TULUN-AN NGA ARTIKULO 26
AMBAHANON 123 Mainunungon nga Magpasakop sa Kahimusan sang Dios
Mapainubuson nga Batuna nga May mga Butang nga Wala Mo Nahibaluan
“Indi naton matungkad ang Labing Gamhanan.”—JOB 37:23.
ANG MATUN-AN NATON
Binagbinagon naton kon paano kita makabatas bisan pa may mga butang nga wala naton nahibaluan, kon paano kita makapokus sa mga butang nga aton nahibaluan, kag kon paano naton mapakita nga nagasalig kita kay Jehova.
1. Ano nga ikasarang ang ginhatag ni Jehova sa aton, kag ngaa ginhatagan niya kita sini?
GINHATAGAN kita ni Jehova sang ikasarang nga makahunahuna, makatuon sang bag-o nga mga butang, makahangop, kag maaplikar ang aton natun-an. Ngaa ginhatagan niya kita sini? Bangod gusto niya nga ‘makita naton ang ihibalo tuhoy sa Dios’ kag maalagad naton sia nga may ikasarang sa pagpangatarungan.—Hulu. 2:1-5; Roma 12:1.
2. (a) Ano ang dapat naton batunon parte sa aton kaugalingon? (Job 37:23, 24) (Tan-awa man ang piktyur.) (b) Ano ang benepisyo kon mapainubuson naton nga batunon nga wala naton nahibaluan ang tanan?
2 Bisan pa may ikasarang kita nga makatuon, dapat naton batunon nga madamo gihapon kita sang wala nahibaluan. (Basaha ang Job 37:23, 24.) Binagbinaga ang halimbawa ni Job. Sang ginpamangkot sia ni Jehova sang madamo nga pamangkot, narealisar niya nga madamo gali sia sang wala nahibaluan. Bangod sini, nangin mapainubuson sia kag ginbag-o niya ang iya panghunahuna. (Job 42:3-6) Makabenepisyo man kita kon mapainubuson naton nga batunon nga wala naton nahibaluan ang tanan. Mapalig-on kita sini nga magsalig nga isugid sa aton ni Jehova ang kinahanglan gid naton mahibaluan para makahimo kita sang maayo nga mga desisyon.—Hulu. 2:6.
Pareho kay Job, makabenepisyo man kita kon batunon naton nga may mga butang nga wala naton nahibaluan (Tan-awa ang parapo 2)
3. Ano ang binagbinagon naton sa sini nga artikulo?
3 Sa sini nga artikulo, binagbinagon naton ang pila ka butang nga wala naton nahibaluan kag ang mga kabudlayan nga posible maeksperiensiahan naton bangod sini. Binagbinagon man naton kon ngaa maayo nga wala naton nahibaluan ang pila ka butang. Magapabakod ini sang aton pagsalig nga isugid sa aton ni Jehova, ang “Isa nga himpit sa ihibalo,” ang kinahanglan gid naton mahibaluan.—Job 37:16.
WALA KITA KABALO KON SAN-O MAABOT ANG KATAPUSAN
4. Suno sa Mateo 24:36, ano ang isa ka butang nga wala naton nahibaluan?
4 Basaha ang Mateo 24:36. Wala kita kabalo kon san-o ang katapusan sining sistema sang mga butang. Bisan si Jesus, sang ari sia sa duta, wala man sia kabalo sang “adlaw kag oras.”a Sang ulihi, ginsilingan niya ang iya mga apostoles nga si Jehova ang ‘nagatalana sang tion’ kon san-o matabo ang pila ka hitabo. (Binu. 1:6, 7) Gintalana na ni Jehova kon san-o ang katapusan sini nga sistema, pero indi naton mahibaluan kon san-o gid ini maabot.
5. Bangod wala kita kabalo kon san-o maabot ang katapusan, ano ang mahimo nga epekto sini sa aton?
5 Base sa ginsiling ni Jesus, wala kita kabalo kon daw ano kadugay pa kita dapat maghulat antes mag-abot ang katapusan. Bangod sini, mahimo nga matak-an kita ukon maluyahan, ilabi na kon madugay na naton nga ginahulat ang adlaw ni Jehova. Mahimo nga mabudlayan man kita nga batason ang pagpakalain sang mga miembro sang aton pamilya ukon sang iban. (2 Ped. 3:3, 4) Gani, mahimo mahunahuna naton nga kon kabalo lang kuntani kita kon san-o gid maabot ang katapusan, mas mahapos sa aton ang maghulat kag magbatas.
6. Ngaa maayo nga wala kita kabalo kon san-o maabot ang katapusan?
6 Bangod wala ginpabalo ni Jehova kon san-o maabot ang katapusan, ginahatagan niya kita sang kahigayunan nga ipakita nga nagaalagad kita sa iya bangod palangga naton sia kag nagasalig kita sa iya. Wala naton ginahunahuna nga kon mag-abot na ang katapusan, mauntat na kita sa pag-alagad kay Jehova. Sa baylo, gusto naton nga alagaron sia asta sa wala sing katapusan. Gani imbes nga magpokus kon san-o maabot ang “adlaw ni Jehova,” mas maayo nga magpokus kita sa maayo nga resulta sina nga adlaw. Kon himuon naton ini, mas magabakod pa gid ang aton kaangtanan kay Jehova kag himuon naton ang tanan para malipay sia.—2 Ped. 3:11, 12.
7. Ano ang nahibaluan naton?
7 Mas maayo nga magpokus kita sa nahibaluan naton. Halimbawa, kabalo kita nga nag-umpisa ang katapusan nga mga adlaw sang 1914. Ginhatagan kita ni Jehova sang mga tagna sa Biblia nga nagapamatuod sini. Ginsugiran man niya kita sang madamo nga detalye parte sa mangin kahimtangan sang kalibutan pagkatapos sina nga tuig. Gani, kumbinsido kita nga “malapit na ang daku nga adlaw ni Jehova.” (Sof. 1:14) Kabalo man kita nga may ginapahimo si Jehova sa aton, nga amo ang pagsugid sa madamo nga tawo parte sa “maayong balita sang Ginharian.” (Mat. 24:14) Ginabantala naton ini sa mga 240 ka kadutaan sa sobra 1,000 ka lenguahe. Indi kinahanglan nga mahibaluan naton ang “adlaw kag oras” para mangin mapisan kita sa sining importante nga hilikuton.
WALA KITA KABALO KON ANO ANG HIMUON NI JEHOVA
8. Ano ang ginapatuhuyan sang ekspresyon nga “binuhatan sang matuod nga Dios”? (Manugwali 11:5)
8 May mga tion nga wala kita kabalo sang “binuhatan sang matuod nga Dios.” (Basaha ang Manugwali 11:5.) Ini nga ekspresyon nagapatuhoy sa ginapahanabo ni Jehova nga matabo ukon sa ginatugutan niya nga matabo para matuman ang iya kabubut-on. Indi gid naton ini mahangpan sing bug-os. (Sal. 37:5) Hunahunaa ini: Indi gihapon mahangpan sing bug-os sang mga scientist kon paano nagadaku ang bata sa tiyan sang iya iloy. Sing kaanggid, indi naton mahangpan sing bug-os kon ngaa gintugutan ni Jehova nga matabo ang isa ka butang ukon kon paano niya kita buligan.
9. Bangod wala kita kabalo kon ano ang himuon ni Jehova, ano ang mahimo nga mahunahuna naton?
9 Bangod wala kita kabalo kon ano ang himuon ni Jehova para sa aton, mahimo nga mabudlayan kita magdesisyon. Mahimo nga magduhaduha kita nga magsakripisyo para dugangan kuntani ang aton ginahimo sa pag-alagad, pareho sang pagpasimple sang aton kabuhi ukon pagsaylo sa bululigan nga kongregasyon. Kag kon wala naton nalab-ot ang aton tulumuron sa pag-alagad, mahimo mahunahuna naton nga wala nalipay sa aton si Jehova. Mahimo mahunahuna man naton ini kon wala kita nakakita sing Bible study bisan nagapanikasog gid kita sa aton ministeryo, ukon kon madamo sing problema ang proyekto nga ginahimo naton sa organisasyon.
10. Bangod wala kita kabalo kon ano ang himuon ni Jehova, ano nga importante nga mga kinaiya ang mapakita naton?
10 Bangod wala kita kabalo kon ano ang himuon ni Jehova, buligan kita sini nga mapakita ang importante nga mga kinaiya pareho sang pagkamapainubuson kag kaugdang. Gani, ginabaton naton nga mas mataas ang panghunahuna kag dalanon ni Jehova sangsa aton. (Isa. 55:8, 9) Mapakita man naton nga nagasalig kita sing bug-os nga himuon gid ni Jehova kon ano ang pinakamaayo sa isa ka sitwasyon. Kon nagmadinalag-on kita sa aton ministeryo ukon sa proyekto nga ginahimo naton sa organisasyon, ginahatag naton ang kadayawan kay Jehova. (Sal. 127:1; 1 Cor. 3:7) Pero kon lain sa aton ginapaabot ang nangin resulta sang aton pagpanikasog, dapat naton dumdumon nga kontrolado gihapon ni Jehova ang tanan. (Isa. 26:12) Himuon lang naton ang aton masarangan, kag padayon kita nga magsalig nga buligan gid kita pirme ni Jehova. Sang una, may mga tion nga nagahatag si Jehova sang instruksion paagi sa milagro. Bisan pa wala na niya ini ginahimo subong, makasalig kita nga hatagan niya kita sang instruksion nga kinahanglan naton.—Binu. 16:6-10.
11. Ano ang nahibaluan naton nga makabulig sa aton?
11 Kabalo kita nga si Jehova mahigugmaon gid, makatarunganon, kag maalam. Kabalo man kita nga ginapabaloran gid niya ang aton ginahimo para sa iya kag para sa aton mga kauturan. Kag kabalo kita nga ginapadyaan gid pirme ni Jehova ang mga mainunungon sa iya.—Heb. 11:6.
WALA KITA KABALO KON ANO ANG MATABO BUAS
12. Suno sa Santiago 4:13, 14, ano ang wala naton nahibaluan?
12 Basaha ang Santiago 4:13, 14. Wala kita kabalo kon ano ang mangin sitwasyon sang aton kabuhi buas. Sa sini nga sistema sang mga butang, posible gid nga maeksperiensiahan naton ang ‘wala ginapaabot nga mga hitabo.’ (Man. 9:11) Gani, indi naton masigurado kon bala magamadinalag-on ang aton mga plano ukon bala buhi pa kita para himuon ini.
13. Bangod wala kita kabalo kon ano ang matabo buas, ano ang mahimo nga epekto sini sa aton?
13 Bangod wala kita kabalo kon ano ang matabo buas, mahimo nga mabudlayan kita nga magbatas. Ngaa? Kay man, kon nabalaka kita sa posible nga matabo, mahimo madula ang aton kalipay. Kon gulpi lang kita makaeksperiensia sang mga trahedya ukon sang wala ginapaabot nga mga hitabo, mahimo magalalain gid kita kag masubuan. Kag kon wala natabo ang ginapaabot naton, mahimo magluya ang aton buot.—Hulu. 13:12.
14. Sa ano nagadepende ang aton kalipay? (Tan-awa man ang mga piktyur.)
14 Kon ginabatas naton ang mga kabudlayan, ginapakita naton nga bisan ano pa ang matabo, nagaalagad kita kay Jehova bangod palangga naton sia. Ginapakita sang mga kasaysayan sa Biblia nga indi kita dapat magpaabot nga proteksionan kita ni Jehova sa tanan nga kabudlayan, kag wala niya ginatalana ang mga matabo sa aton kabuhi. Kabalo si Jehova nga bisan pa wala kita kabalo kon ano ang matabo sa aton sa palaabuton, puede kita mangin malipayon. Kay man, ang aton kalipay nagadepende sa aton pagpangayo sang giya kag pagtuman sa iya. (Jer. 10:23) Kon nagapagiya kita sa iya kon nagahimo kita sang mga desisyon, daw pareho lang nga nagasiling kita: “Kon kabubut-on ni Jehova, magakabuhi kami kag himuon ini ukon ina.”—Sant. 4:15.
Maproteksionan gid kita kon magpagiya kita kag magtuman kay Jehova (Tan-awa ang parapo 14-15)b
15. Ano ang nahibaluan naton parte sa palaabuton?
15 Bisan pa wala kita kabalo kon ano ang matabo buas, kabalo kita nga nagpromisa si Jehova sing kabuhi nga wala sing katapusan sa langit kag sa duta. Kabalo kita nga indi gid sia magbutig kag wala sing makapugong sa iya sa pagtuman sang tanan niya nga promisa. (Tito 1:2) Sia lang ang ‘makatagna sang mahanabo, kag sang mga butang nga wala pa matabo.’ Natuman gid ang tanan niya nga tagna nga natabo sang panahon sang Biblia, gani matuman gid ang tanan niya nga tagna nga matabo sa palaabuton. (Isa. 46:10) Kabalo kita nga wala sing makapugong sa gugma ni Jehova sa aton. (Roma 8:35-39) Hatagan gid niya kita sang kaalam, paumpawan niya kita, kag pabakuron niya kita para mabatas naton ang bisan ano nga kabudlayan. Makasalig kita nga buligan kita ni Jehova kag pakamaayuhon.—Jer. 17:7, 8.
INDI NATON MAHANGPAN SING BUG-OS KON DAW ANO KITA KA KILALA NI JEHOVA
16. Suno sa Salmo 139:1-6, ano ang nahibaluan ni Jehova nga indi naton mahangpan sing bug-os?
16 Basaha ang Salmo 139:1-6. Nahibaluan sang aton Manunuga ang tanan parte sa aton. Kabalo sia kon ano ang nakaimpluwensia sa aton ginahunahuna kag ginabatyag. Kabalo sia kon ano ang aton ginahambal kag kon ano ang aton buot silingon sa sini. Kabalo man sia sang tanan naton nga ginahimo kag kon ngaa ginahimo naton ini. Suno kay Hari David, ginabantayan kita pirme ni Jehova gani handa Sia pirme sa pagbulig sa aton. Nalipay gid kita nga nagaulikid gid sa aton ang Soberanong Ginuo sang uniberso kag ang labing gamhanan nga Manunuga sang langit kag duta. Nagsiling si David: “Ina nga ihibalo tuman ka makatilingala sa akon. Tuman ini kataas nga indi ko matungkad.”—Sal. 139:6, mga footnote.
17. Ngaa mahimo nabudlayan kita nga magpati nga kilala gid kita ni Jehova?
17 Bangod sang aton gindak-an nga pamilya, sang aton kultura, ukon sang aton mga pagpati sang una, mahimo nabudlayan kita nga magpati nga isa ka mahigugmaon nga Amay si Jehova nga nagaulikid gid sa aton. Posible man nga nagabatyag kita nga bangod grabe gid kalain sang aton mga sala sang una, indi gid gusto ni Jehova nga mangin suod sa aton kag malayo sia sa aton. May mga tion nga nabatyagan ini bisan ni David. (Sal. 38:18, 21) Kag kon ginapanikasugan sang isa ka tawo nga bag-uhon ang iya paagi sang pagkabuhi para matuman niya ang mga kasuguan sang Dios, posible mahunahuna niya, ‘Kon kilala gid ako sing maayo sang Dios, ngaa gusto niya nga magbag-o ako? Tani batunon niya na lang kon ano ako.’
18. Ano ang benepisyo kon batunon naton nga mas kilala kita ni Jehova sangsa pagkilala naton sa aton kaugalingon? (Tan-awa man ang mga piktyur.)
18 Matun-an naton nga batunon nga mas kilala kita ni Jehova sangsa pagkilala naton sa aton kaugalingon, kag makita niya ang aton maayo nga mga kinaiya nga indi naton makita. Makita man niya ang aton mga kakulangan, pero nahangpan niya ang aton ginabatyag kag kon ngaa nahimo naton ang isa ka butang. Gani, palangga niya gihapon kita. (Roma 7:15) Kon marealisar naton nga kabalo si Jehova sang aton masarangan nga himuon, mas mapalig-on pa gid kita nga alagaron sia sing matutom kag malipayon.
Ginapabakod ni Jehova ang aton pagtuo sa dalayawon nga kabuhi nga ginpromisa niya sa bag-ong kalibutan. Paagi sa sini, ginabuligan niya kita nga mabatas ang wala ginapaabot nga mga kabudlayan (Tan-awa ang parapo 18-19)c
19. Ano ang nahibaluan naton parte kay Jehova?
19 Kabalo kita nga si Jehova gugma. Sigurado gid kita sini. (1 Juan 4:8) Kabalo kita nga ginhatagan niya kita sang matarong nga mga kasuguan bangod palangga niya kita kag gusto niya ang pinakamaayo para sa aton. Kabalo kita nga gusto ni Jehova nga magkabuhi kita sing wala sing katapusan. Kay man, gin-aman niya ang gawad para mangin posible ini. Bangod napatay si Jesus para sa aton, makasalig kita nga mapahalipay naton si Jehova bisan pa indi kita perpekto. (Roma 7:24, 25) Kag kabalo kita nga “ang Dios labaw pa sa aton tagipusuon kag nakahibalo sang tanan nga butang.” (1 Juan 3:19, 20) Bangod nahibaluan ni Jehova ang tanan parte sa aton, sigurado sia nga mahimo naton ang iya kabubut-on.
20. Ano ang himuon naton para indi kita mabalaka sa mga butang nga wala naton nahibaluan?
20 Ginasugid sa aton ni Jehova ang tanan nga impormasyon nga kinahanglan gid naton. Gani, indi kita dapat mabalaka sa mga butang nga wala naton nahibaluan. Sa baylo, dapat magpokus kita sa importante nga mga butang. Kon himuon naton ini, ginapakita naton nga bug-os gid ang aton pagsalig kay Jehova, “ang Isa nga himpit sa ihibalo.” (Job 36:4) Bisan pa may mga butang nga wala naton nahibaluan subong, kabalo kita nga padayon kita nga tudluan sang aton Halangdon nga Dios sang bag-o nga mga butang asta sa wala sing katapusan.—Man. 3:11.
AMBAHANON 104 Ang Dulot sang Dios nga Balaan nga Espiritu
b PIKTYUR: Ginapreparar sang isa ka amay kag sang iya bata ang ila go bag para nakahanda ang ila pamilya engkaso may emerhensia.
c PIKTYUR: Madamo sing problema ang isa ka brother, pero ginaimadyin niya nga mangin malipayon sia sa bag-ong kalibutan.