Sulat Halin sa Nagadumala nga Hubon

Pinalangga nga Masigka-Saksi ni Jehova:

Makakulunyag gid ini nga tion! Kag malipayon gid kami sa pagpanghikot upod sa inyo nga amon pinalangga nga kauturan. ‘Nagahilisugut’ kita sa pinakadaku nga panaksi para sa aton langitnon nga Amay, si Jehova.—Sof. 3:9; Juan 14:12.

Ang aton malipayon nga pag-alagad kay Jehova wala nagapahangop nga wala kita sing mga kabudlayan. Sang nagligad nga tuig sang pag-alagad, ang pila sa inyo nabudlayan bangod sang mga linog, baha, bagyo, kag iban pa nga kinaugali nga kalamidad. (Mat. 24:7) Madamo ang nagaantos sang balatian kag epekto sang katigulangon. Tanan kita nagaatubang sa nagabaskog nga ‘kasakitan.’ (Mat. 24:8) Sa pila ka pungsod, lakip sa Armenia, Eritrea, kag South Korea, madamo sa aton kauturan ang napriso bangod sang ila pagtuo.—Mat. 24:9.

Ano ang nakabulig sa aton nga mahuptan ang positibo nga panimuot bisan pa sa sini nga mga kabudlayan? Ang tuigan nga teksto sang 2010 nagapahanumdom sa aton sang isa ka importante nga butang: ‘Ang gugma nagabatas sang tanan nga butang. Ang gugma wala gid nagauntat.’ (1 Cor. 13:7, 8) Ang aton gugma sa isa kag isa—kag kay Jehova—nagapabakod sa aton nga magbatas.

Madamo sa nagapangangkon nga Cristiano ang natingala sa kasangkaron kag pagkamapinadayunon sang aton pagbantala. Bisan pa indi sila mag-ugyon sa aton mga pagpati kag panudlo, ang pila sa ila nagtuaw, “Ginahimo ninyo ang hilikuton nga dapat namon himuon!” Ngaa nakapadayon ang mga Saksi ni Jehova sa pagbantala kada adlaw? Bangod sa gugma. Kaangay sang aton langitnon nga Amay, indi naton luyag nga malaglag ang bisan sin-o. (2 Ped. 3:9) Ang aton handum nga ang tanan maghinulsol makita sa bag-o nga kataason nga 7,508,050 ka manugbantala sang nagligad nga tuig sang pag-alagad. Ano nga relihion nga may madamo nga ministro ang aktibo nga nagapakigbahin sa sini nga hilikuton bangod sa gugma kag tinagipusuon nga nagabulig sa iban sa espirituwal?

Napalig-on kita nga makita ang padayon nga katumanan sang tagna nga ginrekord ni Isaias: “Mahanabu sa olihing mga adlaw nga ang bukid sang balay sang GINOO tukuron sa putokputokan sang kabukiran, kag pakataason sa ibabaw sang kabakoloran; kag magaduguk sa iya ang tanan nga pungsud.” (Isa. 2:2-4) Lakip sa kadam-an nga nagadugok sa balay ni Jehova amo ang 294,368 nga nabawtismuhan sang nagligad nga tuig sang pag-alagad. Ginaabiabi naton sila sa aton organisasyon. Kabay pa nga ang aton Cristianong gugma magapahulag sa aton nga ipadayon ang pagbulig sa ila para pamatukan ang mga pag-atake sang aton kaaway, si Satanas nga Yawa.—1 Ped. 5:8, 9.

Ang kataason nga 18,706,895 nga nagtambong sa Memoryal sang Martes, Marso 30, 2010, nagapakita nga minilyon pa ang posible nga magbuylog sa aton pagsimba kay Jehova. Malipayon gid kita kay wala pa ginlaglag ni Jehova ining malaut nga kalibutan! Sa wala pa ini, ang aton gugma nagabulig sa aton nga padayon nga magbatas.—2 Tes. 3:5.

Ang “Magpabilin nga Suod kay Jehova!” Distrito nga Kombension, nga ginhiwat sa bug-os nga kalibutan sang 2010, nagpabakod sang aton kaangtanan sa aton langitnon nga Amay, si Jehova. Matuod gid ang ginsiling sang salmista: “Bulahan ang katawohan nga ang ila Dios amo [si Jehova, NW].” (Sal. 144:15) Ano man ang matabo sa palaabuton, nagasalig gid kita nga kadampig naton si Jehova, gani wala gid kita sing dapat kahadlukan. (Sal. 23:4) Sa indi madugay, laglagon ni Jehova ang “mga binuhatan sang Yawa” paagi sa iya Anak. (1 Juan 3:8) Ginapaabot gid naton ina nga tion! Apang sa karon, masako gid kita sa aton mga hilikuton.—1 Cor. 15:58.

Saligi nga ‘wala untat nga ginasambit namon kamo pirme sa amon mga pangamuyo.’ (Roma 1:9) Kabay pa nga “magpabilin kamo sa gugma sang Dios, samtang nagahulat kamo sang kaluoy sang aton Ginuong Jesucristo nga nagadul-ong sa kabuhi nga walay katapusan.”—Jud. 21.

Ginahigugma gid namon kamo tanan!

Ang inyo kauturan,

Nagadumala nga Hubon sang mga Saksi ni Jehova