1 | Pangamuyo—‘Itugyan Ninyo sa Iya ang Tanan Ninyo nga Kabalaka’

ANG GINASILING SANG BIBLIA: ‘Itugyan ninyo sa Dios ang tanan ninyo nga kabalaka, kay nagaulikid sia sa inyo.—1 PEDRO 5:7.

Ang Buot Silingon

Ginaagda kita ni Jehova nga Dios nga isugid sa iya ang bisan ano nga problema ukon kabalaka nga nagapagamo sa aton pensar. (Salmo 55:22) Puede naton ipangamuyo sa iya ang aton problema, daku man ini ukon gamay. Kon importante ini sa aton, importante man ini kay Jehova, kay nagaulikid gid sia sa aton. Ang pangamuyo makabulig gid para maghaganhagan ang aton kabalaka.—Filipos 4:6, 7.

Kon Paano Ini Makabulig

Kon may problema kita sa mental health, basi nagabatyag kita nga nagaisahanon, kay sa masami, indi gid bug-os nga maintiendihan sang iban ang aton ginaantos. (Hulubaton 14:10) Pero kon isugid naton ang tanan naton nga ginabatyag sa Dios kon mangamuyo kita, magapamati gid sia kag naintiendihan gid niya kita. Makita kita ni Jehova, nabal-an niya ang aton kasakit kag pag-antos, kag gusto niya nga ipangamuyo naton sa iya ang bisan ano nga ginakabalak-an naton.—2 Cronica 6:29, 30.

Ang pag-istorya kay Jehova sa pangamuyo nagapabakod sang aton pagsalig nga nagaulikid sia sa aton. Mabatyagan naton ang ginsiling sang manunulat sang Salmo nga nagpangamuyo: “Nakita mo ang akon kalisdanan; nahibaluan mo ang akon tuman nga kasakit.” (Salmo 31:7) Bangod nahibaluan naton nga nakita ni Jehova ang aton ginaantos, nagapahaganhagan ini sang aton ginabatyag. Pero, wala lang niya ginatan-aw ang aton mga kabudlayan. Wala na sang iban pa nga makaintiende gid sang aton ginaantos, kag paagi sa Biblia ginabuligan niya kita nga mapaumpawan kag mapabakod.

Kon Paano Nabuligan sang Biblia si Julian

Ang Epekto sa Akon sang Anxiety Disorder

“May ara ako anxiety disorder kag obsessive-compulsive disorder (OCD). Gulpi lang ini nagaatake sa akon sa wala ginapaabot nga tion. Kon kaisa maayo ang akon pamatyag, pero gulpi lang nagabatyag ako sang grabe nga kabalaka bisan wala man sing rason. Indi ako mapahamtang kon ara ako sa lugar nga madamo sing tawo kay ginakabalak-an ko kon ano ang ila ginapensar sa akon.

“Ginabuligan gid ako sang akon mga abyan nga nakahibalo sang akon sitwasyon. Kon kaisa pamatyag ko ang ila ginahambal indi gid makabulig. Pero nagapasalamat ako nga gusto nila ako buligan.

“May mga tion nga bangod sang akon anxiety disorder kag sang akon OCD nabudlayan ako mangamuyo. Kinahanglan manikasog gid ako sing todo para makapokus kag makaistorya kay Jehova sa pangamuyo. Kadamo sang nagasulod sa pensar ko amo nga indi na ako mapahamtang kag indi na ako kabalo kon ano ang akon ihambal. Bangod kagamo sang akon pensar, indi ko man masugid kay Jehova kon ano ang akon ginahunahuna kag ginabatyag.”

Kon Paano Ako Nabuligan sang Biblia

“Natun-an ko sa Biblia nga ang pangamuyo indi kinahanglan nga malawig ukon naplastar sing maayo ang mga tinaga para pamatian sang Dios. Kon kaisa, kon indi ko gid mahambal ang akon ginabatyag, nagapangamuyo na lang ako nga: ‘Jehova, palihug buligi ’ko.’ Bisan amo lang ’na ang akon masiling, nabatyagan ko gid nga naintiendihan ako ni Jehova kag ginasabat niya ang akon pangamuyo sa sina nga tion. Dugang sa pangamuyo, nagpakonsulta man ako. Nalipay gid ako nga nakabulig ang pagpangamuyo kag ang pagpadoktor para mag-ayoayo ang akon kondisyon. Bisan pa kinahanglan sang daku nga panikasog para makapalapit sa akon Amay sa langit, ginahimo ko ini kay bal-an ko nga palangga niya ako kag gusto niya ako buligan.”