Mga Pamangkot Gikan sa mga Bumalasa

Sin-o ang mga banhawon sa duta, kag ano ini nga klase sang pagkabanhaw?

Binagbinaga ang sabat sang Biblia sa sini nga mga pamangkot.

Ang Binuhatan 24:15 nagasiling nga “may pagkabanhaw sang mga matarong kag mga indi matarong.” Ang mga matarong amo ang mga nagtuman sa Dios antes sila napatay, gani nasulat ang ila ngalan sa libro sang kabuhi. (Mal. 3:16) Nalakip sa mga indi matarong ang mga wala mahatagan sang tsansa nga makatuon parte kay Jehova antes sila napatay, gani wala nasulat ang ila ngalan sa libro sang kabuhi.

Ining duha ka grupo nga ginsambit sa Binuhatan 24:15 amo man ang ginapatuhuyan sang Juan 5:28, 29. Nagsiling si Jesus nga “ang mga naghimo sang maayo” magagua kag “makabaton sang kabuhi nga wala sing katapusan, apang ang mga naghimo sang malaut hukman.” Ang mga matarong naghimo sang maayo antes sila napatay. Banhawon sila kag makabaton sang kabuhi nga wala sing katapusan bangod nasulat gihapon ang ila ngalan sa libro sang kabuhi. Pero ang mga indi matarong naghimo sang malaut antes sila napatay. Gani hukman sila kon banhawon na sila. Wala pa nasulat ang ila ngalan sa libro sang kabuhi, gani hatagan sila sang tion para obserbahan sila. Sa sina nga tion, hatagan sila sang tsansa nga magtuon parte kay Jehova kag masulat ang ila ngalan sa libro sang kabuhi.

Ginapaathag sa Bugna 20:12, 13 nga dapat tumanon sang tanan nga banhawon ang “mga butang nga nasulat sa mga linukot,” ukon ang bag-o nga mga kasuguan nga ihatag sa aton sang Dios sa bag-ong kalibutan. Laglagon ni Jehova ang tanan nga indi magtuman sa sini.—Isa. 65:20.

Gintagna sang Daniel 12:2 nga ang iban sa mga banhawon “magabaton sing kabuhi nga wala sing katapusan kag ang iban pakahuy-an kag pakamalauton tubtob san-o.” Ginapatuhuyan sini nga bersikulo ang matabo sa ulihi sa mga banhawon. Magabaton sila sing “kabuhi nga wala sing katapusan” ukon “pakamalauton [sila] tubtob san-o.” Gani pagkatapos sang 1,000 ka tuig, ang iban makabaton sing kabuhi nga wala sing katapusan, pero ang iban laglagon.—Bug. 20:15; 21:3, 4.

Binagbinaga ini nga ilustrasyon. Ang sitwasyon sang duha ka grupo nga banhawon puede makumparar sa mga foreigner nga gusto mag-istar sa iban nga pungsod. Ang mga matarong daw pareho sa mga foreigner nga ginhatagan sing work visa ukon resident visa, gani may pila sila ka kinamatarong kag may mga benepisyo nga ginahatag ang gobierno sa ila. Ang mga indi matarong naman daw pareho sa mga foreigner nga ginhatagan sing temporary visa ukon visitor’s visa. Dapat anay pamatud-an sini nga mga foreigner nga nagakadapat sila mag-istar sa bag-o nga pungsod. Sing kaanggid, dapat tumanon sang mga indi matarong nga banhawon ang mga kasuguan ni Jehova kag dapat nila pamatud-an nga matarong sila para makapabilin sila sa Paraiso. Pero bisan ano man nga visa ang ihatag sa mga foreigner, dapat gid nila tumanon ang mga kasuguan sang pungsod. Kay man, posible nga mangin citizen sila sang pungsod sa ulihi ukon posible man nga i-deport sila. Nagadepende ini sa ila pamatasan kag ginahimo. Sing kaanggid, ang matabo sa ulihi sa mga banhawon nagadepende sa ila katutom kag ginahimo sa bag-ong kalibutan.

Mahigugmaon nga Dios si Jehova kag matarong gid sia. (Deut. 32:4; Sal. 33:5) Ipakita niya ang iya gugma paagi sa pagbanhaw sa mga matarong kag sa mga indi matarong. Pero gusto niya nga tumanon sining duha ka grupo ang iya mga kasuguan parte sa husto kag sala. Ang mga nagapalangga sa iya kag nagatuman sang iya mga kasuguan amo lang ang makapabilin sa bag-ong kalibutan.