Kon Paano Ka Makakita sing Utod nga Mangin Maayo nga Asawa Ukon Bana

1-2. (a) Ano ang dapat binagbinagon sing maayo sang isa ka single nga utod antes sia mag-umpisa sa pag-date? (b) Sa ano nagapatuhoy ang tinaga nga “pag-date”? (Tan-awa ang “Dugang nga Paathag.”)

GUSTO mo bala magpangasawa ukon magpamana? Indi kinahanglan magpangasawa ukon magpamana ang isa ka single nga utod para mangin malipayon sia. Pero madamo nga lamharon ukon may edad na nga mga utod ang gusto magpangasawa ukon magpamana. Siempre, antes mo umpisahan ang pag-date, dapat handa ka na sa espirituwal, emosyonal, kag pinansial nga mga responsibilidad sa pag-asawahay.a (1 Cor. 7:36) Kon handa ka na antes ka mag-date, labanlaban gid nga mangin malipayon kamo sang imo mangin asawa ukon bana sa ulihi.

² Pero, indi mahapos mangita sing utod nga mangin maayo nga asawa ukon bana. (Hulu. 31:10) Kag bisan pa makakita ka sing utod nga gusto mo nga mas makilala sing maayo, posible nga indi mahapos umpisahan ang pag-date.b Sa sini nga artikulo, binagbinagon naton kon ano ang makabulig sa isa ka single nga Cristiano nga makakita sing utod nga mangin maayo nga asawa ukon bana. Tun-an man naton kon paano masuportahan sang mga kauturan ang mga utod nga gusto magpangasawa ukon magpamana.

PAANO KA MAKAKITA SING UTOD NGA MANGIN MAAYO NGA ASAWA UKON BANA?

3. Ano ang dapat binagbinagon sang isa ka single nga utod kon nagapangita sia sing mapangasawa ukon mapamana?

³ Kon gusto mo magpangasawa ukon magpamana, mas maayo kon hibaluon mo na nga daan kon ano nga mga kinaiya ang gusto mo nga makita sa imo mangin asawa ukon bana antes ka mag-date. Kay kon indi mo ini paghimuon, posible nga indi mo matalupangdan ang isa ka utod nga puede mangin isa ka maayo nga asawa ukon bana. Kag posible man nga may ma-date ka nga indi bagay sa imo. Siempre, dapat bawtismado nga utod ang pilion mo nga mangin asawa ukon bana. (1 Cor. 7:39) Pero bisan pa bawtismado na ang isa ka utod, indi buot silingon sini nga mangin isa na sia ka maayo nga asawa ukon bana. Gani pamangkuta ang imo kaugalingon: ‘Ano ang akon mga goal ukon tulumuron? Ano nga mga kinaiya ang gusto ko nga makita sa akon mangin asawa ukon bana? Makatarunganon bala ang akon mga ginapaabot?’

4. Kon parte sa pagpangita sing mapangasawa ukon mapamana, ano ang ginpangabay sang iban sa ila mga pangamuyo?

⁴ Kon gusto mo magpangasawa ukon magpamana, sigurado gid nga ginpangamuyo mo na ini kay Jehova. (Fil. 4:6) Wala nagpromisa si Jehova nga hatagan niya sang asawa ukon bana ang iya mga alagad. Pero nagaulikid sia sa imo kag kabalo sia sang imo mga kinahanglanon kag sang imo ginabatyag, gani buligan ka niya samtang nagapangita ka sing mapangasawa ukon mapamana. Gani padayon nga isugid sa iya ang imo mga handum kag ginabatyag. (Sal. 62:8) Mangamuyo sa iya nga buligan ka nga mangin mapinasensiahon kag hatagan ka sing kaalam. (Sant. 1:5) Binagbinaga si Johnc nga isa ka single nga brother nga taga-United States. Ari ang ginsiling niya nga ginalakip niya sa iya mga pangamuyo: “Ginasugid ko kay Jehova kon ano nga mga kinaiya ang ginapangita ko sa gusto ko mangin asawa. Nagapangamuyo ako nga kuntani may mga sitwasyon nga may makilala ako nga sister nga puede mangin isa ka maayo nga asawa. Nagapangabay man ako kay Jehova nga buligan niya ako nga mapakita ang mga kinaiya nga makabulig sa akon nga mangin isa ka maayo nga bana.” Si Tanya, nga isa ka sister nga taga-Sri Lanka, nagsiling: “Samtang nagapangita ako sing mapamana, nagapangabay ako kay Jehova nga buligan niya ako nga magpabilin nga matutom kag pirme mangin malipayon.” Bisan pa indi ka makakita dayon sang utod nga puede mangin maayo nga asawa ukon bana, nagapromisa si Jehova nga padayon ka niya nga buligan sa imo pisikal kag emosyonal nga mga kinahanglanon.​—Sal. 55:22.

5. Ano ang dapat himuon sang isa ka single nga utod para may makilala sia nga mga single nga nagapalangga man kay Jehova? (1 Corinto 15:58) (Tan-awa man ang piktyur.)

⁵ Ginapalig-on kita sang Biblia nga dapat “madamo [kita] pirme sing ginahimo sa hilikuton sang Ginuo.” (Basaha ang 1 Corinto 15:58.) Kon masako ka sa pag-alagad kay Jehova kag pirme ka nagaupod sa madamo nga mga kauturan, mapalig-on ka gid nila kag posible may makilala ka nga mga single nga nagapokus man sa ila pag-alagad kay Jehova pareho sa imo. Kag kon ginahimo mo ang imo bug-os nga masarangan kay gusto mo nga malipay sa imo si Jehova, mabatyagan mo ang matuod nga kalipay.

6. Ano ang dapat dumdumon sang isa ka single nga utod kon nagapangita sia sing mapangasawa ukon mapamana?

⁶ Pero ari ang dapat mo dumdumon: Dapat ka maghalong kay basi mangin pinakaimportante na sa imo kabuhi ang pagpangita sing mapangasawa ukon mapamana. (Fil. 1:10) Single ka man ukon indi, wala nagadepende sa sini ang matuod nga kalipay, kundi nagadepende ini sa imo kaangtanan kay Jehova. (Mat. 5:3) Kag samtang single ka pa, mas madamo ka sing puede himuon sa imo pag-alagad kay Jehova. (1 Cor. 7:​32, 33) Gani gamita sing maayo ang imo tion samtang single ka pa. Binagbinaga si Jessica, nga isa ka sister nga taga-United States, nga nagpamana sang halos 40 anyos na sia. Nagsiling sia: “Sang single pa ako, masako ako sa pagbantala kag pagtudlo nga hilikuton. Nakabulig ini sa akon nga mangin kontento bisan pa gusto ko na magpamana sadto.”

MAG-OBSERBAR ANAY KAG HATAGI INI SANG TION

7. Ngaa mas maayo kon obserbahan mo anay ang utod nga naluyagan mo antes mo sia pangaluyagan? (Hulubaton 13:16)

⁷ Ano abi kon sa banta mo mangin isa ka maayo nga asawa ukon bana ang isa ka utod? Isugid mo bala dayon sa iya ang imo ginabatyag? Ang Biblia nagasiling nga nagahunahuna anay sing maayo ang isa ka maalam nga tawo antes niya himuon ang isa ka butang. (Basaha ang Hulubaton 13:16.) Gani mas maayo kon hatagan mo anay sang tion ang pag-obserbar sa utod nga naluyagan mo antes mo sia pangaluyagan. Si Aschwin nga taga-Netherlands nagsiling: “May mga tion nga posible maluyag kita dayon sa isa ka tawo, pero madasig man nga nagakadula ini nga balatyagon. Gani kon hatagan mo anay sang tion ang pag-obserbar sa isa ka tawo, malikawan mo nga magpadasudaso sa pagpangaluyag sa iya.” Dugang pa, kon obserbahan mo anay ang utod nga naluyagan mo, posible marealisar mo nga indi gali sia mangin isa ka maayo nga asawa ukon bana.

8. Paano maobserbahan sang isa ka single ang naluyagan niya nga utod? (Tan-awa man ang piktyur.)

⁸ Obserbahi ang utod nga naluyagan mo. Pero, himua ini sa paagi nga indi niya mabal-an nga ginaobserbahan mo gali sia. Paano? Sa mga miting sang kongregasyon ukon sa mga tipontipon sang mga kauturan, posible may matalupangdan ka parte sa iya espirituwalidad, personalidad, kag paggawi. Sin-o ang iya mga abyan, kag ano nga mga topiko ang gusto niya istoryahan? (Luc. 6:45) Pareho bala ang inyo mga tulumuron? Puede mo pamangkuton ang mga gulang sa ila kongregasyon ukon ang hamtong nga mga utod nga nakakilala gid sa iya. (Hulu. 20:18) Pamangkuta sila parte sa iya reputasyon kag mga kinaiya. (Rut 2:11) Samtang ginaobserbahan mo ang utod, likawi nga maghimo sang mga butang nga posible masaw-ahan sia. Respetuha ang iya balatyagon, kag indi kinahanglan nga hibaluon mo gid ang tanan nga nagakatabo sa iya kabuhi.

9. Antes mo pangaluyagan ang utod nga naluyagan mo, sa ano ka dapat sigurado?

⁹ Daw ano kadugay mo dapat obserbahan ang utod nga naluyagan mo antes mo sia pangaluyagan? Kon pangaluyagan mo sia dayon pagligad lang sang malip-ot nga tion, posible hunahunaon niya nga wala mo ginapamensaran sing maayo ang imo mga desisyon. (Hulu. 29:20) Sa pihak nga bahin, kon marealisar niya nga may luyag ka sa iya pero wala mo ini gihapon ginasugid sa iya bisan pa nagligad na ang malawig nga tion, posible hunahunaon niya nga nagapabuyanbuyan ka kon may dapat ka himuon nga mga desisyon. (Man. 11:4) Tandai nga antes mo pangaluyagan ang isa ka utod, indi kinahanglan nga kumbinsido ka gid nga sia na ang imo pakaslan. Pero dapat sigurado ka na nga handa ka na magpangasawa ukon magpamana. Dapat kumbinsido ka man nga posible mangin isa ka maayo nga asawa ukon bana ang utod nga naluyagan mo.

10. Ano ang dapat mo himuon kon narealisar mo nga may luyag sa imo ang isa ka utod pero wala ka sing luyag sa iya?

¹⁰ Pero ano abi kon narealisar mo nga may luyag sa imo ang isa ka utod? Kon wala ka sing luyag sa iya, dapat mangin maathag ini sa kon paano mo sia ginatratar. Halimbawa, indi gid mahigugmaon kon ipabatyag mo sa utod nga may tsansa nga mangin kamo nga duha bisan pa kabalo ka nga indi ini matabo.​—1 Cor. 10:24; Efe. 4:25.

11. Kon ikaw ang magapili sang i-date sang isa ka tawo ukon sang iya mangin asawa ukon bana, ano ang mga dapat mo binagbinagon?

¹¹ Sa iban nga pungsod, ang mga ginikanan ukon ang iban nga mga adulto ang nagapili sing mapangasawa ukon mapamana sang ila paryente. Sa iban naman nga pungsod, ang mga pamilya kag mga abyan sang isa ka tawo amo ang nagapangita sang puede niya mapangasawa ukon mapamana. Ginapakilala nila ang lalaki kag ang babayi, kag sila nga duha ang magadesisyon kon bala umpisahan nila ang pag-date. Kon ikaw ang magapili sang i-date sang isa ka utod ukon sang iya mangin asawa ukon bana, binagbinaga kon ano ang mga gusto niya. Binagbinaga man kon ano ang mga gusto sang nakita mo nga puede niya mangin asawa ukon bana. Kon may nakita ka na nga isa ka utod nga puede mangin isa ka maayo nga asawa ukon bana, panikasugi nga hibalua ang iya personalidad, mga kinaiya, kag labaw sa tanan, ang iya espirituwalidad. Mas importante ang suod nga kaangtanan kay Jehova sangsa kuarta, tinapusan, ukon kon daw ano ka prominente ang ila pamilya. Pero tandai nga ang single nga brother kag ang single nga sister amo ang magadesisyon kon bala mapakasal sila ukon indi.​—Gal. 6:5.

KON PAANO MO UMPISAHAN ANG PAG-DATE

12. Kon gusto mo pangaluyagan ang isa ka utod, paano mo ini ipabalo sa iya?

¹² Kon gusto mo pangaluyagan ang isa ka utod, paano mo ini ipabalo sa iya?d Istoryaha sia sa pangpubliko nga lugar ukon paagi sa telepono. Ihambal sing maathag sa iya nga naluyag ka sa iya kag gusto mo nga makilala sia sing maayo. (1 Cor. 14:9) Kon magsiling sia nga pamensaran niya anay ini, hatagi sia sang tion nga himuon ini. (Hulu. 15:28) Kag kon magsiling sia nga indi niya gusto nga pangaluyagan mo sia, respetuha ang iya desisyon.

13. Ano ang puede mo himuon kon may utod nga magsiling sa imo nga naluyag sia sa imo? (Colosas 4:6)

¹³ Ano abi kon may utod nga magsiling sa imo nga naluyag sia sa imo? Nagakinahanglan sing kaisog para masugid niya ini sa imo, gani pakitai sia sing kaayo kag respetuha ang iya ginabatyag. (Basaha ang Colosas 4:6.) Kon kinahanglan mo sang tion para pamensaran anay kon bala mapasugot ka nga pangaluyagan ka niya ukon indi, isiling ini sa iya. Pero, mas maayo kon indi mo pagpadugayan ang pagsiling sa iya kon bala mapasugot ka ukon indi. (Hulu. 13:12) Kon indi mo gusto nga pangaluyagan ka niya, isiling ini sa iya sing mainayuhon kag sing maathag. Binagbinaga ang ginhimo ni Hans, nga isa ka brother nga taga-Austria, sang ginsilingan sia sang isa ka sister nga naluyag sia sa iya. Nagsiling si Hans: “Mainayuhon kag maathag ko nga ginsiling sa iya ang akon desisyon. Ginsiling ko ini dayon sa iya kay indi ko gusto nga hunahunaon niya nga basi may tsansa nga mangin kami nga duha sa ulihi. Pagkatapos sini, nagahalong gid ako sa akon pagtratar sa iya para indi niya mahunahuna nga basi magbag-o ang akon pensar.” Pero, kon magsugot ka nga pangaluyagan ka sang utod, isiling ini sa iya. Dayon istoryahan ninyo nga duha kon ano ang ginapaabot ninyo sa inyo pag-date. Posible nga lain ang imo ginapaabot sangsa iya ginapaabot kay nagadepende ini sa inyo kultura kag sa iban pa nga mga butang.

PAANO MASUPORTAHAN SANG MGA KAUTURAN ANG SINGLE NGA MGA UTOD?

14. Paano naton masuportahan ang single nga mga utod paagi sa aton mga ginasiling?

¹⁴ Paano naton masuportahan ang single nga mga utod nga gusto magpangasawa ukon magpamana? Ang isa ka paagi amo ang paghalong sa aton mga ginasiling. (Efe. 4:29) Pamangkuton naton ang aton kaugalingon: ‘Ginasunlog ko bala ang mga single nga gusto magpangasawa ukon magpamana? Kon makita ko nga nagaistoryahanay ang isa ka single nga brother kag ang isa ka single nga sister, ginahunahuna ko bala dayon nga naluyag sila sa isa kag isa?’ (1 Tim. 5:13) Indi man naton dapat pag-ipabatyag sa single nga mga utod nga daw may kulang sa ila kabuhi bangod wala sila sing asawa ukon bana. Si Hans, nga ginsambit kaina, nagsiling: “Ginasilingan ako sang pila ka utod, ‘Ngaa wala ka pa nangasawa haw? Tigulang ka na bala.’ Kon mabatian ini sang mga single, posible mahunahuna nila nga wala sila ginapabaloran kag ma-pressure pa gid sila nga magpangasawa ukon magpamana.” Gani mas maayo gid kon dayawon naton kag pasalamatan ang aton single nga mga utod.​—1 Tes. 5:11.

15. (a) Suno sa prinsipio nga mabasa sa Roma 15:​2, ano ang dapat naton binagbinagon antes naton buligan ang isa ka utod nga makakita sing mapangasawa ukon mapamana? (Tan-awa man ang piktyur.) (b) Ano ang mga natun-an mo sa video? (Tan-awa ang footnote.)

¹⁵ Ano abi kon sa banta naton bagay gid ang isa ka brother kag ang isa ka sister? Ginasilingan kita sang Biblia nga dapat naton respetuhon ang balatyagon sang iban. (Basaha ang Roma 15:2.) Madamo nga single ang indi gusto nga ginatugpotugpo sila, kag dapat naton ini respetuhon. (2 Tes. 3:11) May iban naman nga gusto magpabulig, pero indi kita dapat mag-entra kon wala kita ginpangabay nga magbulig.e (Hulu. 3:27) Gusto naman sang iban nga buligan sila sa indi hilmunon nga paagi. Si Lydia, nga isa ka single nga sister nga taga-Germany, nagsiling: “Puede ninyo hagaron ang isa ka brother kag ang isa ka sister sa tipontipon sang mga kauturan. Paagi sa sini, mahatagan sila sing tsansa nga magkilalahay. Depende na sa ila kon ano ang madesisyunan nila sa ulihi.”

16. Ano ang dapat dumdumon sang single nga mga utod?

¹⁶ Single man kita, may asawa, ukon may bana, puede kita tanan mangin malipayon kag kontento sa aton kabuhi. (Sal. 128:1) Gani kon gusto mo magpangasawa ukon magpamana pero wala ka pa sing nakita nga utod nga naluyagan mo, padayon nga magpokus sa imo pag-alagad kay Jehova. Ang isa ka sister nga taga-Macao nga si Sin Yi nagsiling: “Kon ikumparar sa tion nga makaupod mo ang imo asawa ukon bana sa Paraiso, malip-ot lang ang imo tion bilang isa ka soltero ukon dalaga. Gani i-enjoy ining malip-ot nga tion kag gamita ini sing maayo.” Pero ano abi kon may nakita ka na nga isa ka utod nga puede mangin isa ka maayo nga asawa ukon bana kag nobyahanay na kamo? Sa masunod nga artikulo, binagbinagon naton kon paano makahimo sang maayo nga desisyon ang magnobyahanay.