Bisan Pa Mahuluy-on Ako, Nangin Misyonero Ako

Natawo ako sang 1951 sa Vienna, Austria, kag Katoliko ang amon pamilya. Mahuluy-on ako, pero nagapati ako nga may Dios kag pirme ako nagapangamuyo. Sang nuebe anyos ako, nagtuon si Tatay sang Biblia upod sa mga Saksi ni Jehova. Wala madugay pagkatapos sini, nagtuon man si Nanay upod sa iya.

Sang ulihi, nangin bahin kami sang Döbling Congregation sa Vienna. Pirme gid updanay ang amon pamilya. Ululupod kami nga nagabasa kag nagatuon sang Biblia, nagatambong sa mga miting, kag nagaboluntaryo sa mga asembleya. Halin sang bata pa ako, ginbuligan ako ni Tatay nga palanggaon si Jehova. Pirme pa gani ginapangamuyo ni Tatay nga magpayunir kami sang akon utod nga babayi. Pero sadto, lain pa ang akon tulumuron.

NAG-ALAGAD AKO SING BUG-OS TION

Nabawtismuhan ako sang 1965, sang 14 anyos ako. Pero nakulbaan gid ako mag-istorya sa mga tawo sa ministeryo. Manubo man ang akon pagtan-aw sa akon kaugalingon kag gusto ko nga batunon ako sang pareho ko nga mga pamatan-on. Gani wala madugay pagkatapos ako mabawtismuhan, nakig-abyan ako sa mga wala nagaalagad kay Jehova. Bisan pa nanamian ako mag-upod sa ila, ginakonsiensia ako kay indi sila mga Saksi. Pero nabudlayan ako nga untatan ang pagpakig-upod sa ila. Ano ang nakabulig sa akon?

Sadto man nga tion, nangin bahin sang amon kongregasyon ang 16 anyos nga si Dorothée. Nanamian gid sia sang pamalaybalay nga pagbantala. Mas magulang ako sa iya, pero mas mapisan sia magbantala sangsa akon. Gani sa pensar ko: ‘Saksi ang akon mga ginikanan, kag si Dorothée isa lang nga Saksi sa ila pamilya. Ginaatipan man niya ang iya nanay nga nagamasakit, pero pirme sia gihapon nagabantala.’ Napalig-on gid ako sang iya halimbawa nga dugangan pa gid ang akon ginahimo sa pag-alagad kay Jehova. Sang ulihi, nangin partner kami ni Dorothée sa pagpayunir. Sang primero, nag-auxiliary payunir kami, ukon ginatawag sadto nga vacation pioneer. Kag sang ulihi, nag-alagad kami bilang mga regular payunir. Makalalaton gid ang kapisan ni Dorothée sa pagbantala. Ginbuligan niya ako nga masugdan ang una ko nga Bible study. Sang ulihi, mas mahapos na sa akon ang pagpakig-istorya sa mga tawo sa ila balay, sa dalan, kag bisan diin.

Sang una pa lang nga tuig sang akon pagregular payunir, gin-asayn sa amon kongregasyon ang isa ka Austrian kag espesyal payunir nga brother nga si Heinz. Natun-an niya ang kamatuoran sa Canada sang nagbisita sia sa iya utod didto nga Saksi. Pag-abot pa lang niya sa amon kongregasyon sa Vienna, nanamian na ako sa iya. Pero gusto niya magmisyonero, kag daw wala gid ina sa akon plano. Gani sang primero, wala ko ginapakita nga nanamian ako sa iya. Pero sang ulihi, nagnobyahanay kami ni Heinz, dayon nagpakasal, kag upod kami nga nagpayunir sa Austria.

GUSTO KO NA MANGIN MISYONERO

Pirme ginaistorya ni Heinz sa akon nga gusto niya magmisyonero. Wala man niya ako ginapilit, pero ginapamangkot niya ako pareho sang, “Wala man kita bata, ti puede ta ayhan dugangan ang aton ginahimo sa pag-alagad kay Jehova?” Bangod mahuluy-on ako, nakulbaan ako magmisyonero. Nagapayunir ako, pero pamatyag ko daw indi ko gid masarangan ang pagmisyonero. Pero pirme gihapon ginaistorya ni Heinz ang parte sa sini. Ginpalig-on man niya ako nga indi magpokus sa akon kaugalingon, kundi sa kon paano ako makabulig sa iban. Ang iya laygay nakabulig gid sa akon.

Sing amat-amat, daw gusto ko naman magmisyonero, gani nag-aplay kami sa Gilead School. Pero nagsiling ang branch servant nga panikasugan ko anay nga magsagad sa Ingles. Pagligad sang tatlo ka tuig nga panikasog ko, nakibot gid kami kay nakabaton kami sang asaynment nga mag-alagad sa Yugoslavian nga kongregasyon sa Salzburg, Austria. Nag-alagad kami didto sa sulod sang pito ka tuig, lakip na ang isa ka tuig nga nangin manugtatap sang sirkito ang akon bana sa Serbo-Croatian nga mga kongregasyon. Mabudlay tun-an ang Serbo-Croatian nga lenguahe, pero madamo kami sing Bible study.

Dayon sang 1979, kuno abi ginpabakasyon kami sa Bulgaria. Ginadumilian ang aton hilikuton didto, gani wala kami nagbantala sang didto kami. Pero may gindala kami nga magagmay nga mga literatura para sa lima ka sister nga nagaistar sa Sofia, ang kapital nga siudad. Grabe gid ang akon kulba, pero ginbuligan ako ni Jehova. Dalayawon gid ang kaisog sini nga mga sister kag malipayon gihapon sila sa ila asaynment bisan pa posible nga mapriso sila. Ang ila halimbawa nagpalig-on sa akon nga himuon ang akon bug-os nga masarangan sa bisan ano pa nga asaynment nga ihatag sa akon sang organisasyon ni Jehova.

Sang ulihi, nag-aplay kami liwat sa Gilead, kag gin-agda gid man kami nga mag-eskwela. Abi namon maeskwela kami sa Ingles nga klase sa United States. Pero sang Nobiembre 1981, nagsugod ang Gilead Extension School sa branch sa Wiesbaden, Germany. Gani German ang lenguahe sang amon klase, kag mas mahapos ko ini maintiendihan. Pero diin kami ayhan iasayn?

NAG-ALAGAD KAMI SA PUNGSOD NGA MADAMO SING INAWAY

Gin-asayn kami sa Kenya. Pero ginpangabay kami sang branch office sa Kenya kon puede kami makaalagad sa tupad sini nga pungsod nga Uganda. Sobra napulo ka tuig antes sini, ginpangunahan ni General Idi Amin ang isa ka kudeta kag sia ang nangin lider sang pungsod. Sa tion sang iya pagginahom, linibo ang iya ginpapatay kag minilyon ka tawo ang nag-antos. Dayon sang 1979, ginpahalin naman si Idi Amin kag napilitan sia nga malagyo bangod sa iya mga kontra. Gani maintiendihan gid ninyo kon ngaa nahadlok ako magkadto sa sini nga pungsod. Pero ginhanas kami sang Gilead nga magsalig kay Jehova, gani nagpasugot kami.

Magamo gid sadto sa Uganda. Parte sa sini, amo ini ang ginsiling ni Heinz sa 2010 nga Tuigan nga Libro: “Madamo sang serbisyo, . . . subong sang suplay sang tubig kag komunikasyon ang nautod. . . . May mga pagpaniro kag mga kinawatay bisan diin, ilabi na sa kagab-ihon. . . . Ang tanan yara sa ila balay kag nagapangamuyo nga kuntani maglipas ang gab-i nga indi sila makawatan.” Bisan pa mabudlay ang kahimtangan, ang mga kauturan nagauswag gihapon sa espirituwal.

Sang 1982, nag-abot kami ni Heinz sa Kampala, ang kapital sang Uganda. Sa una namon nga lima ka bulan didto, nagdayon kami sa balay sang mag-asawa nga sanday Sam kag Christina Waiswa. Upod nila sa ila balay ang lima nila ka bata kag ang apat nila ka paryente. Sa masami, isa ka bes lang sila makakaon sa isa ka adlaw, gani nagdayaw gid kami sa ila pagkamaabiabihon. Madamo gid kami sing natun-an sa ila nga nakabulig sa amon pagmisyonero. Halimbawa, natun-an namon nga paiguon ang pila lang ka litro nga tubig sa amon pagpaligo, kag gamiton ang ginpamunlaw nga tubig sa pagbubo sa basin. Sang 1983, nagsaylo kami ni Heinz sa isa ka balay sa Kampala nga indi masyado delikado.

Nanamian gid kami magbantala sa Kampala. Kaagi gani nga sa isa ka bulan, nakapanagtag kami sing 4,000 ka magasin. Pero ang nanamian gid namon amo nga ang mga tawo didto interesado sa kamatuoran. Ginatahod gid nila ang Dios kag gusto gid nila mag-istorya parte sa Biblia. Sa masami, kada isa sa amon ni Heinz may ara sing 10 asta 15 ka Bible study. Kag madamo man kami sing natun-an sa amon mga Bible study. Halimbawa, positibo lang sila gihapon bisan pa ginalakat lang nila pakadto kag papuli sa miting kada semana. Wala gid sila nagareklamo kag pirme pa sila nagayuhum.

Sang 1985 kag sang 1986, may natabo naman nga duha ka inaway sa Uganda. Pirme kami makakita sang mga bata nga nagadala sang mga armas kag nagabantay sa mga checkpoint. Sadto nga tion sang kinagamo, ginapangamuyo namon kay Jehova nga hatagan niya kami sing kaalam kag buligan niya kami nga mangin kalmado sa amon pagministeryo. Kag ginsabat gid ni Jehova ang amon mga pangamuyo. Kay kon makakita kami sang interesado nga magtuon sa Biblia, nagakadula ang amon kulba.

Nanamian man kami magbantala sa mga dumuluong. Halimbawa, nakilala namon kag nangin Bible study si Murat kag Dilbar Ibatullin, ang mag-asawa nga halin sa Tatarstan (Central Russia). Si Murat isa ka doktor. Nagpabawtismo sila nga duha kag padayon sila nga nagaalagad kay Jehova sing matutom. Sang ulihi, nakilala ko man si Tatjana Vileyska nga halin sa Ukraine. Nagapensar sia sadto nga maghikog. Sang nabawtismuhan na si Tatjana, nagpauli sia sa Ukraine kag sang ulihi nangin translator sia sang aton mga publikasyon.a

BAG-O NGA ASAYNMENT

Sang 1991, sang nagbakasyon kami ni Heinz sa Austria, nakabaton kami sang sulat nga may bag-o kami nga asaynment. Gin-asayn kami sa Bulgaria. Sang natapos ang komunismo sa Eastern Europe, nangin legal na ang mga Saksi ni Jehova sa Bulgaria. Sa nasambit na kaina, patago kami sadto nga nagadala ni Heinz sang mga literatura sa Bulgaria sang ginadumilian pa ang aton hilikuton. Pero subong, gin-asayn kami didto para magbantala.

Gin-instruksionan nila kami nga indi na magpauli sa Uganda. Gani wala na kami nakapanghimos sang amon mga gamit sa missionary home kag wala na kami nakalisensia sa amon mga abyan. Sa baylo, nagkadto kami sa Bethel sa Germany, dayon ginhatagan nila kami sang salakyan, kag nagbiyahe na kami pakadto sa Bulgaria. Gin-asayn kami sa isa ka grupo sa Sofia nga may mga 20 ka manugbantala.

Lain naman nga mga kabudlayan ang amon naeksperiensiahan sa Bulgaria. Una, indi kami kabalo sang ila lenguahe. Isa pa, ang publikasyon lang nga may ara sila amo ang The Truth That Leads to Eternal Life kag ang My Book of Bible Stories. Nabudlayan man kami mangita sing Bible study. Pero bisan pa mabudlay ang kahimtangan, ang amon gamay nga grupo sang makugi nga mga kauturan padayon nga nagauswag. Wala gid nanamian ang Orthodox Church sa amon pagbantala, gani ginhingabot nila kami.

Sang 1994, wala na ginkilala sang gobierno nga legal nga relihion ang mga Saksi ni Jehova. Kag abi sang madamo nga taga-Bulgaria, makahalalit kita nga sekta. Gin-aresto ang pila naton ka kauturan. Ginapalapta man sang media ang kabutigan nga gusto kuno sang mga Saksi ni Jehova nga mapatay ang ila kabataan kay indi sila magpatughong sang dugo. Nagsiling man sila nga ginahambalan kuno naton ang aton mga kauturan nga maghikog. Nabudlayan kami ni Heinz magbantala. Kay kon kaisa, ginasinggitan kami sang mga tawo, ginatawgan nila kami sang pulis, kag ginahaboy pa gani nila kami sang bisan ano. Dugang pa, indi na makapasulod sang literatura sa pungsod, kag nabudlayan na kami mangita sang lugar nga maarkilahan para sa mga miting. Kaagi gani nga ginpauntat sang pulis ang amon kombension. Wala kami naanad ni Heinz nga makaeksperiensia sang grabe nga kaakig. Lain gid ini sangsa mga tawo sa Uganda, nga interesado gid magtuon sang Biblia. Ano ang nakabulig sa amon ni Heinz nga padayon nga mangin malipayon?

Nakabulig sa amon ang pagpakig-upod sa mga kauturan. Ginapabaloran gid nila ang kamatuoran kag ginaapresyar gid nila ang amon bulig sa ila. Ginaulikdan gid namon ang isa kag isa kag nagabuligay gid kami. Natun-an namon sa sina nga asaynment nga kon palanggaon namon ang mga tawo, mangin malipayon gid kami.

Pero pagligad sang pila ka tuig, amat-amat nga nangin maayo ang kahimtangan. Nangin legal liwat ang aton organisasyon sang 1998, kag madamo nga publikasyon ang ginhimo sa Bulgarian nga lenguahe. Dayon sang 2004, gindedikar ang bag-o nga bilding sang branch. Subong, may ara na sing 57 ka kongregasyon sa Bulgaria, nga may 2,953 ka manugbantala. Sang 2024 nga tuig sang pag-alagad, 6,475 ang kabilugan nga nagtambong sa Memoryal. Sang una, lima lang ka sister ang ara sa Sofia, pero subong may siam na ka kongregasyon. Nakita gid namon nga ‘ang diutay nangin isa ka libo.’—Isa. 60:22.

ANG AMON PERSONAL NGA MGA KABUDLAYAN

Madamo man ako sing ginabatyag sa lawas. Gintubuan ako sing mga tumor, lakip na sa akon ulo. Nagpabulong ako paagi sa radiation kag nagkadto kami sa India para magpaopera. Nagdugay sing 12 ka oras ang akon operasyon para kuhaon ang kalabanan ko nga tumor sa ulo. Pagkatapos ako maoperahan, nagtener kami anay sa branch sa India para magpaayoayo. Dayon nagbalik kami sa Bulgaria.

Nagmasakit man si Heinz sing tumalagsahon nga balatian nga ginatawag Huntington’s disease. Bangod sini, nabudlayan na sia maglakat, maghambal, kag magkontrol sang iya hulag. Sang nagalala na ang iya balatian, kinahanglan ko na gid sia atipanon. Kon kaisa, grabe na gid ako kakapoy kag nabalaka ako nga basi indi ko na sia masarangan atipanon. Pero pirme ginahagad si Heinz sang pamatan-on nga si Bobi nga mag-updanay sila sa pagbantala. Wala nahuya si Bobi nga updon si Heinz bisan pa indi na sia maayo kahambal kag indi niya makontrol ang hulag sang iya kamot kag tiil. Masaligan ko gid pirme ang bulig ni Bobi. Bisan pa wala kami nagbata ni Heinz sa sini nga sistema, pamatyag namon ginhatag ni Jehova si Bobi sa amon para may bata kami.​—Mar. 10:29, 30.

May kanser man si Heinz. Kag makapasubo nga napatay ang akon pinalangga nga bana sang 2015. Nagalalain gid ako kag daw indi makapati nga wala na sia. Pero indi ko gid sia malipatan kag nagapabilin sia sa akon tagipusuon. (Luc. 20:38) Madumduman ko man ang iya mga ginsiling kag mga laygay sa akon. Nagapasalamat gid ako nga nakaupod ko sia sa pag-alagad kay Jehova sa sulod sang madamo nga tinuig.

NAGAPASALAMAT GID AKO SA BULIG NI JEHOVA

Ginbuligan gid ako ni Jehova sa tanan ko nga kabudlayan. Ginbuligan man niya ako nga madaug ang kahuya kag mangin misyonero nga nagapalangga sa mga kauturan. (2 Tim. 1:7) Nagapasalamat gid ako kay Jehova kay nagaalagad na kami subong sing bug-os tion sang akon manghod nga babayi. Sia kag ang iya bana nagaalagad subong sa sirkito sa Serbian nga mga kongregasyon sa Europe. Ginsabat gid ni Jehova ang mga pangamuyo sang akon amay sang bata pa kami.

Sa kada tion nga ginatun-an ko ang Biblia, nagatawhay ang akon hunahuna. Sa mabudlay nga mga tion, natun-an ko nga mangamuyo “sing hanuot pa gid” pareho sa ginhimo ni Jesus. (Luc. 22:44) Ang isa ka paagi nga ginsabat ni Jehova ang akon mga pangamuyo amo ang gugma kag kaayo nga ginapakita sang mga kauturan sa amon kongregasyon sa Nadezhda, Sofia. Nalipay gid ako kay pirme nila ako ginaupod kag ginahambalan nga palangga nila ako.

Pirme ko ginapamalandungan ang parte sa pagkabanhaw. Ginaimadyin ko nga ara sa atubang sang amon balay ang akon mga ginikanan kag bataon na sila liwat pareho sang ginkasal sila. Ginaimadyin ko man nga nagapreparar sang pagkaon ang akon utod nga babayi. Kag ginaimadyin ko nga nagatindog si Heinz sa tupad sang iya kabayo. Kon ginapamalandungan ko ini nga mga butang, nagabulig ini sa akon nga indi paghunahunaon ang negatibo nga mga butang kag mangin mapinasalamaton kay Jehova.

Kon ginapamalandungan ko ang mga natabo sa akon kabuhi kag ang palaabuton, masiling ko man ang ginsiling ni David sa Salmo 27:13, 14: “Ano ang matabo sa akon kon wala ako sing pagtuo nga makita ko ang kaayo ni Jehova samtang nagakabuhi ako? Magsalig ka kay Jehova; magpakaisog ka kag magpakabakod. Huo, magsalig ka kay Jehova.”