Paano Naton Mabatuan ang Sala nga mga Handum?

1. Bilang indi perpekto nga mga tawo, ano ang ginapakigbatuan naton tanan?

NABUDLAYAN ka bala nga pakigbatuan ang sala nga mga handum? Kon huo, indi paghunahunaa nga mas mabudlay nga pagtilaw ang imo ginaatubang sangsa ginaatubang sang iban. Ang Biblia nagasiling: “Wala sing pagsulay nga nagaabot sa inyo nga wala maagihan sang iban.” (1 Cor. 10:13) Ginapahangop sini nga ano man nga handum ang imo ginapakigbatuan, indi lang ikaw ang nagapakigbato sa sini. Pero sa bulig ni Jehova, masarangan mo ini.

2. Ano ang pila sa mga pagsulay nga posible ginapakigbatuan sang pila ka utod kag mga Bible study? (Tan-awa man ang mga piktyur.)

² Ang Biblia nagasiling man: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon.” (Sant. 1:14) Ginapahangop sini nga lainlain nga mga handum ang posible magsulay sa kada isa. Halimbawa, posible masulay ang iban nga utod nga maghimo sing imoral nga buhat. May iban pa gani nga gusto maghimo sini sa pareho nila nga lalaki ukon babayi. May iban naman nga nag-untat na sa pagtan-aw sang pornograpiya, pero daw indi nila mapunggan nga magtan-aw sini liwat. Kag posible masulay ang iban nga magdroga ukon magpahubog liwat bisan pa nauntatan na nila ini. Pila lang ini sa sala nga mga handum nga ginapakigbatuan sang pila ka utod kag mga Bible study. May tion gid nga nabatyagan naton ang nabatyagan ni apostol Pablo. Nagsiling sia: “Kon luyag ko himuon ang husto, ang malain yari sa akon.”​—Roma 7:21.

3. Kon pirme mo ginapakigbatuan ang isa ka sala nga handum, ano ang posible mahunahuna mo?

³ Kon pirme mo ginapakigbatuan ang isa ka sala nga handum, posible mahunahuna mo nga indi mo ini masarangan. Posible mahunahuna mo man nga wala ka na sing paglaum, ukon indi gid malipay sa imo si Jehova bangod sa sining sala nga handum. Pero makasalig ka nga indi matuod ang imo mga ginahunahuna. Para makumbinsi ka sa sini, binagbinagon sa sini nga artikulo ang duha ka pamangkot: (1) Ngaa posible mahunahuna mo nga indi mo masarangan pakigbatuan ang sala nga handum ukon wala ka na sing paglaum? (2) Ano ang himuon mo para mabatuan mo ang sala nga mga handum?

KON ANO ANG GUSTO NI SATANAS NGA HUNAHUNAON NATON

4. (a) Ngaa gusto ni Satanas nga hunahunaon naton nga indi naton masarangan pakigbatuan ang sala nga mga handum? (b) Ngaa sigurado kita nga masarangan naton pakigbatuan ang sala nga mga handum?

⁴ Gusto ni Satanas nga hunahunaon naton nga indi naton masarangan pakigbatuan ang sala nga mga handum. Kabalo sa sini si Jesus, gani gintudluan niya ang iya mga disipulo nga ipangamuyo ini: “Buligi kami agod indi kami madaug sang pagsulay, kag luwasa kami sa isa nga malauton.” (Mat. 6:13) Nagsiling si Satanas nga kon ginasulay ang mga tawo sang ila sala nga mga handum, mas pilion nila nga maghimo sing malain sangsa tumanon si Jehova. (Job 2:4, 5) Ngaa nasiling niya ina? Nagpadala si Satanas sa iya handum, kag indi niya gusto nga magpabilin nga matutom kay Jehova. Gani nagapati sia nga pareho man kita sa iya, ukon indi man naton pagtumanon si Jehova kon sulayon kita. Nahunahuna pa gani ni Satanas nga masulay niya ang perpekto nga Anak sang Dios. (Mat. 4:8, 9) Pero hunahunaa ini: Indi gid man bala naton masarangan pakigbatuan ang aton sala nga mga handum? Masarangan naton ini. Kay man, nagaugyon kita sa ginsiling ni apostol Pablo: “Sa tanan nga butang may kusog ako paagi sa isa nga nagapabakod sa akon.”​—Fil. 4:13.

5. Ngaa masiling naton nga sigurado gid si Jehova nga masarangan naton pakigbatuan ang sala nga mga handum?

⁵ Lain gid si Jehova kay Satanas. Kay man, sigurado gid si Jehova nga masarangan naton pakigbatuan ang sala nga mga handum. Ngaa masiling naton ina? Bangod gintagna ni Jehova nga may daku nga kadam-an nga magapabilin nga matutom sa iya kag makalampuwas sa dakung kapipit-an. Hunahunaa kon ano ang buot silingon sini. Si Jehova indi makabutig, kag nagsiling sia nga madamo ang magasulod sa iya bag-o nga kalibutan. “Ginlabhan” sining mga magaistar sa Paraiso “ang ila malaba nga panapton kag ginpaputi ini sa dugo sang Kordero.” (Bug. 7:9, 13, 14) Gani maathag nga para kay Jehova, masarangan naton pakigbatuan ang sala nga mga handum.

6-7. Ngaa gusto ni Satanas nga hunahunaon naton nga wala na kita sing paglaum?

⁶ Gusto man ni Satanas nga hunahunaon naton nga wala na kita sing paglaum, ukon indi kita paghatagan ni Jehova sang kabuhi nga wala sing katapusan bangod sa aton sala nga mga handum. Pero sa liwat, ngaa gusto ni Satanas nga hunahunaon naton ini? Kay man, sia ang wala na sing paglaum. Ang matuod, ginhukman sia ni Jehova nga laglagon sia sing bug-os. (Gen. 3:15; Bug. 20:10) Akig gid si Satanas kay may paglaum kita nga mabuhi sing wala sing katapusan. Gani, gusto gid niya nga hunahunaon man naton nga wala na kita sing paglaum. Pero, indi ina matuod. Kay man, ginapasalig sang Biblia nga gusto gid ni Jehova nga buligan kita. Ang matuod, “indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.”​—2 Ped. 3:9.

⁷ Gani, kon ginahunahuna naton nga indi naton masarangan pakigbatuan ang sala nga mga handum ukon wala na kita sing paglaum, amo gid sina ang gusto ni Satanas. Bangod nabal-an naton ini, panikasugan gid naton nga pamatukan sia.​—1 Ped. 5:8, 9.

KON ANO ANG POSIBLE MAHUNAHUNA NATON BANGOD INDI KITA PERPEKTO

8. Magluwas sa malain nga mga buhat, ano pa ang ginapatuhuyan sang sala? (Salmo 51:5) (Tan-awa man ang “Dugang nga Paathag.”)

⁸ Magluwas kay Satanas, may isa pa ka rason kon ngaa mahunahuna naton nga indi naton masarangan pakigbatuan ang sala nga mga handum kag wala na kita sing paglaum. Ano ini? Ang sala nga napanubli naton tanan sa aton una nga mga ginikanan.a—Job 14:4; basaha ang Salmo 51:5.

9-10. (a) Ano ang ginbatyag nanday Adan kag Eva bangod sa ila sala? (Tan-awa man ang piktyur.) (b) Ano ang ginabatyag naton bangod indi kita perpekto?

⁹ Binagbinaga ang ginbatyag nanday Adan kag Eva bangod sa ila sala. Pagkatapos nila ginlapas ang sugo ni Jehova, nagpanago sila kag gintabunan nila ang ila lawas. Parte sa sini, ang Insight on the Scriptures nagsiling: “Bangod sa sala, ginkonsiensia sila kag nakabatyag sila sing kahadlok, kabalaka, kag kahuya.” Daw pareho lang nga ara sanday Adan kag Eva sa sulod sang isa ka balay nga nakandaduhan. May apat ini ka kuarto nga nagarepresentar sa ila ginbatyag. Makasaylosaylo sila sa mga kuarto, pero indi gid sila makagua sa balay. Gani bisan ano pa ang ila himuon, magapabilin sila nga indi perpekto.

¹⁰ Siempre, lain ang aton kahimtangan sa kahimtangan nanday Adan kag Eva. Kay man, indi sila makabenepisyo sa gawad. Pero sa aton bahin, ginpaposible sang gawad nga mapatawad ang aton mga sala kag makatigayon kita sang matinlo nga konsiensia. (1 Cor. 6:11) Pero napanubli naton ang sala, gani indi kita perpekto. Gani ginakonsiensia man kita kag nagabatyag kita sing kahadlok, kabalaka, kag kahuya. Ang matuod, ang Biblia nagasiling nga hugot nga ginauyatan sang sala ang mga tawo. Kag ginhimo ini sang sala “bisan sa mga wala makahimo sing sala nga pareho sang paglapas ni Adan.” (Roma 5:14) Pero indi naton dapat paghunahunaon nga bangod makasasala kita, indi na naton mahimo ang husto ukon wala na kita sing paglaum. Kay man, may puede kita himuon para madula ining negatibo nga panghunahuna. Ano ang himuon naton?

11. Ano ang dapat naton himuon kon mahunahuna naton nga indi naton masarangan pakigbatuan ang sala nga mga handum, kag ngaa? (Roma 6:12)

¹¹ Bangod indi kita perpekto, daw may tingog nga nagasiling sa aton nga indi naton masarangan pakigbatuan ang sala nga mga handum. Pero indi naton dapat pagpamatian ina nga tingog. Ngaa? Bangod ang Biblia nagasiling nga indi naton dapat pagtugutan ang sala nga padayon nga “maggahom subong hari” sa aton. (Basaha ang Roma 6:12.) Buot silingon, puede naton sikwayon ang sala nga mga handum. (Gal. 5:16) Sigurado si Jehova nga masarangan naton ini himuon. Kay man, indi niya kita pagsuguon nga sikwayon ini kon indi man lang gali naton ini masarangan. (Deut. 30:11-14; Roma 6:6; 1 Tes. 4:3) Gani, masarangan naton pakigbatuan ang sala nga mga handum.

12. Ano ang dapat naton himuon kon mahunahuna naton nga wala na kita sing paglaum, kag ngaa?

¹² Kon mahunahuna naton nga wala na kita sing paglaum, daw may tingog nga nagasiling sa aton nga indi kita pagpaistaron ni Jehova sa Paraiso bangod sa aton sala nga mga handum. Pero indi man naton dapat pagpamatian ina nga tingog. Ngaa? Bangod ang Biblia nagasiling nga kabalo si Jehova nga makasasala kita. (Sal. 103:13, 14) “Nakahibalo [sia] sang tanan nga butang” parte sa aton, pati na ang epekto sa kada isa sa aton sang aton napanubli nga sala. (1 Juan 3:19, 20) Pero kon ginapanikasugan gid naton nga pakigbatuan ang aton sala nga mga handum, matinlo kita sa panulok ni Jehova. Ngaa makasigurado kita sa sini?

13-14. Kon makahunahuna kita sang sala nga mga handum, ginapakita bala sini nga wala nalipay sa aton si Jehova? Ipaathag.

¹³ Ginapakita sang Biblia nga may kinalain ang paghunahuna sa sala nga mga handum kag ang paghimo sa sini nga mga handum. Wala kita sing kontrol kon ano nga handum ang aton mahunahuna, pero kita ang may kontrol kon bala himuon naton ini nga handum ukon indi. Halimbawa, nagahimo sang homoseksuwalidad ang pila ka Cristiano sa Corinto sang unang siglo. Si Pablo nagsulat: “Amo sina anay ang iban sa inyo.” Pero wala na gid bala nagsulod sa ila hunahuna nga maghimo sang homoseksuwal nga mga buhat? Posible gid nga may mga tion nga nahunahuna nila ini gihapon. Kay man, mabudlay gid dulaon ini nga mga handum. Pero nalipay si Jehova sa mga Cristiano nga nagpugong sa ila kaugalingon kag wala nila ginhimo ang ila mga handum. Para sa iya, “ginhugasan na” sila. (1 Cor. 6:9-11) May mahimo ka man para mangin pareho sa sini ang pagtan-aw sa imo ni Jehova.

¹⁴ Bisan ano pa nga sala nga handum ang imo ginapakigbatuan, masarangan mo ini. Posible nga indi mo ini madula sa imo hunahuna. Pero mapunggan mo ang imo kaugalingon para malikawan mo nga ‘pasundan ang kabubut-on sang unod kag sang imo hunahuna.’ (Efe. 2:3) Ano ang puede mo himuon para madaug mo ang sala nga mga handum?

ANG PUEDE MO HIMUON PARA MADAUG MO ANG PAGSULAY

15. Para mabatuan naton ang sala nga mga handum, ngaa dapat mangin honest kita sa aton kaugalingon?

¹⁵ Para mabatuan mo ang sala nga mga handum, dapat mangin honest ka sa imo kaugalingon parte sa imo mga kaluyahon. Indi mo dapat pagdayaon ang imo kaugalingon paagi “sa butig nga pangatarungan.” (Sant. 1:22) Halimbawa, posible magsiling ang isa, ‘Mas grabe ’ya paimnon ang iban sangsa akon.’ May pila naman nga ginabasol nila ang iban. Posible magsiling ang isa, ‘Wala kuntani ako nasulay nga magtan-aw sang pornograpiya kon pirme ako ginaangga sang akon asawa.’ Kon amo sini ang imo mga pangatarungan, mas mahapos ka nga masulay. Gani bisan sa imo lang hunahuna, indi ka dapat mangita sang rason kon ngaa nakahimo ka sing malain. Sa baylo, batuna nga ikaw ang manabat sa imo ginhimo.​—Gal. 6:7.

16. Paano mo pabakuron ang imo determinasyon nga himuon ang husto?

¹⁶ Magluwas nga dapat mangin honest ka sa imo kaugalingon parte sa imo mga kaluyahon, dapat pabakuron mo man ang imo determinasyon nga indi magpadaug sa sini. (1 Cor. 9:26, 27; 1 Tes. 4:4; 1 Ped. 1:15, 16) Hunahunaa kon ano nga kaluyahon ang nabudlayan ka nga pakigbatuan kag kon san-o ka nabudlayan nga pakigbatuan ini. Posible nga nabudlayan ka nga madaug ang isa ka klase sang pagsulay ukon may tion nga mas mabudlay ini daugon. Halimbawa, nabudlayan ka bala nga daugon ang isa ka pagsulay kon kapoy ka ukon gab-i na gid katama? Maghanda kon paano mo pamatukan ini nga pagsulay, kag praktisa ini sa imo hunahuna. San-o ka dapat maghanda? Antes pa sang pagsulay.​—Hulu. 22:3.

17. Ano ang matun-an naton sa halimbawa ni Jose? (Genesis 39:7-9) (Tan-awa man ang mga piktyur.)

¹⁷ Binagbinaga ang ginhimo ni Jose sang ginsulay sia sang asawa ni Potifar nga maghulid sa iya. Nangindi dayon si Jose kag maathag niya ini nga ginsiling. (Basaha ang Genesis 39:7-9.) Ano ang ginapakita sini? Determinado na nga daan si Jose nga himuon ang husto antes pa sia ginsulay sang asawa ni Potifar. Sing kaanggid, puede mo pabakuron ang imo determinasyon nga himuon ang husto antes ka pa makaeksperiensia sang pagsulay. Paagi sini, kabalo ka na sang imo himuon kon sulayon ka kay nakadesisyon ka na nga daan.

“PADAYON NGA USISAA” ANG IMO KAUGALINGON

18. Ano pa ang puede mo himuon para madaug mo ang sala nga mga handum? (2 Corinto 13:5)

¹⁸ Para madaug mo ang sala nga mga handum, dapat ‘padayon mo nga usisaon’ ang imo kaugalingon. (Basaha ang 2 Corinto 13:5.) Regular nga usisaa ang imo mga ginahunahuna kag ginahimo, kag bag-uha ang mga dapat mo bag-uhon. Halimbawa, bisan pa nadaug mo ang isa ka pagsulay, pamangkuta ang imo kaugalingon: ‘Daw ano kadugay antes ko ini napangindian?’ Kon narealisar mo nga wala ka nakapangindi dayon, indi ka dapat maluyahan sang buot. Sa baylo, hunahunaa kon ano ang puede mo himuon para madasig mo nga mapangindian ang pagsulay. Pamangkuta ang imo kaugalingon: ‘Kon makahunahuna ako sing indi husto, ano ang himuon ko para masikway ko ini dayon? Ang akon bala kalingawan amo ang rason kon ngaa mas nabudlayan ako nga daugon ang pagsulay? Ginapalayo ko bala dayon ang akon panulok sa imoral nga mga talan-awon? Naintiendihan ko bala nga para gid pirme sa akon kaayuhan ang mga kasuguan ni Jehova bisan pa nga kinahanglan ko magpakita sang pagpugong sa kaugalingon?’—Sal. 101:3.

19. Kon nagahimo kita sang indi maayo nga mga desisyon bisan pa gamay lang ini, ngaa mas mabudlayan kita nga pakigbatuan ang sala nga mga handum?

¹⁹ Indi ka man dapat mangita sang rason kon ngaa nakahimo ka sing indi husto. Ang Biblia nagasiling: “Ang tagipusuon madaya labaw sa tanan nga butang kag makatalagam.” (Jer. 17:9) Nagsiling si Jesus nga nagahalin sa sini ang “malaut nga pangatarungan.” (Mat. 15:19) Halimbawa, binagbinaga ang isa ka tawo nga nag-untat na sa pagtan-aw sang pornograpiya. Pagligad sang tion, posible magrason sia nga indi man makahalalit kon magtan-aw sia sang mga piktyur nga makapukaw sa sekso kay wala man nagauba ang ara sa piktyur. Posible man nga magrason sia, ‘Indi sala nga mag-imadyin ako sang sala nga mga buhat kay wala ko man ini ginahimo.’ Kon amo sini ang panghunahuna sang isa ka tawo, ‘nagaplano’ ang iya madaya nga tagipusuon “para sa mga kailigbon sang unod.” (Roma 13:14) Paano mo ini malikawan? Likawi nga maghimo sang indi maayo nga mga desisyon bisan pa gamay lang ini. Kay man, posible ini magresulta sa paghimo sang daku kag indi maayo nga mga desisyon, pareho sang pagpadala sa pagsulay.b Isikway man ang bisan ano nga panghunahuna, ukon “malaut nga pangatarungan,” nga posible himuon mo nga rason sa paghimo sing indi husto.

20. Ano ang aton paglaum sa palaabuton, kag paano kita ginabuligan ni Jehova subong?

²⁰ Natun-an naton nga paagi sa bulig ni Jehova, masarangan naton nga pamatukan ang pagsulay. Nagapasalamat man kita sa iya kaluoy kay may paglaum kita nga mabuhi sing wala sing katapusan sa bag-ong kalibutan. Sa sina nga tion, mangin malipayon gid kita kay maalagad naton si Jehova nga may matinlo nga hunahuna kag tagipusuon. Pero samtang wala pa ina nga tion, makasigurado kita nga masarangan naton pakigbatuan ang sala nga mga handum kag may ara kita paglaum. Pakamaayuhon ni Jehova ang aton mga pagpanikasog, gani magadaug kita.