Makasalig Ka nga Buligan Ka ni Jehova sa Mabudlay nga mga Sitwasyon

1-2. (a) Ano ang pagkaanggid sang aton sitwasyon sa sitwasyon sang mga Judiyo nga nagbalik sa Jerusalem? (b) Ano ang pila ka kabudlayan nga naeksperiensiahan sang mga Judiyo? (Tan-awa ang kahon nga “Ang mga Natabo sang Panahon ni Hageo, ni Zacarias, kag ni Esdras.”)

MAY mga tion bala nga nabalaka ka sa imo palaabuton? Posible nga nadulaan ka sang obra kag nabalaka ka kon paano mo maamanan ang imo pamilya. Posible nga nabalaka ka para sa imo pamilya bangod sang kinagamo sa pulitika, sang paghingabot, ukon sang pagpamatok sa aton pagbantala nga hilikuton. Amo bala sini ang imo sitwasyon subong? Daw pareho man sa sini ang sitwasyon sang mga Israelinhon sang una. Gani mapalig-on ka gid kon binagbinagon mo kon paano sila ginbuligan ni Jehova.

² Para sa mga Judiyo nga sa Babilonia lang nakaistar sa bilog nila nga kabuhi, mabudlay gid biyaan ang ila maayo nga sitwasyon didto. Gani nagpakita sila sang mabakod nga pagtuo sang naglakbay sila pakadto sa pungsod nga indi pamilyar sa kalabanan sa ila. Wala madugay pag-abot nila sa Jerusalem, naapektuhan sila sang problema sa ekonomiya, sang kinagamo sa pulitika, kag sang pagpamatok. Bangod sini, nabudlayan ang iban nga magpokus sa pagkay-o sang templo ni Jehova. Gani, sang mga 520 B.C.E., ginsugo ni Jehova ang iya duha ka manalagna nga sanday Hageo kag Zacarias nga palig-unon ang katawhan nga mangin mapisan sa ila pagsimba kay Jehova. (Hag. 1:1; Zac. 1:1) Napalig-on gid sila sa sini nga mga manalagna. Pero pagligad sang halos 50 ka tuig, nagluya liwat ang nagbalik nga mga Judiyo. Gani halin sa Babilonia, nagkadto sa Jerusalem si Esdras, nga isa ka eksperto nga manugkopya sang Kasuguan, para palig-unon ang katawhan sang Dios nga unahon sa ila kabuhi ang pagsimba kay Jehova.​—Esd. 7:​1, 6.

3. Ano nga mga pamangkot ang binagbinagon naton? (Hulubaton 22:19)

³ Nakabulig gid sa katawhan sang Dios sang una ang mga tagna nanday Hageo kag Zacarias nga padayon nga magsalig kay Jehova bisan pa may mga nagapamatok sa ila. Makabulig man ini sa aton subong nga magsalig nga buligan gid kita ni Jehova sa mabudlay nga mga sitwasyon. (Basaha ang Hulubaton 22:19.) Gani binagbinagon naton ang mensahe sang Dios paagi kanday Hageo kag Zacarias, dayon tun-an naton ang halimbawa ni Esdras. Samtang ginahimo naton ini, sabton naton ini nga mga pamangkot: Paano naapektuhan sang mga kabudlayan ang nagbalik nga mga Judiyo? Ngaa dapat naton padayon nga unahon ang paghimo sang kabubut-on sang Dios bisan sa mabudlay nga mga sitwasyon? Kag paano naton mapabakod ang aton pagsalig kay Jehova sa tion sang mga kabudlayan?

ANG EPEKTO SANG MGA KABUDLAYAN SA NAGBALIK NGA MGA JUDIYO

4-5. Ngaa nadula ang kapisan sang mga Judiyo sa pagkay-o sang templo?

⁴ Pag-abot sang nagbalik nga mga Judiyo sa Jerusalem, madamo sila sang dapat himuon. Gani ginkay-o nila dayon ang halaran ni Jehova kag ginpasad nila ang pundasyon sang templo. (Esd. 3:​1-3, 10) Pero sang ulihi, nadula ang ila kapisan sa pagkay-o sang templo. Ngaa? Bangod magluwas nga dapat nila kay-uhon ang templo, dapat man sila magpatindog sang ila mga balay, magpananom sa mga uma, kag dapat nila amanan ang ila mga pamilya. (Esd. 2:​68, 70) Ginapamatukan man sila sang ila mga kaaway nga may plano nga pauntaton sila sa pagkay-o sang templo.​—Esd. 4:​1-5.

⁵ Nakaapekto man sa nagbalik nga mga Judiyo ang problema sa ekonomiya kag ang kinagamo sa pulitika. Sakop na sadto sang Emperyo sang Persia ang ila pungsod. Sang napatay si Hari Ciro sang Persia sang 530 B.C.E., gusto gid sang nagbulos sa iya nga si Cambyses nga sakupon ang Egipto. Samtang nagapakadto sa Egipto, posible nga nag-agi ang iya mga soldado sa teritoryo sang Israel kag ginpilit nila ang mga Israelinhon nga hatagan sila sang pagkaon, tubig, kag mapahuwayan. Bangod sini, nadugangan pa gid ang kabudlayan sang mga Israelinhon. Ang nagbulos kay Cambyses amo si Dario I. Sang nag-umpisa sia sa paggahom, may mga kinagamo sa pulitika kag madamo ang nagrebelde sa iya. Bangod sa sini nga mga kahimtangan, sigurado gid nga madamo sa nagbalik nga mga Judiyo ang nabalaka kon paano nila maamanan ang ila pamilya. Bangod sang mga nagakatabo, nahunahuna sang pila ka Judiyo nga indi pa sadto ang tion para kay-uhon ang templo ni Jehova.​—Hag. 1:2.

6. Suno sa Zacarias 4:​6, 7, ano pa nga kabudlayan ang naeksperiensiahan sang mga Judiyo, kag ano ang ginpasalig sa ila ni Zacarias?

⁶ Basaha ang Zacarias 4:​6, 7. Magluwas sa problema sa ekonomiya kag sa kinagamo sa pulitika, ginhingabot man ang mga Judiyo. Sang 522 B.C.E., nakumbinsi sang ila mga kaaway ang gobierno sang Persia nga pauntaton sila sa pagkay-o sang templo ni Jehova. Pero ginpasalig ni Zacarias ang mga Judiyo nga gamiton ni Jehova ang Iya gamhanan nga espiritu para mapadayon nila ang ila ginahimo. Sang 520 B.C.E., nagsugo si Hari Dario nga puede na nila padayunon liwat ang pagkay-o sang templo kag ginhatagan pa gani niya sila sang kuarta. Ginsugo man niya ang mga gobernador nga buligan ang mga Judiyo.​—Esd. 6:​1, 6-10.

7. Sang gin-una sang nagbalik nga mga Judiyo ang paghimo sang kabubut-on sang Dios, ano nga mga pagpakamaayo ang nabaton nila?

⁷ Paagi kanday Hageo kag Zacarias, nagpromisa si Jehova sa iya katawhan nga buligan niya sila kon unahon nila ang pagkay-o sang templo. (Hag. 1:​8, 13, 14; Zac. 1:​3, 16) Bangod sa pagpalig-on sang mga manalagna, ginsugdan liwat sang nagbalik nga mga Judiyo ang pagkay-o sang templo sang 520 B.C.E. Wala malab-utan lima ka tuig, natapos nila ang pagkay-o sang templo. Bangod gin-una sang mga Judiyo ang paghimo sang kabubut-on ni Jehova bisan sa mabudlay nga mga sitwasyon, ginhatagan niya sila sang ila mga kinahanglanon kag ginbuligan niya sila nga padayon nga mangin matutom sa iya. Gani nangin malipayon sila sa ila pagsimba kay Jehova.​—Esd. 6:​14-16, 22.

UNAHA ANG KABUBUT-ON SANG DIOS

8. Paano makabulig sa aton ang ginasiling sang Hageo 2:4 nga unahon ang paghimo sang kabubut-on sang Dios? (Tan-awa man ang footnote.)

⁸ Samtang nagahilapit ang dakung kapipit-an, kabalo kita nga importante gid ang pagbantala nga hilikuton. (Mar. 13:10) Pero kon nagapamigado kita ukon ginapamatukan ang aton pagbantala, posible gid nga nabudlayan kita nga magpokus sa sini. Ano ang makabulig sa aton nga unahon ang paghimo sang kabubut-on ni Jehova? Dapat kita magsalig nga kaupod naton si “Jehova sang mga kasuldadusan.”b Buligan niya kita kon padayon naton nga unahon ang paghimo sang iya kabubut-on. Gani indi gid kita dapat mahadlok.​—Basaha ang Hageo 2:4.

9-10. Paano napamatud-an sang isa ka mag-asawa nga matuod gid ang ginsiling ni Jesus sa Mateo 6:33?

⁹ Binagbinaga ang halimbawa sang mag-asawa nga payunir nga sanday Oleg kag Irina.c Pagkatapos nila magsaylo sa iban nga lugar para buligan ang isa ka kongregasyon, nadulaan sila sang obra bangod sang problema sa ekonomiya sa ila pungsod. Bisan pa wala sila sang permanente nga obra sa sulod sang mga isa ka tuig, nabatyagan gid nila ang gugma kag bulig ni Jehova. May mga tion man nga ginbuligan sila sang ila mga kauturan. Ano ang nakabulig sa ila nga mabatas ang mga kabudlayan? Si Oleg, nga na-depress sang umpisa, nagsiling, “Nangin masako kami sa pagbantala, kag nakabulig ini sa amon nga magpokus sa kon ano ang pinakaimportante sa kabuhi.” Samtang nagapangita sia kag ang iya asawa sang obra, masako sila gihapon sa ila pagbantala.

¹⁰ Isa ka adlaw, pag-abot nila sa ila balay pagkatapos nila magbantala, ginsugiran sila sang ila kaingod nga may nagkadto sa ila balay. Nagbiyahe gali ang ila suod nga abyan sing mga 160 ka kilometro para dal-an sila sang ila mga kinahanglanon kag mga pagkaon nga nabutang sa duha ka suludlan. Nagsiling si Oleg: “Sadto nga adlaw, nabatyagan namon liwat kon daw ano kami ka palangga ni Jehova kag sang mga kauturan. Kumbinsido kami nga wala gid ginakalimtan ni Jehova ang iya mga alagad, bisan pa pamatyag nila daw wala na sang paglaum ang ila sitwasyon.”​—Mat. 6:33.

11. Ano ang mapaabot naton kon padayon naton nga unahon ang paghimo sang kabubut-on sang Dios?

¹¹ Gusto ni Jehova nga magpokus kita sa hilikuton nga nagaluwas sang kabuhi nga amo ang pagtudlo sa mga tawo para mangin disipulo sila. Natun-an naton sa parapo 7 nga ginpalig-on ni Hageo ang katawhan ni Jehova nga sugdan liwat ang pagkay-o sang templo. Ginpalig-on niya sila nga mangin mapisan liwat nga daw pareho lang nga ginapasad nila liwat ang pundasyon sang templo. Kon himuon nila ini, nagpromisa si Jehova nga “pakamaayuhon” niya sila. (Hag. 2:​18, 19) Makasalig man kita nga pakamaayuhon ni Jehova ang aton mga pagpanikasog kon unahon naton ang hilikuton nga ginsugo niya sa aton.

KON PAANO NATON MAPABAKOD ANG ATON PAGSALIG KAY JEHOVA

12. Ngaa kinahanglan ni Esdras kag sang kaupod niya nga mga bihag ang mabakod nga pagtuo?

¹² Sang 468 B.C.E., naglakbay si Esdras halin sa Babilonia pakadto sa Jerusalem upod ang ikaduha nga grupo sang mga Judiyo. Kinahanglan gid ni Esdras kag sang mga kaupod niya ang mabakod nga pagtuo. Kay man, madamo ang dala nila nga bulawan kag pilak nga ginhatag sa ila para gamiton sa templo, gani posible nga lambatan sila sang mga tulisan. (Esd. 7:​12-16; 8:31) Kag narealisar nila nga delikado man ang sitwasyon bisan sa Jerusalem. Diutay lang ang nagaistar sa siudad, kag dapat kay-uhon ang mga pader kag mga gawang sini. Ano ang matun-an naton kay Esdras parte sa pagpabakod sang aton pagsalig kay Jehova?

13. Paano ginpabakod ni Esdras ang iya pagsalig kay Jehova? (Tan-awa man ang footnote.)

¹³ Nakita ni Esdras kon paano ginbuligan ni Jehova ang Iya katawhan sa mabudlay nga mga sitwasyon. Sang 484 B.C.E., posible nga nagaistar si Esdras sa Babilonia sang nagmando si Hari Ahasuero nga pamatyon ang tanan nga Judiyo sa Emperyo sang Persia. (Est. 3:​7, 13-15) Gani ara sa peligro ang kabuhi ni Esdras kag sang tanan nga Judiyo. Sang nabatian sang mga Judiyo “sa tanan nga probinsia” ang parte sa mando, nagpuasa sila kag naghibi samtang nagapangamuyo kay Jehova nga buligan sila. (Est. 4:3) Gani imbes nga sila ang pamatyon, ang mga nagplano nga pamatyon sila amo ang ginpamatay. Imadyina ang nabatyagan ni Esdras kag sang mga Judiyo sadto nga tion. (Est. 9:​1, 2) Sigurado gid nga nakabulig kay Esdras ini nga eksperiensia para masarangan niya ang mabudlay nga mga sitwasyon sang ulihi, kag nagpabakod ini sa iya pagsalig nga ginaamligan gid ni Jehova ang Iya katawhan.d

14. Ano ang natun-an sang isa ka sister sang naeksperiensiahan niya ang bulig ni Jehova sa mabudlay nga mga sitwasyon?

¹⁴ Kon maeksperiensiahan naton ang bulig ni Jehova sa mabudlay nga mga sitwasyon, nagabakod pa gid ang aton pagsalig sa iya. Binagbinaga ang halimbawa ni Anastasia nga taga-Eastern Europe. Naghalin sia sa iya obra para malikawan niya nga magdampig sa pulitika. Nagsiling sia: “Subong ko pa lang naeksperiensiahan nga wala gid ako sang kuarta.” Nagsiling pa sia: “Nangamuyo ako kay Jehova kag ginbuligan gid niya ako. Kon madulaan ako liwat sang obra, indi gid ako mahadlok. Kon ginaatipan ako sang akon Amay sa langit subong, sigurado nga atipanon man niya ako sa palaabuton.”

15. Ano ang nakabulig kay Esdras nga padayon nga magsalig kay Jehova? (Esdras 7:​27, 28)

¹⁵ Naeksperiensiahan ni Esdras ang pagbulig ni Jehova sa iya. Ginpamalandungan ni Esdras ang mga tion nga ginbuligan sia ni Jehova, gani padayon sia nga nagsalig sa Iya. Talupangda ang ekspresyon nga “ginbuligan ako ni Jehova nga akon Dios.” (Basaha ang Esdras 7:​27, 28.) Lima pa ka beses nga ginsambit ni Esdras ang pareho sa sini nga ekspresyon sa libro sang Esdras nga iya ginsulat.​—Esd. 7:​6, 9; 8:​18, 22, 31.

16. Sa ano nga mga sitwasyon makita naton sing maathag nga ginabuligan kita ni Jehova? (Tan-awa man ang piktyur.)

¹⁶ Mabuligan kita ni Jehova sa mabudlay nga mga sitwasyon. Halimbawa, kon nagalisensia kita sa aton boss nga mag-leave sa obra para maka-attend kita sa kombension ukon nagalisensia kita nga i-adjust ang aton iskedyul sa obra para maka-attend kita sa tanan naton nga miting, maeksperiensiahan gid naton ang bulig ni Jehova. Kag posible nga makibot gid kita sa mangin resulta kay mas maayo pa ini sangsa ginapaabot naton. Gani, magabakod pa gid ang aton pagsalig kay Jehova.

17. Paano ginpakita ni Esdras nga mapainubuson sia sa tion sang kabudlayan? (Tan-awa ang piktyur sa kober.)

¹⁷ Mapainubuson nga nangamuyo si Esdras kay Jehova nga buligan sia. Sa kada tion nga nabalaka si Esdras sa iya mga responsibilidad, mapainubuson sia nga nagapangamuyo kay Jehova. (Esd. 8:​21-23; 9:​3-5) Bangod nagsalig si Esdras kay Jehova, napalig-on ang iban nga suportahan sia kag ilugon ang iya pagtuo. (Esd. 10:​1-4) Kon nabalaka kita parte sa aton materyal nga mga kinahanglanon ukon parte sa sitwasyon sang aton pamilya, dapat kita mangamuyo kay Jehova kag magsalig nga buligan niya kita.

18. Ano ang makabulig para magbakod ang aton pagsalig kay Jehova?

¹⁸ Kon mapainubuson kita nga magpabulig kay Jehova kag batunon naton ang bulig sang aton mga kauturan, magabakod ang aton pagsalig sa iya. Binagbinaga ang halimbawa ni Erika nga may tatlo ka bata. Sang nakaeksperiensia sia sang masubo gid nga mga sitwasyon, padayon sia nga nagsalig kay Jehova. Sa sulod sang malip-ot lang nga tion, nahulog ang iya ginabusong nga bata kag napatay ang iya pinalangga nga bana. Amo ini ang ginsiling niya parte sa tanan nga natabo: “Indi mo mabal-an sing abanse kon paano ka buligan ni Jehova. Masorpresa ka gid sa iya mga paagi. Madamo sa akon mga pangamuyo ang ginsabat ni Jehova paagi sa akon mga abyan. May mga ginsiling sila kag ginhimo nga nakabulig gid sa akon. Gani ginasugid ko sa akon mga abyan ang mga nagakatabo sa akon kabuhi para kabalo sila kon paano nila ako buligan.”

PIRME MAGSALIG KAY JEHOVA ASTA SA KATAPUSAN

19-20. Ano ang matun-an naton sa mga Judiyo nga wala nakabalik sa Jerusalem?

¹⁹ May matun-an man kita sa mga Judiyo nga wala nakabalik sa Jerusalem. Posible nga tigulang na ang pila sa ila, may malala nga balatian, ukon may mga obligasyon sila sa ila pamilya. Pero bisan pa amo sini ang ila sitwasyon, nalipay gid sila sa pagbulig sa mga Judiyo nga nagdesisyon nga magbalik sa Jerusalem. Ginhatagan nila sila sang madamo nga mga butang nga kinahanglan sa pagkay-o sang templo. (Esd. 1:​5, 6) Pagligad sang mga 19 ka tuig pagkatapos mag-abot sa Jerusalem ang una nga grupo sang mga Judiyo, posible nga nagapadala gihapon sang kinabubut-on nga amot sa Jerusalem ang mga nabilin sa Babilonia.​—Zac. 6:10.

²⁰ Bisan pa limitado na lang ang aton mahimo sa aton pag-alagad kay Jehova, makasalig kita nga ginapabaloran gid niya ang aton mga pagpanikasog para malipay sia. Ngaa masiling naton ini? Sang panahon ni Zacarias, ginsugo ni Jehova ang iya manalagna nga magkuha sing bulawan kag pilak halin sa ginpadala sang mga bihag sa Babilonia, kag himuon ini nga isa ka korona. (Zac. 6:11) Ining “daku nga korona” mangin isa ka “pahanumdom” sang ila maalwan nga mga amot. (Zac. 6:​14, footnote) Gani makasalig kita nga indi gid pagkalimtan ni Jehova ang aton bug-os tagipusuon nga pag-alagad sa iya sa mabudlay nga mga sitwasyon.​—Heb. 6:10.

21. Ano ang himuon naton para padayon kita nga magsalig kay Jehova bisan ano pa ang matabo sa palaabuton?

²¹ Makaeksperiensia gid kita sang mabudlay nga mga sitwasyon sa sining katapusan nga mga adlaw, kag posible nga magalala pa gid ang kahimtangan sa palaabuton. (2 Tim. 3:​1, 13) Pero, indi kita dapat mabalaka sing sobra. Dumduma ang ginsiling ni Jehova sa iya katawhan sang panahon ni Hageo: “Kaupod ninyo ako . . . Indi kamo magkahadlok.” (Hag. 2:​4, 5) Makasalig man kita nga kaupod naton si Jehova basta ginahimo naton ang iya kabubut-on sa bug-os naton nga masarangan. Kon iaplikar naton ang aton mga natun-an sa mga tagna ni Hageo, sa mga tagna ni Zacarias, kag sa halimbawa ni Esdras, padayon kita nga magasalig kay Jehova bisan ano pa nga mga kabudlayan ang maeksperiensiahan naton sa palaabuton.