Husto kag Sala: Ang Desisyon nga Dapat Mo Himuon
Ang mga kasuguan sa moral nga aton ginpili nga sundon may epekto kon bala mangin malipayon kita ukon indi. Nahibaluan ina ni Jehova nga Dios. Amo ina kon ngaa gusto niya nga sundon naton ang iya mga kasuguan.
Gusto ni Jehova nga may malinong kag malipayon kita nga kabuhi.
“Ako si Jehova nga imo Dios, ang nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan. Luyag ko nga magpamati ka sa akon mga sugo! Kon himuon mo ini, ang imo paghidait mangin kaangay sang suba kag ang imo pagkamatarong mangin kaangay sang mga balod sang dagat.”—Isaias 48:17, 18.
Bilang aton Manunuga, nahibaluan sang Dios ang pinakamaayo nga paagi sang pagkabuhi. Gusto niya nga sundon naton ang iya giya kay para ini sa aton kaayuhan. Kon sundon naton ang mga sugo sang Dios, indi na kita magduhaduha kon bala mangin maayo ukon indi ang resulta sang aton desisyon. Pirme gid mangin insakto ang aton desisyon nga magaresulta sa kalinong kag kalipay.
Wala ginapaabot ni Jehova nga himuon naton ang indi naton masarangan.
“Ini nga sugo nga ginasugo ko sa inyo subong nga adlaw indi mabudlay para sa inyo, kag indi ini malayo sa inyo.”—Deuteronomio 30:11.
Kon sundon naton ang giya sang Dios mahimo nga kinahanglan naton bag-uhon ang aton panghunahuna kag paggawi. Pero, wala nagapaabot si Jehova sing sobra sa aton mahimo. Bilang aton Manunuga, nahibaluan niya kon ano ang aton masarangan. Kag kon mas makilala pa gid naton si Jehova, mahibaluan naton nga “ang iya mga sugo indi mabug-at.”—1 Juan 5:3.
Si Jehova nagapromisa nga buligan niya ang mga nagpili nga sundon ang iya mga sugo.
“Ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’”—Isaias 41:13.
Masunod naton ang mga sugo sang Dios bangod buligan niya kita. Himuon niya ini paagi sa iya Pulong, ang Biblia, nga makahatag sa aton sing pagpalig-on kag paglaum.
Natun-an sang minilyon ka tawo sa bilog nga kalibutan nga nagnami ang ila kabuhi sang ginsunod nila ang mga kasuguan sa Biblia. Tun-i sing dugang ang maayo nga laygay nga mahatag sang Biblia. Puede mo ini sugdan paagi sa pagtuon sa base sa Biblia nga brosyur nga Magkabuhi sing Wala Katapusan! nga mabasa sing libre sa jw.org. Amo ini ang mga leksion nga imo matun-an:
Paano ang Biblia Makabulig sa Imo?
Ang Biblia Nagahatag sing Paglaum
Masaligan Mo Bala ang Biblia?
Samtang ginatun-an mo ang Pulong sang Dios, ang Biblia, mahibaluan mo nga makabulig gihapon ini asta subong. “Masaligan ini pirme, karon kag sa wala sing katubtuban.” (Salmo 111:8) Ang pagsunod sa mga giya nga makita sa Biblia amo ang pinakamaayo nga himuon naton sa aton kabuhi. Pero, indi kita pagpiliton sang Dios nga himuon ini. (Deuteronomio 30:19, 20; Josue 24:15) Ang kada isa sa aton ang dapat magdesisyon kon himuon naton ini.