“Ang mga Nagapangita kay Jehova Indi Pagkulangon sing Maayo nga Butang”

1. Ano ang mabudlay nga sitwasyon nga naeksperiensiahan ni David?

NALAGYO si David kay gusto sia patyon ni Saul nga hari sang Israel. Sang kinahanglan ni David ang pagkaon, nagkadto sia sa siudad sang Nob, kag nangayo sia didto sang lima lang ka tinapay. (1 Sam. 21:1, 3) Sang ulihi, nanago sia kag ang iya mga tinawo sa kueba. (1 Sam. 22:1) Pero ngaa gusto sia patyon ni Saul?

2. Ano ang indi husto nga ginhimo ni Saul? (1 Samuel 23:16, 17)

² Grabe gid ang kahisa ni Saul kay David kay madamo nga tawo ang nanamian kay David kag nagdaug sia sa madamo nga inaway. Kabalo man si Saul nga ginsikway sia ni Jehova bilang hari sang Israel kay wala niya gintuman si Jehova, kag kabalo sia nga ginpili ni Jehova si David nga mangin hari. (Basaha ang 1 Samuel 23:16, 17.) Pero kinahanglan malagyo si David bangod si Saul pa ang hari sang Israel. Madamo si Saul sing soldado kag madamo ang nagasuportar sa iya. Ginhunahuna bala ni Saul nga mapunggan niya ang katuyuan sang Dios nga mangin hari si David? (Isa. 55:11) Wala sing ginasiling ang Biblia parte sa sini, pero sigurado kita nga indi gid husto ang desisyon ni Saul kay nahalitan lang sia sa iya ginhimo. Kay man, indi gid magdaug ang mga nagakontra sa Dios.

3. Ano ang reaksion ni David bisan pa mabudlay ang iya kahimtangan?

³ Mapainubuson si David. Wala niya gin-ambisyon nga mangin hari sang Israel. Si Jehova ang nagtangdo sa iya nga mangin hari. (1 Sam. 16:1, 12, 13) Akig gid katama si Saul kay David. Pero wala ginbasol ni David si Jehova nga ara sa katalagman ang iya kabuhi, kag wala man nagreklamo si David nga diutay lang ang iya pagkaon kag kinahanglan niya magpanago sa kueba. Posible pa gani nga samtang nagapanago si David sa sini nga kueba, ginsulat niya ang isa ka manami nga ambahanon nga nagadayaw kay Jehova. Nalakip sa sini nga ambahanon ang ginasiling sa teksto nga ginbasihan sini nga artikulo: “Ang mga nagapangita kay Jehova indi pagkulangon sing maayo nga butang.”—Sal. 34:10.

4. Ano nga mga pamangkot ang binagbinagon naton, kag ngaa importante ini?

⁴ Subong, may mga tion nga indi bastante ang pagkaon kag iban pa nga mga kinahanglanon sang madamo nga alagad ni Jehova.b Naeksperiensiahan gid nila ini sa panahon sang pandemic. Kag bangod malapit na ang “dakung kapipit-an,” mas magabudlay pa gid ang aton kahimtangan. (Mat. 24:21) Gani binagbinagon naton ang sabat sa apat ka pamangkot: Ngaa masiling naton nga ‘wala ginkulang si David sing maayo nga butang’? Ngaa dapat kita mangin kontento? Ngaa makasalig kita nga atipanon kita ni Jehova? Kag ano ang puede naton himuon subong para mahandaan naton ang matabo sa palaabuton?

“INDI AKO PAGKULANGON”

5-6. Paano kita mabuligan sang Salmo 23:1-6 nga mahangpan ang buot silingon ni David sang nagsiling sia nga “indi pagkulangon sing maayo nga butang” ang mga alagad sang Dios?

⁵ Ano ang buot silingon ni David sang nagsiling sia nga “indi pagkulangon sing maayo nga butang” ang mga alagad ni Jehova? Makabulig sa aton ang ginsulat ni David nga pareho man sa sini nga ekspresyon. Mabasa ini sa Salmo 23. (Basaha ang Salmo 23:1-6.) Amo ini ang umpisa sang salmo nga ginhimo ni David: “Si Jehova ang akon Manugbantay. Indi ako pagkulangon.” Dayon, ginsambit ni David ang mga butang nga matuod gid nga importante, pareho sang mga pagpakamaayo nga nabaton niya bangod ginhimo niya si Jehova nga iya Manugbantay. Gintuytuyan ni Jehova si David “sa dalanon sang pagkamatarong,” kag mainunungon Niya nga ginbuligan si David sa maayo kag indi maayo nga mga kahimtangan. Kabalo si David nga bisan pa ara sia sa “madabong nga halalban” ni Jehova, indi buot silingon nga wala na sia sing problema. May mga tion nga nagluya ang iya buot, nga daw pareho lang nga nagalakat sia “sa madulom nga nalupyakan,” kag may mga kaaway man sia. Pero ‘wala mahadlok’ si David bangod si Jehova ang iya Manugbantay.

⁶ Gani masabat na naton ini nga pamangkot: Ngaa masiling naton nga ‘wala ginkulang si David sing maayo nga butang’? Ara ang tanan niya nga kinahanglanon para mangin suod sia pirme kay Jehova. Wala nagadepende sa materyal nga mga butang ang iya kalipay. Kontento si David sa ginhatag sa iya ni Jehova. Ang pinakaimportante sa iya amo ang pagpakamaayo kag pag-amlig sang iya Dios.

7. Suno sa Lucas 21:20-24, ano nga kabudlayan ang naeksperiensiahan sang mga Cristiano sa Judea sang unang siglo?

⁷ Matun-an naton sa ginsiling ni David nga importante gid nga husto ang aton pagtamod sa materyal nga mga butang. Bisan pa makahatag sang kalipay ang materyal nga mga butang, indi naton ini dapat paghimuon nga pinakaimportante sa aton kabuhi. Napamatud-an sang mga Cristiano sa Judea sang unang siglo nga matuod ini. (Basaha ang Lucas 21:20-24.) Ginpaandaman sila ni Jesus nga maabot ang tion nga ‘libutan sang kasuldadusan’ ang siudad sang Jerusalem. Kon matabo ini, dapat sila “magpalagyo sa mga bukid.” Kon malagyo sila, maluwas sila. Pero dapat nila biyaan ang ila madamo nga pagkabutang. Mga pila ka tuig na ang nagligad, ginsiling ini sang Ang Lalantawan: “Ginbiyaan nila ang mga latagon kag mga puluy-an, nga wala gani gintipon ang ila mga pagkabutang gikan sa ila mga balay. Nagasalig sa pag-amlig kag bulig ni Jehova, gin-una nila ang pagsimba sa iya labaw sa tanan nga butang nga daw importante.”

8. Ano nga importante nga leksion ang ginatudlo sa aton sang natabo sa mga Cristiano sa Judea sang unang siglo?

⁸ Ano nga importante nga leksion ang ginatudlo sa aton sang natabo sa mga Cristiano sa Judea sang unang siglo? Ang ginsambit kaina nga Ang Lalantawan nagsiling man: “Mahimo nga may pagtilaw nga matabo sa palaabuton sa kon paano naton ginatamod ang materyal nga mga butang; amo gid bala ini ang labing importante nga butang, ukon mas importante bala ang kaluwasan nga matigayon sang tanan nga yara sa kiliran sang Dios? Huo, ang aton pagpalagyo mahimo magdalahig sing pila ka kabudlayan kag kinawad-on. Dapat kita mangin handa sa bisan ano man nga matabo, subong sang ginhimo anay sang mga kaangay naton sang unang siglo nga nagpalagyo gikan sa Judea.”c

9. Paano ka napalig-on sang laygay ni apostol Pablo sa mga Hebreo?

⁹ Maimadyin mo bala kon daw ano kabudlay para sa sini nga mga Cristiano nga biyaan ang halos tanan nila nga pagkabutang kag mag-umpisa liwat sa bag-o nga lugar? Kinahanglan nila magtuo kag magsalig nga buligan sila ni Jehova sa ila mga kinahanglanon. Pero may makabulig sa ila para mahimo nila ini. Lima ka tuig antes napalibutan sang mga Romano ang Jerusalem, ginlaygayan ni apostol Pablo ang mga Hebreo: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo. Kay ang Dios nagsiling: ‘Indi ko gid kamo pagbayaan, kag indi ko gid kamo pagpabay-an.’ Gani, makasiling kita nga may pagsalig: ‘Si Jehova ang akon manugbulig; indi ako magkahadlok. Ano ang mahimo sang tawo sa akon?’” (Heb. 13:5, 6) Nabuligan gid ang mga Cristiano nga nag-aplikar dayon sa laygay ni Pablo antes pa nagsalakay ang mga Romano. Sigurado gid nga nahapusan sila mag-adjust sa simple nga kabuhi sa bag-o nga lugar. Wala gid sila nagduhaduha nga hatagan sila ni Jehova sang ila mga kinahanglanon. Ang ginsiling ni Pablo nagapasalig sa aton nga atipanon kita ni Jehova.

“MANGIN KONTENTO NA KITA SA SINI”

10. Ano ang “sekreto” ni Pablo nga ginsugid niya sa aton?

¹⁰ May ginlaygay si Pablo kay Timoteo nga pareho sa ginlaygay niya sa mga Hebreo, kag dapat man naton ini sundon. Nagsulat sia: “Gani, kon kita may pagkaon, kag panapton, mangin kontento na kita sa sini.” (1 Tim. 6:8) Buot bala silingon sini nga indi kita puede magkaon sang manamit nga pagkaon, makaistar sa manami nga balay, ukon makabakal sang bag-o nga bayo? Indi amo sina ang buot silingon ni Pablo. Ginlaygayan kita ni Pablo nga dapat kita mangin kontento sa mga butang nga ara sa aton. (Fil. 4:12) Amo ini ang “sekreto” ni Pablo. Ang aton pinakaimportante nga ginapanag-iyahan amo ang aton kaangtanan sa aton Dios, indi ang bisan ano nga materyal nga butang.—Hab. 3:17, 18.

11. Ano ang matun-an naton sa ginsiling ni Moises sa mga Israelinhon parte sa pagkakontento?

¹¹ Kon parte sa aton mga kinahanglanon, posible nga lain ang aton panghunahuna sangsa panghunahuna ni Jehova. Binagbinaga ang ginsiling ni Moises sa mga Israelinhon pagkatapos sang 40 ka tuig nga ara sila sa kamingawan: “Ginpakamaayo kamo ni Jehova nga inyo Dios sa tanan nga ginhimo ninyo. Nahibaluan gid niya ang inyo paglakat sa sining malapad nga kamingawan. Kaupod ninyo si Jehova nga inyo Dios sa sulod sining 40 ka tuig, kag wala sing bisan isa ka butang nga nakulang sa inyo.” (Deut. 2:7) Sa sulod sang 40 ka tuig, ginhatagan ni Jehova ang mga Israelinhon sang manna bilang ila pagkaon. Ang ila mga bayo sang naggua sila sa Egipto wala gid magdaan. (Deut. 8:3, 4) Posible nga ginhunahuna sang iban nga indi ini bastante, pero ginpahanumdom ni Moises ang mga Israelinhon nga kompleto sila sa ila mga kinahanglanon. Malipay gid si Jehova kon kontento kita. Gusto niya nga pasalamatan naton bisan ang simple nga mga butang nga ginahatag niya, kag dapat mahangpan naton nga regalo niya ini sa aton.

MAGSALIG NGA ATIPANON KA NI JEHOVA

12. Paano ginpakita ni David nga wala sia nagsalig sa iya kaugalingon kundi kay Jehova?

¹² Kabalo si David nga mainunungon si Jehova kag nagaulikid gid sia sa mga nagapalangga sa Iya. Sang ginsulat ni David ang Salmo 34, ara sa katalagman ang iya kabuhi. Pero mabakod gid ang iya pagtuo kay Jehova amo nga nakasiling sia nga “ang anghel ni Jehova nagabantay” sa iya. (Sal. 34:7) Posible nga ginpaanggid ni David ang anghel ni Jehova sa isa ka soldado nga alisto nga nagabantay sa pagsalakay sang mga kaaway. Isa ka maisog nga soldado si David kag ginpromisahan sia ni Jehova nga mangin hari sia. Pero wala nagsalig si David sa iya kaugalingon bisan pa sagad sia maglabyog sang bato ukon maggamit sang espada sa pagpierde sa iya mga kaaway. (1 Sam. 16:13; 24:12) Nagsalig si David sa Dios kay kabalo sia nga ‘ginaluwas sang anghel ni Jehova ang mga nagakahadlok sa Iya.’ Subong, wala kita nagapaabot nga amligan kita paagi sa milagro. Pero kabalo kita nga ang tanan nga nagasalig kay Jehova makabaton sang kabuhi nga wala sing katapusan bisan pa mapatay sila subong.

13. Ngaa pamensaron sang Gog sang Magog nga mahapos lang kita salakayon, pero ngaa indi kita dapat mahadlok? (Tan-awa ang piktyur sa kober.)

¹³ Nagasalig bala kita nga masarangan ni Jehova nga amligan kita? Sa indi na lang madugay, matilawan ang aton pagsalig sa iya. Kon salakayon na ang katawhan sang Dios sang Gog sang Magog, ukon sang naghimbon nga mga pungsod, posible nga hunahunaon naton nga mahalitan nila kita. Dapat kita magsalig nga masarangan kita luwason ni Jehova kag himuon gid niya ini. Sa panan-aw sang mga pungsod, daw pareho kita sa mga karnero nga wala sing nagaamlig. (Ezeq. 38:10-12) Wala kita sing mga armas, kag wala kita nahanas sa pagpakig-away. Pamensaron sang mga pungsod nga mahapos lang kita salakayon. Bangod wala sila nagatuo sa Dios, wala sila kabalo nga handa ang mga anghel ni Jehova sa pag-amlig sa aton. Pero nagatuo gid kita nga amligan kita. Makibot gid sila kon amligan na kita sang mga kasuldadusan sa langit.—Bug. 19:11, 14, 15.

HANDAI NA SUBONG ANG MATABO SA PALAABUTON

14. Ano ang puede naton himuon subong para mahandaan naton ang matabo sa palaabuton?

¹⁴ Ano ang puede naton himuon subong para mahandaan naton ang matabo sa palaabuton? Una, dapat husto ang aton pagtamod sa materyal nga mga butang, kay maabot ang tion nga biyaan naton ini. Dapat man kita mangin kontento, kag dapat ang aton kaangtanan kay Jehova amo ang nagapahalipay gid sa aton. Kon makilala pa gid naton sing maayo ang aton Dios, magasalig pa gid kita nga masarangan niya kita amligan kon magsalakay na ang Gog sang Magog.

15. Ano ang mga naeksperiensiahan ni David sang pamatan-on pa sia nga nagpabakod sang iya pagsalig nga buligan gid sia pirme ni Jehova?

¹⁵ Binagbinaga kon ano pa ang nakabulig kay David nga makabulig man sa aton nga mahandaan ang pagtilaw. Si David nagsiling: “Tilawi ninyo kag tan-awa nga si Jehova maayo; malipayon ang tawo nga nagadangop sa iya.” (Sal. 34:8) Base sa sining ginsiling ni David, mabal-an naton kon ngaa nagasalig gid sia nga buligan sia ni Jehova. Pirme gid nagasalig si David kay Jehova, kag wala gid sia ginpabay-an sang iya Dios. Sang pamatan-on pa si David, nakig-away sia sa higante nga Filistinhon nga si Goliat nga daw wala sing makapierde. Pero ginsilingan sia ni David: “Sa sini gid nga adlaw, itugyan ka ni Jehova sa akon.” (1 Sam. 17:46) Sang ulihi, sang nagaalagad si David kay Hari Saul, madamo nga beses nga gintinguhaan sia nga patyon ni Saul. Pero ‘kaupod ni David si Jehova.’ (1 Sam. 18:12) Bangod naeksperiensiahan ni David nga ginbuligan sia ni Jehova sang una, nagasalig si David nga buligan sia ni Jehova sa iya mga problema.

16. Sa ano nga mga sitwasyon ‘matilawan’ naton ang kaayo ni Jehova?

¹⁶ Kon pirme kita nagapagiya kay Jehova subong, mas magabakod ang aton pagsalig nga masarangan gid niya kita buligan sa palaabuton. Halimbawa, dapat may pagtuo kita kag handa kita magsalig kay Jehova kon mangabay kita sa aton boss nga mag-off sa aton obra para maka-attend kita sa aton asembleya ukon kombension, ukon mangabay kita kon puede i-adjust ang aton iskedyul sa obra para maka-attend kita sa tanan naton nga miting kag mas madamo kita sing tion sa pagbantala. Ano abi kon indi magsugot ang aton boss sa aton ginpangabay kag madulaan kita sang obra? Nagatuo bala kita nga indi gid kita pagbayaan ukon pagpabay-an ni Jehova kag hatagan gid niya kita pirme sang aton mga kinahanglanon? (Heb. 13:5) Madamo nga payunir ang makasugid sang ila mga eksperiensia nga nagapamatuod nga ginbuligan sila ni Jehova sa tion nga kinahanglan gid nila ini. Masaligan gid si Jehova.

17. Ano ang tuigan nga teksto sa 2022, kag ngaa suno gid ini sa tion?

¹⁷ Bangod kaupod naton si Jehova, indi gid kita dapat mahadlok ano man ang matabo sa palaabuton. Indi gid kita pagpabay-an sang aton Dios basta unahon naton ang iya Ginharian. Para ipahanumdom sa aton nga dapat naton handaan subong ang mga kabudlayan sa palaabuton kag dapat kita magsalig nga indi gid kita pagpabay-an ni Jehova, ginpili sang Nagadumala nga Hubon ang Salmo 34:10 bilang aton tuigan nga teksto sa 2022: “Ang mga nagapangita kay Jehova indi pagkulangon sing maayo nga butang.”