KON PAANO MATAPOS ANG WALA UNTAT NGA PAGDUMTANAY

4 | Dulaa ang Dumot Paagi sa Bulig sang Dios

Panudlo sang Biblia:

“Ang mga kinaiya nga ginapatubas sang espiritu amo ang gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.”—GALACIA 5:22, 23.

Ang Buot Silingon:

Posible matapos ang wala untat nga pagdumtanay paagi sa bulig sang Dios. Mabuligan kita sang iya balaan nga espiritu nga mapakita ang mga kinaiya nga indi gid naton mapakita kon sa aton lang. Gani imbes nga tinguhaan naton nga dulaon ang dumot sa aton lang ikasarang, mas maayo nga magpabulig kita sa Dios. Kon himuon naton ina, maeksperiensiahan naton ang pareho sa ginsiling ni apostol Pablo. Nagsulat sia: “Sa tanan nga butang may kusog ako paagi sa isa nga nagapabakod sa akon.” (Filipos 4:13) Kag makasiling man kita: “Ang bulig para sa akon nagahalin kay Jehova.”—Salmo 121:2.

Ang Puede Mo Himuon:

“Ginpabag-o ako ni Jehova halin sa isa ka masingki nga tawo pakadto sa isa nga mahidaiton.”—WALDO

Mangamuyo kay Jehova kag pangabaya sia nga hatagan ka sang iya balaan nga espiritu. (Lucas 11:13) Pangabaya sia nga buligan ka nga ipakita ang maayo nga mga kinaiya. Tun-i ang mga ginasiling sang Biblia parte sa mga kinaiya nga makabulig para madula ang dumot pareho sang gugma, paghidait, pagkamapinasensiahon, kag pagpugong sa kaugalingon. Panikasugi nga mapakita ini nga mga kinaiya. Makig-abyan sa mga tawo nga nagapanikasog man nga mapakita ini nga mga kinaiya. Ini nga mga abyan makabulig nga ‘pahulagon ka sa gugma kag sa maayong mga buhat.’—Hebreo 10:24.

Eksperiensia—WALDO

Nadula Niya ang Iya Kapintas kag Dumot

Mabudlay gid ang kabuhi ni Waldo samtang nagadaku sia, amo nga nagtubo ang dumot sa iya tagipusuon. Nagsiling sia: “Pirme kami nagainaway sang mga nagabaligya sang droga . . . Isa ka bes, ang kontra namon nga gang nagsuhol sang bantog nga manugpatay para patyon ako, maayo lang nakasalbar ako nga may pilas lang.”

Wala gid nalipay si Waldo sang nagtuon ang iya asawa sa Biblia upod sa mga Saksi ni Jehova. Nagsiling sia: “Naugot ako sa mga Saksi ni Jehova, kag madamo nga beses nga ginbuyayaw ko sila. Pero katingalahan nga kalmado lang sila.”

Sang ulihi, nagtuon man si Waldo sa Biblia. Nagsiling sia: “Mabudlay iaplikar ang akon natun-an. Sa pamatyag ko daw indi ko gid masarangan nga kontrolon ang akon kaakig.” Pero may natun-an sia sa Biblia nga nakabulig sa iya nga magbag-o.

Si Waldo nagsiling: “Isa ka adlaw, ang nagatudlo sa akon nga si Alejandro nangabay nga basahon ko ang Galacia 5:22, 23. . . . Ginpaathag niya nga ang pagpakita sina nga mga kinaiya wala nagadepende sa akon kaugalingon nga kusog, kundi sa balaan nga espiritu sang Dios. Yadto nga kamatuoran nagpabag-o gid sa akon pagtamod!”

Paagi sa pagsalig sa bulig sang Dios, nauntatan ni Waldo ang pagdumot sa iban. Nagsiling sia: “Ang akon iloy, mga utod, kag mga abyan daw indi makapati sa akon pagbag-o.” Nagsiling pa sia: “Ginpabag-o ako ni Jehova halin sa isa ka masingki nga tawo pakadto sa isa nga mahidaiton.”