Mga Tigulang—Importante Kamo sa Kongregasyon

Kon tigulang ka na, posible nga diutay na lang man ang imo masarangan nga himuon. Kag bisan pa matutom ka nga nagaalagad kay Jehova sa sulod sang madamo na nga tinuig, posible nagaluya ang imo buot kay indi mo na mahimo ang mga ginahimo mo sadto. Kon amo sini ang imo ginabatyag, ano ang makabulig sa imo nga mangin malipayon?

KON ANO ANG GUSTO NI JEHOVA NGA HIMUON MO

Pamangkuta ang imo kaugalingon, ‘Ano ang gusto ni Jehova nga himuon ko?’ Mapalig-on ka gid sa ginasiling sang Marcos 12:30: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.”

Base sa sini nga teksto, gusto ni Jehova nga ihatag mo sa iya ang imo pinakamaayo suno sa imo kahimtangan. Gani indi mo dapat pag-ikumparar ang imo mahimo sa mahimo sang iban, kag indi mo dapat pag-ikumparar ang mahimo mo sadto sa mahimo mo subong.

Binagbinaga ini: Sang pamatan-on ka pa, posible gid nga ginhatag mo kay Jehova ang imo pinakamaayo suno sa imo kahimtangan sadto. Kamusta naman subong? Bisan pa nagbag-o na ang imo kahimtangan, ginahatag mo gihapon kay Jehova ang imo pinakamaayo suno sa imo masarangan nga himuon subong. Kon amo sini ang imo panghunahuna, marealisar mo nga ang imo gihapon pinakamaayo ang ginahatag mo kay Jehova halin sadto asta subong. Ginhatag mo sa iya ang imo pinakamaayo sadto, kag ginahatag mo sa iya ang imo pinakamaayo subong.

DAKU ANG MABULIG MO SA IBAN

Imbes nga hunahunaon ang mga indi mo na masarangan nga himuon, hunahunaa nga madamo ka sing kahigayunan para buligan ang iban. Kay man, subong nga tigulang ka na, may mga puede ka himuon nga indi mo mahimo sang pamatan-on ka pa. Ari ang pila sa mga puede mo himuon:

Isugid sa iban ang imo mga eksperiensia. Binagbinaga ining pila ka ekspresyon nga mabasa sa Biblia:

Nagsiling si Hari David: “Nangin pamatan-on ako kag karon tigulang na, apang wala pa ako makakita sang matarong nga ginpabay-an, ukon sang iya mga anak nga nagapangayukayo sing tinapay.”—Sal. 37:25.

Nagsiling si Josue: “Dali na lang ako mapatay, kag nahibaluan gid ninyo sa bug-os ninyo nga tagipusuon kag sa bug-os ninyo nga kalag nga wala sing bisan isa sa tanan nga ginsaad sa inyo ni Jehova nga inyo Dios ang napaslawan. Natuman ini tanan sa inyo. Wala sing bisan isa sa sini ang napaslawan.”—Jos. 23:14.

Naeksperiensiahan ni David kag ni Josue ang ila ginsiling kay matutom sila nga nag-alagad kay Jehova sa sulod sang madamo nga tinuig. Gani, masaligan gid ang ila ginsiling. Sa imo bahin, posible nga may tion sa imo kabuhi nga nasiling mo man ang ginsiling ni David kag ni Josue kay gusto mo palig-unon ang iban. Pero subong nga tigulang ka na, mas makapalig-on pa gid ang imo ginasiling kay naeksperiensiahan mo ini mismo.

Halimbawa, isugid sa iban kon paano ka ginpakamaayo ni Jehova ukon ang iya katawhan sa pinasahi nga paagi. Sigurado gid nga madamo ka sang napalig-on sang ginhimo mo ini. Gani kon isugid mo sa imo mga kauturan ang imo mga eksperiensia sa pag-alagad kay Jehova, mapabakod mo ang ila pagtuo.—Roma 1:11, 12.

Ang isa pa ka paagi para mapalig-on mo ang iban amo ang pag-attend sa mga miting sa Kingdom Hall kon posible sa imo kahimtangan. Kon himuon mo ini, mapalig-on mo ang imo mga kauturan kag mapalig-on ka man nila. Si Connie, nga ginsambit kaina, nagsiling: “Paagi sa pag-attend sa mga miting, nalikawan ko nga magluya ang akon buot. Kon ara ako sa Kingdom Hall, imposible nga masubuan ako kay ginapabatyag sa akon sang mga kauturan nga palangga nila ako. Ginatinguhaan ko gid nga pasalamatan sila paagi sa paghatag sa ila sing regalo bisan gamay lang ini. Kag ginasigurado ko nga mapalig-on ko man sila sa tion sang miting.”

GINAPABALORAN NI JEHOVA ANG IMO KATUTOM

Madamo kita sing mabasa sa Biblia parte sa mga tawo nga ginpalangga ni Jehova bisan pa nga diutay na lang ang ila mahimo sa pag-alagad sa iya. Binagbinaga si Simeon nga isa ka Israelinhon. Tigulang na sia sang natawo si Jesus. Sa kada tion nga nagakadto si Simeon sa templo, posible makita niya ang lamharon nga mga lalaki nga nagahimo sang importante nga mga hilikuton didto. Posible nahunahuna ni Simeon nga kon ikumparar sa sini nga mga lamharon, diutay na lang ang iya balor kay Jehova. Pero ano ang pagtan-aw ni Jehova sa iya? Para kay Jehova, “matarong kag diosnon” si Simeon. Ginpadunggan ni Jehova si Simeon kay nakita niya ang bata nga si Jesus. Gingamit pa gani niya si Simeon sa pagtagna nga si Jesus ang mangin Mesias sa ulihi. (Luc. 2:25-35) Gani, wala nagpokus si Jehova sa pisikal nga ikasarang ni Simeon. Sa baylo, nakita niya ang mabakod nga pagtuo ni Simeon “kag ang balaan nga espiritu yara sa iya.”

Makasalig ka man nga ginapabaloran ni Jehova ang imo matutom nga pag-alagad sa iya bisan pa nga diutay na lang ang imo mahimo para sa iya. Kon ‘ginahatag sang isa ka tawo ang suno sa yara sa iya, indi ang suno sa wala sa iya, labi ini nga kalahamut-an kay Jehova.’—2 Cor. 8:12.

Gani, magpokus sa imo masarangan nga himuon. Halimbawa, hunahunaa kon ano nga paagi sang pagbantala ang masarangan mo nga himuon bisan pa sa malip-ot lang nga tion. Hunahunaa man kon paano mo mapalig-on ang imo mga kauturan. Basi puede mo sila tawgan ukon padal-an sang card ukon sulat. Bisan pa gamay lang ang imo mahimo para sa imo mga kauturan, daku ang epekto sini sa ila kay isa ka madugay na nga alagad ni Jehova ang nagapalig-on sa ila.

Bisan pa maluya na ang imo panglawas, may mahimo ka gihapon para kay Jehova. Binagbinaga ang eksperiensia sa East Africa sa kahon nga “Naluwas ang Iya Kabuhi.”

Dumduma nga makapalig-on gid sa iban ang imo matutom nga pag-alagad sa sulod sang madamo nga tinuig. Maayo ka gid nga halimbawa sa pagbatas, kag makasalig ka nga ‘ang Dios matarong kag indi niya pagkalimtan ang imo binuhatan kag ang gugma nga ginpakita mo para sa iya ngalan paagi sa pag-alagad kag sa padayon nga pag-alagad sa mga balaan.’—Heb. 6:10.

HIMUA ANG IMO MASARANGAN SA PAGBULIG SA IBAN

Suno sa ginhimo nga mga pagtuon, mas maayo ang panglawas, mas alisto ang panghunahuna, kag mas malawig ang kabuhi sang mga tigulang nga pirme nagabulig sa iban.

Siempre, bisan pa nagahimo kita sang maayo sa iban, indi sini madula ang epekto sang pagtigulang. Ang Ginharian sang Dios lang ang makadula sang aton napanubli nga sala nga amo ang rason sang aton pagtigulang kag kamatayon.—Roma 5:12.

Pero bisan subong pa lang, may mahimo ka para magbakod pa gid ang imo pagsalig sa imo ginalauman kag para mangin maayo ang imo panglawas. Ano ini? Himua ang mga ginasugo ni Jehova, kag nalakip sa sini ang pagbulig sa iban nga makilala sia. Pinalangga nga mga tigulang, ginapabaloran gid ni Jehova ang inyo pag-alagad sa iya kag ginaapresyar gid sang inyo mga kauturan ang inyo katutom.