Piktyur sang entablado kag sang telon sa ibabaw sini
1922 Sang Nagligad Nga Isa Ka Gatos Ka Tuig
“GINHATAG [sang Dios] sa aton ang kadalag-an paagi [kay] Jesucristo.” (1 Cor. 15:57) Amo ini ang ginpili nga tuigan nga teksto sang 1922. Ginpahanumdom sini ang mga Estudyante sang Biblia nga padyaan ni Jehova ang ila katutom. Sadto nga tuig, ginpadyaan gid ni Jehova ining mapisan nga mga manugbantala. Ginsugdan nila sadto ang pag-imprinta kag pag-bind sang ila mga libro, kag naggamit sila sang radyo para ibantala ang Ginharian. Ginpakamaayo gid sila ni Jehova. May isa pa ka hitabo sadto nga tuig nga nagapakita nga ginapakamaayo gid ni Jehova ang iya katawhan. Nakahiwat ang mga Estudyante sang Biblia sing importante nga kombension sa Cedar Point, Ohio, U.S.A. Daku ang epekto sini nga kombension sa ginahimo sang organisasyon ni Jehova halin sadto asta subong.
“KANAMI GID NGA IDEYA”
Bangod nagdamo ang manugbantala, kinahanglan man ang madamo nga publikasyon. Ang mga kauturan sa Bethel sa Brooklyn amo ang nagaimprinta sang mga magasin, pero ginapaimprinta nila sa mga printing company ang ila hardcover nga mga libro. Sa sulod sang madamo nga binulan, indi bastante ang mga libro nga mahimo sang mga printing company, gani naapektuhan ang pagbantala nga hilikuton. Bangod sini, ginpamangkot ni Brother Rutherford si Robert Martin, nga amo ang nagadumala sa printery, parte sa posibilidad nga sila mismo ang maghimo sang mga libro.
Ang printery sa Concord Street sa Brooklyn, New York
“Kanami gid nga ideya,” siling ni Brother Martin, “kay ginapahangop sini nga maga-operate kami sang printery nga makasarang sa paghimo sang mga libro.” Gin-arkilahan sang mga kauturan ang isa ka puesto sa 18 Concord Street sa Brooklyn kag nagbakal sila sang kinahanglan nila nga mga makina.
May pila nga wala nalipay sa sini. Ginbisitahan sang presidente sang isa ka kompanya nga nagaimprinta sang aton mga libro ang bag-o nga printery. Nagsiling sia: “Maayo gid nga klase ang inyo mga makina sa pag-imprinta, pero wala sing bisan isa sa inyo nga kabalo mag-operate sini. Pagligad sang anom ka bulan, guba na ini tanan.”
“Posible ina matabo,” siling ni Brother Martin, “pero pirme kami ginabuligan ni Jehova, gani kabalo kami nga buligan man niya kami subong.” Husto si Brother Martin. Sang ulihi, nagaimprinta na ang bag-o nga printery sang 2,000 ka libro kada adlaw.
Nagatindog sa tupad sang mga makina nga nagapang-imprinta ang mga naga-operate sini
LINIBO ANG GINBANTALAAN PAAGI SA RADYO
Magluwas sa pag-imprinta sang mga libro, ginsugdan man sang katawhan ni Jehova ang paggamit sang radyo para ibantala ang maayong balita. Bag-o ini nga paagi sa pagbantala. Sang Domingo sang hapon, Pebrero 26, 1922, nagpamulongpulong si Brother Rutherford sa radyo sa pinakauna nga tion. Ang estasyon sang radyo amo ang KOG sa Los Angeles, California, U.S.A., kag ang iya tema amo ang “Millions Now Living Will Never Die” (Minilyon nga Nagakabuhi Karon ang Indi Na Mapatay).
Ginbulubanta nga mga 25,000 ka tawo ang nakabati sang programa. Ang pila sa ila nagpadala sang sulat nga nagapasalamat kay Brother Rutherford. Ang isa sa mga nagsulat amo si Willard Ashford nga taga-Santa Ana, California. Ginpasalamatan niya si Brother Rutherford sa iya “manami kag makapahunahuna” nga pamulongpulong. Dayon nagsiling pa sia: “Tatlo ang nagamasakit sa amon balay. Kon wala ka nagpamulongpulong sa radyo, wala gid kuntani kami nakapamati sa imo bisan pa ibutang ta nga nagpamulongpulong ka sa lugar nga malapit lang sa amon.”
Pagkasunod nga mga semana, madamo pa nga mga pamulongpulong ang ginwaragwag sa radyo. Sang natapos ang 1922, ginbulubanta sang The Watch Tower nga “indi magnubo sa 300,000 ka tawo ang nakapamati sa sini sa radyo.”
Napalig-on gid ang mga Estudyante sang Biblia sa mga sulat kag mga komento nga nabaton nila. Gani nagdesisyon sila nga magpatindog sang estasyon sang radyo sa Staten Island, nga malapit lang sa Bethel sa Brooklyn. Sa sulod sang madamo nga tinuig, gingamit sang mga Estudyante sang Biblia ini nga estasyon, nga gintawag WBBR, para ibantala ang mensahe sang Ginharian sa madamo nga tawo.
“ADV”
Ginpahibalo sang Hunyo 15, 1922, nga The Watch Tower nga may hiwaton nga kombension sa Cedar Point, Ohio, sugod sa Septiembre 5 asta 13, 1922. Excited gid ang mga Estudyante sang Biblia pag-abot nila sa Cedar Point.
Sa una nga pamulongpulong ni Brother Rutherford, ginsilingan niya ang mga nagatambong: “Sigurado ako nga pakamaayuhon gid ni Jehova ini nga kombension, kag siguraduhon niya nga mahimo ang pinakamasangkad nga pagbantala sa bilog nga kalibutan.” Sulitsulit nga mabatian sa mga nagapamulongpulong sa kombension nga ginapalig-on nila ang mga kauturan nga magbantala.
Ang mga nag-attend sa kombension sa Cedar Point, Ohio, sang 1922
Sang Biernes, Septiembre 8, mga 8,000 ang nag-attend sa awditoryum kag excited sila sa pamulongpulong ni Brother Rutherford. Nagalaum sila nga ipaathag niya ang buot silingon sang “ADV,” nga ara sa mga imbitasyon. Sang nagpungko sila, sigurado gid nga madamo sa ila ang nakatalupangod sang daku nga telon nga nalukot sa ibabaw sang entablado. Ang isa sa mga nag-attend amo si Arthur Claus nga taga-Tulsa, Oklahoma, U.S.A. Manami ang iya puesto kay mabatian niya sing maayo ang pamulongpulong. Mabudlay sadto makapamati sing maayo kay wala pa mga mikropono ukon mga loudspeaker.
“Ginapamatian gid namon sing maayo ang pamulongpulong”
Para masigurado nga wala sing may magdisturbo sa pamulongpulong, ginpahibalo sang chairman nga wala sing pasudlon sa awditoryum samtang nagapamulongpulong si Brother Rutherford. Sang 9:30 sang aga, ginpaathag ni Brother Rutherford ang ginsiling ni Jesus sa Mateo 4:17: “Ang Ginharian sang langit malapit na.” Samtang ginabinagbinag niya kon paano mabatian sang mga tawo ang parte sa sini nga Ginharian, nagsiling sia: “Si Jesus mismo nagsiling nga sa tion sang iya presensia magapangani sia para tipunon ang iya matuod kag matutom nga katawhan.”
Si Brother Claus nga nagapungko sa sulod sang awditoryum nagsiling: “Ginapamatian gid namon sing maayo ang pamulongpulong.” Pero gulpi lang nga naglain ang iya pamatyag, kag kinahanglan niya maggua sa awditoryum. Daw indi tani sia maggua kay kabalo sia nga indi na sia pagpasudlon liwat.
Pagligad sang pila ka minuto, nag-ayo ang iya pamatyag. Nagsiling sia nga samtang nagalakat sia pabalik sa awditoryum, nabatian niya ang matunog nga pinalakpak. Nahunahuna niya nga dapat gid niya tapuson ang pagpamati sa sining manami nga pamulongpulong bisan pa kinahanglan niya magsaka sa atop. Nakakita sing paagi nga makasaka sa atop si Brother Claus, nga 23 anyos lang sadto. Sang malapit na sia sa bukas nga mga bintana, natalupangdan niya nga maathag niya nga mabatian ang pamulongpulong.
Pero indi lang si Arthur ang ara sa atop. Ara man sa atop ang pila sa iya mga abyan. Ang isa sa ila amo si Frank Johnson nga nagpamangkot sa iya, “May matalom ka nga kutsilyo?”
“Huo, may ara,” siling ni Arthur.
“Ikaw ang sabat sa amon mga pangamuyo,” siling ni Frank. “Nakita mo ining nalukot nga daku nga telon nga ginhigot sa mga lansang? May nakasulat sa sini nga telon. Pamatii sing maayo si Judge.a Kon magsiling sia, ‘kag dapat ninyo ibantala, ibantala,’ utda dayon ining apat ka higot.”
Gani gin-uyatan ni Arthur ang iya kutsilyo kag ginpamatian niya sing maayo si Brother Rutherford. Ginbantayan niya kag sang iya mga abyan nga isiling ni Brother Rutherford ang sinyales nga utdon na ang higot. Sang ihambal na ni Brother Rutherford ang pinakaimportante nga bahin sang iya pamulongpulong, excited gid sia kag grabe ang iya emosyon. Gani posible gid nga ginpabaskog niya ang iya tingog sang nagsiling sia: “Mangin matutom kag mangin matuod nga mga saksi sang Dios. Magpadayon sa pagpakig-away asta sa tion nga malaglag sing bug-os ang Babilonia. Ibantala ang mensahe bisan diin. Dapat mahibaluan sang kalibutan nga si Jehova ang Dios kag si Jesucristo amo ang Hari sang mga hari kag Ginuo sang mga ginuo. Ari na kita sa pinakaimportante nga tion sa kasaysayan sang tawo. Tan-awa, ang Hari nagagahom na! Dapat ninyo ini ipahibalo sa tanan. Gani ibantala, ibantala, ibantala, ang Hari kag ang iya Ginharian.”
Nagsiling si Arthur nga sang gin-utod niya kag sang iban pa nga mga brother ang mga higot, kanami gid tan-awon sang pagbuklad sang telon. Nakasulat sa sini ang mga tinaga nga, “Advertise the King and Kingdom.” Ang “ADV” amo ang ginpalip-ot nga English nga tinaga nga “advertise,” nga nagakahulugan sing “ibantala.”
IMPORTANTE NGA HILIKUTON
Napalig-on ang mga kauturan sa kombension sa Cedar Point nga magpokus sa pinakaimportante nga hilikuton nga amo ang pagbantala sang Ginharian. Nalipay gid sa pagbantala ang mga handa nga himuon ini. Ang isa ka colporteur (payunir subong) sa Oklahoma, U.S.A., nagsulat, “Madamo nga tawo sa amon teritoryo ang nagaobra sa minahan sang coal kag pigado katama ang ila pagkabuhi.” Nagsiling sia nga sa masami, kon mabatian sang mga tawo ang mensahe nga ara sa Golden Age nga magasin, “nagahibi sila.” Dayon nagsiling sia, “Nalipay gid kami nga mapaumpawan sila.”
Nabatyagan sini nga mga Estudyante sang Biblia ang importansia sang ginsiling ni Jesus nga mabasa sa Lucas 10:2: “Madamo ang alanyon, apang diutay lamang ang mangangani.” Sang natapos ang tuig, mas ginpanikasugan pa gid nila nga ibantala ang mensahe sang Ginharian sa pinakamadamo nga tawo asta sa malab-utan nila.
a Kon kaisa, ginatawag si Brother Rutherford nga “Judge” bangod may mga tion nga nakaobra sia bilang hukom sa Missouri, U.S.A.