Mga Pamangkot Gikan sa mga Bumalasa
San-o matapos ang pagbantala sang maayong balita?
Nagsiling si Jesus: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” (Mat. 24:14) Ang Griego nga tinaga nga gin-translate “katapusan” sa sini nga bersikulo kag sa bersikulo 6 kag 13 amo ang teʹlos. Nagapatuhoy ini sa katapusan sang kalibutan ni Satanas sa Armageddon. (Bug. 16:14, 16) Gani, padayon naton nga ibantala ang maayong balita antes sang Armageddon. Bag-o ini nga paathag sa aton paghangop.
Sang una, nagsiling kita nga mauntat na kita sa pagbantala sang maayong balita kon magsugod na ang dakung kapipit-an. Kag magasugod ini kon laglagon na ang Babilonia nga Daku. (Bug. 17:3, 5, 15, 16) Nagapati kita sadto nga kon magsugod na ang dakung kapipit-an, matapos na ang malaragwayon nga “tuig sang maayong kabubut-on ni Jehova.” (Isa. 61:2) Naghunahuna man kita nga ang mga makalampuwas sa dakung kapipit-an amo ang mga matutom nga nagaalagad kay Jehova antes magsugod ang dakung kapipit-an. Ginpaanggid naton sila sa mga Judiyo nga naluwas sang ginlaglag ang Jerusalem sang 607 B.C.E. Ini nga mga Judiyo madugay na nga ginmarkahan sa agtang bangod ginsimba nila si Jehova kag gindumtan nila ang malaut. (Ezeq. 5:11; 9:4) Pero ini nga pagpaanggid wala nahisanto sa ginsiling ni Jesus sa Mateo 24:14. Kay man, ginapakita sang iya ginsiling nga posible may tsansa ang mga tawo nga batunon ang maayong balita antes sang katapusan sa Armageddon.
Bangod may bag-o nga paghangop sa Mateo 24:14, kinahanglan man naton bag-uhon ang aton paghangop parte sa mensahe nga daw dalagku nga mga yelo sa Bugna 16:21. Base sa dugang nga pagtuon, nagabuligay ining duha ka teksto. Ngaa masiling naton ini? Makita naton ang sabat sa reaksion sang mga tawo sa mensahe sang Ginharian. Suno kay apostol Pablo, ang mensahe sang Ginharian isa ka maayong balita ukon ‘kaamyon sang kabuhi’ para sa ‘mga maluwas.’ Pero para sa mga kaaway sang Dios, isa ini ka malain nga balita ukon ‘kaamyon sang kamatayon.’ (2 Cor. 2:15, 16) Ginadumtan gid nila ang mensahe sang Ginharian bangod ginabuyagyag sini nga malaut ang ila kalibutan nga ginagamhan ni Satanas, kag malapit na lang ini laglagon.—Juan 7:7; 1 Juan 2:17; 5:19.
Talupangda man nga ang dalagku nga mga yelo nga ginsambit sa Bugna 16:21 “makahalalit gid.” Ginapakita sini nga sa tion sang dakung kapipit-an, posible nga prangka na ang mensahe nga aton ibantala kag madamo pa gid nga tawo ang mabantalaan. Gani bilang resulta, mas madamo nga tawo ang makakilala sang ngalan ni Jehova. (Ezeq. 39:7) Sa sina nga tion, kon malaglag na ang Babilonia nga Daku, mahimo nga may pila nga manamian sang aton mensahe pareho sang mahamot nga kaamyon. Posible nga madumduman nila ukon marealisar nila sa sina nga tion nga madugay na nga ginabantala sang mga Saksi ni Jehova ang parte sa paglaglag sa Babilonia nga Daku.
Mapaanggid naton ini sa natabo sa Egipto sadto pagkatapos sang Napulo ka Kalalat-an. Pagkatapos ‘mahukman ni Jehova ang tanan nga dios sang Egipto,’ nag-upod sa iya katawhan ang “madamo nga dumuluong” nga indi mga Israelinhon. (Ex. 12:12, 37, 38) Posible nga nagdesisyon sila nga mag-upod sa katawhan ni Jehova sang makita nila nga natuman ang ginsiling ni Moises parte sa Napulo ka Kalalat-an.
Pagkatapos malaglag ang Babilonia nga Daku, may tsansa ang mga magadampig kay Jehova nga suportahan ang mga utod sang Cristo nga ari pa sa duta. (Mat. 25:34-36, 40) Gani, may tsansa sila nga hukman bilang mga karnero. Pero matapos ini nga tsansa antes sang Armageddon. Kay man sina nga tion, mabaton na sang nabilin nga mga hinaplas ang ila padya sa langit.
Ginapakita sining bag-o nga paghangop ang daku nga gugma kag kaluoy ni Jehova. Huo, “indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.”—2 Ped. 3:9.