Iluga ang Panghunahuna ni Jehova kag ni Jesus

1-2. Paano naton dapat higugmaon si Jehova, kag paano ini ginpakita ni Jesus?

“HIGUGMAA si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga kusog kag sa bug-os mo nga hunahuna.” (Luc. 10:27) Nag-ugyon si Jesus nga amo ini ang pinakaimportante nga sugo sa Mosaikong Kasuguan. Gani dapat naton higugmaon si Jehova sing bug-os tagipusuon, nga nagalakip sang aton handum, balatyagon, kag emosyon. Dapat man naton sia higugmaon sing bug-os kalag kag sing bug-os kusog. Pero talupangda nga dapat man naton higugmaon si Jehova sing bug-os hunahuna, nga nagalakip sang aton pagtamod sa mga butang. Siempre, indi gid naton maintiendihan sing bug-os ang panghunahuna ni Jehova, pero dapat naton ini panikasugan nga ilugon. Mas maintiendihan naton ang panghunahuna sang Dios kon tun-an naton “ang hunahuna sang Cristo” bangod perpekto nga gin-ilog ni Jesus ang panghunahuna sang iya Amay.​—1 Cor. 2:16.

² Ginhigugma ni Jesus si Jehova sa bug-os niya nga hunahuna. Kabalo sia kon ano ang kabubut-on sang Dios sa iya, kag handa sia nga himuon ini bisan pa kinahanglan niya mag-antos. Bangod nagpokus si Jesus sa paghimo sang kabubut-on sang iya Amay, wala gid sing nakapugong sa iya sa paghimo sini.

3. Ano ang natun-an ni apostol Pedro kay Jesus, kag ano ang ginpalig-on ni Pedro nga dapat himuon sang mga Cristiano? (1 Pedro 4:1)

³ Nakaupod ni Pedro kag sang iban pa nga apostoles si Jesus, gani nakatuon sila sa iya panghunahuna. Sang ginhimo ni Pedro ang iya una nga sulat, ginpalig-on niya ang mga Cristiano nga sangkapan nila ang ila kaugalingon sang panghunahuna sang Cristo. (Basaha ang 1 Pedro 4:1.) Sang ginsulat ni Pedro ang mga tinaga nga ‘sangkapi ang inyo kaugalingon,’ gingamit niya ang ekspresyon nga nagalaragway sa mga soldado nga nagahanda para sa inaway. Gani kon tun-an sang mga Cristiano ang panghunahuna ni Jesus, masangkapan sila sang gamhanan nga hinganiban para mabatuan nila ang ila sala nga mga handum kag ang impluwensia sang kalibutan ni Satanas.​—2 Cor. 10:​3-5; Efe. 6:12.

4. Paano makabulig sa aton ini nga artikulo para masunod naton ang laygay ni Pedro?

⁴ Binagbinagon naton ang panghunahuna ni Jesus kag kon paano naton ini mailog. Tun-an naton (1) kon paano naton mailog ang panghunahuna ni Jehova nga makabulig sa aton nga maghilisugot sa hunahuna, (2) kon paano kita mangin mapainubuson, kag (3) kon paano mangin maligdong ang aton hunahuna paagi sa pagsalig kay Jehova sa pangamuyo.

ILUGA ANG PANGHUNAHUNA NI JEHOVA

5. Sa ano nga sitwasyon wala nailog ni Pedro ang panghunahuna ni Jehova?

⁵ May tion nga wala nailog ni Pedro ang panghunahuna ni Jehova. Ginsilingan ni Jesus ang iya mga apostoles nga dapat sia magkadto sa Jerusalem, dakpon sia sang mga lider sang relihion didto, paantuson sia, kag patyon. (Mat. 16:21) Posible daw indi makapati si Pedro nga tugutan ni Jehova nga patyon si Jesus kay sia ang ginpromisa nga Mesias nga magaluwas sa Israel. (Mat. 16:16) Gani gindala ni Pedro si Jesus sa higad kag ginsilingan sia: “Maluoy ka sa imo kaugalingon, Ginuo; indi gid ina matabo sa imo.” (Mat. 16:22) Bangod wala nailog ni Pedro ang panghunahuna ni Jehova sa sini nga sitwasyon, lain ang iya panghunahuna sa panghunahuna ni Jesus.

6. Paano ginpakita ni Jesus nga pareho sila sang panghunahuna ni Jehova?

⁶ Gin-ilog gid ni Jesus ang panghunahuna sang iya Amay sa langit. Ginsilingan ni Jesus si Pedro: “Kadto ka sa likod ko, Satanas! Kasandaran ka sa akon kay ang imo panghunahuna indi iya sang Dios, kundi iya sang tawo.” (Mat. 16:23) Kabalo si Jesus nga para mahimo niya ang kabubut-on ni Jehova, dapat sia mag-antos kag mapatay. Gani bisan pa maayo ang motibo ni Pedro, wala ginbaton ni Jesus ang iya laygay. Sadto nga tion, natun-an ni Pedro nga dapat niya ilugon ang panghunahuna sang Dios. Importante ini nga leksion nga dapat man naton tun-an.

7. Paano ginpakita ni Pedro sang ulihi nga handa sia nga ilugon ang panghunahuna ni Jehova? (Tan-awa ang piktyur.)

⁷ Sang ulihi, ginpakita ni Pedro nga gusto niya ilugon ang panghunahuna ni Jehova. Nag-abot na ang tion nga puede na mangin bahin sang katawhan sang Dios ang wala natuli nga mga Gentil. Ginsugo sang Dios si Pedro nga bantalaan si Cornelio, kag nalakip sia sa pinakauna nga grupo sang mga Gentil nga nangin Cristiano. Ginalikawan sang mga Judiyo ang mga Gentil, gani dapat bag-uhon ni Pedro ang iya panghunahuna para matuman niya ang iya asaynment. Sang naintiendihan ni Pedro ang kabubut-on sang Dios, ginbag-o niya ang iya panghunahuna. Gani, ‘wala nagpamatok’ si Pedro sang ginpatawag sia ni Cornelio. (Binu. 10:​28, 29) Ginbantalaan niya si Cornelio kag ang iya panimalay kag nabawtismuhan sila.​—Binu. 10:​21-23, 34, 35, 44-48.

8. Paano naton mapakita nga ginailog naton ang panghunahuna ni Jehova? (1 Pedro 3:8 kag footnote)

⁸ Pagligad sang pila ka tuig, ginpalig-on ni Pedro ang iya mga kauturan nga “maghilisugot sa hunahuna.” (Basaha ang 1 Pedro 3:8 kag footnote.) Bilang katawhan ni Jehova, magahilisugot ang aton hunahuna kon ginailog naton ang panghunahuna ni Jehova nga natun-an naton sa iya Pulong. Halimbawa, ginpalig-on ni Jesus ang iya mga sumulunod nga unahon ang Ginharian sa ila kabuhi. (Mat. 6:33) Gani kon may utod nga gusto mag-alagad kay Jehova sing bug-os tion, ano ang maayo nga himuon? Indi naton sia pagpaluyahon. Sa baylo, dapat naton sia palig-unon kag buligan.

MANGIN MAPAINUBUSON

9-10. Paano ginpakita ni Jesus nga mapainubuson gid sia?

⁹ Sang gab-i antes ginpatay si Jesus, gintudluan niya si Pedro kag ang iban pa nga apostoles parte sa pagpaubos. Antes sini, ginsugo ni Jesus si Pedro kag si Juan nga ihanda ang iya katapusan nga panihapon upod sa ila. Posible gid nga naghanda man sila sang labador kag mga tualya para makapanghinaw sila sang ila mga tiil. Pero sin-o ayhan sa ila ang mapainubuson nga maghinaw sang tiil sang iban?

¹⁰ Mapainubuson gid si Jesus kay sia ang naghimo sini. Posible nga nakibot gid ang mga apostoles sa ginhimo ni Jesus kay isa ka ulipon ang masami nga nagahimo sini. Gin-uba ni Jesus ang iya kunop, ginwagkus ang tualya sa iya hawak, ginbutangan sing tubig ang labador, kag ginhinawan niya ang ila mga tiil. (Juan 13:​4, 5) Ginhinawan ni Jesus ang mga tiil sang tanan niya nga 12 ka apostoles, lakip na si Judas nga magaluib sa iya. Gani posible daku nga tion ang gingamit niya sa sini. Pero, mapainubuson ini nga ginhimo ni Jesus. Dayon ginsilingan sila ni Jesus: “Nahangpan bala ninyo ang akon ginhimo sa inyo? Ginatawag ninyo ako, ‘Manunudlo,’ kag ‘Ginuo,’ kag husto kamo, kay amo gid man ako. Gani, kon ako nga inyo Ginuo kag Manunudlo, naghinaw sang inyo mga tiil, dapat man ninyo hinawan ang mga tiil sang isa kag isa.”​—Juan 13:​12-14.

11. Paano ginpakita ni Pedro nga nangin mapainubuson na sia? (1 Pedro 5:5) (Tan-awa man ang piktyur.)

¹¹ May natun-an si Pedro sa pagkamapainubuson ni Jesus. Pagbalik ni Jesus sa langit, naghimo si Pedro sang milagro paagi sa pag-ayo sa isa ka lalaki nga lupog halin pa sa iya pagkabun-ag. (Binu. 1:​8, 9; 3:​2, 6-8) Nakita ini sang madamo nga tawo kag nagdinalagan sila pakadto kay Pedro. (Binu. 3:11) Gusto bala ni Pedro nga dayawon sia? Sa kultura nga gindak-an ni Pedro, gusto gid sang mga tawo nga ginadayaw sila. Pero, nangin mapainubuson si Pedro kag ginsilingan niya sila nga si Jehova kag si Jesus ang dapat dayawon. Nagsiling sia: “Paagi sa [ngalan ni Jesus], kag bangod nagatuo kami sa iya ngalan, nagbakod ini nga tawo nga inyo nakita kag nakilala.” (Binu. 3:​12-16) Sang ulihi, ginsulatan ni Pedro ang mga Cristiano nga dapat sila mangin mapainubuson. Sa orihinal nga lenguahe, gingamit niya ang tinaga nga nagalaragway sa pagkamapainubuson nga daw isa ka bayo nga puede isuksok. Ginapahanumdom sini sa aton ang tion nga nagwagkus si Jesus sang tualya kag ginhinawan niya ang mga tiil sang mga apostoles.​—Basaha ang 1 Pedro 5:5.

12. Pareho kay Pedro, ano ang himuon naton para mangin mapainubuson kita pirme?

¹² Pareho kay Pedro, panikasugan naton nga mangin mapainubuson pirme. Mapakita naton ang matuod nga pagkamapainubuson indi lang paagi sa aton ginahambal. Base sa tinaga nga gingamit ni Pedro nga gin-translate nga “mapainubuson,” nalakip sa matuod nga pagkamapainubuson ang aton panghunahuna, ukon ang aton pagtamod sa aton kaugalingon kag sa iban. Nagahimo kita sing maayo sa iban bangod palangga naton si Jehova kag ang mga tawo, indi bangod gusto naton nga dayawon kita. Kon nalipay kita mag-alagad kay Jehova kag sa aton mga kauturan, natalupangdan man ini sang iban ukon wala, ginapakita naton nga mapainubuson kita.​—Mat. 6:​1-4.

MANGIN ‘MALIGDONG SING HUNAHUNA’

13. Ano ang buot silingon sang ‘maligdong sing hunahuna’?

¹³ Ano ang buot silingon sang ‘maligdong sing hunahuna’? (1 Ped. 4:7) Kon maligdong ang aton hunahuna, ginatinguhaan naton nga hibaluon anay ang pagtamod ni Jehova antes kita maghimo sang desisyon. Kabalo kita nga ang aton kaangtanan kay Jehova amo ang pinakaimportante sa aton kabuhi. Balanse man ang aton pagtan-aw sa aton kaugalingon, kag ginabaton naton nga may mga butang nga wala naton nahibaluan. Kag ginapakita naton nga nagasalig kita kay Jehova paagi sa pagpangamuyo pirme sa iya.a

14. Ngaa wala napakita ni Pedro nga nagasalig sia kay Jehova?

¹⁴ Sang gab-i antes ginpatay si Jesus, ginpaandaman niya ang iya mga disipulo: “Tanan kamo masandad bangod sa matabo sa akon karon nga gab-i.” Pero nagsabat si Pedro: “Bisan pa ang tanan masandad bangod sa matabo sa imo, indi gid ako masandad.” Sina nga gab-i, ginlaygayan ni Jesus ang pila niya ka disipulo: “Magpadayon kamo sa pagbantay kag pagpangamuyo.” (Mat. 26:​31, 33, 41) Kon ginsunod ni Pedro ina nga laygay, nangin maisog kuntani sia sa pagpakilala nga disipulo sia ni Jesus. Pero, ginpanghiwala ni Pedro ang iya Agalon kag ginhinulsulan gid niya ini.​—Mat. 26:​69-75.

15. Sang gab-i antes ginpatay si Jesus, ano ang ginhimo niya para mangin maligdong ang iya hunahuna?

¹⁵ Bug-os gid nga nagsalig si Jesus kay Jehova. Bisan pa perpekto si Jesus, pila ka beses sia nga nangamuyo sang gab-i antes sia ginpatay. Bangod sini, may kaisog sia nga himuon ang kabubut-on ni Jehova para sa iya. (Mat. 26:​39, 42, 44; Juan 18:​4, 5) Sigurado gid nga wala nalipatan ni Pedro nga madamo nga beses nga nangamuyo si Jesus sang gab-i antes sia ginpatay.

16. Paano ginpakita ni Pedro nga maligdong na ang iya hunahuna? (1 Pedro 4:7)

¹⁶ Sang ulihi, natun-an ni Pedro nga magsalig pa gid kay Jehova paagi sa pangamuyo. Sang ginbanhaw si Jesus, ginpasalig niya si Pedro kag ang iban pa nga apostoles nga makabaton sila sang balaan nga espiritu para mabantala nila ang maayong balita. Pero, ginpangabay sila ni Jesus nga maghulat sa Jerusalem asta nga matabo ang iya ginsiling. (Luc. 24:49; Binu. 1:​4, 5) Ano ang ginhimo ni Pedro samtang nagahulat? “Nagpadayon sa pagpangamuyo” si Pedro kag ang iya mga kauturan. (Binu. 1:​13, 14) Sang ulihi, sa una nga sulat ni Pedro, ginpalig-on niya ang iya mga kauturan nga mangin maligdong sing hunahuna kag magsalig kay Jehova paagi sa pangamuyo. (Basaha ang 1 Pedro 4:7.) Natun-an ni Pedro nga magsalig kay Jehova kag nangin haligi sia sang kongregasyon.​—Gal. 2:9.

17. Bisan pa may mga ikasarang kita, ano dapat ang padayon naton nga himuon? (Tan-awa man ang piktyur.)

¹⁷ Para mangin maligdong ang aton hunahuna, dapat pirme kita mangamuyo kay Jehova. Kabalo kita nga dapat padayon kita nga mangamuyo kay Jehova bisan pa may mga ikasarang kita. Gani, kon nagahimo kita sang importante nga mga desisyon, dapat kita mangamuyo nga giyahan kita ni Jehova kag magsalig nga kabalo sia sang pinakamaayo para sa aton.

18. Ano ang gusto mo nga panikasugan nga himuon?

¹⁸ Nagapasalamat gid kita kay Jehova kay gintuga niya kita nga may ikasarang nga mapakita ang iya mga kinaiya. (Gen. 1:26) Siempre, indi naton mailog sing perpekto si Jehova. (Isa. 55:9) Pero pareho kay Pedro, gusto naton nga padayon nga ilugon ang panghunahuna ni Jehova, mangin mapainubuson, kag mangin maligdong ang aton panghunahuna.