Pamatan-on nga mga Brother, Iluga Ninyo si Marcos kag si Timoteo

1-2. Ano kuntani ang puede irason ni Marcos kag ni Timoteo para indi na nila pagdugangan ang ila ginahimo para sa iban?

PAMATAN-ON nga mga brother, gusto bala ninyo nga dugangan ang inyo ginahimo para kay Jehova kag sa kongregasyon? Kabalo kami nga amo gid sina ang gusto ninyo. Kanami gid tan-awon nga madamo nga pamatan-on nga lalaki ang handa gid nga magbulig sa iban. (Sal. 110:3) Pero, posible nabudlayan ka nga himuon ini. Nagaduhaduha ka bala nga dugangan ang imo mahimo sa ministeryo kay nabalaka ka sa posible nga mga pagbag-o sa imo kabuhi? May tion bala nga wala mo ginbaton ang ginhatag sa imo nga asaynment kay pamatyag mo indi mo ini masarangan? Kon huo, indi lang ikaw ang nagabatyag sina.

² Amo man sina ang ginbatyag ni Marcos kag ni Timoteo. Pero wala nila gintugutan ini nga mga rason nga magpugong sa ila nga dugangan ang ila ginahimo para kay Jehova. Posible nga maayo ang pangabuhi ni Marcos upod sa iya iloy sang gin-agda sia ni apostol Pablo kag ni Bernabe nga mag-upod sa ila pinakauna nga paglakbay bilang mga misyonero. (Binu. 12:​12, 13, 25) Pero handa si Marcos nga bayaan ini para dugangan pa ang iya ginahimo para kay Jehova. Sang primero, nagsaylo sia sa Antioquia. Dayon, nag-upod sia kay Pablo kag kay Bernabe sa iban pa nga malayo nga mga lugar. (Binu. 13:​1-5) Posible nga ara man si Timoteo sa poder sang iya mga ginikanan sang gin-agda sia ni Pablo nga mag-upod sa iya sa pagbantala. Pamatan-on pa sadto si Timoteo, gani posible nga nabalaka sia kay daw indi pa sia kalipikado sa pag-upod kay Pablo. (Ipaanggid ang 1 Corinto 16:​10, 11 kag ang 1 Timoteo 4:12.) Pero ginbaton niya ang pangagda ni Pablo, kag nakabaton sia sang madamo nga pagpakamaayo.​—Binu. 16:​3-5.

3. (a) Ngaa makasiling kita nga ginpabaloran gid ni Pablo si Marcos kag si Timoteo? (2 Timoteo 4:​6, 9, 11) (Tan-awa man ang mga piktyur.) (b) Ano nga mga pamangkot ang binagbinagon naton sa sini nga artikulo?

³ Natun-an ni Marcos kag ni Timoteo kon paano tatapon ang mabug-at nga mga responsibilidad sang pamatan-on pa lang sila. Ginpabaloran gid ni Pablo ining duha ka pamatan-on kay sang lapit na lang sia mapatay, ginpatawag gid niya sila. (Basaha ang 2 Timoteo 4:​6, 9, 11.) Ano nga mga kinaiya ang nanamian ni Pablo kay Marcos kag kay Timoteo? Paano sila mailog sang pamatan-on nga mga brother subong? Kag paano makabenepisyo ang pamatan-on nga mga brother sa laygay ni Pablo?

ILUGA SI MARCOS NGA HANDA MAG-ALAGAD PARA SA IBAN

4-5. Paano ginpakita ni Marcos nga handa sia mag-alagad para sa iban?

⁴ Suno sa isa ka reperensia, ang pag-alagad para sa iban nagapahangop nga nagapanikasog gid ang isa sa pagbulig sa ila bisan pa mabudlay ini himuon. Maayo gid nga halimbawa sa sini si Marcos. Sang wala sia gin-upod ni Pablo sa iya ikaduha nga paglakbay bilang misyonero, posible nga nasakitan gid si Marcos kag naluyahan. (Binu. 15:​37, 38) Pero wala nag-untat si Marcos sa pag-alagad para sa iya mga kauturan.

⁵ Ginbaton ni Marcos ang asaynment upod sa iya pakaisa nga si Bernabe. Pagligad sang 11 ka tuig, isa si Marcos sa mga nagbulig kay Pablo sang ginpriso sia sa Roma sa una nga tion. (Filem. 23, 24) Ang matuod, nagpasalamat gid si Pablo sa bulig ni Marcos. Nagsiling sia nga ‘naghatag si Marcos sing daku nga lugpay sa iya.’—Col. 4:​10, 11.

6. Ano ang nabenepisyo ni Marcos bangod nakig-upod sia sa hamtong nga mga Cristiano? (Tan-awa ang footnote.)

⁶ Nakabenepisyo gid si Marcos sa iya pagpakig-upod sa hamtong nga mga Cristiano. Pagkatapos niya mag-upod kay Pablo sa Roma, nag-upod sia kay apostol Pedro sa Babilonia. Nangin suod gid sila nga duha kay gintawag sia gani ni Pedro nga “Marcos nga akon anak.” (1 Ped. 5:13) Posible nga ginsugid ni Pedro kay Marcos ang madamo nga detalye parte sa kabuhi kag ministeryo ni Jesus nga amo ang ginsulat sang ulihi ni Marcos sa iya Ebanghelyo.a

7. Paano gin-ilog sang pamatan-on nga brother nga si Seung-Woo ang halimbawa ni Marcos? (Tan-awa man ang piktyur.)

⁷ Padayon nga nangin masako si Marcos sa pag-alagad kay Jehova kag pirme sia nagapakig-upod sa hamtong nga mga utod. Paano mo mailog si Marcos? Kon wala ka pa nahatagan sang dugang nga pribilehiyo, indi ka maluyahan sing buot. Panikasugi nga dugangan ang imo mahimo para kay Jehova kag sa mga kauturan. Binagbinaga ang halimbawa ni Seung-Woo nga isa na ka gulang subong. Sang pamatan-on pa sia, ginakumparar niya ang iya kaugalingon sa iban nga pamatan-on nga brother. Ang pila sa ila may mga pribilehiyo na, pero sia wala pa. Naluyahan gid sia, gani ginsugid niya sa hamtong nga mga brother ang iya ginabatyag. Ginsilingan sia sang isa ka gulang nga himuon lang niya ang iya masarangan sa pagbulig sa iban, bisan pa kon kaisa indi ini matalupangdan. Nagpalig-on ini kay Seung-Woo nga buligan ang mga tigulang kag ang mga nagakinahanglan sing salakyan para makatambong sa mga miting. Parte sa iya eksperiensia sadto, nagsiling sia: “Mas naintiendihan ko na kon ano gid ang buot silingon sang pag-alagad para sa iban. Kag nabatyagan ko ang kalipay sang pagbulig sa iban.”

ILUGA SI TIMOTEO NGA NAGAULIKID SA IBAN

8. Ngaa ginpili ni Pablo si Timoteo nga mag-upod sa iya sa paglakbay? (Filipos 2:​19-22)

⁸ Nakaeksperiensia si Pablo sing pagpamatok sa pila ka siudad. Gani kinahanglan niya sing mga utod nga may kaisog nga mag-upod sa iya sa pagbalik sa sini nga mga siudad. Ang una niya nga ginpili amo si Silas nga madugay na nga nagaalagad kay Jehova. (Binu. 15:​22, 40) Sang ulihi, ginpili man ni Pablo si Timoteo nga mag-upod sa iya. Ano ang nanamian ni Pablo kay Timoteo? Ang iya maayo nga reputasyon. (Binu. 16:​1, 2) Nagaulikid man si Timoteo sa mga tawo.​—Basaha ang Filipos 2:​19-22.

9. Paano ginpakita ni Timoteo nga nagaulikid gid sia sa iya mga kauturan?

⁹ Sa umpisa pa lang sang pag-upod ni Timoteo kay Pablo, ginpakita na niya nga mas nagaulikid sia sa iban sangsa iya kaugalingon. Amo ini ang rason kon ngaa may pagsalig si Pablo nga ibilin sia sa Berea para palig-unon ang bag-uhan nga mga kauturan didto. (Binu. 17:​13, 14) Sadto nga tion, madamo sing natun-an si Timoteo sa halimbawa ni Silas nga nagpabilin man sa Berea. Pero sang ulihi, si Timoteo na lang ang ginpadala ni Pablo sa siudad sang Tesalonica para palig-unon ang mga kauturan didto. (1 Tes. 3:2) Sa masunod nga 15 ka tuig, natun-an ni Timoteo nga “maghibi upod sa mga tawo nga nagahibi,” ukon ginpabatyag niya sa mga nagaantos nga naintiendihan niya sila. (Roma 12:15; 2 Tim. 1:4) Paano mailog sang pamatan-on nga mga brother si Timoteo?

10. Paano natun-an sang brother nga si Woo Jae nga magpakita sing pag-ulikid sa iban?

¹⁰ Natun-an sang brother nga si Woo Jae nga magpakita sing pag-ulikid sa iban. Sang pamatan-on pa sia, nabudlayan sia makig-istorya sa may edad na nga mga kauturan. Gani ginabugno niya lang sila sa Kingdom Hall kag nagahalin dayon. Nagsiling ang isa ka gulang nga puede ni Woo Jae sugdan ang pag-istoryahanay paagi sa pagsugid sa mga utod kon ano gid ang nanamian niya sa ila. Nagsiling man ang gulang nga puede niya pamensaron kon ano ang hilig sina nga mga utod. Ginsunod ni Woo Jae ini nga laygay. Isa na sia ka gulang subong, kag nagsiling sia: “Kahapos na lang sa akon subong mag-istorya sa mga tawo nga lainlain ang edad. Nalipay gid ako kay mas naintiendihan ko na ang mga kabudlayan sang iban. Bangod sini, mas nabuligan ko ang mga kauturan.”

11. Paano matun-an sang pamatan-on nga mga brother nga magpakita sing pag-ulikid sa mga kauturan sa kongregasyon? (Tan-awa man ang piktyur.)

¹¹ Pamatan-on nga mga brother, matun-an man ninyo nga magpakita sing pag-ulikid sa iban. Sa mga miting, istoryaha ang lainlain nga mga kauturan, lakip na ang mga pamatan-on kag mga tigulang. Kamustaha sila, kag pamatii ang ila sabat. Makabulig ini para mahibaluan mo kon paano mo sila mabuligan. Mahimo mahibaluan mo nga nabudlayan gali ang tigulang nga mag-asawa sa paggamit sang JW Library^® nga app. Ukon wala gali sila sing upod sa pagministeryo. Puede mo sila buligan kon paano gamiton ang ila gadyet ukon updan sila sa pagbantala. Kon nagapanikasog ka nga buligan ang iban, mangin maayo ka gid nga halimbawa sa tanan.

MABULIGAN KA SANG LAYGAY NI PABLO

12. Paano makabulig sa mga pamatan-on ang laygay ni Pablo kay Timoteo?

¹² Ginhatagan ni Pablo si Timoteo sing laygay nga nakabulig sa iya nga magmadinalag-on sa iya kabuhi kag ministeryo. (1 Tim. 1:18; 2 Tim. 4:5) Pamatan-on nga mga brother, makabulig man sa inyo ang laygay ni Pablo. Paano? Basaha ang duha ka sulat ni Pablo kay Timoteo, kag hunahunaa nga daw para gid ini sa imo. Dayon hibalua kon ano nga laygay ni Pablo ang naaplikar sa imo. Binagbinagon naton ang pila ka halimbawa.

13. Ano nga kinaiya ang kinahanglan naton ipakita para mangin mainunungon kita kay Jehova?

¹³ “Hanasa ang imo kaugalingon nga ang imo tulumuron amo ang diosnon nga debosyon.” (1 Tim. 4:7b) Ano ang diosnon nga debosyon? Nagapatuhoy ini sa aton pagkamainunungon kay Jehova kag sa aton mga pagpanikasog para malipay sia. Wala kita sing amo sini nga kinaiya sang natawo kita, gani dapat naton panikasugan nga ipakita ini. Paano? Ang Griego nga tinaga nga gin-translate “hanasa ang imo kaugalingon” masami nga ginagamit para ilaragway ang grabe nga paghanas nga ginahimo sang mga atleta. Kinahanglan nila disiplinahon ang ila kaugalingon para magdaug sila. Kinahanglan man naton disiplinahon ang aton kaugalingon para maanad kita nga himuon ang mga hilikuton nga magapasuod pa gid sa aton kay Jehova.

14. Ano dapat ang aton tulumuron kon nagabasa kita sang Biblia? Maghatag sing halimbawa.

¹⁴ Importante gid nga maanad kita nga basahon ang Biblia adlaw-adlaw. Tandaan naton nga ang aton tulumuron sa pagbasa sang Biblia amo ang mangin suod pa gid kay Jehova. Halimbawa, ano ang matun-an naton sa kasaysayan ni Jesus kag sang manggaranon nga pamatan-on nga manugdumala? (Mar. 10:​17-22) Nagapati ini nga pamatan-on nga si Jesus ang Mesias, pero kulang ang iya pagtuo nga magsunod sa iya. Bisan pa sini, ‘ginhigugma’ sia ni Jesus. Indi bala nga makapalig-on gid ang paagi ni Jesus sa pag-istorya sa sini nga pamatan-on? Gusto gid ni Jesus nga alagaron sang pamatan-on si Jehova para mangin malipayon sia. Paagi sa ginhimo ni Jesus, makita naton ang gugma ni Jehova para sa sini nga pamatan-on. (Juan 14:9) Samtang ginapamalandungan mo ini nga kasaysayan kag ang imo kahimtangan, pamangkuta ang imo kaugalingon, ‘Ano ang dapat ko himuon para mangin suod pa gid ako kay Jehova kag para makabulig pa gid ako sa iban?’

15. Ngaa importante gid nga mangin maayo nga halimbawa ang pamatan-on nga brother? (1 Timoteo 4:​12, 13)

¹⁵ “Mangin halimbawa ka sa mga matutom.” (Basaha ang 1 Timoteo 4:​12, 13.) Ginpalig-on ni Pablo si Timoteo nga panikasugan nga mangin maayo sa pagbasa kag pagtudlo. Magluwas sa sini, ginpalig-on man niya sia nga ipakita ang mga kinaiya pareho sang gugma, pagtuo, kag katinlo. Ngaa? Kay man, mas daku ang epekto sang aton maayo nga halimbawa sangsa aton ginahambal. Ibutang ta nga ginhatagan ka sang bahin parte sa kon paano kita mangin makugi pa gid sa aton ministeryo. Mas may kompiansa ka sa imo pamulongpulong kon ginahimo mo ang imo bug-os nga masarangan sa ministeryo. Kag mas mapalig-on mo ang mga kauturan bangod nakita nila ang imo maayo nga halimbawa.​—1 Tim. 3:13.

16. (a) Sa ano nga lima ka butang puede mangin halimbawa ang pamatan-on nga mga brother? (b) Paano mangin halimbawa ang pamatan-on nga brother sa iya “paghambal”?

¹⁶ Ginsambit ni Pablo sa 1 Timoteo 4:12 ang lima ka butang nga puede mangin halimbawa ang pamatan-on nga mga brother. Maayo gid kon tun-an mo ang kada isa sa sini. Ibutang ta nga gusto mo nga mangin mas maayo nga halimbawa sa imo “paghambal.” Hunahunaa kon paano mo mapalig-on ang iban paagi sa imo mga ginahambal. Kon ara ka pa sa poder sang imo mga ginikanan, pasalamati sila pirme sa mga ginahimo nila para sa imo. Pagkatapos sang miting, ihambal sa mga utod nga may bahin kon ano ang nanamian mo sa ila bahin. Puede mo man testingan nga magkomento sa mga miting nga wala ginabasa ang parapo. Kon panikasugan mo nga mangin maayo nga halimbawa sa imo paghambal, makita sang mga kauturan nga nagauswag ka sa espirituwal.​—1 Tim. 4:15.

17. Ano ang makabulig sa pamatan-on nga brother para madugangan niya ang iya ginahimo para kay Jehova? (2 Timoteo 2:22)

¹⁷ “Palagyo ka sa mga kailigbon sang pagkapamatan-on, apang tinguhai nga ipakita ang pagkamatarong.” (Basaha ang 2 Timoteo 2:22.) Ginpalig-on ni Pablo si Timoteo nga likawan ang mga butang nga posible makaupang sa iya pag-alagad kag makaguba sa iya kaangtanan kay Jehova. Posible may nanamian ka nga himuon nga indi man sala pero nagaubos sang imo tion sa pag-alagad kay Jehova kag sa pagbulig sa iban. Halimbawa, hunahunaa kon daw ano kadamo nga oras ang ginagamit mo sa sports, sa Internet, ukon sa mga video game. Ano abi kon gamiton mo ang pila sa sini sa imo mga hilikuton sa pag-alagad? Puede ka magbulig sa pagmentinar sang inyo Kingdom Hall ukon magpanaksi paagi sa cart. Kon himuon mo ini, posible gid nga makakita ka sang bag-o nga mga abyan nga makabulig sa imo nga dugangan ang imo ginahimo para kay Jehova.

PAKAMAAYUHON KA KON NAGABULIG KA SA IBAN

18. Ngaa masiling naton nga nangin kontento kag malipayon si Marcos kag si Timoteo sa ila kabuhi?

¹⁸ Nagsakripisyo si Marcos kag si Timoteo para mas makabulig sila sa iban. Bangod sini, nangin kontento sila kag malipayon sa ila kabuhi. (Binu. 20:35) Sa bahin ni Marcos, naglakbay sia sa malayo nga mga lugar para buligan ang iya mga kauturan. Nagsulat man sia sang kasaysayan parte sa kabuhi kag ministeryo ni Jesus. Sa bahin ni Timoteo, ginbuligan niya si Pablo sa pagtukod sang bag-o nga mga kongregasyon kag sa pagpalig-on sa mga kauturan. Nalipay gid si Jehova sa mga sakripisyo nga ginhimo ni Marcos kag ni Timoteo.

19. Ngaa dapat iaplikar sang pamatan-on nga mga brother ang laygay ni Pablo kay Timoteo, kag ano ang resulta kon himuon nila ini?

¹⁹ Makita naton sa mga sulat ni Pablo kay Timoteo nga palangga gid niya sia. Pamatan-on nga mga brother, ginapakita man sini nga mga sulat nga palangga gid kamo ni Jehova. Gusto niya nga mangin malipayon kamo sa pag-alagad sa iya. Gani iaplikar ninyo ang laygay ni Pablo, kag dugangi ninyo ang inyo ginahimo para kay Jehova kag para sa iban. Kon himuon ninyo ini, mangin malipayon kamo subong kag ‘makapanguyapot kamo sing malig-on sa matuod nga kabuhi’ sa palaabuton.​—1 Tim. 6:​18, 19.