Talalupangdon nga mga Hitabo sang Nagligad nga Tuig

BISAN pa sang makapaluya nga mga kahimtangan sang kalibutan, nangin mabungahon gihapon ang mga Saksi ni Jehova sa ila sagrado nga pag-alagad. Paagi sa pagpakamaayo sang Dios, ang kamatuoran sang maayong balita “nagapamunga kag nagalambo sa bug-os nga kalibutan.” (Col. 1:5, 6) Napat-od namon nga mapalig-on kag mapabakod ang inyo pagtuo sa report sa sini nga tuig.

BAG-O NGA KAHIMUSAN PARA SA PAG-AUXILIARY PAYUNIR

Madamo gid ang nalipay bangod ang mga auxiliary payunir mahimo makapili sing 30 ukon 50 ka lalab-uton nga oras sa bulan sang Abril. Ginkalitan ini sang madamo nga indi anay makapakigbahin sa sini nga sahi sang pag-alagad. Linibo ka manugbantala ang nag-auxiliary payunir sa una nga higayon, kag madamo man nga payunir anay ang nalipay sa pag-aplay liwat. Dugang pa, madamo nga manugbantala nga indi makapayunir ang nagpakigbahin sing kapin pa sa pagbantala. Ano ang resulta?

Madamo nga sanga ang nagreport nga nalabawan nila ang mga peak sang nagliligad. Sa bug-os nga kalibutan, 2,657,377 ang nag-auxiliary payunir—mas madamo sing lima ka pilo sangsa peak sang nagligad nga tuig. Otsenta porsiento sang pamilya Bethel sa bug-os nga kalibutan—16,292 sang 20,290 ka Bethelite—ang nag-auxiliary payunir. Makalilipay gid mahibaluan nga ang nahimuan sang mga alagad ni Jehova sang Abril amo ang pinakamadamo sa bug-os nga maragtas!

Mga kapin sa isa ka tuig pagkatapos sang makahalalit nga linog nga nagkutol sang mga 300,000 ka kabuhi, ang Haiti nagreport sing bag-o nga peak sang Abril. Sa 17,009 ka manugbantala, 6,185 ang nag-auxiliary payunir. Ang pinasahi nga kampanya sa pagpanagtag sang brosyur nga Kon ang Isa nga Ginahigugma Mo Mapatay, nga bag-o lang ginpagua sa Haitian Creole, naghatag gid sing paumpaw kag paglaum sa nagalalaw nga mga pumuluyo.

Pinasahi man ang hangkat nga naatubang sang mga kauturan sa Nigeria sang Abril. Sa apat ka adlaw nga gintalana para sa eleksion (Sabado ang tatlo sa sini), gindumilian sang gobierno ang bisan sin-o nga maglakatlakat sa dalan halin sa 7:00 s.a. asta 5:00 s.h. luwas lamang kon parte ini sa eleksion. Pero, wala gid nabuhinan ang espiritu sang pagpayunir. “Malipayon namon kamo nga ginasulatan kag ginapasalamatan bangod sa amon makaalayaw nga tinion sa sini nga bulan,” sulat sang isa ka kongregasyon. Sa isa pa ka kongregasyon, 92 sa 127 ka bawtismado nga manugbantala ang nag-auxiliary payunir, lakip ang tanan nga gulang kag ministeryal nga alagad. Sa Bethel, 555 sa 688 ka miembro sang pamilya ang nag-auxiliary payunir.

Gin-atubang Nila ang Hangkat. Si Jeannette, nga nagaistar sa kabukiran sang Burundi, nagahandum gid nga magpayunir. Pero bangod may malala sia nga balatian sa tagipusuon, indi sia makalakat sing malayo ukon makataklad sa matag-as nga mga lugar. Nalipay gid si Jeannette sang nabatian niya nga ginpanubuan ang lalab-uton nga oras sang mga auxiliary payunir sa Abril. Agod mabuligan sia nga matuman ang iya handum, ginhatagan sia sang mga gulang sing teritoryo nga malapit sa iya balay. Dugang pa, ginadala sang mga payunir kag mga manugbantala ang ila mga ginatun-an sa Biblia sa iya balay para didto hiwaton ang pagtuon. Sa katapusan sang bulan, nalipay si Jeannette kay may nasugdan sia nga apat ka pagtuon sa Biblia. “Gusto ko magpayunir liwat,” siling niya, “kag nagasalig ako nga buligan ako ni Jehova.”

Sa isla sang Grenada, ang isa ka pamatan-on nga babayi nga apa nagpayunir bisan pa may kasablagan sia nga nagapabudlay sa iya sa paglakat. “Makahalangkat gid ang paglakat sing tuman kalayo para makasakay sa bus pakadto sa teritoryo,” siling niya. Isa pa, wala sia sing trabaho, gani hanuot sia nga nangayo sing bulig kay Jehova. Nahisuno sa iya pangamuyo, ginsakdag niya ang iya kaugalingon paagi sa pagbaligya sing mga ginansilyo, kag mga kulintas, pulseras, aritos kag iban pa. “Nakapakigbahin ako sing bug-os sa pagbantala,” siling niya sang ulihi, “kag nabatyagan ko ang suporta kag pagpalig-on sang mga kauturan. Nagpahalipay gid ini sa akon!”

Si Toshi, isa ka utod nga babayi sa Japan nga 101 anyos, malangkagon nga nag-auxiliary payunir sang Abril. Bangod indi sia makahalin sa pasilidad nga iya ginaistaran, nagpanaksi sia paagi sa mga sulat kag nagapakig-istorya sa mga kabulig nga nagakadto sa iya kuarto. “Bangod indi ako makabati sing maayo,” siling ni Toshi, “nagahambal ako sing matunog. Gani, mabatian man ini sang iban nga tawo nga ara sa pasilidad.”

Si Felix, nga isa ka paralitiko sa Costa Rica, nagdesisyon nga mag-auxiliary payunir. Pero, paano niya ini himuon? May ginbutang nga lamesa sang literatura sa gua sang ila balay agod makapanaksi sia sa mga nagalabay. Sa katapusan sang bulan, kinapoy gid si Felix, pero narepreskuhan sia sa espirituwal kag nalipay nga makasugod sing apat ka pagtuon sa Biblia.

Madamo man sing pamatan-on nga manugbantala ang nalangkag nga mangin bahin sang pinasahi nga hilikuton sa Abril. Halimbawa, sa Spain, luyag dugangan sang 11 anyos nga si Sandra kag sang iya 7 anyos nga manghod nga si Alejandro ang ila pagbantala nga hilikuton. Bangod napahulag sila sang makugi nga espiritu sang ila kongregasyon kag sang maayo nga halimbawa sang ila mga ginikanan, luyag nila nga mag-auxiliary payunir. Pero paano nila ini mahimo kay indi pa sila bawtismado? Naghimo sila nga duha sang iskedyul nga maghinguyang sang madamo nga oras sa pagbantala pareho sa ila ginikanan kag maghanda para sa ministeryo paagi sa pag-ensayo sang mga presentasyon sa tion sang ila Pangpamilya nga Pagsimba. Nahunahuna sang ila mga ginikanan nga mahimo sila matak-an sa ulihi. Pero wala ini matabo. Sang Abril 30, nalab-ot nila tanan ang tulumuron nga 30 ka oras magluwas lang kay Alejandro, nga nagakinahanglan pa sing tatlo ka oras. Gani naggua sila sang iya amay sa katapusan nga adlaw para malab-ot ang iya tulumuron. Nalipay gid sila bangod may masako kag makaalayaw sila nga tion subong nahiusa nga pamilya!

“Nagapangamuyo ako adlaw-adlaw,” siling ni Jean, “nga makabantala kami sang akon bana nga si Philip sing 30 ka oras.” Pero si Philip, nga nag-alagad subong manugtatap sang distrito tubtob sang nagbalatian sia sang cerebral aneurysm, nagahigda na lang sa ospital sa Spain kag indi makahambal. Makapakigkomunikar lang sia paagi sa iya mga mata, nga ginapisok ini sing makaisa kon huo ang iya sabat kag makaduha kon indi.

“Sang ginsugiran ko sia parte sa pag-auxiliary payunir,” padayon ni Jean, “nagsenyas sia nga luyag niya mag-auxiliary payunir.” Pero paano niya ini mahimo?

Sang nagligad nga mga binulan, ginpanaksihan nanday Jean kag Philip ang mga pasyente, nagaduaw nga mga miembro sang pamilya, kag mga empleyado sang ospital. “Sa Abril, plano namon nga magbantala diri sa amon hulot sa ospital sing mga isa ka oras kada adlaw kon nagamata si Philip para makapakigbahin sia sa pag-istoryahanay paagi sa pagpamisok.”

Apang sang Marso, ginsaylo si Philip sa naseparar nga hulot. Pero, nahuptan gihapon nila ni Jean ang ila iskedyul. Nagapakigsugilanon gihapon sila sa mga empleyado sang ospital sing pila ka minuto sa lainlain nga oras. Ang isa sa mga nars nga nagbaton sang libro nga Ano Gid ang Ginatudlo Sang Biblia? nagtulok sa mata ni Philip kag nagsaad nga magbalik sa madason nga adlaw agod magbasa sang mga teksto. Sang nagbalik ang nars, ginpangabay sia ni Jean nga basahon ang Juan 17:3 kag ipaathag kon ano ang iya nahangpan. Nian masiling si Philip kon husto ukon sala ang nars paagi sa pagpamisok sang iya mga mata. Bisan indi iskedyul sang nars, ginakadtuan niya si Philip agod pasaligon nga ginapangabay niya si Jehova nga buligan sia nga mangin suod sa Iya.

Ginakabig sang mga alagad ni Jehova ining pagpauswag sang hilikuton subong paagi sa pagpakita sang ila gugma sa ila isigkatawo, pagpasalamat sa sakripisyo ni Jesucristo, kag sang ila debosyon sa ila langitnon nga Amay. Malangkagon nila nga ginahulat ang Marso 2012, diin makapanghikot naman sila liwat sing 30 ukon 50 ka oras.

MGA ESKWELAHAN NGA NAGATUDLO SANG MGA DALANON NI JEHOVA

Ginserioso gid sang organisasyon ni Jehova ang tagna sa Isaias 2:3: “Magataklad kita sa bukid sang GINOO, sa balay sang Dios ni Jacob; kag tudloan niya kita sang iya mga dalanon.” Halimbawa, samtang masandukot ang Bug-os Kalibutan nga Inaway II, narealisar sang matutom kag mainandamon nga ulipon nga ang katawhan gikan sa tanan nga pungsod kinahanglan gihapon tudluan ni Jehova antes matapos ang sistema sang mga butang ni Satanas. Gani, nag-organisar sing mga eskwelahan pareho sang Watchtower Bible School of Gilead kag Teokratikong Eskwelahan Para sa Ministeryo. Sining karon lang, ang Nagadumala nga Hubon naghimo sing dugang nga mga pagbag-o sa nanuhaytuhay nga eskwelahan nga nagahatag sing pinasahi nga mga paghanas.

Sang Oktubre 2010, ang Ministerial Training School gintawag na nga Bible School for Single Brothers. Ang di-minyo nga mga gulang kag ministeryal nga alagad magatuon sa sulod sang duha ka bulan sa sini nga eskwelahan. Sa kabilugan, 37,445 na ang nakapanginpulos sa sini nga klase sa bilog nga kalibutan, kag madamo sa ila ang nag-alagad subong payunir, nagalakbay nga manugtatap, misyonero, kag Bethelite.

Ang bag-o nga eskwelahan nga Bible School for Christian Couples nga nagalawig sing duha ka bulan nagsugod sang Hulyo 2011 sa Patterson, New York. Ang mga mag-asawa nga makahambal sing Ingles mahimo makapalista kon nagaedad sila sing 25 tubtob 50 anyos, may maayo nga panglawas, kasal sa di-magkubos duha ka tuig, kag yara sa bug-os tion nga pag-alagad sa nagligad nga di-magkubos duha ka tuig kag kon ang bana nagaalagad subong gulang ukon ministeryal sa sulod sang duha ka sagunson nga tuig. Sugod sa 2012, ang mga klase sa sini nga eskwelahan pagahiwaton sa mga lugar sa diin may ginahiwat nga Bible School for Single Brothers.

Ang Bible School for Christian Couples gindesinyo agod pinasahi nga hanason ang mag-asawa para mas magamit pa sila sing bug-os ni Jehova kag sang iya organisasyon. Ang kalabanan sa mga magradweyt magaalagad subong regular payunir kon diin may mas daku nga panginahanglan sa ila pungsod. Pero, may pila sa ila nga iasayn subong temporaryo nga mga espesyal payunir kag ang iban hanason sa hilikuton sa sirkito. Ang pila mahimo makabaton sing asaynment sa iban nga pungsod kon kalipikado sila kag handa.

Ang mga luyag mag-aplay sa sini nga eskwelahan dapat hamtong sa espirituwal nga may masinakripisyuhon nga espiritu. Ang mga instruktor sa Bible School for Single Brothers amo man ang magatudlo sa sini nga eskwelahan, nga nagasunod sa pareho nga kurikulum. May pila ka yunit nga hiwaton lamang para sa mga bana samtang ang ila asawa magapanghikot sa latagon. Ang dugang nga mga detalye kag kinahanglanon para sa mga interesado mag-aplay iaman sa mga miting nga hiwaton sa distrito nga kombension.

Ang Nagadumala nga Hubon nagbalay sang mga pagbag-o para sa Watchtower Bible School of Gilead. Sugod sa ika-132 nga klase sang Oktubre 24, 2011, ang paghanas ihatag lamang sa mga mag-asawa nga yara na sa pinasahi nga bug-os tion nga pag-alagad, subong sang mga misyonero nga gin-asayn sa latagon nga wala pa nakaeskwela sa Gilead, espesyal payunir, nagalakbay nga manugtatap, kag mga Bethelite. Kon ang mag-asawa maayo maghambal kag magsulat sa Ingles, mahimo sila irekomendar sang Komite sang Sanga.

Ang mga magradweyt sa Gilead hatagan sing mga asaynment nga magapabakod kag magapalig-on sa pag-alagad sa latagon kag sa pag-organisar sang sanga. Ayhan magaalagad sila sa latagon subong mga misyonero, nagalakbay nga manugtatap, ukon mga Bethelite. Ang mga iasayn sa latagon gamiton sa mga lugar nga madamo sing tawo agod makahatag sila sing maayo nga epekto sa pagbantala kag sa mga hilikuton sa kongregasyon. Ang mga Komite sang Sanga mahimo padayon nga makapangabay sing mga naggradweyt sa Gilead kon may partikular nga kinahanglanon sa ila teritoryo. Mahimo man sila makarekomendar sing kalipikado nga mga utod nga yara sa pinasahi nga bug-os tion nga pag-alagad gikan sa teritoryo sang ila sanga para mag-eskwela sa Gilead. Sa pila ka kahimtangan, ang mga Komite sang Sanga mahimo makapangabay nga pabalikon sa ila lugar ang mga naggradweyt.

Ang School for Branch Committee Members and Their Wives pagahiwaton sa Ingles sing duha ka beses kada tuig sa Patterson. Sa pila ka kahimtangan, ang mga miembro sang Komite sang Pungsod pagaagdahon man. Ang mga miembro sang Komite sang Sanga nga nakaeskwela na sang nagligad pagaagdahon nga mag-eskwela sa ikaduha nga higayon upod sa iban nga magatuon sa una nga higayon. Ang ila mga asawa magatambong sa kalabanan nga klase upod sa ila. Pero sa pila ka yunit parte sa mga pamaagi sang pag-organisar, tun-an lamang ini sang mga bana, samtang ang ila mga asawa magapanghikot sa lainlain nga asaynment sa Bethel.

Dugang pa, duha ka klase sang School for Traveling Overseers and Their Wives ang pagahiwaton sa Patterson kada tuig. Ang mga klase nga ginahiwat sa Estados Unidos nagalakip na sang mga utod nga lalaki nga nakaeskwela na anay; ang ila kadamuon katunga sang kabilugan nga klase. Ang ila mga asawa magatambong man sa kalabanan nga sesyon sang klase.

Nalipay gid ang katawhan sang Dios nga kalitan ang ginaaman nga paghanas ni Jehova! Si Jesus mismo nagsiling: “Nasulat na sa mga Manalagna, ‘Kag sila tanan pagatudluan ni Jehova.’” (Juan 6:45; Isa. 54:13) Nagasalig kita nga ining mga pagbag-o magapadasig pa gid sa hilingagawon nga hilikuton sang pagbantala sang maayong balita sa bug-os nga duta antes mag-abot ang katapusan.

ISA KA MABASKOG NGA LINOG SA JAPAN

Ginabalita sa bilog nga kalibutan ang tuhoy sa makahalapay nga mga kalamidad nga nagalakip sang mga linog, tsunami, buhawi, bagyo, baha, sunog, kag paglupok sang bulkan. Bisan pa indi mahimuan sang report ang tanan nga kalamidad sining karon lang, ang kaisog sang mga Saksi ni Jehova sa pag-atubang sini maathag gid nga ginpakita sa Japan.

Sang Biernes, Marso 11, 2011, mga alas 2:46 s.h., isa ka linog nga may kabaskugon nga 9.0 ang nag-igo sa Japan. Ang mga tsunami nga gintuga sini naghapay sang madamo nga banwa kag minuro nga malapit sa baybayon sang Pasipiko. Mga 20,000 ka tawo ang kompirmado nga napatay ukon nadula. Sa apektado nga mga lugar, apat ka Kingdom Hall ang naguba kag apat pa ang indi na magamit. Mga 235 ka balay sang aton mga kauturan ang naanod ukon naguba, kag kapin sa isa ka libo ka balay ang kinahanglan kay-uhon.

Ginguba man sang linog kag tsunami ang isa ka planta sang nuklear nga nagresulta sa paggua sang mga radioactive particle. Ang gobierno nagmando nga magbakwit ang mga pumuluyo sa sina nga lugar. Sa isa lang ka gab-i, wala na sing tawo sa madamo nga lugar. Ang mga kauturan sa duha ka kongregasyon sa sina nga mga lugar napilitan nga magbakwit.

Sa sobra 14,000 ka Saksi ni Jehova sa mga lugar nga nahalitan gid, 12 ang napatay, 5 ang malubha nga nasamaran, kag 2 ang wala pa makit-an. Madamo sa mga nakalampuwas ang nadulaan sang puluy-an, pagkabutang, kag bisan sang ila mga hinigugma.

“Ginpasakay ko ang akon dis-ebol nga iloy sa salakyan kag nagpadulong sa evacuation center,” siling ni Kiyoko nga taga-Ofunato. “Dayon napanimahuan ko ang aso. Naggua ako sa salakyan kag nakita ko ang amon balay nga ginalamon sang daku nga balod. Nagapakadto sa amon ang balod! Ginbuligan ko si Nanay nga makasaka sa mataas nga riles sang tren. Nakita gid namon nga naanod ang amon salakyan.”

Pagkatapos sang linog, luyag kuntani kadtuan sang pamatan-on nga utod nga si Koichi ang balay sang iya mga ginikanan nga lima ka kilometro ang kalayuon gikan sa baybayon sang Ishinomaki. Pero sang malapit na sia, nakita niya nga daw dagat na ang palibot. “Indi na ako makalab-ot didto kon wala sing sakayan.” Tatlo ka semana pagkatapos sang linog, nasapwan niya ang iya amay sa morge, kag pagligad sang tatlo ka semana, ang iya naman nga iloy.

Sang nag-untat na ang linog, ginparking ni Masaaki nga taga-Shichigahama ang iya salakyan sa Kingdom Hall nga isa ka kilometro ang kalayuon halin sa baybayon. Sia nagsiling: “Nakita ko ang isa ka utod nga babayi nga nagbakwit man didto. Abi ko indi na kami malab-ot sang tsunami. Pero sang ulihi, nalikupan na sang maitom nga tubig ang duta. Naglinutaw ang amon mga salakyan. Ginbuksan ko ang bintana, naggua sa salakyan kag nagtindog sa atop sini, pero ang salakyan sang utod nga babayi naanod kag nadula! Nangamuyo ako kay Jehova nga buligan sia.

“Nagaulan sadto sang niebe kag basa pa ako kag ginakurog. Sang nag-untat na ang pag-ulan sang niebe, matugnaw gihapon ang hangin. Wala madugay nagtunod ang adlaw kag amat-amat nga nagdulom. Ang mga bituon masanag kag matahom. Nagtindog ako sa atop sang akon salakyan nga daw isa ka isla sa tunga sang matugnaw nga kadagatan. May iban man nga ara sa tinumpok nga mga pagkabutang ukon sa atop sang mga bilding. Napensar ko kon maagahan pa ayhan ako. Para lingawon ang akon kaugalingon, ginhunahuna ko ang pamulongpulong nga gindeliber ko sang nagligad nga duha ka semana. Nagakaigo gid ang tema sini: ‘Sa Diin Ka Makapangayo sing Bulig sa Tion sang Kasisit-an?’ Pagkatapos, gin-amba ko ang isa ka ambahanon nga nasaulo ko: ‘Akon Amay, Akon Dios kag Abyan.’ Ginsulitsulit ko ini. Samtang nagakanta ako, ginapanumdom ko ang akon pag-alagad kay Jehova kag nagtululagay ang akon luha.

“Dayon may nagsinggit sa akon halin sa balay sa tabok sang dalan, ‘OK ka lang da? Hulat lang kay buligan ta ka!’” Ina nga tawo may ginhimo nga balsa nga human sa mga kahoy nga naglinutaw. Ginabuligan niya ang mga tawo sa sina nga lugar. Sa iya bulig, nakasulod si Masaaki sa isa ka balay nga nagaagi sa bintana sang ikaduha nga panalgan. Nahaw-asan sia sang mahibal-an niya sang ulihi nga ang utod nga babayi sa salakyan nga naanod naluwas man.

Nalangkag ang madamo sa kasal nanday Kohei kag Yuko, nga hiwaton sa Kingdom Hall sa Rikuzentakata sa Sabado, Marso 12. Pagkatapos marehistro ang ila kasal sa munisipyo sang Biernes, natabo ang linog. Nabatian ni Kohei ang paandam sang siudad parte sa tsunami amo nga nagdalidali sia saka sa mataas nga lugar. “Nakita ko nga nalikupan sang alipuop ang bilog nga siudad,” hinumdom niya. “Wala sang nabilin luwas sa pila ka dalagku nga bilding. Sa sina nga tion ginapamensar ko pa ang amon mga preparasyon, pero narealisar ko sang ulihi nga may mas importante pa gali nga atipanon.”

Ginhinguyang nanday Kohei kag Yuko ang Sabado sa pagbulig sa mga kauturan sa kongregasyon. “Nakabaton kami sing mga suplay halin sa kaingod nga mga kongregasyon,” siling niya. Nalipay ako nga mabatian nga nasadyahan gid ang akon asawa nga ginhinguyang namon ang amon tion kag kusog para sa mga kauturan. Ginapasalamatan ko si Jehova bangod sa sining maayo gid nga asawa. Gin-anod sang tsunami ang amon salakyan, bag-o nga balay, kag tanan namon nga pagkabutang. Pero nagapasalamat gid ako sa gugma nga ginpakita sang mga utod sa amon.”

Pagbulig sa Pisikal, Espirituwal, kag Emosyonal. Ang sanga sang Japan nag-organisar gilayon sing tatlo ka Disaster Relief Committee kag pila ka beses nga nagpadala sang mga representante sang sanga sa apektado nga mga lugar. Sang nag-abot sa Japan sang Mayo ang mga manugtatap sang sona nga sanday Geoffrey Jackson kag Izak Marais gikan sa ulong talatapan, ginduaw man nila ang mga kauturan sa isa sang mga naapektuhan gid nga lugar. Isa ka pinasahi nga miting ang ginhiwat para sa apektado nga mga kongregasyon paagi sa telephone hookup, agod mapasalig ang mga 2,800 ka kauturan kag 21 ka kongregasyon sang gugma kag kabalaka sang mga kauturan sa bilog nga kalibutan.

Ang mga Disaster Relief Committee kag iban pa nga boluntaryo masako nga nag-aman sang mga kinahanglanon nga bulig. Panguna sa sini amo ang pagkaon, tubig, kag gatong. Nagpadala man ang mga relief committee sang mga bayo nga lainlain ang kadakuon sa apektado nga mga kongregasyon. May ginplastar nga mga bulutangan sang bayo kag mga espiho sa mga tilipunan agod didto makapili ang mga utod.

Nagapasalamat gid ang mga kauturan bangod nabatyagan nila nga gin-atipan sila ni Jehova sa pisikal kag emosyonal. Napalig-on gid sila sa Cristianong mga miting. “Nakatigayon ako sang kalinong sa hunahuna sa mga miting,” sulat sang isa ka utod nga babayi sa nahalitan nga lugar. “Amo ini ang nagapabakod sa akon.”

Mensahe sang Paglaum. Ang mga kauturan sa Japan nagpaambit dayon sing lugpay halin sa Pulong sang Dios sa ila nalisdan nga mga kaingod. Ang isa ka grupo sang manugbantala sa siudad nga indi apektado sang kalamidad nagdesisyon nga magpanaksi sa kalye dala ang daku nga karatula, “Ngaa Natabo Ini nga Trahedya? Ang sabat masapwan sa Biblia.” Madamo ang nagpakita sing interes, gani sa isa lang ka adlaw kag tunga nakapahamtang sila sing 177 ka Ginatudlo Sang Biblia nga libro.

Sa mga lugar nga nahalitan, ginalugpayan anay sang mga Saksi ang mga ginatun-an sa Biblia kag mga ginaduaw liwat antes ang ila mga kaingod. “Sang ginbasa ko ang Mateo 6:34 sa tagbalay,” siling ni Akiko, “naghibi sia. Madamo gid sia sing ginakabalak-an. Sang ginpaathag ko kon paano kita mabuligan sang Biblia nga mahuptan ang kalinong sa hunahuna, nag-ugyon sia kag ginpasalamatan ako. Nagbakod pa gid ang akon apresasyon sa gahom sang Kasulatan sa pagpahulag sa tagipusuon sang mga tawo.”

“Kadamo sang relihion,” siling sang isa ka tawo, “pero kamo lang gid ang nagakadto sa amon bisan pa sa sining mabudlay nga tion.” Matinahuron nga nagsiling ang isa pa, “Makadalayaw gid nga padayon kamo gihapon sa inyo hilikuton bisan pa sa sini nga hitabo.” Isa ka gulang ang nagkomento: “Madamo ang nagbaton sa amon. Nagsiling sila, ‘Kamo ang una nga nagduaw sa amon pagkatapos sang kalamidad. Palihug balik kamo liwat.’”

ANG NEW WORLD TRANSLATION SA 106 KA LENGUAHE!

Indi gid malipatan sa Latvia kag Lithuania ang adlaw nga Biernes, Hulyo 15, 2011, kag isa ini ka importante nga hitabo sa maragtas sang katawhan sang Dios didto. Sa isa ka pamulongpulong nga mabatian sa duha ka pungsod, ginpagua ni Stephen Lett sang Nagadumala nga Hubon ang Bag-ong Kalibutan nga Badbad Sang Cristianong Griegong Kasulatan sa Latvian kag Lithuanian. Amo na ini ang ika-99 kag ika-100 nga badbad. Sa nagligad nga pito ka tuig, ginhatagan gid sang prioridad sang Nagadumala nga Hubon ang pagbadbad sang Biblia. Bangod sini, duha ka pilo na karon ang kadamuon sang lenguahe sang nabadbad nga New World Translation kon ipaanggid sang 2004. Ang mga manugbadbad sa bug-os nga kalibutan padayon nga nagapangabudlay sa pagbadbad sang Biblia sa mas madamo nga lenguahe.

Nalipay gid sa pagbaton sang Biblia ang mga kauturan sa ila mismo lenguahe. “Importante ang pagtigayon sang Biblia,” siling sang isa ka utod nga lalaki sa Central African Republic, “pero ang pinakaimportante amo nga matun-an mo ini sa imo kaugalingon nga lenguahe. Ang New World Translation sa Sango mahapos lang intiendihon. Kon ginabasa ko ang Ebanghelyo, mahanduraw ko na ang mga karakter kag mahangpan ang ila ginabatyag.” Ginpabutyag sang isa ka pamatan-on nga utod nga babayi nga taga-Etiopia ang ginabatyag sang madamo sang nagsiling sia: “Indi matumbasan sang tinaga nga ‘salamat’ ang akon ginabatyag. Pirme ko ginapangamuyo kay Jehova nga hatagan kami sang New World Translation sa amon lenguahe. Subong, ginhatag niya ini sa akon!”

TALALUPANGDON NGA MGA BALITA SA BUG-OS NGA KALIBUTAN

Napahipos ang Nagapangdaug-daug sa Rusya. Si Vera, isa ka tigulang nga utod nga babayi, madugay na nga nagaproblema sa isa niya ka kaingod nga wala nanamian sa mga Saksi ni Jehova. Ginapahog kag ginabuyayaw sia sini sa atubangan sang iya mga apo nga pirme nagaduaw sa iya. Bangod pirme niya ginahunahuna ang pinamulong sa Roma 12:18, kalmado sia kag wala nagabais sa iya. Sang Enero 2011, nangin agresibo pa gid ini. Bangod sa kahadlok, gintawgan ni Vera ang pulis sa ila lugar, nga nagduaw man anay sa iya balay sang Marso 2010 upod sa opisyal sang banwa. Gin-usisa nila kon bala sia kag ang iban nga Saksi nga nagatipon sa iya balay mga rebelde. Pero sini nga tion, nakita sang pulis kon diin gid naghalin ang problema. Gin-akigan niya ang kaingod sini kag ginpamulta sing 3,000 ka ruble (mga $100 U.S.) bangod sa pagpamahog. Pagkatapos sini, wala na sia sing problema sa iya kaingod. Agod ipakita ang iya pagpasalamat, ginsulatan ni Vera ang departamento sang pulis. Nakibot gid sia kay ginsulatan man sia sang hepe sang pulis. Ginpasalamatan niya si Vera bangod ginpakig-angutan sini sing maayo ang pulis nga nagbulig sa iya. Nagsulat man sia: “Ang imo maayo nga mga pulong nagpabag-o sang pagtamod sang kalabanan nga tawo karon sa mga pulis, ginapakita sini nga nagasalig ka sa amon.” Nagsiling si Vera nga regular sia nga ginakadtuan sang pulis agod pat-uron nga maayo ang iya kahimtangan.

Ang “Basurero” sa Turkey. Duha ka tawo nga nagtuon sa Biblia sining karon lang ang nagtambong sa distrito nga kombension. Nagsulat sila: “Daw indi ini mapatihan. Nagahuyom ang tanan, mainabyanon, kag matinahuron. Sang udto, naglibotlibot kami kag wala namon nabatyagan nga lain kami sa ila. Dayon ginpalapitan kami sang utod nga lalaki nga nagatuon sa amon. May dala sia nga plastik para sa basura. Ginlikawan namon sia kay abi namon basurero sia, kag indi namon luyag nga makilal-an nga abyan sang isa lang ka basurero. Nagliko kami kag nagsal-ot sa kadam-an. Sa pensar namon, ‘Ngaa sa isa ka basurero pa ta ya nagpatudlo man? Tani didto sa nagapamulongpulong sa plataporma!’

“Pero samtang nagapadayon ang amon pagtuon, nahibaluan namon nga ining ‘basurero’ nga nagatudlo sa amon sa Biblia isa gali ka miembro sang Komite sang Sanga kag nagaalagad sa sanga talatapan sang mga Saksi ni Jehova. Padayon kami nga nag-uswag kag gindedikar namon ang amon kabuhi kay Jehova. Nahangpan man namon nga ang aton utod nagagawi sing ‘kubos.’ (Luc. 9:48) Ginaapresyar gid namon ang isa ka hamili nga leksion nga amon natun-an sa una nga daku nga pagtilipon nga amon natambungan!”

Kabutigan sa Armenia. Ang isa ka kampanya sa pagpakalain sa mga Saksi ni Jehova nagsugod sa media sang ang isa ka pamatan-on nga lalaki nga nagpatay sang iya mga ginikanan sa siudad sang Sevan nangangkon nga isa ka Saksi ni Jehova. Ang isa ka panaysayon nga nagasiling nga indi ini matuod ginpanagtag gilayon sa media. Pero nagpadayon gihapon ini nga pagpakalain, kag isa ka pinasahi nga report nga ginpagua sa telebisyon ang nagainsister nga isa gid kuno ka Saksi ni Jehova ang pamatan-on. Malaw-ay kag makahuluya nga mga pulong ang ginagamit kon nagahambal parte sa mga Saksi ni Jehova, kag ang isa ka kapsion sa tion sang programa nagasiling “Mapintas kag Wala sing Kaluoy nga mga Manugpatay ni Jehova.” Ginpalig-on pa sini ang mga tumalan-aw nga sakiton ang mga Saksi kon magduaw sila. Gani, gindumtan pa gid ang mga Saksi ni Jehova sa sina pungsod. May kaso nga ginpasaka sa sini nga estasyon sang telebisyon, kag ginpabawi sa ila ang sala nga impormasyon, mangayo sang pasaylo, kag magbayad sang multa tungod sa pagpakahuya sang aton maayo nga ngalan kag reputasyon. Sang gin-imprinta ang 2012 Tuigan nga Libro, wala pa sing ginbawi ang amo nga estasyon, pero may negosasyon na nga ginahimo para mahusay ini sing matawhay.

Ang Palaabuton nga mga Enhinyero sang Venezuela. Sa banwa sang San José de Guaribea, may grupo sang kindergarten nga nagaagi sa duog nga ginatukuran sang Kingdom Hall kon magkadto sila sa ila eskwelahan kada aga. Pirme sila nagadulog kag nagatan-aw sing makadali, nga nagadayaw sa mga ginahimo didto. Isa ka adlaw sa ila klase, namangkot ang ila manunudlo kon ano ang gusto nila kon magdaku sila. Nakibot gid sia kay indi lamang isa kundi madamo sa ila ang nagsabat nga gusto nila nga mangin “enhinyero pareho sa mga Saksi ni Jehova”! Bangod sini, sia kag ang isa pa ka maestra nagdesisyon nga dal-on ang bilog nga klase sa duog nga ginatukuran. Pag-abot nila, ginlibot sila sang isa ka crew sa site. Nalipay gid ang mga bata, ilabi na kay ginpasuksok sila sang maduagon nga mga hard hat. Madamo sang pamangkot ang mga manunudlo, kag isa ka maayo nga panaksi ang nahatag.

Nagdamo ang Ginaimprinta nga Magasin sa Canada. Agod magamit sing maayo ang nadedikar nga mga pundo, ginpangabay sang Nagadumala nga Hubon ang sanga sang Canada nga magsuplay sang Lalantawan kag Magmata! sa tanan nga kongregasyon sa Bermuda, Guyana, Canada, Estados Unidos, kag sa kalabanan nga isla sang Caribbean. Gani sugod sang 2011 nga tuig sang pag-alagad, nagdamo sing dose ka pilo ang ginaimprinta nga magasin sang sanga sang Canada. Ang Canada nagaimprinta na karon sing mga magasin sa 30 ka lenguahe, nga nagadamo sing halos 25 porsiento sang tanan nga magasin nga ginaimprinta sa bilog nga kalibutan.

Open House sa Finland. Sa pahanugot sang Nagadumala nga Hubon, isa ka pinasahi nga kampanya ang gin-organisar nga nasentro sa mga Saksi ni Jehova kag sa mensahe nga ila ginabantala sa Finland sa sulod sang isa ka siglo. Ang mga kauturan makugi nga nagpanagtag sang Agosto 2010 nga Magmata! nga natig-uluhan “Mga Saksi ni Jehova—Sin-o Sila?” Nagresulta ini sa maayo nga paghambalanay tuhoy sa aton hilikuton. Dayon sa katapusan sang Agosto, ang mga utod nga lalaki nag-organisar sang isa ka open house sa sanga talatapan. Ang bug-os nga pamilya Bethel nagpakigbahin sa pagpaathag sang hilikuton nga ginahimo didto. Nagtukod sing mga eksibit agod ipahibalo sa mga bisita ang parte sa aton hilikuton. Ang pila sa mga Bethelite nagsuksok man sang dumaan nga mga bayo kag ginpakita nila kon paano ginagamit ang mga plakard sadto agod ipahibalo ang pamulongpulong publiko sang katuigan 1940 kag 1950. Ang pila ka departamento naghanda sang magagmay nga mga souvenir para sa mga bisita. Mga 1,500 ang nagkadto. Ang mga pamantalaan, radyo, kag TV may paborable nga report parte sa aton mga hilikuton.

Kinagamo sa Côte d’Ivoire. Ang 2011 nga tuig sang pag-alagad ginsugdan sing positibo upod ang pagpaabot sang padayon nga pag-uswag. Ang pamatuod sini amo ang 23,019 ka pagtuon sa Biblia nga ginadumalahan sang 8,656 ka manugbantala. Pero sang hingapusan sang Nobiembre 2010, nag-utwas ang kinagamo sa pungsod bangod sa eleksion. Nakalab-ot ini sa kapital sang komersio sang Abidjan sang Marso kag naglawig asta sang Abril 2011. Bangod sini, naghalalin ang mga sibilyan indi lamang sa siudad kundi bisan sa pungsod pa gani. Upod sa ila ang madamo naton nga kauturan, nga nagpinalagyo kag nagbiya sang ila balay kag mga pagkabutang.

Sa sining mabudlay nga mga tinion, ang neutral nga panindugan sang aton mga kauturan nangin pangamlig sa ila. Sa isa ka hitabo, ginsulod sang mga soldado ang isa ka eskwelahan sa elementarya sa diin may ginahiwat nga seminar ang mga manunudlo kag mga manuglaygay. Ginmanduan ang tanan nga maghapa kag ihatag ang ila mga pagkabutang. Sang ginhatag sang isa ka utod ang iya bag nga puno sang aton mga publikasyon, nakilal-an sia gilayon nga isa ka Saksi ni Jehova. Ginbalik nila ang bag pati ang iya kuarta kag cell phone nga nagasiling: “Indi ka makatalagam sa amon.”

ANG MGA DEDIKASYON SANG SANGA NAGAHIMAYA SA DIOS

Sang Disiembre 18, 2006, nagsugod ang pagpanukod sa sanga sang Chile agod pasangkaron ini nga nagalakip sang duha sing panalgan nga opisina, tatlo ka panalgan nga puluy-an, kag pagpasangkad sang warehouse. Sang Oktubre 16, 2010, ang nagtambong sa dedikasyon may kadamuon nga 5,501. Si David Splane sang Nagadumala nga Hubon amo ang naghatag sing diskurso sa Spanish.

Sang Pebrero 19, 2011, naglab-ot sa 210 ang nagtambong sa dedikasyon sang ginpasangkad nga talatapan sang pungsod sa Burkina Faso. Si John Kikot nga halin sa ulong talatapan amo ang naghatag sang diskurso. Ang pagbantala nga hilikuton diri ginatatap sang sanga sang Côte d’Ivoire tubtob sang Mayo 2011 sang ang Burkina Faso gintatap sang sanga sang Benin. Ang maayo nga paggawi sa duog sang konstruksion nakahatag sing himaya sa ngalan ni Jehova. “Wala sing nagasininggitanay,” siling sang empleyado sang isa ka daku nga kompanya nga nagsuplay sang materyales. “Wala pa gid kami anay nakaobra upod sa mga tawo nga mahidaiton kag malipayon kaangay nila.”

Daku gid ang kalipay sang gindedikar ang bag-o nga pasilidad sang sanga sang Hong Kong sang Agosto 27, 2011. Ang bag-o nga mga opisina nahamtang sa ika-19 nga panalgan sang 37 ka panalgan nga bilding nga nagaatubang sa Victoria Harbor. (Tan-awa ang arrow sa ubos.) Si Stephen Lett sang Nagadumala nga Hubon amo ang naghatag sang pamulongpulong sa 290 ka tumalambong nga nagapungko sa dining hall, mga opisina, kag shipping area. Ang bag-o nga mga opisina pagagamiton sa mga departamento sang Translation, Service, Audio/Video, Purchasing, Shipping, kag Accounting.

LEGAL NGA PAGPAKIGBATO

Ang matutom nga manalagna nga si Jeremias may maayo gid nga rason sa pagsalig nga indi sia pagpabay-an sang Labing Gamhanan nga Dios. “Magapakig-away sila sa imo, apang indi sila makalandas sa imo, kay ako nagaupud sa imo sa pagluwas sa imo kag sa pagbawi sa imo.” (Jer. 15:20) Subong ginapakita sang masunod nga mga report, naeksperiensiahan man sang mga alagad ni Jehova karon ang iya bulig kag suporta samtang ginatuman nila ang ila hilikuton sa pagbantala bisan pa may mga pagpamatok.—Mat. 24:9; 28:19, 20.

Armenia Si Vahan Bayatyan isa sa mga Saksi ni Jehova nga ginsentensiahan sing duha ka tuig kag tunga nga pagkapriso kay nangindi sia sa pagsoldado bangod sa iya konsiensia. Sang napierde sia sa kaso kag sa pag-apelar sa mga korte sang Armenia, ginpasaka ang iya kaso sa European Court of Human Rights (ECHR). Sang Oktubre 27, 2009, pito ka hukom sang ECHR ang nagdesisyon sing pabor sa Armenia. Apang ang isa ka hukom, nga indi mag-ugyon sa desisyon, nagsiling nga ang desisyon sang Korte “wala nagasunod sa bag-o nga mga talaksan sang Europa may kaangtanan sa pagpangindi bangod sa konsiensia.” Bangod sini, nagpasugot ang ECHR nga ipasaka ang kaso sa Grand Chamber, nga ginahuman sang 17 ka hukom.

Sang Hulyo 7, 2011, ang 16 ka hukom sang Grand Chamber nagdesisyon nga ginlapas sang Armenia ang kinamatarong ni Utod Bayatyan sa kahilwayan sang pagsunod sa konsiensia. Ang Korte nagsiling nga “indi gid maduhaduhaan nga ang kabangdanan sang pagpangindi sang aplikante sa pagsoldado amo ang iya relihioso nga pagpati, nga ginasunod gid niya kag supak gid sa iya obligasyon nga magsoldado.” Kabay nga ining talalupangdon nga desisyon mangin basihan para paguaon ang 69 ka utod nga ginpriso sa Armenia, subong man ang iban nga utod nga nagaatubang sing amo man sini nga kaso sa Azerbaijan kag Turkey.a

Bulgaria Sang Abril 17, 2011, kapin sa 100 ka tawo, nga nagalakip sa mga babayi, kabataan, kag tigulang, ang malinong nga nagasaulog sang Memoryal sang kamatayon ni Cristo sa Kingdom Hall sang Burgas. Sa gua, may akig nga guban sang kapin sa 60 ka tawo ang nagtipon kag nagpanghaboy sang dalagku nga mga bato sa mga Saksi nga nagatindog sa puertahan. Dayon gintinguhaan nila nga sudlon ang Kingdom Hall, pero ginpunggan sila sang mga utod nga lalaki. Gintawgan gilayon ang mga pulis pero mahinay ang ila pagresponde. Pila ka Saksi ang nasamaran sa pag-atake, kag lima ang ginsakay sa ambulansia padulong sa ospital. Walay sapayan sini, ginpadayon sang kongregasyon ang ila pagsaulog sang Memoryal. Kinaandan na nga ginatahod ang mga Saksi ni Jehova sa Bulgaria, gani ini nga pag-atake may positibo gid nga resulta. Ginpangabay sang Nagadumala nga Hubon ang 13 ka sanga nga ipatalupangod ini nga pag-atake sa Bulgarian Embassy sa ila pungsod. Sugod sadto ginpakamalaut na sang gobierno sang Bulgaria ini nga pag-atake, kag ginpasakaan sang kaso sang lokal nga mga abogado ang walo sa mga nag-atake.

South Korea Kapin sa 800 ka Saksi ni Jehova ang yara gihapon sa prisuhan sa South Korea bangod sa ila pagpangindi sa pagsoldado base sa ila relihioso nga pagpati. Sugod sang 1950, kapin sa 16,000 na ka Saksi ni Jehova ang ginpamatbatan sing kapin sa 31,000 ka tuig nga pagkapriso bangod sa pagpangindi nga magsoldado. Ngaa amo sini ang panindugan sang madamo nga pamatan-on?

Ang tagsa ka pamatan-on nga nangindi sa pagsoldado nagadesisyon base sa ila konsiensia. Halimbawa, si Kim Ji-Gwan nagpaathag sa tion sang iya bista: “Napahulag gid ako sang mga panudlo sang Biblia pareho sang ‘ang pungsod indi magtuon sing inaway’ kag ‘higugmaa ang imo isigkatawo subong sang imo kaugalingon.’ Natun-an ko man nga ang gugma nga may prinsipio makapahulag sa aton nga higugmaon ang aton mga kaaway. Base sa sini kag sa iban pa nga kasulatan kag bangod sa akon malig-on nga pamat-od, nagdesisyon ako nga mangindi sa pagsoldado.”—Isa. 2:4; Mat. 5:43, 44; 22:36-39.

Sa karon, ang mga pamatan-on sa South Korea wala ginahatagan sing pililian para sa tal-us nga mga hilikuton. Agod solbaron ini nga isyu, napulo ka kaso ang gin-apelar sa Constitutional Court sang Korea. Sang Nobiembre 11, 2010, ginkasaba sa korte ang mga argumento, lakip ang pagbinagbinag kon bala nalapas sang Korea ang kinamatarong sang pumuluyo sa indi paghatag sini sing tal-us nga hilikuton para sa mga nagapangindi bangod sa ila konsiensia.

Pero sang Marso 24, 2011, ang United Nations Human Rights Committee (UNHRC) nagpagua sing desisyon nga nalapas sang South Korea ang pagsulundan nga ginakilala sa bug-os nga kalibutan parte sa mga kinamatarong sang tawo sang ginpriso sini ang 100 ka Saksi ni Jehova nga nangindi bangod sa ila konsiensia. (Ining 100 ka kauturan nag-apelar sa UNHRC.) Isa pa, ang desisyon sang Grand Chamber sang ECHR nga pabor kay Utod Bayatyan (tan-awa ang report sa Armenia sa pahina 34-35) ginpadala sa Constitutional Court sang Korea para analisahon may kaangtanan sa napulo ka kaso nga ginabinagbinag nila. Apang bisan pa sa sini, sang Agosto 30, 2011, ginpatuman gihapon sang Constitutional Court ang Military Service Law kag padayon nga ginpriso ang mga nagapangindi bangod sa ila konsiensia. Nagapakita lamang nga wala nila ginsunod ang desisyon sang UNHRC. Pero duha sa siam ka hukom ang wala magpasugot sa sini nga desisyon kag nangabay nga maghimo sing kahimusan para sa tal-us nga hilikuton sa pagsoldado, kay nakita nila nga nagasumpakilay ang Military Service Law kag ang pagkilala sang kasuguan parte sa kahilwayan sa pagsunod sang konsiensia.

Turkey Sang Hulyo 31, 2007, nagkalipay ang aton mga kauturan sa sini nga pungsod bangod legal na kita nga ginkilala subong isa ka relihion. Bisan pa may mga hangkat gihapon parte sa neutralidad kag paggamit sang aton mga Kingdom Hall, ang iban nga aspekto sang aton hilikuton diri padayon nga nagauswag. Sang Abril 26, 2011, ang Ministry of National Education para sa Turkish Republic nagpadala sing direktiba nga nagasiling nga ‘ang mga Saksi ni Jehova mahimo nga indi na magsulod sa mga klase parte sa relihion.’ Nagsiling ang Ministry nga “bisan pa ang mga Saksi ni Jehova wala nagabaton sang kinaandan nga mga pagpati sang Cristianismo—ang mga Saksi ni Jehova isa ka Cristiano nga relihion.” Nalipay gid sa sini nga desisyon ang aton pamatan-on nga mga kauturan nga tinuig na nga wala makapasar bangod sa indi pag-entra sa mga aktibidades parte sa relihion.

Estados Unidos Sang Mayo 2011, ang Kansas Court of Appeals nagpagua sing paborable nga desisyon sa kaso nga Mary D. Stinemetz v. Kansas Health Policy Authority. Nagsiling ang korte nga nalapas ang mga kinamatarong ni Utod Stinemetz pasad sa kasuguan sang pederal kag estado bangod wala sia ginpahanugutan nga magpaopera sa gua sang estado. Bangod indi matigayon sa Kansas ang sahi sang pag-opera nga wala nagagamit sing dugo para sa aton utod, nagmando ang korte nga tugutan sia sang estado nga magpaopera sa gua. Ini nga kadalag-an indi lamang para kay Utod Stinemetz kundi para man sa iban nga manugbantala sa Estados Unidos nga nagabaton sing pag-atipan sa ikaayong lawas nga ginasakdag sang gobierno.

Sang Agosto 10, 2011, ang Korte Suprema sang Kansas nagpagua sing desisyon nga si Monica McGlory, isa sa mga Saksi ni Jehova, ang may kinamatarong sa pagpadaku sang iya bata. Ang amay sang bata nagsiling nga wala sing kinamatarong si Utod McGlory sa pagpadaku sa bata bangod (1) indi sia magpasugot sa pagpatughong sing dugo, (2) ginaupod niya ang bata sa ministeryo, kag (3) ginapahilayo niya kuno ini sa iya amay kag sa komunidad paagi sa pagtudlo sa iya parte sa Armagedon.

Ginpadaku sang Korte Suprema sang Kansas ang mga prinsipio sang konstitusyon nga ginpagua na sang 1957, sang nagsiling ini: “Ang kahilwayan sa relihion, nga ginagarantiya sang aton konstitusyon, dapat gid ipatuman, kag ang relihioso nga mga pagtudlo sa bata indi dapat pagkabigon nga basihan kon sin-o ang may kinamatarong nga magpadaku sa iya.” Parte naman sa pagpatughong sing dugo, ang korte nagsiling: “Indi kami makadesisyon sa mga kaso [sang pagpadaku sa bata] base lang sa posible nga mga aksidente ukon balatian sa ulihi nga magakinahanglan sang [pagpatughong sing dugo.]”

Pransia Daku gid ang kalipay sang Hunyo 30, 2011, sang nagpagua sing desisyon ang ECHR pabor sa Asosasyon sang mga Saksi ni Jehova sa Pransia. Kadalag-an ini sa 16 ka tuig nga legal nga pagpakigbato parte sa tuman kataas kag kontrobersial nga 60 porsiento nga buhis sa mga donasyon nga ginabaton sang sanga. Ang mga Saksi ni Jehova lamang sa dalagku nga mga relihion ang ginabuhisan sing amo sini kataas. Sa kabilugan, ang gobierno sang Pransia nag-obligar sa mga Saksi ni Jehova nga magbayad sing 58 milyones ka euro (kapin sa $82,000,000 U.S.), nga mas mataas pa sangsa mga ginapanag-iyahan sang Asosasyon. Pagkatapos nga ginsuportahan halin sa pinakamanubo asta sa pinakamataas nga korte sang Pransia ini nga pagbuhis, nag-apelar kita sa ECHR sang Pebrero 2005.

Sang Hunyo 30, 2011, ang pito ka hukom nagsiling nga kon pasugtan ang ginapatuman sang Pransia, ang mga Saksi ni Jehova indi na makapakigbahin sa ila relihion sing hilway. Ginsakdag sang Korte nga ang proteksion nga ginahatag sang European Convention of Human Rights naaplikar sa mga Saksi ni Jehova. Ini nga kadalag-an mahimo man mangin basihan sa pagpakigbato sa kahilwayan sa pagsimba sa iban nga pungsod nga sakop sang ECHR pareho sang Armenia, Bulgaria, Georgia, kag Rusya. Talalupangdon man nga amo ini ang una nga tion nga napamatud-an nga nakasala ang gobierno sang Pransia bangod sa pagsupak sa kahilwayan sang relihion nga ginapatuman sang European Convention. Wala na mag-apelar ang gobierno sang Pransia.

Rusya Sang Hunyo 10, 2010, ang mga Saksi ni Jehova nakatigayon sing legal nga kadalag-an batok sa gobierno sang Rusya paagi sa ECHR sa kaso nga Jehovah’s Witnesses of Moscow v. Russia. Nangabay ang gobierno sang Rusya nga ipasaka ang kaso sa Grand Chamber sang Korte. Pero sang Disiembre 13, 2010, wala ginpasugtan sang Grand Chamber ang pangabay sang gobierno, gani ang desisyon sang Hunyo 10 indi na mabag-o. Ina nga desisyon nagasiling nga ang gobierno sang Rusya “may legal nga obligasyon . . . nga untaton na ang mga paglapas nga nakita sang Korte kag tadlungon ang mga resulta sini tubtob posible.” Pero, tubtob sa karon wala ini gintuman sang gobierno. Sa baylo, may bag-o naman sila nga paagi para halitan kag balabagan ang mga Saksi sa paghimo sang ila relihioso nga mga hilikuton sing hilway.

Halimbawa, sang kaagahon sang Agosto 25, 2011, ginsulod sang mga pulis ang 19 ka balay sang aton mga utod sa siudad sang Taganrog kag ginkompiskar ang mga literatura, kompyuter, kag rekord sang kongregasyon. Daw may kaangtanan ini sa desisyon nga ginpagua sang Russian Federation Supreme Court nga ang lokal nga organisasyon sa Taganrog dapat pauntaton kag ang 34 sang aton publikasyon ginkabig nga extremist. Suno sa mga desisyon sang mga korte sang Rusya, ginlista sang gobierno ang 63 sang aton publikasyon sa Federal List of Extremist Materials.

Dugang pa, ang aton mga kauturan nangin biktima sang indi magkubos 950 ka pagpangransak, pagpang-atake, pagpang-aresto, kag pagpanghunong sang mga pulis. Ang mga awtoridad sang Rusya nagpasaka sang 11 ka kaso sang krimen batok sa aton mga kauturan, kag madamo nga Kingdom Hall ang ginhalitan. Nagbutang pa gani sila sing mga surveillance camera sa balay sang isa ka pamilya kag gin-tap ang linya sang mga telepono kag ginmonitor ang e-mail sang iban pa agod makaimbento sing inugsumbong may kaangtanan sa anti-extremism law.

Ang isa sa mga gin-imbento nga sumbong amo ang akusasyon sa 35 anyos nga si Aleksandr Kalistratov sa siudad sang Gorno-Altaysk, nga “nagapalig-on sia sa pagdumot kag pagbinangigay sang relihion” sa idalom sang anti-extremism law. Ini nga kasuguan ginamulay sang mga nagapangapin sang kinamatarong sang tawo. Sa tion sang mga bista, sugod sang Oktubre 7, 2010 asta Marso 18, 2011, wala gid sing bisan isa sa 71 ka saksi sa korte nga gin-eksamin ang makapamatuod nga may krimen nga ginhimo—ukon gintinguhaan—si Aleksandr. Maukod nga gin-usisa sang korte ang mga literatura kag panudlo sang mga Saksi ni Jehova, kag sang Abril 14, 2011, ang hukom nagdesisyon nga wala sing sala si Aleksandr. Pero, nag-apelar ang pihak nga kampo, kag sang Mayo 26, 2011, ang Korte Suprema sang Altay Republic nagdesisyon nga ibalik ang kaso sa manubo nga korte agod repasuhon liwat sang bag-o nga hukom. Gani pagkatapos nga napamatud-an nga wala sing sala, si Utod Kalistratov magaatubang naman liwat sing mga pagbista nga mahimo magbag-o sa nauna nga desisyon.

Pero ina nga kaso sang ginakabig nga makatalagam nga hilikuton nagkuha sing atension sang publiko parte sa aton hilikuton sa magamay nga siudad sang Gorno-Altaysk. Sa sini nga mga kahimtangan, ano ginhimo sang mga Saksi diri nga yara man sa katalagman nga mapasakaan sing kaso?

“Sa sini nga mga tion, ang Biblia nangin mas bilidhon pa gid,” siling sang utod nga babayi nga si Inna. “Ang mga kauturan daw pamilya ko na, kag nangin mas suod pa gid ako kay Jehova!” Bisan pa gindumilian ang pila sang aton publikasyon, madamo nga pagtuon ang nasugdan paagi lamang sa Biblia. Ang kadamuon sang manugbantala sa Altay Republic nag-uswag sing 24 porsiento. Nadugangan sing 33 porsiento ang oras nga ginhinguyang sang mga Saksi sa ministeryo. Ang nagtambong sa Memoryal 16 porsiento nga mas mataas sangsa nagligad nga tuig kag ang kadamuon sini duha ka pilo sang mga manugbantala sa bug-os nga republika!

Sa karon, ang mga Saksi ni Jehova sa Rusya nagpadala sing 13 ka bag-o nga apelasyon sa ECHR batok sa gobierno sang Rusya. Ang isa sa sini amo ang nadesisyunan sang Korte Suprema sang Disiembre 8, 2009, kag ang iban pa amo ang desisyon sang Korte Suprema sang Altay Republic nga nagdeklarar nga extremist ang 18 naton ka publikasyon.

[Nota]

[Blurb sa pahina 14]

“Nasulat na sa mga Manalagna, ‘Kag sila tanan pagatudluan ni Jehova’”

[Blurb sa pahina 25]

“Indi matumbasan sang tinaga nga ‘salamat’ ang akon ginabatyag”

[Kahon sa pahina 12]

Kon Ano ang Ginsiling Nila Parte sa Pag-auxiliary Payunir:

• “Amo ini ang una nga tion nga nakaauxiliary payunir ako. Daku gid ang akon pasalamat sa sini nga kahigayunan!”

• “Madamo gid nga salamat sa sining bag-o nga kahimusan. Nagpahalipay gid ini sa amon.”

• “Indi gid ini malipatan nga hitabo sa amon kongregasyon.”

• “Bangod tuman kadamo ang nag-auxiliary payunir, nangin mahidaiton kag nahiusa pa gid ang amon kongregasyon.”

• “Lapit na lang gid ang Armagedon!”—Isa ka indi Saksi nga nakatalupangod sang pagpauswag sang aton hilikuton sang Abril.

[Kahon sa pahina 43]

“MAGASINGGIT SA KALIPAY”

ANG kalibutan sa idalom sang mapintas nga paggahom ni Satanas nagaeksperiensia sing nagadugang nga kailo. (Bug. 12:12) Sa kabaliskaran, ang mga alagad ni Jehova “magasinggit sa kalipay bangod sang maayo nga kahimtangan sang tagipusuon.” (Isa. 65:13, 14, NW) Wala untat nila nga ginaagda ang madamo nga tawo tubtob posible nga mag-alagad sa matuod nga Dios, nga nakahibalo nga “ang tanan nga nagadangop [kay Jehova] magakasadya; magahugyaw sila sa kalipay sa walay katubtuban.”—Sal. 5:11, NW.

[Tsart/Graphs sa pahina 26]

(Para sa aktual nga pormat, tan-awa ang publikasyon)

MATIGAYON SA 106 KA LENGUAHE

Kompleto nga New World Translation: 62

Afrikaans American Sign Language

Albanian Amharic

Arabic Azerbaijani

Armenian Azerbaijani (Cyrillic)

Bulgarian Brazilian Sign Language

Cebuano Cambodian

Chichewa Chitonga

Chinese (Simplified) Colombian Sign Language

Chinese (Traditional) Estonian

Cibemba Ewe

Croatian Fijian

Czech Gun

Danish Haitian Creole

Dutch Hiligaynon

Efik Hindi

English Hiri Motu

Finnish Italian Sign Language

French Kannada

Georgian Kazakh

German Kikaonde

Greek Kiribati

Hungarian Latvian

Igbo Lithuanian

Iloko Luganda

Indonesian Luvale

Italian Malayalam

Japanese Mexican Sign Language

Kinyarwanda Myanmar

Kirghiz Nepali

Kirundi Pangasinan

Korean Papiamento (Curaçao)

Lingala Punjabi

Macedonian Russian Sign Language

Malagasy Sango

Maltese Silozi

Norwegian Sranantongo

Ossetian Tamil

Polish Thai

Portuguese Tok Pisin

Romanian Tongan

Russian Tumbuka

Samoan Ukrainian

Sepedi Uzbek

Serbian Vietnamese

Serbian (Roman)

Sesotho

Shona

Sinhala

Slovak

Slovenian

Spanish

Swahili

Swedish

Tagalog

Tsonga

Tswana

Turkish

Twi (Akuapem)

Twi (Asante)

Xhosa

Yoruba

Zulu

[Graphs]

◀ 76% ◁ 24%

Sang 2011, halos 76 porsiento sang pumuluyo sa bug-os nga kalibutan ang may “New World Translation” (kompleto ukon sing bahin) sa ila kaugalingon nga lenguahe

110

100

90

80

70

60

50

40

30

20

10

0

1950 1955 1960 1965 1970 1975 1980 1985 1990 1995 2000 2005 2010

[Graph sa pahina 8]

(Para sa aktual nga pormat, tan-awa ang publikasyon)

Sa Bug-os Kalibutan, 2,657,377 ka Manugbantala ang Nag-auxiliary Payunir

2.5 (MILYON)

2.0

1.5

1.0

0.5

0

2008 2009 2010 2011

[Mapa sa pahina 35]

(Para sa aktual nga pormat, tan-awa ang publikasyon)

ESTADOS UNIDOS

PRANSIA

BULGARIA

TURKEY

ARMENIA

AZERBAIJAN

RUSYA

SOUTH KOREA

[Retrato sa pahina 6]

Sa ibabaw: Ginadala sang mga payunir kag manugbantala ang ila mga ginatun-an sa Biblia sa balay ni Jeannette para didto hiwaton ang pagtuon. (Tan-awa ang pahina 8-9)

[Retrato sa pahina 7]

Isa ka grupo sang regular kag auxiliary payunir nga magabantala sa Madrid, Spain

[Retrato sa pahina 10]

Si Toshi nga nagapanaksi sa isa ka kabulig sang nursing home

[Retrato sa pahina 11]

Si Alejandro kag ang iya amay sa Sant Celoni, Barcelona, Spain, sang katapusan nga adlaw sang bulan

[Retrato sa pahina 13]

Ang Watchtower Educational Center sa Patterson, New York, U.S.A.

[Retrato sa pahina 18]

Ang Kingdom Hall sa Rikuzentakata, Japan

[Retrato sa pahina 22]

Sa ibabaw: Mga boluntaryo nga nagapanghakot sang nabilin nga materyales sa balay sang utod sa Shibata, Miyagi

[Retrato sa pahina 22]

Sa wala: Miembro sang Komite sang Sanga nga nagapamulongpulong sa balay sang isa ka utod sa Rikuzentakata

[Retrato sa pahina 22]

Sa ubos: Paghanda sang panyaga para sa tumalambong sa adlaw sang pinasahi nga asembleya sa nahalitan nga lugar

[Retrato sa pahina 24]

Lithuanian kag Latvian nga mga badbad

[Mga Retrato sa pahina 31]

Maragtason nga tanda sang Yankee Stadium, New York, U.S.A.

[Retrato sa pahina 32]

Mga nagatrabaho sa konstruksion sa talatapan sang Burkina Faso

[Retrato sa pahina 32]

Talatapan sang Burkina Faso

[Retrato sa pahina 32]

Sanga sang Chile

[Mga Retrato sa pahina 33]

Bag-o nga mga pasilidad sang sanga sang Hong Kong

[Retrato sa pahina 34]

Ang European Court of Human Rights, Strasbourg, France

[Mga Retrato sa pahina 38]

Mga estudyante nga nagauyat sang ila report kard sa eskwelahan. Malipayon sila kay ginpasugtan sila nga indi na magsulod sa mga klase parte sa relihion

[Retrato sa pahina 41]

Mga Saksi nga nagabantala sa Gorno-Altaysk, Republic of Altay