Duha ka Bag-o nga Miembro sang Nagadumala nga Hubon

SANG Oktubre 5, 2024, may pinasahi nga pahibalo nga ginhimo sa annual meeting: Gintangdo sanday Brother Jody Jedele kag Brother Jacob Rumph bilang mga miembro sang Nagadumala nga Hubon sang mga Saksi ni Jehova. Pareho sila nga madugay na nga nagaalagad sing matutom kay Jehova.

Natawo si Brother Jedele sa Missouri, U.S.A., kag Saksi ang iya mga ginikanan. Nagaistar sila sa lugar nga diutay lang ang mga Saksi. May mga kauturan nga halin sa lainlain nga mga lugar nga nagakadto didto para magbulig sa ila teritoryo. Gani madamo sia sang nakilala nga mga kauturan, kag napalig-on gid sia sa ila gugma kag paghiusa. Nabawtismuhan sia sang Oktubre 15, 1983, sang tin-edyer pa lang sia. Nanamian gid sia magbantala. Gani pagkagradweyt niya sa high school, nagpayunir sia sang Septiembre 1989.

Sang pamatan-on si Brother Jedele, ginadala sia sang iya mga ginikanan sa Bethel upod ang iya utod nga babayi. Napalig-on sila nga duha nga mag-alagad sa Bethel, kag nangin Bethelite gid sila sang ulihi. Nag-abot si Brother Jedele sa Bethel sa Wallkill sang Septiembre 1990. Una sia nga gin-asayn sa Cleaning Department, kag sang ulihi sa Medical Services.

Sadto nga tion, nagadamo ang Spanish nga mga kongregasyon kag kinahanglan gid ang mga brother. Gani nagbulig si Brother Jedele sa isa sini nga mga kongregasyon kag nagtuon sia sing Spanish. Wala madugay pagkatapos sini, nakilala niya si Damaris nga isa ka payunir sa ila sirkito. Sang ulihi, nagpakasal sila, kag upod sila nga nag-alagad sa Bethel.

Sang 2005, naggua sila sa Bethel para atipanon ang ila matutom nga mga ginikanan. Sadto nga tion, nag-alagad sila bilang mga regular payunir. Nagtudlo man si Brother Jedele sa Pioneer Service School, kag nag-alagad sia sa Hospital Liaison Committee kag sa Regional Building Committee.

Sang 2013, ginpatawag liwat sa Bethel sanday Brother kag Sister Jedele para sa konstruksion sa Warwick. Nakaalagad man sila sa Patterson kag sa Wallkill. Naasayn si Brother Jedele sa Local Design/Construction Department kag sa Hospital Information Services. Sang Marso 2023, gintangdo sia bilang kabulig sa Service Committee. Ari ang ginsiling niya parte sa iya mga asaynment: “Kon makabaton ka sang bag-o nga asaynment, makabatyag ka kon kaisa nga indi mo ini masarangan. Sa sina nga mga tion, dapat magsalig ka gid kay Jehova kay buligan gid niya kita nga mahimo ang ginapahimo niya sa aton.”

Natawo si Brother Rumph sa California, U.S.A. Sang bata pa sia, indi aktibo ang iya iloy. Pero gintudluan sia sang iya iloy parte sa kamatuoran. Kag kada tuig, nagabisita sia sa iya lola nga matutom nga Saksi. Ginbuligan sia sang iya lola nga mangin interesado sa kamatuoran. Gani sang 13 anyos sia, nagpa-Bible study sia. Sang Septiembre 27, 1992, nabawtismuhan sia sang tin-edyer pa lang sia. Sang ulihi, nangin aktibo liwat ang iya iloy kag nabawtismuhan ang iya amay kag ang tanan niya nga utod.

Sang pamatan-on si Brother Rumph, nakita niya nga malipayon gid ang mga payunir. Gani pagkagradweyt niya sa high school, nagpayunir sia sang Septiembre 1995. Sang 2000, nagsaylo sia sa Ecuador kay nagakinahanglan didto sang dugang nga manugbantala. Nakilala niya didto si Inga, nga isa ka payunir nga taga-Canada. Sang ulihi, nagpakasal sila. Pagkatapos nila magpakasal, nag-alagad sila sa isa ka banwa sa Ecuador nga may isa ka grupo nga diutay lang ang manugbantala. Subong, madamo na sing manugbantala sa sini nga kongregasyon.

Sang ulihi, nangin espesyal payunir sanday Brother kag Sister Rumph, kag dayon nag-alagad sila sa sirkito. Sang 2011, nag-eskwela sila sa ika-132 nga klase sang Gilead. Pagkagradweyt nila, nag-alagad sila sa lainlain nga pungsod. Madamo man sila sang nangin pribilehiyo, pareho sang Bethelite, misyonero, kag pag-alagad sa sirkito. Nakatudlo man si Brother Rumph sa School for Kingdom Evangelizers.

Bangod sang COVID-19 nga pandemic, nagbalik sanday Brother kag Sister Rumph sa United States. Gin-agda sila nga mag-alagad sa Bethel sa Wallkill, kag ginhanas si Brother Rumph sa Service Department. Sang ulihi, gin-asayn sila liwat sa branch sa Ecuador, kag nangin miembro sang Branch Committee si Brother Rumph. Sang 2023, ginsaylo sila sa Warwick. Sang Enero 2024, gintangdo si Brother Rumph bilang kabulig sa Service Committee. Ari ang ginsiling niya parte sa iya mga asaynment, “Indi ang mga lugar ang nagahimo sa isa ka asaynment nga espesyal, kundi ang mga tawo nga kaupod mo sa pag-alagad.”

Ginapabaloran gid naton ang pagpangabudlay sini nga mga utod, kag ‘padayon naton nga ginapalangga ang subong sina nga mga tawo.’—Fil. 2:29.