ang ginpromisa sang Biblia nga himuon niya.—Hulubaton 20:22.
DULAON SANG DIOS ANG MGA RASON SANG DUMOT
1. SI SATANAS NGA YAWA. Si Satanas, ang nagrebelde nga anghel, amo gid ang rason sang pagdumtanay subong. Laglagon ukon dulaon sang Dios si Satanas kag ang tanan nga gin-impluwensiahan niya nga magdumot man sa iban.—Salmo 37:38; Roma 16:20.
2. ANG KALIBUTAN NI SATANAS NGA PUNO SING DUMOT. Dulaon sang Dios ang tanan nga kalainan sa sini nga kalibutan, lakip ang korap nga mga pulitiko kag mga lider sang relihion nga nagaimpluwensia sa iban nga magdumot. Dulaon man sang Dios ang korap kag sakon nga mga negosyante nga nagapamentaha sa mga tawo.—2 Pedro 3:13.
3. ANG INDI PERPEKTO NGA KAHIMTANGAN SANG MGA TAWO. Ginasugid sang Biblia nga ang tanan nga tawo nakapanubli sang sala amo nga indi sila perpekto. Bangod sini, masami nga sala ang ila mga ginahunahuna, ginabatyag, kag mga ginahimo. (Roma 5:12) Kag nalakip sa sala nga ila ginahimo amo ang pagdumot kag pagpamintas sa iban bangod sa ila dumot. Buligan sang Dios ang mga tawo nga dulaon ang ila sala nga mga ginahunahuna, ginabatyag, kag mga ginahimo para madula sing bug-os ang dumot.—Isaias 54:13.
NAGPROMISA ANG BIBLIA SANG ISA KA KALIBUTAN NGA WALA NA SING DUMOT
1. WALA NA SING MAKAEKSPERIENSIA SING INHUSTISYA. Gamhan sang Ginharian sang Dios ang bilog nga duta. Magagahom ini halin sa langit kag ini nga ginharian matarong kag magapadayon sa paggahom asta san-o. (Daniel 2:44) Wala na sing diskriminasyon ukon pagpasulabi. Tadlungon sang Dios ang tanan nga inhustisya nga naeksperiensiahan sang mga tawo subong.—Lucas 18:7.
2. MAY PAGHIDAIT NA ANG TANAN. Wala na sing magaantos bangod sa kapintas ukon sa inaway. (Salmo 46:9) Mangin malinong na ang duta kay ang tanan nga tawo nga magaistar sa sini mga mahidaiton na.—Salmo 72:7.
3. ANG TANAN MAGAKABUHI SING WALA KATAPUSAN SA ISA KA PERPEKTO NGA KALIBUTAN. Ang tanan nga tawo sa duta magapakita sing matuod nga gugma sa kada isa. (Mateo 22:39) Wala na sing magaantos kag indi na pagdumdumon ang malain nga mga eksperiensia sang una. (Isaias 65:17) Sa sina nga tion, wala na sing dumot ang mga tawo “kag mangin malipayon gid sila sa bugana nga paghidait.”—Salmo 37:11.
Gusto mo bala magkabuhi sa sina nga kalibutan? Bisan subong, madamo nga tawo ang nagatinguha nga dulaon ang dumot sa ila tagipusuon paagi sa pag-aplikar sa mga prinsipio sa Biblia. (Salmo 37:8) Amo sina ang ginahimo sang minilyon ka Saksi ni Jehova sa bilog nga kalibutan. Bisan pa sarisari ang ila kultura kag ginhalinan, daw pamilya ang ila pagtamdanay bangod nahiusa sila kag ginahigugma nila ang isa kag isa.—Isaias 2:2-4.
Natun-an sang mga Saksi ni Jehova kon ano ang dapat himuon kon makaeksperiensia sing inhustisya kag diskriminasyon. Nalipay sila nga isugid man ini sa imo. Ang imo matun-an makabulig sa imo nga amat-amat nga mabuslan sang gugma ang dumot sa imo tagipusuon. Matun-an mo man kon paano pakitaan sing kaayo ang tanan nga tawo, pati ang mga tawo nga wala nagapasalamat kag nagadumot. Kon himuon mo ini, mangin malipayon ka subong kag mangin mas maayo ang imo relasyon sa iban. Ang pinakaimportante sa tanan, matun-an mo kon ano ang dapat mo himuon para mangin sakop sang Ginharian sang Dios. Kay man, kon maggahom na ina nga ginharian, madula na sing bug-os ang pagdumtanay.—Salmo 37:29.